Actes 17

Goo nìì reè fau Tesalonikì wɔ̀ rɔ̀n

1 Àyìwà, Pɔlì ko Silasì yè dɔ̀n bo tɔ̀un wɔ̀ fii swey ɲàn, ci Anfipolisì ko Apoloni, yè kòmànà bè wɔ wɔ̀ kpɛrɛ ɲan, ci Tesalonikì. Dzyèèsìbee mòdzin neè rè waajibi fa gba na ni tɔ̀ wɔ̀ rɔ̀n.

2 Tà doùn, a ci Pɔlì dɛ̀rɔɔ̀n à y'à faa nìi tsuru bɔrɔɔ, è bè tàrà fɔ ɲanwɔ sii zhììgi, à bèe tɔ̀ waajibi fa gbaà rà, à ko dzyèèsìbee mòdzin neè yè bè Ŋaablà re goomaa kaangoo jia.

3 Pɔlì na Ŋaablà re goomaa jaa dèe è ra, à y'a doùn bo. À ci tɔ̀ gooma ree rìì y'à kpàdeò, ci Ŋaablà Jaara Modzìàn na wù è byɛn ŋe, tà shɔ̀ùn, è san, è kòmànà sèè kpunan. À ci tɔ̀ Ŋaablà Jaara Moo rèe na mòò pɛn Yesù tɛ̀y waa, wo nìi gooma deè è ra.

4 Dzyèèsìbee mòdzin neè swey y'à jà, ci tɔ̀ goomaa sààben, yè ɲɛn Yesù rà, yè e ba Pɔlì ko Silasì tɛ̀y. Mòdzin niì reè kun kpɛrɛ mòdzin ì yè bà dɔɔ̀n Dzyèèsìbee mòdzin neè rè dzinɛɛ ɲàn, twɛy giri ko tàan mòdzin bla reè giri sa yeè ɲɛn tɔ̀ goomaa nà, yè e ba Pɔlì ko Silasì tɛ̀y.

5 Ŋà, nìi Dzyèèsìbee mòdzìn dzyee reè, è jaaɲininbe yè twɛy kun. Tà doùn, yè wɔ̀ɔ̀ doùn mòdzìn kor'nèè swey sen ba e tɛy, yè e ladzyèè dzyèè be, yè fù ji màànkaan ka wɔ̀ɔ̀ min niì sapɛ. Tɔ̀un, yè bè dɔ̀n kpiri sɔn ne tsii, tɔ̀ tsoo ci Yasɔ̀n. Yè Pɔlì ko Silasì gaa mɔn, è sàò yeè bà na n'a re, ye yè è kun bè jàmaà rè, yè kitsi.

6 Ŋà, è na è jà waa. Tɔ̀un, yè Yasɔ̀n ko kàràndzin neè swey kun, yè bè è ka wɔ̀ɔ̀ kitsikun'neè rè. Tɔ̀un, yè dziàn fààn na ci: «Nèe mòdzin nee reè dziɲantsiɛ sapɛ ban gbiimaɔ̀n e si ɲan. È wɔɔ ɲe rìì lè mìin dòònun.

7 Yasɔ̀n nì yè è tɔɔnsi kpiri. È na Ɔ̀rɔmùn màsà kpiri blàa rè sàrìya reè latsuɔ waa, kàtsu, è ci màsà kpiri kpɛrɛ ni, tɔ̀ tsoo yè bà ci Yesù.»

8 Kitsikun'neè ko jàmaà toro dziu ji tɔ̀ goomaa ɲàn min niì, è akir'là na tsuù soo tsɛ waa.

9 È ci e ye Yasɔ̀n ko kàràndzin kuunma rèè bàji, yè ɲɛyn giri tsi è ra, yè kòmànà è bàji.

Nìi fau Beere wɔ̀ rɔ̀n

10 Àyìwà, dzɔɔ̀n tsìu min niì, kàràndzin neè yè Pɔlì ko Silasì bàji be wɔ̀ sɔn ɲan suu, ci Beere. È bèu wɔ mɔn, yè dɔ̀n be Dzyèèsìbee mòdzin neè rè waajibi fa gbaà rà.

11 È bèu Dzyèèsìbee mòdzin niì reè jà mɔn, twɛy ka goo na dzi, è geren Tesalonikì wɔ̀ɔ̀ Dzyèèsìbee mòdzin neè raà tsɛ. Twɛy yè e tsiiŋ Ŋaablà re Goomaa nà taamadzibe ko duun fyɛ ka. Jisee sapɛ, twɛy mòdzin neè na Ŋaablà re Goomaa kìtaabuà dzii saan, y'à siin Pɔlì ì nìi dèe, è ba sààben taki.

12 Mòò giri yè bà tɔ̀un Yesù rè kàràndzin, Dzyèèsìbee mòdzin neè ɲàn. Nìi Gɛ̀rɛ̀ki rèè, twɛy tàan rèè mòdzin bla reè giri ko kpir'leè giri yè ɲɛn Yesù rà, yè bà à re kàràndzin.

13 Tesalonikì wɔ̀ɔ̀ Dzyèèsìbee mòdzin neè y'à myɛ̀un min niì, ci Pɔlì ì Beereka reè sa toro kɔ̀ɔ Ŋaablà re goomaa nà, yè jàà mɔn, yè bè twɛy mòdzin neè duùn wɔ, yè fù ji màànkaan ka wɔ̀ɔ̀ min niì sapɛ.

14 Kàràndzin neè y'à goò jàu tà tsuru, yè fù Pɔlì ka suu, yè b'a kèèsen kòòyu dziɛ rà, sànko è dzi konkoron sen mɔn. Àwà, nìi Silasì ko Tsìmotè, twɛy yè to à shɔ̀ùn Beere wɔ̀ɔ̀ doùn.

15 Tà doùn, Pɔlì kèèsenbaa rèè yè b'a ka fɔ wɔ̀ sɔn ɲan, ci Atɛnì. È bèu wɔ mɔn, twɛy ci e ye e kpɛyn sèè watsi riì bwèy, Pɔlì yè dzin è ra, ci y'à dè Silasì ko Tsìmotè rà, ci yè e maxɔbe, yè dzi wò tsɛ mɔn tabe.

Pɔlì waajibi niì fau Atɛnì wɔ̀ rɔ̀n

16 Àyìwà, Pɔlì ni Silasì ko Tsìmotè màshua rà Atɛnì wɔ̀ rɔ̀n, à jaa yè ɲɛn ɲɔ̀n giri mà wɔ̀ɔ̀ doùn, mòdzian nìì reè kɔ̀ɔ. Tɔ̀ goò yè dɔ̀n Pɔlì ɲàn fɔ è bè geren.

17 Tà doùn, Dzyèèsìbee mòdzin neè, ko kun kpɛrɛ mòdzin niì reè dɔ̀ɔn è re dzinɛɛ ɲàn, Pɔlì ko twɛy yè kaangoo jia waajibi fa gbaà rà. Àwà, wɔ̀ɔ̀ sijama blà riì ni, siì saa see, Pɔlì bèe mɔn, à ko mɔn bèbaa rèè yè bè kaangoo ji.

18 Twɛ̀yfabaa blà bla swey sa na bà ni tɔ̀ gàne rɔ̀n. È na twɛy swey kir'là ci Epikuriɲɛn rèè, yè bà swey kir'là Sitoyisiɲɛn rèè. Twɛy mòdzin neè sa yeè nà e maa, yè goomaa Pɔlì ka. Swey dziàn è ɲan ci: «Nèe jòòn bo kɛyn nèe yè bà ci dzùrù kɔn kɛ ?»

Swey yè bà dziàn ci: «À ni a ci à kɔ̀ɔ gè kpɛrɛ ì rìì gooma deè.»

È na tɔ̀ dèe, kàtsu, Pɔlì na Yesù rè Kùnàgoo Dziɔ̀ rìì gooma deè, ko fùn nèè sèè kpunaàn goomaa.

19 Tɔ̀un, yè bè à ka e re wɔ̀ɔ̀ kitsi kununma nɔ̀n. È wɔu mɔn, y'à tey ci: «Wo yɛ naɔ̀ nèe kàràn ye riì ka nèe, a dzia sɔn de mun na tɔ̀ tsɛ ɔ ?

20 Ɲe toro yɛ gooma niì reè ɲàn wo dzu kudɛyn nèe, à sapɛ goo ye ɲe jaa ra, ɲe sàò to ni ɲe y'à doùn tɔ̀.»

21 Atɛnì wɔ̀ɔ̀ndzin neè ko tɔnɔn niì reè tsùuŋnà è ka, twɛy na e raa watsia fàan sapɛ faa goo nìi rà, tɔ̀ rii yɛ, yè goo ye lakɛ̀ɛ̀y, tà ko yè yeu nauma lamyɛn.

22 Tà doùn, Pɔlì tsìiŋmaà wɔ̀ɔ̀ kitsikununma nɔ̀n mòdzian fi, è dzin è ra ci: «Atɛnika reè, mun y'à kààwɔɔ, mun y'à jà ci ye re dzinɛ goo blà.

23 Mun na à tɔ̀ pɛn na, mun ɲantsyeerekɔɔn ye re wɔ̀ɔ̀ doùn, mun gè giri jàu, ye nìì reè kɔ̀ɔ. Fɔ, è bè wɔ min saafama sɔn ja, à sɛbɛɔ̀n mɔn ci: "Kɔ̀ɔ gè rìi kun na tɔ waa, tɔ̀ raa saafamaà". Àwà, ye nìi kɔ̀ɔ, ye to na à kun tɔ waa, mun nà kuàn nì, min nà tɔ̀ gooma de ye ra.

24 Ŋaablà riì dziɲan ɲɛun, ko à doun gee sapɛ, è bà ŋaablaxɔɔ̀ ko dzɔ̀nxɔɔ̀ sa Tsifaà, à tɔ̀ rii. À na e tsuɔ gba ì doùn, mòdzin ì nìì reè jiɔ̀ waa.

25 Gèsɔn pɛn na à fɔɔn waa. Moo yè bà ni gè sìn à ra, à màgoo na ni tɔ̀ ra waa. Jaamabee ò, ŋɔ̀ɔ̀n ò, gè o ge, wò rii y'à sapɛ siàn.

26 À mòdzian sapɛ ɲɛun, è bo mòò sɔn ɲan, yè e tsuù dzɔ̀nxɔɔ̀ min niì sapɛ. À yè è re jàmaan rèè dàn jiu, è goo rèè watsi reè sa dan ji.

27 Ŋaabla tɔ sapɛ fau, sànko mòdzian yè wò gaa. Gè sɔn ge, à gaakɔɔn doùn tà tsuru, a ci gè mɛ̀nmɛnkɔɔn, à dzia jà. Tɔ̀ to y'à tàrà, à dàn na gbàn mùn soo sookɔɔn pɛn na waa.

28 Wò rii baraka ɲan, mùn ni jaamabee rà, mùn dzia e ɲankwey, xɔɔn yè bà ni mùn na. Ye re ye cee reè swey tɔ̀ rii dèu nèe tsuru ci: <Mùn y'a dzin ì nì.>

29 Àwà, mìn ba à dzin ì, à na wù, mùn y'a jàtsi kun ɲɔn ì ka waa. Mòdzian twɛy nìì reè boo e akiri ɲan, yè è lamɔnɔ̀n sɛn'na, warifyɛɛ tàmafa kpàa ka.

30 Àwà, mòdzian twɛy goo nìì reè sapɛ fa dɔun, è to naà à tɔ̀ ye nìi faa waa, Ŋaablà na è kpɛyn kaà tɔ̀ pɛn ka dɛ. Ŋà dòònun, è bè min niì sapɛ, à y'à gaa mòdzian sapɛ re, yè sèè bo twɛy goo kaatsi rèè kpɛyn, yè e re jaamabee fau'n kur'la lakere.

31 È wù yè tɔ̀ fa, kàtsu, Ŋaabla jisee soo rii tsùuŋnà nìi sii sèè, à nà kitsia kùnùn dziɲan tsiɛ mòdzian sapɛ tsɛ, sààben ka. Àwà, à mòò sɔn dzin soo rii boo e jaa ra, è tà tsùù à goo rèè shi jɔɔn. À goo rìi ka tɔ̀ kpàdèe mùn na, tɔ̀ rii bàu tɔ̀ mòò sɔɔ̀n saunmaà, à y'à sèè kpunan e shɔùn, è bo fùn nèè fi.»

32 Àwà, è toro dziu ji fùn nèè sèè kpunaàn goomaa ɲàn Pɔlì dzu min niì, swey yè jiran à mà. Swey yè dzin à ra ci: «Mùn nà nà e toro wɔ à dzyeè rè watsi kpɛrɛ.»

33 Tɔ̀un, Pɔlì yè bo è fi, è geren.

34 Tà ko e sa ra, swey yè ɲɛn Yesù rà, yè e ba Pɔlì tɛ̀y. Twɛy mòdzin neè fi, sɔn tsoo na ci Dènisì, tɔ wɔ̀ɔ̀ kitsikunun kur'là mòdzin neè sɔn, ko tàan sɔn, ci Damarisì, tà ko mòdzin kpɛrɛ ì.