20
1 Àyìwà, màànkaan nàu e macin watsi riì bwèy, Pɔlì yè kàràndzin neè kiri, è ladzyee, è màxɔ̀n làtsìì goòmà ì ka. Tà shɔ̀ùn, è shi gaa è re, è dɔ̀n be Maseduwani jamaan nɔn.
2 Pɔlì dɔ̀n bokɔɔn Maseduwani jamaan nɔn, è làtsìì goòmà giri dè kàràndzin neè rà, è tɔ̀ ka è màxɔ̀n. Tà shɔ̀ùn, è dɔ̀n be jàmàan sɔn ɲan, ci Gɛrɛsì.
3 È to mɔn, è kuu zhììgi fa. À ci e ye bo mɔn watsi riì bwèy, è dɔ̀n konkoron bla doùn, è bè Siiri jamaan nɔn, à y'à myɛ̀n, ci dzyèèsìbee mòdzin neè gòndo shiɔ̀ wò sàn dzuun. À y'à ji e duùn tɔ̀un, ci wo nà e kpɛyn sèè dɔ̀n Maseduwani jamaan nɔn.
4 À dzyèèsi nìì reè na ni à ka, twɛy rìì siin: sɔn tsoo na Sopatɛrì è bà kpiri sɔn dzin, ci Pirusì, tɔ̀ na boò Beere wɔ̀ rɔ̀n. Arisitakì na ni, sɔn ni, ci Segɔndusì, twɛy boò Tesalonikì wɔ̀ rɔ̀n. Gayusì ni, tɔ̀ boò Dɛribè wɔ̀ rɔ̀n, Tsìmotè ni, ko mòkun fii kpɛrɛ, soo tsoo ci Tsishikì, soo tsoo yè bà ci Torofimù, twɛy Azhi jamaan mòdzin ì.
5 Twɛy kur'la yè e maa ɲe jɔɔn tɔ̀un, yè bè ɲe shù Torowasì wɔ̀ rɔ̀n.
6 Buru fu bɛɛ sɛr'là dɔ̀n bouma shɔ̀ùn, ɲe yè dɔ̀n konkoron blaa doùn Filipi wɔ̀ rɔ̀n. Ɲe yè bwèy nùn fa jìɛ̀ rà, ɲe yè kòmànà wɔ è tsɛ Torowasì. Ɲe yè bwèy ɲɛ̀ɛ̀nun fa mɔn tɔ̀un.
Goo nìi fau Torowasì wɔ̀ rɔ̀n
7 Ɲànwɔ siɛ la gbee, ɲe yè bè e ladzyèè, mìn Tsìfaà rè ɲwɛyn goo dèumaà ɲɔn. Pɔlì na nà bè tɔ̀ raa gbee nìi fa, è geren goomaa rè ko kàràndzin neè ka, è bè suu fɔ feèn tar'la dzu.
8 Ɲe na e ladzyèeŋnà gbà nìi doùn sangasoò jìran nɔ̀n, fìtsina giri dzu na wɔɔ mɔn.
9 Dzunwɛyn sɔn na ni, ci Etsikusì, tɔ̀ yeè bà na e tsuuŋnà gbàà fɔ̀rɔ̀nkɔɔ dziikuan tsɛ. Pɔlì rè kaangoo nàu gbànbe geren, dzunwɛɛn yè cìi. À tou ciɛ̀ rà, è nà fɔn e yɛr'la jaa soo, è bo sangasoò zhììgìraa tsɛ mɔn, è nà mɛɛy. È nàu à lateren, y'à jà, à saɔn.
10 Pɔlì yè jàà na tɔ̀un, è nà e mɛɲɛn à kùùn, à sen, è dzin ci: «Ye e akir'là tsùù soo tsɛ, à ni e jaa ra !»
11 Tà shɔ̀ùn, Pɔlì yè sèè tèyn, yè Tsìfaà rè ɲwɛyn goo dèumaà ɲɔn. Tɔ̀un, è geren goomaa rè kɔn, è bè suu fɔ bwèy ɲin'na boò dzu, è kòmànà à waa.
12 Nìi dzunwɛɛn, yè sèè tɔ̀ ka e re tsii gèsɔn na n'a na waa. Tà goò yè è sapɛ vunun cin.
13 Àwà nìi ɲe, ɲe yè dɔ̀n konkoron blaa doùn tɔ̀un, ɲe yè e maa Pɔlì jɔɔn, fɔ wɔ̀ sɔn ɲan, ci Asɔsì. Pɔlì na ci wo nà jìì be Asɔsì, wò yeè na bè sen mɔn.
14 À bèu dzi ɲe tsɛ mɔn Asɔsì watsi riì bwèy, è dɔ̀n ɲe ka mɔn konkoron blaa doùn. Mìn fù mɔn tɔ̀un, fɔ wɔ̀ sɔn ɲan, ci Mitsilɛnì, mìn tsiì mɔn.
15 Mùn bou mɔn, tɔ̀ raa gbee, mìn bè dɔ̀n bo jeen nà kòòyua shiɲaanfi dzɔ̀nxɔ sɔn taàkuùn, tɔ̀ kir'la Kiyò. Tɔ̀ raa gbee kɔn, mìn bè wɔ gàne sɔn ɲan, ci Samɔsì, tɔ̀ sa kòòyua shiɲaanfi dzɔ̀nxɔɔ̀ sɔn. Tɔ̀ raa gbee kɔn, mìn bè wɔ gàne sɔn ɲan, ci Milɛtsì.
16 À na ni Pɔlì duùn, wò yeè dɔ̀n bo Efɛzhì wɔ̀ɔ̀ tààkuùn, wo mà e tsiì waa, kàtsu, à sàò naà ni, wò yeè cin geren Azhi jamaan ɲàn dɛ. À na Yerusalɛmùn wɔ̀ɔ̀ rìì kaà, sànko wò yeè Pantekɔtsi sɛr'la jisee tàrà mɔn.
Pɔlì Efɛzhi kàràndzìn kur'là bɔɔ rèè kiriu min niì, è latsi
17 Konkoron blaa tsìiŋmaà Milɛtsì wɔ̀ rɔ̀n, Pɔlì yè to mɔn, è kɛɛrɛbe ka Efɛzhì kàràndzìn kur'là bɔɔ rèè kpɛyn, ci yè nà wò kpà mɔn.
18 Àwà, twɛy nàu nà watsi riì bwèy, è dzin è ra ci: «È sen fɔ mun dɔ̀n jisee jɔnaa Azhi jamaan doùn, è bè suu, fɔ mun watsi niì sapɛ fau, min bà ni ye ka, mun na ni ye ka nìi tsuru, ye na fìriɔ̀ tɔ̀ mà waa.
19 Mun mà jàaŋma goo fau Tsìfaà rè. Byɛnbee kamà, min jaayu giri bo, à sapɛ Dzyèèsìbee mòdzin neè rè gòndo shikɔɔn doùn mun sàn dzuun.
20 Goo o goo dzia ye màgoo wube, mun na à pɛn mɛnɛn ye mà. Mun ye toro kɔ̀u à ra, min ye kàràn à ra mòdzian sapɛ jaa ra, tà ko ye re gbà rèè doùn.
21 Dzyèèsìbee mòdzin sen ɲɛn kun kpɛrɛ mòdzin ì tsɛ, min vu bou è sapɛ ra, n ci yè e re jaamabee fau'n kur'la lakere Ŋaablà ka, yè ɲɛn mùn Tsìfa Yesù rà.
22 Àwà dòònun, mun bèkɔɔn yɛ nèe Yerusalɛmùn, nìi nà bè mun tàrà mɔn, mun na tɔ̀ tɔ̀ dɛ, ŋà, Ŋaablà re Dzia rìì ci, fɔ mun y'à fa tà tsuru.
23 Mun kpɛ̀yn nìi tɔ̀, tɔ̀ rii yɛ, min dɔn bo wɔ̀ o wɔ ɲàn, Ŋaablà re Dzi Fɛnɛɛ yè e sar'la mun na, ci n taa yeè bà ni tsuù à mà, ci jɔ̀rɔ̀kɔ nà wɔ mun na, min byɛnbe giri sa fa.
24 Mun kpɛ̀yn na sɔɔn n yɛr'la raa jaamabee kpɛyn dɛ, kàtsu, tɔ̀ na gèsɔn pɛn mun ne waa. Mun nìi kaà, Tsìfa Yesù faagoo nìi kɛ̀ɛ̀yfaɔ̀ mun mà, min dzi tɔ̀ fa, m'a vyɛ̀ e daùn. Tɔ̀ rii yɛ, min mòdzian toro kɔ̀ Kùnàgoo Dziɔ̀ rà, Ŋaablà ɲanwùɔ goomaa.
25 Àwà, è sen dòònun nà, è mun to ye fi, mun Ŋaablà re Màsàbee gooma deu ye nìì reè sapɛ jaa ra, m'a tɔ̀ ye sɔn jaa fa ɲɛn mun mà dɛ.
26 Tɔ̀ kamà, m'a dè màxɔbee e ra she, e ge o ge ye na sèè bo mun ne kàr'nà kpɛyn, nìì ye na à tsìfa tàrà, tɔ̀ na mun ne goo dɛ.
27 À na mun ne goo waa, kàtsu, nìi Ŋaablà saɔ, mun ye toro kɔ̀u tɔ̀ ra, mun na à gàne pɛn mɛnɛn ye mà waa.
28 Tà doùn, ye e yɛrɛ kaàwɔ, ye Ŋaablà re sàà kur'là sa kaàwɔ, à re Dzi Fɛnɛɛ twɛy nìì reè kɛ̀ɛ̀yfau ye mà, ye yè bà è kààwɔbaa, ye yè è kuru kun. À yɛ̀r'la tsìɛn nì baraka ɲan, à tɔ̀ kàràndzìn kur'là tàrà bàu e raa.
29 M'a tɔ̀, ci mun ma ba ni watsi riì bwèy dɛ, kpanran ɲan ì tsuru mòdzin ì nà dɔ̀n ye fi, è to fa màtsuru sàà kur'là rà waa.
30 Arì ye ɲan, mòdzin ì nà jà, yè doò dèe, fɔ yè kàràndzin neè sàn fìrì, yè è gban e kpɛyn.
31 Tà doùn, e maà cìi dɛ ! Ye e taa to, ci è bè tàrà fɔ jii zhiigi feèn ko bwèè sa, kudɛyn, mun na ye mòò sɔ̀n sɔ̀nkɔɔn sapɛ latsia fɔ mun bèe jaayu boò watsia sɔn ɲan.
32 Àwà dòònun, à tou min ye kɛ̀ɛ̀yfa Ŋaablà ma, min ye kɛ̀ɛ̀yfa à ɲan wùɔ goomaa mà. Ye ɲɛn niì faɔ̀ à ra, à dzi n'a na, è fààn wɔ ye ɲan tà doùn. À nìì reè bo jiɔ̀ e si, yè bà à raa, à goo wùù wuu niì reè ŋɛ̀nɛ̀ɲaɔ̀n twɛy ka, è tɔ̀ sa sin ye ra.
33 Mun na n jaàn bo ɲɛyn ne, mun na n jaàn bo sɛn'ne, mun to na n jaàn bo mòò pɛn ne vya ì rè.
34 Mun si nìì reè yɛ nèe, y'a tɔ, mun twɛy rìì ka faagoò fau, yè e tsiì mun ka, yè e tsiì mun dzyèèsi rèè ka.
35 Min niì sapɛ, mun na à kpàdèe ye ra kudɛyn, ci ye faagoò fa tɔ̀ tsuru, ye wɔ gbakɔɔn reè rà. Tsìfa Yesù nìi dèu, mìn taa to tɔ̀ re. À dziun ci: <E mòò kɔ̀, dzwɛ ni tɔ̀ rii ɲàn, è geren mòò y'à kɔ.>»