Goo nìì reè fau Azhi mar'la ɲàn
19
1 Àyìwà, è Apolɔsì to Korɛntsì wɔ̀ rɔ̀n, Pɔlì, tɔ̀ yeè Azhi mar'la jèn gane reè fi shɛn dɔ̀n, è dɔ̀n be Efɛzhì. Tɔ̀un, è bè kàràndzin danman ja mɔn.
2 È twɛy kàràndzin neè tey ci: «Ye ɲɛun Yesù rà gbaa nìi bwèy, ye yè bà à re kàràndzin ɔn, Ŋaablà re Dzi Fɛnɛɛ jàaŋ ye tsɛ ɔ ?»
Twɛy yè dzin à ra ci: «Ɲe yɛ̀rɛ̀ na à myɛ̀n jà e tor'la ŋe tsu, ci Ŋaablà re Dzi ni waa.»
3 Pɔlì yè è tey kɔn ci: «Tà doùn, ye raa jaara foo bàu jaara foo kaatsi kɛ̀n ?»
Yè dzin à ra ci: «Ɲe mòdzìn jààràfoobaà Yùxanà raa jaara foo rìì fau.»
4 Pɔlì yè dzin è ra tɔ̀un ci: «À sààben, nìì reè sàò na ni yè e re jaamabee fau'n kur'la lakere, Yùxanà na twɛy jaa ra foo, è bà na dziàn Isirayɛlì mòdzin neè rà sa, ci mòò riì nà nà wò shɔ̀ùn, tɔ̀ yeè bà Yesù, ci yè ɲɛn tɔ̀ ra.»
5 Efɛzhì kàràndzin neè toro jiu tɔ̀ goomaa ɲàn, y'à to yè è jaara foò Ŋaablà re shia goo rèè rà Tsìfa Yesù tsoò ka.
6 Pɔlì yè e si rèè tsùù tsùù be è tsɛ tɔ̀un, Ŋaablà re Dzi Fɛnɛɛ yè jàà è tsɛ. Tɔ fau min niì, yè e maa yè goomaa kun kpɛrɛ goòmà ì ɲàn, Ŋaablà to gooma niì reè wɔɔ̀ è dzu, yè twɛy dèe.
7 È na mòkun teeŋ fii tsuru boò.
8 Tà doùn, è bè tàrà fɔ kuu zhììgi, Pɔlì bèe waajibi fa gbaà rà, à akiri tsùuŋma brìsi yè bè goomaa mòdzian ka. À yè è toro kɔ̀ɔ Ŋaablà re Màsàbee goomaa nà, è bà à gaa gaaŋ'n kur'la sapɛ ra, wò yeè dzi e lamyɛ̀nbaa rèè dzuun.
9 Ŋà, mòdzin tantaama xɔ ì yè jà Dzyèèsìbee mòdzin neè ɲàn, twɛy na e tsiì, yè ɲɛn à re goomaa nà waa. Jàmaà shiɲaanfi, yè ɲànŋmɛ̀yn goòmà giri dè, yè bà n'a ka Tsìfaà rè shia jasi. Tɔ̀un, Pɔlì yè e kunùn è ra, è kàràndzin neè kiri, è bè twɛy kàr'na sii saa see kpiri sɔn ne kààngba doùn, nìi tsoo ci Tsiranusì.
10 È tɔ̀ fa, è bè tàrà jii fii. Tà goò yè bà saabu, Azhi jamaan mòdzin neè sapɛ toro yè ji Tsìfaà rè goomaa ɲàn, Dzyèèsìbee mòdzin sen ɲɛn kun kpɛrɛ mòdzin ì tsɛ.
Goo nìi Sevà dzin neè tàrau
11 Àwà, Ŋaablà baraka rɔ̀n, Pɔlì na kabagoo goo bla bla ì faa.
12 È bè wɔ, fɔ vya nìì reè ko mùshɔɔrɔ niì reè dzyɛɔ̀n Pɔl'là, mòdzian twɛy seen, yè bè è dzyɛɛn e re ɲìnìnkɔɔn reè rà, yè cɛrɛmabeè. Kweykɔɔn reè, twɛy raa kwey rèè yè boò twɛy kpɛyn.
13 Dzyèèsìbee mòdzin ì na ni, twɛy yè e ɲantsyeere beè gàne rèè ɲàn, ci ye kwey rèè kaa boò kweykɔɔn reè kpɛyn. Twɛy sa yeè dzin, ye sa na kwey rèè kaa bo siin kweykɔɔn reè kpɛyn Yesù tsoò ka. È ci ye nà dziàn kweykɔɔn reè rà ci: «Pɔlì Yesù nìi goo dèe, tɔ̀ tsoò baraka rɔ̀n, ye bo !»
14 Kpiri sɔn naa dzin kpiri ɲɛɛ̀nun nì na tɔ̀ goò faa, nìì tsoo ci Sevà, è bà Dzyèèsìbee mòdzin neè rè saaka jɔɔndzin bla.
15 Àwà, è bèu kweykɔɔn sɔn ja, yè dzin tɔ̀ tsuru ci: «Pɔlì Yesù nìi goo dèe, tɔ̀ tsoò baraka rɔ̀n, ye bo !»
Ŋà, kweè yè dzin è ra ci: «Yesù, mun y'à tɔ̀, Pɔlì mòò riì, mun y'à tɔ̀. Ŋà, ye do, ye tsi ì rìì ?»
16 Tɔ̀un, kpiri kweykɔɔn yè e mɛɛy è tsɛ. È fààn ɲinan è mà, è lamɔnɔ̀n kun, fɔ yè vwɛ̀ɛ̀y bo gbàà doùn. È re vya rèè sapɛ vyɛ̀ vyɛɔ̀, è màà sapɛ yeè bà tsyɛ tsyɛɔ̀.
17 Efɛzhika reè sapɛ toro yè ji tà goò ɲàn, Dzyèèsìbee mòdzin sen ɲɛn kun kpɛrɛ mòdzin ì tsɛ. À goò yè bà shiɲaanbe brìsi è sapɛ re. Mòdzian sapɛ yeè Tsìfa Yesù tsoò blàbee tɔ̀un.
18 Nìì reè sapɛ na baɔ̀ kàràndzin, twɛy giri na nàa e yɛrɛ ma tɔ̀un, yè nà bo e faadzii ɲaan neè mà, y'à dè fyɛ jàmaà jaa ra.
19 Nìì reè twɛ̀y ɲan goo faa, twɛy giri yè e raa twɛ̀y sɛbɛ̀n nèè tsɛ̀ na, yè nà è kɔrɔ, yè è dzu mòdzian sapɛ jaa ra. Twɛy sɛbɛn neè dzyèèmaa sɔ̀ɔ̀n dziɛ jàtsi kuun, è bè byɛ̀n dan faagoofadzin soo jii caànmoò ko dzyèè tsyeùn ko e bonè faagoo ɲɛyn xɛkɛ.
20 Tɔ̀ tsuru Tsìfaà rè goomaa na jee ji beè kudɛyn, à yɛ̀r'la ɲàn dzia baraka rɔ̀n.
Nìì fau Efɛzhì wɔ̀ rɔ̀n
21 Twɛy goo rèè sapɛ shɔùn, Ŋaablà re Dzia baraka rɔ̀n, Pɔlì y'à ji e duùn ci wo nà dɔ̀n bo Maseduwani jamaan ɲàn, wò yeè dɔ̀n bo Akayi jamaan ɲàn, wò yeè bè Yerusalɛmùn. À yè bà na à dèe sa, ci wò wɔumaà shɔ̀ùn mɔn, fɔ wò yeè nà bè Ɔ̀rɔmùn sa.
22 Tɔ̀un, è dzyeèsi rèè mòkun fii ka bè e jɔɔn Maseduwani jamaan ɲàn. Tsìmotè, ko soo kpɛrɛ, ci Erasitsì. Àwà, à yɛ̀r'la yè to Azhi jamaan ɲàn, è watsi dan fa mɔn.
23 Tɔ̀ watsia yɛ̀r'la ɲàn, Tsìfaà rè shia goò yè bà saabu, màankan bla yeè fù Efɛzhì wɔ̀ rɔ̀n.
24 Àwà, kpiri sɔn na ni mɔn, tɔ̀ tsoo yè bà ci Demeturusì. À na warifyɛ kwey rii. È re ɲɔ̀n sɔn sa na ni, ci tɔ ɲɔ̀n tàànma, yè bà à kir'là, Aritemisì. Demeturusì raa faagoò na gbaɔn nìi tsɛ, tɔ̀ rii yɛ, è tɔ̀ ɲɔ̀n tàànmaa raa gbàà tsuru gbà kiɲaan kiɲaan ì baan warifyɛɛ ka, à y'à gɔɔ̀. À ko nìì reè na tɔ̀ faagoò faa esire, à na baɔ̀ tàrà shi brìsi è re.
25 Sii sɔn see, è nà è sapɛ kiri, è ko nìì reè sapɛ tɔ̀ faagoo soo faa wɔ̀ɔ̀ doùn. È dzin è ra ci: «N dzyeèsi ì, y'a tɔ̀, ɲe raa xɛɛrɛɛ̀ sapɛ boò nèe faagoo rèe rìì ɲàn !
26 Àwà, nìi to fakɔɔn yɛ nèe, ye jaà ni à ra, y'a dèkɔɔn myɛɛ̀n. Pɔlì tsoo ree y'à dèe, ci mòdzian rè gè maana lamɔ̀nɔ̀nkɔɔn reè, ci è ɲɔ̀n, twɛy na gèsɔn pɛn waa. À dziɔ̀ mòò giri dzuun tɔ̀ goomaa ka nòn. À goò na daɔ̀n mìin Efɛzhì dànmaun dɛ, à Azhi jamaan gàne giri kaa kuɔn nòn.
27 À goò dzia bà saabu, è ɲe re faagoò mɛɛy. È bà dzia bà saabu, è ɲe re ɲɔ̀n tàànma blaa rè gbàà saan sa mɛɛy, nìi Aritemisì. Àwà, blàbe riì ni Aritemisì yɛ̀r'la tsɛ, tɔ nà mɛɛy, tɔ̀ to y'à tàrà Azhi jaaman ko dziɲan ko e kur'la sapɛ wò rii blàbee.»
28 Mòdzian toro jiu twɛy gooma reè ɲàn min niì, è vunun tauma blà yeè dzyèè yè sɛ̀ɛ ci: «Efɛzhika reè rè Aritemisì gè blà ! Efɛzhika reè rè Aritemisì gè blà !»
29 Tɔ̀ nɔ̀nkɔɔrɔn, mòdzian yè fù ji min niì sapɛ wɔ̀ɔ̀ doùn màànkaan ka. Pɔlì jììfàsi fii na ni twɛy yè bà Maseduwani mar'la mòdzin ì. Soo tsoo na Gayusì, soo tsoo yè bà Arisitakì. Yè twɛy kun. È re wɔ̀ɔ̀ jaaravi fama blà riì ni, è sapɛ yeè jiri dɔ̀n be mɔn è ka.
30 À na ni Pɔlì duùn, wò sa yeè bè jàmaà kpɛyn mɔn. Ŋà, kàràndzin neè na e tsiì waa.
31 Azhi jamaan fàànma bla niì reè na Pɔlì dzunwɛynsi, twɛy swey sa yeè kɛɛrɛbe ka à re, ci à mà bè wɔ̀ɔ̀ jaaravi fama blà ree ɲan waa.
32 Tɔ̀ bwèy jàmaà ban gbiimaun e si ɲan peu. Màànkaan ni nìi tsuru, à ni tɔ̀ rii tsuru. Jàmaà dèvuà tsu na tsiɔ dɛ waa. Swey nìi dèe, swey na tɔ̀ dèe waa. Giri yè bà ni è ɲan, twɛy na jàmaà ladzyeè kun tsu tɔ waa.
33 Dzyèèsìbee mòdzin sɔn na ni, ci Alɛkisandzire, swey na à goò lakɛrɔɔ̀n tɔ̀ ra jàmaà ɲàn. Tɔ̀un, Dzyèèsìbee mòdzin neè yè tɔ̀ ji e jɔɔn, ci è gooma jàmaà ka. Alɛkisandzire yeè e si ŋààn jàmaà nà tɔ̀un, ci wo nà gooma, wò yeè Dzyèèsìbee mòdzin neè raa dè bo à ɲan.
34 Ŋà, jàmaà dziu à tɔ̀ min niì, ci à Dzyèèsìbee mòdzin, yè màànkaan dzii kun kɔn kpɛrɛ. È bè tàrà fɔ watsi gbaan, è sɛ̀ɛ̀y dzyèe ci: «Efɛzhika reè rè Aritemisì gè blà ! Efɛzhika reè rè Aritemisì gè blà !»
35 Wɔ̀ɔ̀ sɛbɛn goojaabobaà yè e maxɔbe tɔ̀un, è dzi jàmaà màɲɛn. È dzin è ra ci: «Efɛzhika reè, tsi rii soo ni, ci wò na à tɔ̀, ci Efɛzhi wɔ̀ɔ̀ rìì ɲe re ɲɔ̀n tàànma blaa rè gbàà kplatsuubaà, nìi Aritemisì. Tsì rii soo to ni, ci wò na à tɔ̀ ci Aritemisì ɲɛɛ̀n bo nau jìran nɔ̀n, è nà mɛɛy ?
36 Tɔ̀ mòò na ni, nìi dzia twɛy goo rèè sɔ̀swɛy fa waa. Tà doùn, ye e maɲɛn, e maà nà goo fa be e kungɔ tsɛ ka waa.
37 Ye bàaŋnà nèe kpir'lee ree mà ye yè è kun na mìin, tɔ̀ to y'à tàrà, è na gooɲaan faɔ̀ ɲɔ̀n gbaà doùn, è to na ɲe re ɲɔ̀n taàn tsoo ɲaan kpɛrɛ kiriɔ.
38 Àyìwà, Demeturusì ko e faagoofasi rèè ye ba à jaɔ̀, ci mòdzian sɔn goo faɔ̀ ye ra, kitsi kunun jisee reè ni, kitsikun'neè sa yeè bà ni. È dzia bè à goò ka twɛy rè.
39 Goo kpɛ̀rɛ̀ jaaborama nì to ye ba ni e re kɔn, tɔ dzia to, sàrìyà kun'neè ye na e si ladzyeè, è dzia tɔ̀ jaa bo.
40 Tà boshɔ̀ùn, nìi yɛ fau she, tɔ dzia bà saabu, mòò yè dzin mìn mabaɔn, ta to y'à tàrà goo sɔn pɛn na ni, nìi dzia à kpàdè ci tɔ̀ nèe si ladzyee ree kùn waa.»
41 À tɔ̀ goomaa dèu min niì, è shi sin jàmaà nà, ci yè jee.