Piyɛrì nìi dèu Tsìfaà nà jisee tsɛ
3
1 Àwà mun ne kɛniunma rèè, nèe mun ne sɛbɛn fiiraa rìì nòn, mun nìi kaà ye re. È fiɛ̀ sa doùn, mun ye taa toò goo rèè swey rìì lè, ye yè bà ni e kɛsɛu'n kuru wuu fa. 2 Kɛɛra fɛnɛ reè gooma niì reè dè dɔ̀un, tà ko mùn Tsìfaà ko mùn Tsibaà dzugooma xɔù nìi dèu ye ra è bo kɛɛradzin neè dzu, ye taa yeè to twɛy rè. 3 Soore, ye bà à tɔ̀ ci watsi latan neè ɲàn, ɲànŋwɛ̀ynfabaa ì nà nà, ɲànŋwɛ̀yn goo reè ni ji nìì reè ɲàn, è yɛ̀r'leè kur'la goo ɲaan neè yè bà è kuru kuɔn. 4 È nà dzin ci: «À nà goo làyir'lìi seun, tɔ ni min na ? È ɲɛn à tsɛ, fɔ mùn fàbɔɔ rèè sa yeè bè san, goò sapɛ ni e niu'n kur'la fɔ dziɲaan jɔ̀n bwèy. 5 Twɛy mòdzin neè yè e tsoò yè e taamyɛn ci Ŋaablà re Goomaa baraka ɲan, jìrànxɔɔ̀ bàu ni dan. Dzɔ̀nxɔɔ̀ bou yuà ɲàn, è bà ni yuà fi. 6 Tɔ̀ fau'n kuru soo rà, yuà dan dziɲaan sa ɲɔun, è fìrì peu. 7 Àwà tɔ̀ Gooma soo baraka ɲan, dòònun dzɔ̀nxɔɔ̀ ko jìrànxɔɔ̀ sa màrà tsùuŋnà sàà rìì lè. Ɔ̀ɔn, è màrà tsùuŋnà kitsia jisee kamà, nìì reè na shia Ŋaablà jɔɔn waa, twɛy bara sii sèè.8 Ŋà n ne kɛ̀nìunma rèè, goo soo ni e maà e taamyɛn nìi rè waa. Tsìfaà rè, bwèy sɔn ni a ci jii gbaa soo, jii gbaa soo yeè bà ni a ci bwèy sɔn. 9 Tsìfaà yè e re làyir'là bo e shi tsɛ, à na ciɔ̀n tɔ̀ faa ka a ci swey y'à kɛ̀sɛɛ̀ nìi tsuru waa. Ŋà è mɔɲɔɔ̀n ye kàjaa tsɛ rìì kàtsu à sàò na ni mòò pɛn yè bara waa, ŋà mòdzian sapɛ yeè nimisa rìì, yè e re jaamabee fau'n kur'la lakere. 10 Tsìfaà nà jisee nà bàrà mòdzian ɲàn, a ci shɔn bàr'la mòò ɲàn nìi tsuru. Tɔ̀ sii sèè, jìrànxɔɔ̀ nà dɔ̀n bo peu, baragoò màànkan bla ka. Sàà nà jìrànxɔ̀ ge reè kun è jɛ̀rɛ̀n, dzɔ̀nxɔɔ̀ ko e tsɛ gè rèè sa yeè dzu yè dò. 11 Twɛy gè rèè sa to ye ba nà jɛ̀rɛ̀n tà tsuru, ye wù ye yè bà mòdzìn kaatsi kɛ̀n ? À wù ye yè e re jaamabee fa fɛnɛbe tsɛ, Ŋaablà jɔɔn shiɲaanbe yè bà ni ye ɲan. 12 Ye yè Ŋaablà na jisee màshu, y'a jisee ɲantabe. Tɔ̀ sii sèè, sàà nà jìrànxɔɔ̀ kun à y'à jɛ̀rɛ̀n, ko à doùn ge reè sa. 13 Ŋà è kòrò à re làyiri seunmaà ka, mùn jìrànxɔ̀ ye ko dzɔ̀nxɔ̀ ye rii màshua, terenbee ni min niì.
Piyɛrì ci ɲɛynamoo rèè yè Tsìfaà nà jisee màshu nìi tsuru
14 Tɔ̀ kamà, n ne kɛ̀niunma rèè, à yè e to tɔ̀ màshua rà, ye maxɔbe fyɛ mà jà e ra, jààkima mà jà e ra, jaancin yè bà ni e ko Ŋaablà fi. 15 Àwà ye bà à tɔ̀ rii, ci mùn Tsìfaà rè mɔ̀ɲɔɔn, tɔ̀ rii yɛ ye yè tsi a ci mùn neema kpiri kɛniunma Pɔlì sa y'a dèu ye ra nìi tsuru e re sɛbɛɛn doùn, è kòrò Ŋaablà re akiritsifabe siunmaà ka à ra. 16 À goomaɔ̀ twɛy goo rèè tsɛ e re sɛbɛn neè gè o ge doùn, à tɔ̀ soo rìì dèe. À gooma reè swey fàànmun ɲan, mòdzin faànmùyà bɛy, san gban bɛy reè yè bà è dzuɔn laker'la a ci y'à faa nìi tsuru Ŋaablà re Goomaa kàjàà dzyee reè ka. È tɔ̀ faa e yɛr'la bar'li kamà.