Actes 11

Piyɛrì kpunan niì bou Yerusalɛmùn kàràndzin neè rà

1 Àwà, kɛɛradzin niì reè, ko kàràndzin niì reè na ni Yude mar'la ɲàn, twɛy yè nà à myɛ̀n, ci kun kpɛrɛ mòdzin ì sa yeè e tsiiŋnà Ŋaablà re goomaa nà, nìì reè na Dzyèèsìbee mòdzin ì waa.

2 Tɔ̀ doùn, Piyɛrì nàu e kpɛyn sèè Yerusalɛmùn watsi riì bwèy, kàràndzin niì reè ni mɔn, yè bà Dzyèèsìbee mòdzin ì, twɛy yè e ɲinìnma dè Piyɛr'là. È ci à ra ci:

3 «Wo sɔ̀nbɛn ɔ Piyɛrì ! Wo yè bè dɔ̀n kun kpɛrɛ mòdzin ì nè tsii, nìì reè na shɛɔn waa, fɔ wo yè ɲwɛyn sa ɲɔn è ka kɛ̀ !»

4 Tà shɔ̀ùn, à goò kuun nìi tsuru, Piyɛrì yè bo à jaa mà, à y'à sapɛ lakɛ̀ɛ̀y è ra soo soo, fɔ è bè vyɛ̀ e daùn.

5 A ci: «Àwà, mun na ni Yɔpɛ̀ wɔ̀ rɔ̀n watsi riì bwèy, è mun to Ŋaabla mafyɛɛ̀n nà, Ŋaabla gè sɔn kpadèu mun na jɛ̀y ɲan. Tɔ̀ gèè na ni a ci vya brìsi, è bà shiɔ̀ e nɔnkɔn nààleèn sapɛ ra. Àwà, vya rèe jàà bo nau ŋaablaxɔɔ̀ doùn, è nà fɔ mun tɛyn.

6 Tɔ̀un, mun y'à siin to fur'lu, m'a jà shu kun sapɛ ni à doùn: sàn nààlèn ge ì ni, jòònshu ì ni, gè nìì reè yè e ger'na e don tsɛ, twɛy ni, kɛ̀yn neè yè bà ni.

7 Tɔ̀un, mun yè vu sɔn myɛn, tɔ dziàn mun na ci: <Piyɛrì, fù, e shu rèe rèè sɔn vu, a tàà !>

8 Mun to yè dzin ci: <Aa ɔ̀ɔɔn ! Tsìfaà, gè o ge na fɛnɛɔ̀ waa, è bà ɲe cɛn, mun na tɔ̀ pɛn wɔ jà n dzu ŋe waa.>

9 Vuà to yè bo e jaa fiira ɲan kɔn jìran nɔ̀n, è dzin ci, Ŋaablà ci gè niì gè fɛnɛ, mun mà dzin ci tɔ nooŋnà waa.

10 E fa tɔ̀ tsuru, fɔ jaa zhììgi, gè ree yè kòmànà tèyn ŋaablaxɔɔ̀ doùn.

11 Tɔ̀ watsi soo yɛ̀r'la ɲàn, ɲe ni fɔɔn niì rè, kpiri mokun zhiigi yeè nà e tsiì tɔ̀ dziɛ̀ rà. È na twɛy kaɔ mun ne, yè bo Sezare wɔ̀ rɔ̀n.

12 Ŋaablà re Dzia to yè dzin mun na, ci mun yè bè è ka, n mà n ciri siin tsu waa. Àwà, mùn neema kpiri tsunmɛn niì yɛ nèe, mun sa yeè twɛy bà n tɛy, ɲe yè dɔ̀n be Sezare. Tɔ̀un, kpir'liì mòdzin ì kau mun ne, ɲe yè bè dɔ̀n tɔ̀ re gbàà doùn.

13 Àwà, ɲe bèu dɔ̀n mɔn, tɔ̀ kpir'la yè dzin ɲe ra, ci mɛ̀rɛ̀kɛ sɔn nàu e yɛrɛ kpadè wò ra e re gbàà doùn, è dzin wò ra ci, wò yeè mòò ka bè Yɔpɛ̀ wɔ̀ rɔ̀n, è bè kpiri sɔn kiri, nìi tsoo ci Shimɔ̀n, à tsoò sɔn yeè bà ci Piyɛrì.

14 Tɔ̀un, ci wò ko e re fɔɔn re dzin neè dzia tsi nìi tsuru, ci à nà tɔ̀ dè wò ra.

15 Àyìwà, tɔ̀ rii shɔ̀ùn, mun yè kòmànà n maa, min goomaa è ka. Mun ni goomaa nà, Ŋaablà re Dzi Fɛnɛɛ yè nà jàà è tsɛ, a ci à jàaŋ ɲe sa tsɛ nìi tsuru goo rèè dzii kun bwey rɔ̀n.

16 Tɔ̀ nɔ̀nkɔɔrɔn, mun taa yeè to Tsìfaà rè gooma ree re ci: <Yùxanà mòdzian jaara fooŋ Ŋaablà re shia goo rèè rà ko yu rìì ka. Ŋà, nìi ye, ye jaara nà fòò ko Ŋaablà re Dzi Fɛnɛɛ rìì ka.>

17 Àwà, ɲe ɲɛunmaà doùn Tsìfa Yesù Kirisà rà, Ŋaablà yeè e re Dzi riì ka ɲe blàbeu, à tà soo rìì ka nèe rèè sa blabeu. Mun to tsì rii, mun yè b'à ni dzi Ŋaablà sɔswɛy ?»

18 È dziu twɛy gooma reè myɛ̀n Piyɛrì dzu min niì, tɔ̀ yeè è vunun cin. Yè blàbe ɲɛn Ŋaablà tsɛ, yè dzin ci: «À sààben taki, nìì reè na Dzyèèsìbee mòdzin ì waa, twɛy nà dzi seè bo gooɲaan kpɛyn, yè e re jaamabee fau'n kur'la lakere nìi tsuru, yè jaamabe takia tàrà, Ŋaablà yeè e tsiiŋ tɔ̀ ra twɛy rè.»

Mòò giri bàmaà Yesù rè kàràndzin Antsiyɔshì wɔ̀ rɔ̀n

19 Àyìwà, Etsiyɛnì vuumaà shɔ̀ùn, Dzyèèsìbee mòdzin neè byɛnbe ɲaùn nìi jiu Yesù rè kàràndzin neè tsɛ, tɔ̀ na è vwɛ̀ɛ̀y jeeŋna min niì sapɛ. È ɲan, swey bèu fɔ jàmàan sɔn ɲan, ci Fenisi, swey yè bè Shipùrù jàmàan nɔ̀n, swey yè bè wɔ̀ sɔn ɲan, ci Antsiyɔshì. Ŋà, Dzyèèsìbee mòdzin neè boshɔ̀ùn, è naà mòò kpɛrɛ toro kɔ̀ɔ Ŋaablà re goomaa nà waa.

20 Tɔ̀ y'a tàrà, swey na ni è ɲan, twɛy yè bà boò Shipùrù jàmàan nɔ̀n, ko Sirɛnì wɔ̀ rɔ̀n. Tà doùn, twɛy yè bè Antsiyɔshì, yè bè mòdzin ì toro kɔ̀ Tsìfa Yesù rè Kùnàgoo Dziɔ̀ goomaa nà, nìì reè na dzyèèsìbee mòdzin ì waa.

21 Mùn Tsìfa Ŋaablà na ni twɛy kàràndzin neè ka, è bà wɔɔ̀ è ra. Tɔ̀ baraka rɔ̀n, mòò giri yè ɲɛn è ra, yè e tsiì Tsìfaà rà.

22 Tɔ̀ ɲan, kàràndzin neè kur'liì ni Yerusalɛmùn, twɛy tɔ̀ kùnàgoo myɛ̀un min niì, yè Barinabasì ka bè Antsiyɔshì.

23 Àwà, Barinabasì bèu wɔ mɔn, goo nìi fau twɛy mòdzin neè rè, Ŋaablà baraka rɔ̀n, à jaadzin yeè ɲɛn tɔ̀ mà. Tɔ̀un, à taama yè dzibe cɛyn. À yè è màxɔ̀n, ci yè e shi tsùù Ŋaablà ra kudɛyn, è mà bo tɔ̀ tsɛ waa.

24 Barinabasì na mòò riì kuru, àwà, à na mòdzin jaawuen, Ŋaablà re Dzi Fɛnɛɛ ni à ɲan, è bà ɲɛɔ̀n Ŋaablà ra. Tà doùn, mòò giri yè e shi Tsìfaà rà.

25 Tà shɔ̀ùn, Barinabasì yè bè Tarisì, è bè Sɔlì gàne gaa.

26 Àwà, à Sɔlì jàu, yè bè esire Antsiyɔshì. Tɔ̀un, yè to esire faagoò rà mɔn, ko tɔ̀ gàneè kàràndzin neè ka, è bè tàrà, fɔ jii soo. Tà doùn, yè mòò giri kàràn Ŋaablà re shia goo rèè rà. Yesù rè kàràndzin neè yè kiri "kèrètsyɛn", nìi dzuɔn Yesù kpɛyn dzin neè, tɔ̀ jɔ̀un Antsiyɔshì rìì.

Antsiyɔshì kàràndzin neè nìi fau Yude mar'la kàràndzin neè rè

27 Àwà, mòdzin swey na ni, twɛy yè bà Ŋaablà re kɛɛrabee faa mòdzian rè. Tɔ̀un, twɛy mòdzin neè swey yè bo Yerusalɛmùn kàràndzin kur'là ɲàn tɔ̀ watsi rɔn, yè bè Antsiyɔshì.

28 Mòò sɔn na ni è ɲan, tɔ̀ tsoo yè bà ci Agabusì. Tɔ̀ yeè fù, è dzin Ŋaablà re Dzia baraka rɔ̀n, ci sani dɛyn, dzu bla nà ji dziɲantsiɛ min niì sapɛ. Tɔ̀ dzu rèe nàu ji Ɔ̀rɔmùn màsà kpiri blà sɔn ni naa watsi ɲan, nìi tsoo ci Kloodzì.

29 Tà dzuà doùn, kàràndzin niì reè ni Antsiyɔshì, twɛy yè byɛ̀n à mà, ci ye e si ji e si tsɛ, è sa ko e bɛrɛ. Tɔ̀ tsuru, ye kàràndzìnsi niì reè ni Yude mar'la ɲàn, ye nà tɔ̀ ka bè è re, y'à ka e yɛrɛ dzwɛma.

30 È to tɔ̀ rii fau. Yè e si ji e si tsɛ tɔ̀un, y'à sìn Barinabasì ko Sɔlì rà, ci yè b'a sìn Yude mar'la kàràndzìn kur'là jɔɔndzin neè rà.