Actes 12

Erodzì Piyɛrì jiu min niì kàsoò doùn, mɛ̀rɛ̀kɛɛ̀ y'à bo

1 Tɔ̀ watsi rɔn, màsà kpiri Erodzì yè e ji, è Yesù rè kàràndzìn kur'là mòdzin neè swey byɛɛn.

2 Tɔ̀un, nìi kɛɛradzin Yùxanà raa tsìnà kpiri Yàkubà, à y'à to, yè tɔ̀ vu kaamunun gbààn ka.

3 À y'à jàu ci tɔ̀ goò faumaà dzibeu dzyèèsìbee mòdzin neè rà nìi fa, à y'à to yè Piyɛrì sa kun. À fau "buru fu bɛɛ" sɛr'la watsi rɔn nì.

4 Piyɛrì kuun, à y'à to y'à ji kàsoò doùn. Tɔ̀un, è kaadzin kuru nààlen tsùù, kuru soo soo sa mòkun naàlen nààlen, ci twɛy yè Piyɛrì kplatsuɔ. À sàò na ni à re Geren n tsɛɛ̀ sɛr'là rìì yè dɔ̀n bo ŋe, Piyɛrì yè kòmànà bo è kitsi mòdzian jaa ra.

5 Piyɛrì dzii tsyeeŋmaà kàsoò rà, kaadzin neè yè bà à kplatsuɔ, kàràndzìn kur'là mòdzin neè kpɛ̀yn na Ŋaablà mafyɛ̀ɛn à re nìi tsuru, è na à màfyɛ̀ɛn à re tɔ̀ rii tsuru.

6 Àwà, Erodzì na nà Piyɛrì bo kàsoò doùn gbee tsuru, è kitsi. Fen nɔ̀n, Piyɛrì na shiɔ̀ jɔ̀rɔ̀kɔ fii ka, è bà ɲɛɔ̀n, è ciɛ̀ kaadzin fii shiɲaanfi. Tɔ̀ y'a tàrà kaadzin neè swey sa na ni kàsò gbà dziɛ rà, twɛy yè bà tɔ̀ kplatsuɔ.

7 Tɔ̀un, mùn Tsìfaà rè mɛ̀rɛ̀kɛ sɔn yeè nà bàràma bo jaa soo. Kàsò gbaà doòn sapɛ yeè bà vyevyee brìsi tà nɔ̀nkɔɔrɔn. Mɛ̀rɛ̀kɛɛ̀ yè Piyɛrì màban ban e gaakaa rà, à y'à kpunan, ci è fù tabe tabe. Tɔ̀ nɔ̀nkɔɔrɔn ko e sa, jɔ̀rɔ̀kɔ reè yè tɔrɔn bo Piyɛrì si rèè rà.

8 Mɛ̀rɛ̀kɛɛ̀ yè sèè è dzin à ra kɔn ci: «A re ɲànshìàgee ka a ɲanshì, a re seereyn neè wɔ.»

Piyɛrì yè tɔ̀ fa. Ta dòu, mɛ̀rɛ̀kɛɛ̀ yè dzin kɔn ci: «Dòònun a re mɛ̀yɛ blaa ji a ma, a gban n kpɛyn.»

9 Tɔ̀un, Piyɛrì yè e gban à kpɛyn è bo. Mɛ̀rɛ̀kɛɛ̀ na ni tɔ̀ nìi sapɛ ra, Piyɛrì naà à tɔ̀ ci à sààben goo taki rii waa. Tɔ̀ sapɛ ɲan, Piyɛrì na à siɛ̀n, ci wo sìràan rìì.

10 Tɔ̀un, kaadzin niì reè y'à kplatsuɔ, twɛy kuru jɔnaa, yè nà dɔ̀n bo twɛy tɛyn. Kuru fiiraa, yè nà dɔ̀n bo twɛy sa tɛyn. Yè kòmànà wɔ dziɛ̀ tsɛ, myɛ̀ɛ̀n koon ka tɔ̀ tsyeeŋna, à jaa yè bà jiɔ̀ wɔ̀ɔ̀ rà. È wɔu mɔn, tɔ̀ dzii rèe yè siin, è san e yɛrɛ ma. Dziɛ̀ saun, yè bo tɔ̀un, yè geren shi sɔn ka. È bèkɔɔn, Piyɛrì jaa yè nà bè bàràma fɔ mɛ̀rɛ̀kɛɛ̀ rà.

11 Tɔ̀un, Piyɛrì akiri nàu à jà, è dzin ci: «Dòònun, mun y'à jàu ci à sààben taki rii. Mùn Tsìfaà yè e re mɛ̀rɛ̀kɛɛ̀ ka nau, è nà mun tsi bo Erodzì suun. Dzyèèsìbee mòdzin neè sàò to na ni yè gooɲaan ge o ge fa mun na, è mun tsi twɛy sa ra.»

12 Àwà, kàràndzin sɔn na ni ci Yùxanà, yè bà à kir'là ci Marikì. Piyɛrì nàu e akiri yaa bouma tàrà, è dɔ̀n be tɔ̀ Yùxanà tsoo naà rè tsii, tɔ̀ tsoo ci Mariyamùn. Kàràndzin neè giri na e ladzyèeŋnà mɔn, yè bà Ŋaablà mafyɛ̀ɛn.

13 Piyɛrì bèu wɔ, à yè dɔ̀nma dziɛ màban. Tɔ̀un, faagoofadzin cangur'lii sɔn na ni, tɔ̀ tsoo Rodzì. Tɔ̀ yeè nà dziɛ̀ rà, è tey fa, ci à tsì rii.

14 È Piyɛrì vuà tɔ̀. Tɔ̀un, à taama dzibe ɲaanfaa suun, sani è dziɛ̀ san, à na tɔ̀ fa waa. È vwɛ̀ɛ̀y sèè, è bè dzin dzyee rèè rà ci: «À Piyɛr'lì ! À ni dziɛ̀ rà, da rɔ̀n.»

15 Twɛy yè dzin à ra ci: «Fa jiɔ̀ wo ɲan gbɛ ?»

Tà ko e sa ra, cangur'la ci à wò rii taki. Yè dzin, ci tà bwèy, à y'à mɛ̀rɛ̀kɛɛ̀ rìì.

16 Tà sapɛ ɲan, Piyɛrì ni dziɛ̀ màbaan rà. Yè nà dziɛ̀ san tɔ̀un. Y'à jàu min niì, è ji è sapɛ dzii tsɛ.

17 Tà doùn, Piyɛrì yè e si ŋààn è ra, ci yè e mɛshɛ̀n. Tà shɔ̀ùn, mùn Tsìfaà y'à bou nìi tsuru kàsoò doùn, è tɔ̀ sapɛ lakɛ̀ɛ̀y è ra. Yàkùbà tsoo kpɛrɛ nìi ni, è dzin, ci yè tɔ̀ ko kàràndzìn dzyee reè sapɛ toro kɔ̀ tɔ̀ goomaa nà. Tà shɔ̀ùn, è bo mɔn, è dɔ̀n be min kpɛrɛkuru.

18 Jià nàu seey min niì, à goò yè bà akiri fu kaadzin neè rè. È ci Piyɛrì yè bà dɔ̀un min ?

19 Erodzì yè mòdzin ì ji y'à gaa. Ŋà, è na à gaaŋma jà min sɔn pɛn. Tɔ̀un, è Piyɛrì kplatsuubaa kaadzin neè kiri, è twɛy tey. Tà doùn, è shia sìn, ci yè è vu. Àwà, Erodzì yè bo Yude mar'la ɲàn tɔ̀un, è dɔ̀n be Sezare, è bè watsi danman fa mɔn.

Erodzì saun nìi tsuru

20 Àwà, Erodzì vunun na taɔ Tsirika reè ko Sidɔnka reè kpɛyn fɔ è bè geren. Twɛy yè byɛ̀n à mà, ci ye nà mòdzin ì fù, twɛy yè b'a re, yè b'a sòròn. Kpiri sɔn na ni, ci Blasitusì. Wò rii na Erodzì ɲaangbaa goojaabobaa. Àwà, yè bè tɔ̀ kpir'la kpɛyn ŋe, yè bè tɔ̀ bà e dzunwɛynsi. È ko tɔ̀ byɛ̀unmaà shɔ̀ùn goo rèè mà, yè kòmànà wɔ Erodzì tsɛ, yè bè byɛ̀n gaa à re. È tɔ̀ fau, kàtsu, è raa jàmaàn ɲwɛyn dziɛ giri na boò Erodzì raa jàmaàn nì tsɛ.

21 Tà doùn, Erodzì yè jisee tsuù, ci byɛ̀n nèe goomaa nà dè tɔ̀ sii sèè. Tɔ̀ jisee wɔu, Erodzì yè e re màsà vya reè ji e ma, è nà e tsuù e re màsà gbaaniɛn tsɛ, è kaangoo ji jàmaà nà.

22 Tɔ̀un, mòdzian yè e vu bo fààn na nèe tsuru ci: «Nèe na mòdzin goomakɔɔn waa, à ni a ci Ŋaablà rii goomaa !»

23 Tɔ̀ watsi soo ɲàn, mùn Tsìfaà rè mɛ̀rɛ̀kɛ sɔn yeè nà Erodzì ban, kàtsu blàbe niì na wù Ŋaablà ka, à tɔ̀ bàu e yɛr'laa. Tɔ̀un, à jaamakɔɔn tsùun ì yè dɔ̀n à ɲan, è san.

24 Àwà, Ŋaablà re goomaa kpɛ̀yn na jee ji beè nìi tsuru, à na jee ji beè tɔ̀ rii tsuru.

25 Barinabasì ko Sɔlì na ka beò kùn nìi nà Yerusalɛmùn kàràndzin neè rè, è tɔ̀ jaa bo dòu, yè e kpɛyn sèè. E sèèkɔɔn, yè sèè ko Yùxanà ka e suun, è tɔ̀ nìi kir'là, ci Marikì.