Yùxanà nìi dèu Ŋaablà re goomaa màr'là tsɛ
2
1 N ne dziniin ì, mun nèe sɛbɛn nee fa siàn ye ra, gè riì ni à to ye mà gooɲaan fa waa. Sɔn to ye gooɲaan fa, dzwɛ̀mabaa ni mùn ne Fà Ŋaablà tɛyn, nìi Yesù Kirisà, tɔ̀ niì tereòn. 2 Wò rii bàu saaka, è mùn ne gooɲaantsiɛ mɛɛy bo mùn vu ra, à to na ɲe bàsɔùn waa, à dziɲantsiɛ sapɛ rii. 3 Mìn ba à dzugooma xɔù rèè màr'la, m'a tɔ̀ tɔ̀ rii ɲàn, ci mùn y'a tɔ̀. 4 Mòò riì ci wò y'a tɔ̀, à to na à dzugooma xɔù rèè màr'la waa, tɔ doodebaa, sààbeen to na ni à ɲan waa. 5 Ŋà mòò riì y'à re goomaa màr'la, à re kɛ̀nbààbee dziitsyɛunmaà ni tɔ̀ ɲan taki. M'à tɔ̀ tɔ̀ rii ɲàn, ci mùn ni à ɲan. 6 Mòò riì ci wo ni Kirisà ɲàn, à wù à sa yeè jìì, a ci Kirisà jìiŋ nìi tsuru.Yuxanà nìi dèu Ŋaablà dzugooma xɔù yeo tsɛ
7 N ne kɛ̀niunma rèè, mun na dzugooma xɔù yeu sɛbɛn siàn ye ra waa, ŋà à bɔrɔɔ rii, nìi na ni ye re fɔ dan. Tɔ̀ dzugooma xɔù bɔrɔɔ, tɔ̀ rii yɛ, ye gooma niì myɛ̀un. 8 Kàjaa sɔn tsɛ, à dzugooma xɔù yeu rii, mun nìi sɛbɛn siàn ye ra, è bà sààbèn goo Kirisà ko ye sa ɲan. È ɲɛn à tsɛ tsitsiɛ̀ dɔ̀n boò, vyevyee taki takìà yè bà deèn nòn.
9 Mòò riì ci wo ni vyevyeè ɲàn, tɔ̀ to y'à tàrà è neemaa kpɛynbee, tɔ ni tsitsiɛ̀ ɲàn arì she. 10 Mòò riì yè e neemaa kɛ̀niɔ̀n, tɔ ni vyevyeè ɲàn, goo sɔn pɛn to na ni à ɲan, nìi nà à neemaa sàn nà ban è mɛɛy waa. 11 Ŋà mòò riì yè e neemaa kpɛynbee, tɔ jìɛ tsitsiɛ̀ ɲàn, à to na e bema tɔ̀ waa, è ɲɛn à tsɛ, tsitsiɛ̀ y'à baɔ̀ jaana. 12 Dziniin ì, mun nèe sɛbɛn nee sìan ye ra, kàtsu ye re gooɲaantsiɛ mɛɛy bou ye vu ra Yesù tsoò baraka rɔ̀n. 13 Fa ì, mun nèe sɛbɛn nee sìan ye ra, kàtsu mòò riì ni fɔ dan, ye tɔ̀ tɔ̀. Dzunwɛyn neè, mun nèe sɛbɛn nee sìan ye ra, kàtsu ye dzi tarau gè ɲaan tsɛ. 14 Ɔ̀ɔn dziniin ì, mun nèe sɛbɛn nee sìun ye ra, kàtsu ye Fà Ŋaablà tɔ. Ɔ̀ɔn fa ì, mun nèe sɛbɛn nee sìun ye ra, kàtsu mòò riì ni fɔ dan, ye tɔ̀ tɔ̀. Ɔ̀ɔn dzunwɛyn neè, mun nèe sɛbɛn nee sìun ye ra, kàtsu fàan ni ye ɲan, Ŋaablà re Goomaa ni tsuù ye ɲan, ye yè bà dzi tarau gè ɲaan tsɛ.
Yuxanà ci mùn mà dziɲaan kɛ̀n waa
15 E maà dziɲaan kɛ̀n, e to mà à doun ge reè tsu kɛn. Mòò riì dziɲaan kɛ̀niɔ̀n, Fà Ŋaablà kɛnbààbe na ni tɔ̀ ɲan waa. 16 È ɲɛn à tsɛ goo nìì reè ni dziɲaan doùn, tɔ̀ rii gɔɔ̀n kur'la goo reè, jaadzian kur'la goo reè, ko dziɲaan yɛ̀rɛ̀blàbè goo reè è ɲɛn tàr'là tsɛ. Tɔ̀ pɛn na boo Fà Ŋaablà re, à sapɛ dziɲaan doùn goo. 17 Tɔ̀ to y'à tàrà dziɲaan dɔ̀n boò, ko à kur'la goo reè sa. Ŋà mòò riì Ŋaablà saɔ faa, dò na ni tɔ̀ mà waa.
Yùxanà nìi dèu Kirisà ɲaàn tsɛ
18 Àwà dziniin ì, watsi lataan wɔu. Y'a myɛun ci Kirisà ɲaàn nà nà, ŋà dòònun, Kirisà ɲan giri ni nòn. M'à tɔ̀ɔ tɔ̀ ra, ci watsi lataan wɔu. 19 È bou ɲe fi, ŋà è naà ɲe kuru waa. Yè ba na ɲe kuru, è na nà to ɲe ka. Ŋà à faumaà tà tsuru, à kpàdè fyɛu, ci è pɛn na ɲe kuru waa. 20 Ŋà nìi ye, ye Ŋaablà fɛnɛɛ rè Dzi fɛnɛɛ tàrau, twɛ̀ɛ yè bà ni ye sapɛ ɲan. 21 Mun na nèe sɛbɛn nee sìn ye ra ci ye na sààbeen tɔ̀ dɛ, ŋà m'a sìun ye ra ci y'a tɔ̀ rii, ci doò pɛn to na dzia bo sààbeen ɲàn waa. 22 Tsì rii doodebaà ? Tɔ̀ rii yɛ, mòò riì ci Yesù na Ŋaablà jaara modzìàn waa. Ɔ̀ɔn, Kirisà ɲaàn nì yɛ, mòò riì yè e nɔɔn Fà Ŋaablà ko e Dzin Kpir'la sa re. 23 Mòò riì yè e nɔɔn Dzin Kpirimaa rè, tɔ̀ na Fàmaa tsu taraɔ̀ waa. Mòò riì to yè e tsiɛ Dzin Kpirimaa nà, tɔ Fàmaa sa taraɔ̀.
24 Nìi ye, e nìi myɛ̀un fɔ à dziikunma nɔ̀n, tɔ̀ yeè to e ɲan. Ye nìi myɛ̀un fɔ à dziikunma nɔ̀n, tɔ̀ ye to ye ɲan, ye sa nà to Dzin Kpir'la ko Fàà sa ɲan. 25 À nìi làyiri seòn mùn ne, tɔ̀ rii yɛ jaamabe dziù dòbɛɛ. 26 Nìì reè y'à gaa ye yè ye sànfìrì, mun nèe sɛbɛn siun ye ra ye rìì kamà. 27 Àwà nìi ye, ye Dzi niì tàrau è bo Kirisà rè, tɔ ni tsuù ye ɲan, à na wɔɔ̀ mòò yè ye kàràn dɛ. À na wɔɔ̀ mòò yè ye kàràn dɛ, è ɲɛn à tsɛ ye tɔ̀ Dzi riì tàrau, tɔ̀ ye kàr'na goò sapɛ ra. À re kàr'nà sààben, à na doò waa. Tà doùn ye to tsùù à ɲan, a ci à y'à kàraun ye ra nìi tsuru.