Ŋaablà raa Dzia ko Kirisa ɲaàn raa
4
1 Àwà mun ne kɛ̀niunma rèè, e maà ɲɛn dzia sapɛ ra waa, ŋà ye è ɲansiin nì, ye bà ni à tɔ̀, yè ba boo Ŋaablà ɲan. È ɲɛn à tsɛ kɛɛra doobebaa giri boo dziɲaan doùn. 2 Ŋaablà raa Dzia tɔ̀ɔ nìi rà, tɔ̀ rii siin: dzi o dzi dziàn ci Yesù Kirisà nàu gɔɔ̀n ɲàn, tɔ boo Ŋaablà ɲan. 3 Dzi ge o ge to na dziàn ci Yesù nàu gɔɔ̀n ɲàn, tɔ̀ na Ŋaablà raa waa. Tɔ Kirisà ɲaàn raa dzia rìì, y'a myɛ̀un ci tɔ̀ niì nà nà, à to yè bà ni dziɲaan doùn dòònun nòn.4 Nìi ye, dziniin ì, ye bàu Ŋaablà raa, ye to dzi tarau è tsɛ nòn, è ɲɛn à tsɛ nìi ni ye ɲan, tɔ vùn dziɲaan raà mà. 5 Twɛy dziɲaan raa rìì. Tɔ̀ kamà yè bà goomaa dziɲaan goomau'n kur'la rà, dziɲaan to yè bà è lamyɛɛ̀n. 6 Nìi kpɛ̀yn ɲe, ɲe Ŋaablà raa ì. Mòò riì Ŋaablà tɔ, tɔ ɲe lamyɛɛ̀n. Ŋà mòò riì na à raa waa, tɔ̀ na ɲe lamyɛɛ̀n waa. Ɲe sààbeen dzia ko sànfir'la dzia tɔ̀ boò e si ɲan tɔ̀ rii tsuru.
Yùxanà nìi dèu kɛ̀nbààbee tsɛ
7 N ne kɛ̀niunma rèè, mùn yeè e si kɛ̀n, è ɲɛn à tsɛ kɛ̀nbààbee boo Ŋaablà rii lè. Kɛ̀nbààbee ni mòò riì ɲàn, tɔ kere boo Ŋaablà re, è bà Ŋaablà tɔ. 8 Kɛ̀nbààbe na ni mòò riì ɲàn, tɔ̀ na Ŋaablà tɔ waa, kàtsu Ŋaabla kɛ̀nbààbe rii. 9 Ŋaablà re kɛ̀nbààbee kpàdèu ɲe kàjaa tsɛ nìi tsuru, tɔ̀ rii siin: è Dzin Kpiri soo bàji nau dziɲantsiɛ doùn, gè riì ni à to tɔ̀ baraka ɲan, mìn jaamabee fa. 10 Kɛ̀nbààbee rìì siin nèe: À na ni a ci ɲe rìì Ŋaablà kɛniun dɛ, ŋà wò rii ɲe kɛ̀niun, nìi yɛ è Dzin Kpir'la sìun saaka, è bà ni ɲe re gooɲaantsiɛ mɛɛy bo ɲe vu ra.
11 Mun ne kɛ̀niunma rèè, Ŋaablà ye ba mùn kɛ̀niun tɔ̀ tsuru, à wù mùn sa yeè e si kɛ̀n ! 12 Mòò pɛn jaa na ɲɛn ja Ŋaablà ma ŋe waa. Mìn ba e si kɛ̀niɔ̀n, tɔ̀ y'a kpàdèe ci Ŋaabla ni mùn ɲan, à re kɛ̀nbààbee dzii to tsyɛɔ̀n mùn ɲan.
13 M'à tɔ̀ nìi rà ci à ni mùn ɲan, mùn sa yeè bà ni à ɲan, tɔ̀ rii yɛ, è re Dzia sɔn siun mùn na. 14 Nìi ɲe, ɲe y'à jàu, ɲe to y'à shɛɛrɛbe faa, ci Fà Ŋaablà yeè e Dzin Kpir'la ka nau, è nà bà dziɲantsiɛ Tsibaa. 15 Mòo o moò dziàn ci Yesù Ŋaablà Dzin Kpiri, Ŋaabla ni tɔ̀ ɲan, à sa yeè bà ni Ŋaablà ɲan. 16 Nìi ɲe, kɛ̀nbààbe riì ni Ŋaablà ɲan ɲe kàjaa tsɛ, ɲe tɔ̀ tɔ̀, ɲe to yè bà ɲɛɔn à ra. Ŋaabla kɛ̀nbààbe rii. Kɛ̀nbààbe ni mòò riì ɲàn, tɔ ni Ŋaablà ɲan, Ŋaablà sa yeè bà ni à ɲan. 17 Nìi kɛ̀nbààbee bàa goo dzii tsyɛunma ɲe ɲan, tɔ̀ rii yɛ ci kitsia sii sèè, ɲe akiri tsùuŋmà nà bà ni, è ɲɛn à tsɛ, Yesù ni nìi tsuru, ɲe sa ni tɔ̀ rii tsuru dziɲan ree doùn. 18 Shiɲaanbe na ni kɛ̀nbààbee ɲàn waa. Ŋà kɛ̀nbààbee dzii tsyɛunmaà, tɔ shiɲaanbeè kaà rìì, kàtsu, shiɲaanbeè ye ba ni, tɔ byɛnbe kpadèe. Mòò riì shia, tɔ̀ dzii na tsyɛɔ̀n kɛ̀nbààbee ɲàn waa. 19 Nìi kpɛ̀yn ɲe, ɲe kɛ̀nbààbee shi jiɛ, kàtsu, wò rii jɔ̀na ɲe kɛ̀niun. 20 Mòò ye dzin ci wo Ŋaablà kɛniɔ̀n, tɔ̀ to y'à tàrà è neemasia kpɛynbee, à doodebaa. È ɲɛn à tsɛ, è neemasi riì jàa à na tɔ̀ kɛ̀niɔ̀n waa, à na Ŋaablà riì jàa, à dzia tɔ̀ kɛ̀n dzùrù ? 21 Mùn dzugooma xɔù rìi tàrau è bo Kirisà rè, tɔ̀ rii siin: mòò riì ye Ŋaablà kɛn, è neemasia sa kɛn.