Nìì reè kiriɔ Ŋaablà dzin
3
1 À siin, Fà Ŋaabla ɲe kɛ̀niun, kɛ̀nìùn' n kur'liì rà, è bè wɔ fɔ ɲe yè kiri à dzin ì ! Ɲe to tɔ̀ rii. Tɔ̀ rii kamà dziɲaan na ɲe tɔ̀ waa, kàtsu dziɲaan na à tsu tɔ waa. 2 Mun ne kɛ̀niunma rèè, ɲe kpɛ̀yn Ŋaablà dzin ì dòònun, ŋà ɲe nà nà bà nìi, tɔ̀ na kpadè ŋe waa. M'à tɔ̀ ci Kirisà ye na e kpadè, ɲe nà bà à bosi ì, kàtsu, ɲe nà à jà a ci à ni nìi tsuru. 3 Mòò o moò si xɔ à tsɛ, è ɲɛn tɔ̀ tsɛ, tɔ̀ yeè e yɛrɛ fɛnɛbeè a ci à sa fɛnɛ nìi tsuru. 4 Mòò o moò gooɲaan faa, tɔ̀ na goo tereonma faa waa, kàtsu gooɲaan nì yɛ, goo teren bɛɛ. 5 Y'a tɔ̀ ci Yesù nàu, è bà ni mòdzian rè gooɲaantsiɛ mɛɛy bo è vu ra, nìi to y'à yɛ̀r'la, gooɲaantsii na ni à vu ra waa. 6 Mòò o moò ni à ɲan, tɔ̀ na gooɲaan faa waa. Mòò o moò to gooɲaan faa, tɔ̀ na à jàunà, à to na à tɔ̀. 7 N ne dziniin ì, e maà à to mòò pɛn yè e san fìrì. Mòò riì terenbee goo rèè shi jiɛ, tɔ tereòn a ci Kirisà sa tereòn nìi tsuru. 8 Mòò riì gooɲaan faa, tɔ Sànwɔbaà raa rìì, è ɲɛn à tsɛ fɔ dan, Sànwɔbaà ni gooɲaan faa rà. Ŋaablà Dzin Kpir'la to nàu nì, è Sànwɔbaà faadzii reè bara.9 Mòò o mòò kere bou Ŋaablà re, tɔ̀ na gooɲaan faa waa, kàtsu Ŋaablà re gètsua ni à ɲan. À na dzia gooɲaan fa waa kàtsu à kere boo Ŋaablà re. 10 Nèe kàjaa ree rìì y'à toò Ŋaablà dzin nèè ko Sànwɔbaà dzin nèè yè tɔ̀ bo e si ɲan: mòò o moò na terenbee shi jiɛ, ko mòò o moò na e neemasia kɛ̀ɛn waa, tɔ̀ na Ŋaablà raa waa. 11 È ɲɛn à tsɛ ye nìi myɛ̀un fɔ dan, tɔ̀ rii yɛ ci mìn si kɛ̀n. 12 N mà bà a ci Kayinìn tsuru waa, tɔ̀ niì bàu ɲan Sùtan'naa, è tseyn kpir'la vu. Feera à y'à vu ? Kàtsu à faadziɛ na ɲaan, tseyn kpirimaa raà yè bà na tereòn.
Yuxanà nìi dèu kɛ̀nbààbee tsɛ
13 Neema ì, dziɲaan ye ba e kpɛynbee, tɔ mà ji e dzii tsɛ waa. 14 Ɲe y'à tɔ̀ ci ɲe bou saàn ɲàn, ɲe yè dɔ̀n jaamabee ɲàn, è ɲɛn à tsɛ, ɲe yè e neema reè kɛ̀niɔ̀n. Mòò riì na e neemaa kɛ̀niɔ̀n waa, tɔ ni saàn ɲàn. 15 Mòò o moò yè e neemaa kpɛynbee, tɔ mòdzìn vubaa, ye to y'à tɔ̀ ci jaamabe dziù dòbɛɛ na dzia bà ni mòdzìn vubaa pɛn ɲan. 16 Ɲe kɛ̀nbààbee tɔ̀ è ɲɛn nìi tsɛ, tɔ̀ rii siin: Kirisà yè e xɔɔn sìun ɲe kamà. Tà doùn, ɲe sa wù ɲe yè e xɔɔn sìn neema reè kamà. 17 Dziɲan nafor'la ni mòò riì suun, tɔ̀ yeè e neemasia byɛunma jà, à to na matsuru à ra waa, Ŋaablà kɛnbààbe ni tɔ̀ ɲan dzùrù? 18 Dziniin ì, n mà kɛ̀nbààbee fa dziira goòmàà ko nɛɛ̀n bàsɔùn ka waa, ŋà faadziɛ ko sààbeen.
19 Mùn nà à tɔ̀ tɔ̀ rii tsuru ci mùn ni sààbeen tsɛ, mùn akiri to nà bà tsùuŋà à bììn. 20 È ɲɛn à tsɛ, mùn dùsùkuan ye ba mùn jààkia, Ŋaabla blà mùn dùsùkuan mà, à to goo sapɛ tɔ. 21 Mun ne kɛ̀niunma rèè, mùn dùsùkuan ma ba mùn jààkia fyeu, mùn akiri tsùuŋma bàa ni Ŋaablà biìn. 22 Tà tsuru mìn gè o ge gaa à re, mùn tɔ̀ tàr'la, kàtsu mùn y'a dzugooma xɔù rèè màraɔ̀, mìn bà à dzibee goo reè faa. 23 À dzugooma xɔɔ̀ rìì yɛ, mùn ye ɲɛn Yesù Kirisà tsoò rà, à Dzin Kpir'la, tà ko mùn yeè e si kɛ̀n a ci à y'à dèu mùn na nìi tsuru. 24 Mòò riì y'à dzugooma xɔù rèè màr'la, tɔ̀ ni à ɲan, è bà ni tɔ̀ ɲan. M'à tɔ̀ nìi rà ci à ni mùn ɲan, tɔ̀ rii yɛ, è re Dzi riì sìun mùn na.