Dzi taràù'n kur'la dziɲaan tsɛ
5
1 Mòò o moò ɲɛɛn à ra ci Yesù Ŋaablà Jaara Modzìàn, tɔ kere boo Ŋaablà re. Mòò o moò to dzin faà kɛ̀ɛn, tɔ dziàn sa kɛɛn. 2 Mìn ba Ŋaablà kɛniɔ̀n, mìn bà à dzugooma xɔù rèè shi jiɛ, m'a tɔ̀ tɔ̀ rii là, ci mùn y'a dzin nèè kɛ̀niɔ̀n. 3 Àwà, e Ŋaablà kɛn, tɔ̀ rii yɛ, a dzugooma xɔù rèè shi jiì, à dzugooma xɔù rèè to na seyn vuun waa. 4 È ɲɛn à tsɛ, mòò o moò kere boo Ŋaablà re, tɔ dzi tar'la dziɲaan tsɛ. Goo rìi to dzi tarau dziɲaan tsɛ, tɔ mùn ne ɲɛynaà nì. 5 Tsì rii dzi taraɔ̀ dziɲaan tsɛ ? Mòò riì ɲɛɔ̀n à ra, ci Yesù Ŋaablà Dzin Kpiri, tɔ tɔ̀ rii.Yùxanà nìi dèu Yesù Kirisà shɛɛrɛbee tsɛ
6 Àwà mòò riì nàu yuà ko tsìɛn baraka ɲan, tɔ Yesù Kirisà rìì. À na yuà bàsɔun waa, ŋà à yuà ko tsìɛn sa rii. Ŋaablà re Dzia tɔ̀ shɛɛrɛbe boò, kàtsu Ŋaabla re Dzia sààben. 7 È ɲɛn tɔ̀ tsɛ, tɔ̀ goò bàu shɛɛrɛ zhììgi: 8 nìi yɛ Ŋaablà re Dzia, yuà ko tsìɛn, è zhììgia sapɛ devuà yè bà soo. 9 Mìn ba e tsiɛ adamadzin mòdzin neè raa shɛɛrɛbee rà, Ŋaabla raa shɛɛrɛbee blà tɔ̀ mà. Ŋaablà raa shɛɛrɛbee rìì to yɛ, à shɛɛrɛbe riì boo e Dzin Kpir'la tsɛ. 10 Mòò riì ye ɲɛn Ŋaablà Dzin Kpir'la rà, tɔ̀ shɛɛrɛbee ni tɔ̀ tsìfa ɲan. Ŋà mòò riì ma ɲɛn Ŋaablà ra, tɔ Ŋaablà baà doodebaa, kàtsu è Dzin Kpir'la shɛɛrɛbe riì bou, à na ɲɛɔ̀n tɔ̀ ra waa. 11 Tɔ̀ shɛɛrɛbee rìì yɛ, ci Ŋaabla jaamabe dziù dòbɛɛ sìun mùn na, tɔ̀ jaamabee to ni à Dzin Kpir'la rìì ɲàn. 12 Ŋaablà Dzin Kpir'la ni mòò riì rè, jaamabee ni tɔ̀ re. Ŋà à na ni mòò riì rè, jaamabee na ni tɔ̀ re waa.
Yùxanà nìi dèu jaamabe dziù dòbɛɛ tsɛ
13 Ye nìì reè ɲɛun Ŋaablà Dzin Kpir'la tsoò rà, mun nèe sɛbɛn nee fa siɔ̀n ye ra, ye yè bà ni à tɔ̀ ci jaamabe dziu dòbɛɛ ni ye re. 14 Mùn si xɔ nìi tsɛ Ŋaablà kajaa tsɛ, tɔ̀ rii yɛ ci mùn ye gè gaa à re è kòrò à sàɔ ka, à mùn lamyɛɛ̀n. 15 Mùn ye ba à tɔ̀ ci à mùn lamyɛɛ̀n, mùn nà gè o ge gaa à re, mùn y'à tɔ̀ ci mùn nìi gaaŋ à re, mùn tɔ̀ tàrau.
16 Sɔn y'a jà wò neemaa sɔn gooɲaan faa, nìi na naà san ka mòò mà waa, è Ŋaablà mafyɛ̀n à re. Tɔ̀ tsuru, Ŋaabla nà jaamabee sìn tɔ̀ neemaa nà. Nìì reè gooɲaan faa, gooɲaan niì na naà san ka mòò mà waa, à twɛy rìì gooma dekɔɔn. Gooɲaan sɔn ni, tɔ nàa san ka mòò mà. N na dzin màfyɛyn yè fa tɔ̀ rii là waa. 17 Terenbɛy goo sapɛ gooɲaan, ŋà gooɲaan sapɛ na naà san ka mòò mà waa.
18 M'à tɔ̀ ci mòò riì kere boo Ŋaablà re, tɔ̀ na gooɲaan faa waa. È ɲɛn à tsɛ Dzin nìi kere boo Ŋaablà ɲan, tɔ y'a màraɔ̀, Sùtana na dzia e dzyɛn à ra waa.
19 Ɲe y'à tɔ̀ ci ɲe Ŋaablà raa, dziɲan ko e kur'la, tɔ̀ sapɛ ye bà ni Sùtana suun. 20 M'à tɔ̀ ci Ŋaablà Dzin Kpir'la nàu sa, è nà akiri sìn mùn na, mìn Ŋaablà takia tɔ̀. Mùn to ni Ŋaablà takia ɲàn, à Dzin Kpiri Yesù Kirisà baraka rɔ̀n. Wò rii Ŋaablà takia, ko jaamabe dziù dòbɛɛ. 21 Dziniin ì, ye e yɛrɛ kaawɔ ɲɔ̀n rèè rà.