Yùxanà
rè sɛbɛn jɔna faumaà
Yùxanà rè shɛɛrɛbee Ŋaablà re Goomaa tsɛ, Jaamabee Goomaa
1
1 Àwà fɔ dan dan, nìi na ni, tɔ̀ yeè bà Jaamabee Goomaa, ɲe tɔ̀ gooma myɛun, ɲe y'à jà e jaa ra, ɲe y'à lafyɛ, ɲe ye e si dzyɛn à ra. 2 Ɔ̀ɔn jaamabee yè e kpadèu, ɲe to y'à jàu, ɲe y'à shɛɛrɛbe fa. À jaamabe dziù dòbɛɛ rìì gooma dekɔɔn ye ra, tɔ̀ niì na ni Fà Ŋaablà tɛyn è bà e yɛrɛ kpadèu ɲe ra. 3 Ɲe nìi jàu, tà ko ɲe y'à myɛ̀n, ɲe tɔ̀ gooma deè ye sa ra gè riì ni à to ye yè bà ni ɲe re dzyèè doùn, tɔ̀ dzyèè rìi, ɲe ko Fà Ŋaabla ni à ra ko à Dzin Kpiri Yesù Kirisà. 4 Ɲe twɛy goo rèè sɛbɛn siàn ye ra, gè riì ni à to mùn ne taamadzibeè yè bà taamadzibe dziitsyɛunma.Yuxanà ci Ŋaabla vyevyee rìì
5 Ɲe gooma niì myɛ̀un à re, ɲe yè bà à dèe ye ra, tɔ̀ rii yɛ ci Ŋaabla vyevyee rìì, tsitsiì pɛn na ni à ɲan waa. 6 Mìn ba ci mùn ni dzyèè rà ko a ka, mùn to jìɛ tsitsiɛ̀ ɲàn, mùn doò dèe, mùn na ni sààben tsɛ waa. 7 Ŋà mìn ba jìɛ vyevyeè ɲàn a ci à sa ni vyevyeè ɲàn nìi tsuru, mùn bàa e si dzyèèsi ì, a Dzin Kpiri Yesù tsìɛn yè bà mùn fòò boò e re gooɲaantsiɛ ɲàn.
8 Mìn dzin ci gooɲaantsii na ni mùn vu ra, mìn yɛrɛ maniɛ̀n, sààben to na ni mùn ɲan waa. 9 Mìn ba e tsiɛ à ra ci gooɲaantsiɛ ni mùn vu ra, à vusootsi è bà tereòn. À nà e yɛrɛ to mùn ne, è mùn fòò bo e re teren bɛy goo sapɛ ɲan. 10 Ŋà mìn dzin ci gooɲaantsii na ni mùn vu ra, mùn y'a bàa doodebaa, à re goomaa to na ni mùn ɲan waa.