Actes 10

Ŋaablà re mɛ̀rɛ̀kɛ sɔn yeè e yɛrɛ kpadèu Kɔrɔnayì rà min niì

1 Àyìwà, kpiri sɔn na ni Sezare wɔ̀ rɔ̀n, tɔ̀ tsoo yè bà ci Kɔrɔnayì. À na Ɔ̀rɔmùn kaadzin kuntsiɛ sɔn ni. Kɔrɔnayì na kaadzin kur'lìi kùntsiɛ̀ sɔn, tɔ̀ na kir'là, ci "Itali kaadzin kur'là".

2 Tɔ̀ kpir'la na shia Ŋaablà jɔɔn, à ko e re fɔɔn re dzin neè sa yeè bà na Ŋaablà blabee kudɛyn. À naà Dzyèèsìbee mòdzin waa, à to na wɔɔ̀ Dzyèèsìbee mòdzin gbakɔɔn gir'la, è bà Ŋaablà mafyɛ̀ɛn kudɛyn.

3 Àyìwà, sii sɔn see ɲɛ̀rɛɛ̀ rà, bwèè màciunma na, Ŋaablà yeè gè sɔn kpadè Kɔrɔnayì rà jɛ̀y ɲan. È Ŋaablà re mɛ̀rɛ̀kɛ sɔn ja panpanranpa, tɔ dɔ̀ɔn à re gbàà doùn. Mɛ̀rɛ̀kɛɛ̀ yè Kɔrɔnayì kiri ci: «Kɔrɔnayì !»

4 Kɔrɔnayì yè mɛ̀rɛ̀kɛɛ̀ siin, à shiɲaankɔɔn yeè tey fa ci: «Fee rìì, Tsìfaà ?»

Mɛ̀rɛ̀kɛɛ̀ yè dzin à ra ci: «Wo re màfyɛyn nèè, tà ko wo goowùù niì faa gbakɔɔn reè rà, Ŋaabla twɛy goo rèè kààwɔuna, à to yè e taa too wo re.

5 Àwà dòònun, mòdzin ì ka bè Yɔpɛ̀, yè bè kpiri sɔn kir'na mìin nìi tsoo ci Shimɔ̀n, à tsoò sɔn ci Piyɛrì.

6 À jàaŋnà kpiri sɔn ne tsii, tɔ̀ sa tsoo ci Shimɔ̀n. Tɔ tsùn làmɔnɔnbaa rìì, à re gàneè yè bà ni kòòyua tɛyn.»

7 Àwà, mɛ̀rɛ̀kɛɛ̀ gooma dou Kɔrɔnayì ka min niì, è geren. À gereun min niì, Kɔrɔnayì yè e re faagoofadzian fii kiri, ko kaadzin soo, tɔ ni à tɛyn faagoò rà fɔ watsi gbaan, è bà shia Ŋaablà jɔɔn sa.

8 Tɔ̀un, goo o goo fau, Kɔrɔnayì yè bo tɔ̀ sapɛ jaa mà, à y'à dè è ra, è kòmànà tàrà, à yè è ka bè Yɔpɛ̀.

Piyɛrì jɛ̀y fau goo rìi tsɛ

9 Àyìwà, tɔ̀ raa gbee rɔn, faagoofadzin fiɛ̀, ko kaadzian bèkɔɔn nà shia rè, yè tsyɛnbe beè Yɔpɛ̀ wɔ̀ɔ̀ rà. Tɔ̀ y'a tàrà Piyɛr'laa Ŋaabla mafyɛn bwey wɔɔ, è tèyn gbàmaa tsɛ, ci wo nà Ŋaablà mafyɛ̀n, è koro bwèè ni senfi.

10 È Piyɛrì to mɔn, dzu y'à kun. À sàò na ni, wò yeè ɲwɛyn ɲɔn. Tɛy fa reè ni tɛɛ̀ rà Piyɛrì kɔ̀, Ŋaablà yeè gè sɔn kpadè à ra jɛ̀y ɲan.

11 Tɔ̀un, è ŋaablaxɔɔ̀ dzii saunma jà. È gè sɔn ja, tɔ ni a ci vya brìsi, à shiɔ̀ e nɔnkɔn nààleèn sapɛ ra, è bà jàà naà dzɔn kèrè.

12 Shu kun sapɛ na ni tɔ̀ gè ree doùn: sàn nààlèn ge ì ni, gè nìì reè yè e ger'na e don tsɛ, twɛy ni ko kɛ̀yn neè.

13 Tɔ̀un, Piyɛrì yè vu sɔn myɛn, tɔ dziàn à ra ci: «Piyɛrì, fù, e shu ree reè sɔn vu, a tàà !»

14 Ŋà, Piyɛrì yè dzin ci: «Aa ɔ̀ɔɔn ! Tsìfaà, gè o ge na fɛnɛɔ̀ waa, è bà ɲe cɛn, mun na tɔ̀ pɛn wɔ jà n dzu ŋe waa.»

15 Ŋà, vuà yè sèè, è dzin kɔn ci: «Ŋaablà ci gè niì gè fɛnɛ, maà dzin ci tɔ nooŋnà waa !»

16 À goò yè fa tɔ̀ tsuru, fɔ jaa zhììgi, gè ree yè kòmànà fù, è tèyn ŋaablaxɔɔ̀ doùn.

Kɔrɔnayì rè kɛɛra reè wɔu Piyɛrì tsɛ min niì

17 Tɔ̀un, Piyɛrì duungoo yeè dò. À duungoo doumaà tɔ̀ tsuru, à goo nìi jàu, è maa, è yɛrɛ teè tɔ̀ dzuun ma. Tɔ̀ y'a tàrà, Kɔrɔnayì sa mòkun zhiigi niì reè kaɔ̀, twɛy sa naɔ̀ dɔ̀n wɔ̀ɔ̀ doùn, yè tey fa, ci Shimɔ̀n nè gàneè ni min. Àyìwà, gàneè kpàdèu twɛy rà, yè bè e tsiì fɔɔn dɔ̀nmà dziɛ rà.

18 È tsìiŋmaà mɔn, yè kiri fa fɔɔn doùn, yè tey fa ci: «Shimɔ̀n, nìi tsoo ci Piyɛrì, tɔ jàaŋnà mìin nì ɔ̀n ?»

19 Tɔ̀ sapɛ ɲan, Piyɛrì goo nìi jàu, tɔ̀ dzuɔn nìi, arì she à na e kɛsɛɛ̀ tɔ̀ ra ŋe. Tà doùn, Ŋaablà re Dzia yè dzin à ra ci: «Piyɛrì, a toro wɔ, mòkun zhiigi wo gaa.

20 Fù, e jàà, a wa è ka, maà a ciri siin tsu waa, kàtsu mun nì yè è ka naɔ.»

Ŋaabla nìi ka à kpàdèu Piyɛr'là, ci wò na mòò bo mòò ɲàn waa

21 Piyɛrì yè jàà tɔ̀un, è nà kpiri zhiigia rà, è dzin è ra ci: «Mun yɛ nèe, ye mòò riì gaa, à mun nì. Ye nà kuàn fee rìì ?»

22 Twɛy yè dzin ci: «Kaadzin kuntsii niì tsoo ci Kɔrɔnayì, tɔ̀ rii ɲe ka naɔ. À mòdzin tereonma, à Ŋaablà blabee, à tsoo dzi yeè bà ni Dzyèèsìbee mòdzin neè sapɛ dzu. Ŋaablà re mɛ̀rɛ̀kɛ sɔn y'a gaaŋnà à re, ci è wo kiri na e re tsii, ci gooma ni wo re, wo y'à dè à ra.»

23 Tɔ̀un, Piyɛrì yè kpiri zhiigia dɔ̀n fɔɔn rè, à y'à to yè feèn fa wò ka mɔn.

Piyɛrì bèu Kɔrɔnayì rè kir'là lamyɛn min niì

Tɔ̀ raa gbee rɔn, è shia kun ko è ka, Yɔpɛ̀ raa kàràndzin neè swey sa yeè à sàn mà ji.

24 Àyìwà, jìɛ̀ raa gbee rɔn, yè bè wɔ Sezare. Tɔ̀ y'a tàrà Kɔrɔnayì na è màshua, è bà na e re mòò rèè ko e dzunwɛynsi jaawuen reè kiriɔ.

25 Àwà, Piyɛrì nàu wɔ, à ci e ye dɔ̀n fɔɔn rè min niì, Kɔrɔnayì yè nà à kùùntsi. È kunun gban à bììn, à tswà blàbèma.

26 Ŋà, Piyɛrì y'à kun fù, è dzin à ra ci: «Fù ! Mun sa mòdzin ni, a ci wo.»

27 Tɔ̀un, Kɔrɔnayì fùu, Piyɛrì ko à yè geren goomaa rè, yè bè dɔ̀n gbàà doùn. È bèu dɔ̀n, Piyɛrì yè mòdzian ladzyeèŋma jà mɔn giri.

28 Tɔ̀ ɲan, Piyɛrì yè dzin è ra ci: «Ye yɛ̀r'leè y'à tɔ̀, ci Dzyèèsìbee mòdzian sɔn yeè kun kpɛrɛ bà e dzyeèsi, tàmafa, è dɔ̀n à re gbàà doùn, tɔ̀ na dàaŋnà waa. Ŋà, Ŋaablà goo soo kpadeò mun na. Tà goò doùn, à ci mun mà mòò pɛn jɔɔn bo, ci à na fɛnɛɔ̀ waa, mun to mà dzin ci à nooŋnà waa.

29 Tɔ̀ rii y'à to, ye mun kiriu, mun na à jà ɲaan, min nà ye re kir'là lamyɛn waa. Àwà dòònun, ye mun kiri naɔ kun nìi soo ra, e dzia tɔ̀ dè n na ɔ ?»

30 Kɔrɔnayì yè dzin ci: «À bwèy nààlen yɛ she, nèe watsi ree yɛ̀r'la ɲàn, mun na ni n ne gàne rɔ̀n, min bà nà ɲɛ̀rɛɛ̀ rɔ̀n Ŋaabla mafyɛɛ̀n faa. Tà doùn, mun yè nà bàràma, min kpiri sɔn tsiiŋma jà n jaaterema, à mà vya reè fyɛɔ̀ tɛrɛ tɛrɛ, yè bà den deèn.

31 È dzin mun na ci: <Kɔrɔnayì ! Ŋaabla wo re màfyɛyn nèè kuun. Wo to goowùù niì faa gbakɔɔn reè rà, à twɛy kààwɔuna, à to yè e taa too wo re.

32 Mòdzin ì ka bè Yɔpɛ̀, yè bè Shimɔ̀n kir'na mìin, à tsoò sɔn ci Piyɛrì. À jàaŋnà kpiri sɔn ne tsii, tɔ̀ sa tsoo ci Shimɔ̀n. Tɔ tsùn làmɔnɔnbaa, à re gàneè yè bà ni kòòyua tɛyn.>

33 Mun sa to yè mòdzin ì fù suu, tɔ̀ rii ɲàn, ci yè bè wo kir'na. Àwà, à dzibe niì fau wo ra, wo yè nà, n ne tswɛy ni à re tɔ̀ ra. Dòònun, mùn sa dzyeèmaa yɛ mìin, Ŋaablà jaaterema. Tsìfaà ci wo yè nìi sapɛ de ɲe ra, tɔ̀ dè mùn y'a myɛ̀n.»

Nìi na ni è dè Kɔrɔnayì rà, Piyɛrì tɔ̀ dèu min niì

34 Piyɛrì yè goomaa sen tɔ̀un, è dzin ci: «Dòònun, mun y'à tɔ̀u, ci mòdzian sapɛ soo Ŋaablà re.

35 A bau kun o kun modzìn, a re blàbe ye bà ni Ŋaablà tsɛ, e bà goo tereonma faa, a goò dzi à ra.

36 Ŋaablà yeè e re goomaa dèu Isirayɛlì mòdzin neè rà, nìi Kùnàgoo Dziɔ̀. À tɔ̀ xɛɛrɛ goòmàà dèu è ra, è bo à Jaara moo Yesù rìì ɲàn, tɔ̀ riì mòdzian sapɛ tsifaà.

37 Yùxanà dziunmaà shɔ̀ùn mòdzian nà, ci y'à to yè è jaara foò Ŋaablà re shia goo rèè rà, goo nìi reè fau, è sen Galile mar'la ɲàn, è bè fɔ Yude mar'la min niì sapɛ, ye twɛy tɔ̀.

38 Ŋaablà to yè e re Dzi Fɛnɛɛ jàaŋ Nazarɛtsika kpiri Yesù tsɛ nìi tsuru, è fààn sin à ra, ye tɔ tɔ̀. Ye yè bà à tɔ̀ sa, ci Yesù fùu tɔ̀un, è tsyeeree beè jàmaàn min niì sapɛ, è goowùɔ fa beè. Kweykɔɔn reè, è twɛy sa cɛrɛmabeè, kàtsu Ŋaablà na ni à re.

39 Yesù goo nìì reè sapɛ fau dzyèèsìbee mòdzin neè rè jàmaàn doùn, ko Yerusalɛmùn wɔ̀ɔ̀ doùn, ɲe twɛy goo rèè sapɛ jau e jaadzin fiɛ̀ ka. Y'à gbaun gɔ̀ɔ rà mɔn nì, y'à vu.

40 Ŋà, à saunmaà bwèy zhììgìraa sii sèè, Ŋaablà y'a kpunan bou saàn ɲàn, è yɛrɛ kpadè jaama.

41 À to na e yɛrɛ kpadè mòò pɛn na, fɔ ɲe, Ŋaablà na ɲe nìì reè bo tsùuŋnà bɔrɔɔ, ci ɲe yè bà shɛɛrɛ. Ɲe rìì ɲwɛɛ̀n ɲɔun à ka, ɲe yè mìɛn fa à ka, à sèè kpunaunmaà shɔ̀ùn è bo saàn ɲàn.

42 Tà doùn, Yesù ɲe kau ci ɲe yè mòdzian toro kɔ̀ Kùnàgoo Dziɔ̀ rà, tà ko ɲe y'à dè, ci Ŋaabla wò rii tsùuŋnà fùn nèè ko jaama reè sa kitsibaà.

43 Ŋaablà re kɛɛra reè sapɛ Yesù raa goò rìì dèu, ci mòo o moò ye ɲɛn à ra, Ŋaabla tɔ̀ tsìfa raa gooɲaan tsiɛ mɛɛy boò tɔ̀ vu ra, à tsoò baraka rɔ̀n.»

Ŋaablà re Dzia jàaŋ kun kpɛrɛ mòdzin neè sa tsɛ min niì

44 Àwà, Piyɛrì ni tɔ̀ goomaa nà, Ŋaablà re Dzi Fɛnɛɛ yè nà jàà à lamyɛnbaa rèè sapɛ tsɛ jaa soo.

45 Dzyèèsìbee mòdzin niì reè na naɔ̀ Piyɛrì ka, yè bà Yesù rè kàràndzin, à goò yè ji twɛy dzii tsɛ, kàtsu y'à jàu, ci Ŋaablà yeè e re Dzi Fɛnɛɛ jàaŋnà kun kpɛrɛ ì sa tsɛ, nìì reè na Dzyèèsìbee mòdzin ì waa.

46 Y'à tɔ̀u ci Ŋaablà re Dzia jàaŋnà twɛy mòdzin neè tsɛ, kàtsu è jaa na ni è ra, è goomaa kungoòmà kpɛrɛ ì ɲàn, yè bà tsoo dzi ɲɛɛn Ŋaablà tsɛ.

47 Piyɛrì yè dzin tɔ̀un ci: «Ŋaablà re Dzi Fɛnɛɛ jàaŋmaà shɔ̀ùn nèe rèè tsɛ, a ci à jàaŋ ɲe tsɛ nìi tsuru, mòò ni dzi e nɔn ci è jaara fa fòò Ŋaablà re shia goo rèè rà ko yuà ka ɔ ?»

48 Tɔ̀un, Piyɛrì yè shi sin, ci mòdzin nee reè jaara yeè foò Ŋaablà re shia goo rèè rà, Yesù Kirisà tsoò ka, Ŋaablà Jaara Modzìàn. Tà shɔ̀ùn, twɛy y'à màfyɛ̀n, ci è to ye ka, è bwèy dànman fa ŋe.