Piyɛrì nìi dèu kààmoo doo de reè tsɛ
2
1 Àwà kɛɛra doo de reè fùu Ŋaablà re mòò rèè fi nìì tsuru dan, tɔ̀ soo tsuru, kààmoo doo de reè sa nà fù ye fi, nìì reè nà karan ì dɔ̀n ye sàn dzuun, nìi reè doò, yè bà baragoò faa. À nà bè wɔ fɔ yè e nɔn Kùntsiɛ̀ rè, tɔ̀ niì yè è kùngɔ màbou, è to nà e bar'la jaa ka e yɛr'la tabe. 2 Mòò giri nà e gban è kpɛyn e re seebɛybe goo reè doùn. È kamà, Ŋaablà re sààbèn shià tsoo nà bara. 3 È re ɲɛyngoo ɲanbee kamà, è nà ye bà durukun, e re doo kar'neè ka. Fɔ watsi gbaan è kitsia ni sààn, è bar'la dàn to na gbàn dɛ.4 Àwà, mɛ̀rɛ̀kɛ nìì reè gooɲaan fau, Ŋaablà na twɛy to mɔn waa. À jɔ̀rɔ̀kɔ wɔu è ra, à yè è ji tsitsiì brìsià ɲàn jààndamaan doùn, è ni min niì, yè bà kitsia jisee màshua. 5 Nìi dan dziɲaan mòdzin neè, Nuùn bwèy mòdzin neè, à na twɛy tsu to mɔn waa. Twɛy nìi reè na shia Ŋaablà jɔɔn waa, à ŋaa brìsià bàji nau è tsɛ. Nuùn nìi na terenbee gbango faa, è tɔ̀ ko e re mòò rèè rìì bàsɔùn tsi, è mòkun ŋaalon. 6 È kitsi mɛɛy Sodomùn ko Gɔmɔrɔ̀ wɔ̀ɔ̀ndzin neè tsɛ, nìi yɛ è dzu kpaan peu, è bà shi. Nìì reè na shia Ŋaablà jɔɔn waa, è bà ni à kpàdè twɛy watsi nakɔɔn mòdzin neè rà, nìi nà è tàrà. 7 Ŋà Lotsì, è tɔ̀ tsi kàtsu tɔ̀ na mòdzin tereunma, twɛy gooɲaan fa reè rè seebɛy goo reè yè bà na à xɔn biiŋnà fɔ è bè geren. 8 È ɲɛn à tsɛ, è tɔ̀ tereunmaà to è fi, à na nìi jàa tà ko à nìi myɛ̀ɛn è ɲɛn è re ɲaan fakɔɔn tsɛ, jisee sapɛ, tɔ̀ na à xɔn tɔɔrɔɔ̀ fɔ è bè geren. 9 Tɔ̀ y'a kpàdèe ci nìì reè shia Ŋaablà jɔɔn, Tsìfaà twɛy tsiu'n kuru tɔ e byɛɛn goo rèè rà, è bà teren bɛy reè to tsùuŋnà, è bà ni è byɛn kitsia jisee sii sèè. 10 Gooma na ni nìì reè vwɛ̀ɛ gɔɔn raa goo rèè kpɛyn è ɲɛn è kur'la goo nooŋma rèè tsɛ, yè bà Tsìfaà rèè kùntsììbee ɲanfyɛnbee. È kù'un xɔ, è blà e yɛr'le, è to yè bà ni jìrànxɔɔ̀ nɔɔrɔ ge reè tsoo bara, tɔ̀ shiɲaanbe na ni è ra. 11 Tɔ̀ to y'à tàrà, arì mɛ̀rɛ̀kɛ nìì reè fàan ko è re dzibaabee blà twɛy mòdzin neè raà mà, twɛy tsu na tɔ̀ tsuru tsoo bara goòma ì ka kitsi kun'na è tsɛ Tsìfaà jaa dzuun waa. 12 È modzin neè ni a ci dzwɛkà akiri bɛy ì, nìì re kere kùn yɛ, yè kun yè vu. È na nìi tɔ̀ waa, è tɔ̀ rii tsoo bar'la. È sa nà fyee, a ci dzwɛkà rèè fyeè nìi tsuru. 13 È ni terenbɛybe rìi rà, tɔ̀ terenbɛybe soo rìì nà ka è sàrà. È dzibee goo rìì yɛ, yè e yɛrɛ sin seebɛybe goo reè rà bwèytaaru'un fàxe rɔ̀n. È mòdzin nooŋma seebɛy ì. Yè ba ni ɲwɛyn bla ɲɔɔn nà ye ka watsi riì bwèy, yè e re sàn fìrì goo reè dzibe boò tɔ̀ bwey. 14 È jaà tsyɛɔ̀n ɲànmɔ̀ɔ̀beè rìì là, è to na cɛn jàa gooɲaan faa rà. Nìì reè sàn na gbaɔn waa, è twɛy màniɛ̀n, gè ɲɛyn goo to na ɲan è mà. È mòdzin dangauma ì. 15 È shi tereunmaà bàjiu, yè gban Bòzɔrì dzin kpiri Bàlaamù naa shia kpɛyn, terenbɛybee sàr'là dzibeu tɔ̀ niì rà. 16 Ŋà à re fìr'là dèu à ra. Ɔ̀ɔn, shùkwɛ̀yna, dzwɛkà rìi na goomaa waa, tɔ goomau a ci mòdzin, è tɔ̀ kɛɛraa bo e re akiri bɛy shia tsɛ. 17 Twɛy mòdzin neè ni a ci donkungɔ yu bɛy. È ni a ci ŋaatsi, fyɛn bla nìi sen dɔn bèe. Tsitsiì tsìù bian nì màrà tsùuŋnà è tɛyn. 18 Gooma bla blaa ni è dzu, dzin to na ni à doùn. Tà tsuru, mòdzin niì reè ni fìr'là gè doùn, nìì reè yè e tsiɔ twɛy rà yeu, è twɛy màniɛ̀n gɔɔ̀n kur'la goo seebɛyma reè ka, yè è kùnàban. 19 È dzian è ra ci ye nà è bo jònbee ɲàn, tɔ̀ to y'à tàrà, è sa goo fyeeŋmaà rè jòn. È ɲɛn à tsɛ goo rìi dzi taraɔ̀ a tsɛ, a tɔ̀ re jòn. 20 Àwà, nìì reè tsi boò dziɲau'n goo nooŋma rèè ɲàn mùn Tsìfà ko Tsibaa Yesù Kirisà tɔ̀umaà baraka rɔ̀n, twɛy y'a to twɛy goo rèè yè dzi tarà è tsɛ kpɛrɛ, è re goo rèè lataan ɲanbee rìì, è geren jɔ̀naà tsɛ. 21 È ma ba na shi tereunmaà tɔ̀u fyeu, tɔ̀ na fyan è mà sani y'à tɔ̀, yè sèè bo Ŋaablà dzugooma xɔù fɛnɛɛ kpɛyn, tɔ̀ niì sìun è ra. 22 Tɔ̀ rii yɛ a ci nèe tàlen nèe rèè, nìi sààben: «Vìà sèeŋ e yɛr'la sòngoò kpɛyn.» «Bɛ̀ɛ fòoŋma shɔ̀ùn, è bè e muù bɛr'lɔn kɔn.»