Ŋaablà re Dzia ci Barinabasì ko Sɔlì yè faagoo nìi fa
13
1 Àyìwà, Antsiyɔshì kàràndzìn kur'là ɲàn, mòdzin ì na ni, twɛy yè bà Ŋaablà re kɛɛrɛbee faa. Swey yè bà ni, twɛy kààmoo ì. È ɲan, Barinabasì na ni, sɔn na ni, ci Simeyɔn, yè bà tɔ̀ kir'là sa, ci Tsìɔ, sɔn ni, ci Lusiyusì tɔ boò Sirɛnì wɔ̀ rɔ̀n, sɔn ni, ci Manayɛ̀n, tɔ̀ ko màsà kpiri Erodzì sa bɔrɔn esire gbà soo doùn. Sɔlì yè ɲɛn è tsɛ.
2 Àyìwà, sii sɔn see, è na e ladzyèeŋnà yè bà mùn Tsìfaà blàbee, tɔ̀ y'a tàrà, è ni suàn nà. Tɔ̀un, Ŋaablà re Dzi Fɛnɛɛ yè dzin è ra ci: «Mun taa ni Barinabasì ko Sɔlì mà faagoo rìi rà, ye twɛy bo ji e si mun ne, yè tɔ̀ fa.»
3 Àwà, è suàn wɔu, yè Ŋaablà mafyɛ̀n, tà shɔ̀ùn, yè e si rèè tsùù tsùù Barinabasì ko Sɔlì tsɛ yè dzwɛ ji è ra, yè kòmànà à to yè bèe Tsìfaà rè faagoò rà.
4 Ŋaablà re Dzi Fɛnɛɛ Barinabasì ko Sɔlì kau tɔ̀ rii tsuru. Yè dɔ̀n be wɔ̀ sɔn ɲan, ci Selesi. Àwà, Shipùrù jàmaàn ni kòòyua shiɲaanfi dzɔ̀nxɔ sɔn tsɛ. È wɔu Selesi tɔ̀un do, yè konkoron bla sen mɔn, yè kòòyua fuu, yè dɔ̀n be wɔ̀ sɔn ɲan, ci Salaminì, tɔ ni kòòyua dzii kpɛyn Shipùrù jàmàan nɔ̀n.
5 Àwà, è dɔ̀un mɔn, yè mòdzian toro kɔ̀ Ŋaablà re goomaa nà Dzyèèsìbee mòdzin neè rè waajibi fa gba rèè doùn. Tà doùn, Yùxanà nìi kir'là ci Marikì, tɔ̀ na ni ko è ka, è bà è dzwɛ̀maa.
Goo nìi Bariyesù tàrau
6 È bou mɔn, yè Shipùrù jàmaàn fi shɛn, yè bè wɔ à wɔ̀ sɔn ɲan, ci Pafɔsì. È bèu wɔ mɔn, yè kpiri sɔn ja, tɔ̀ tsoo ci Bariyesù, è bà twɛ̀y ɲan goofabaa. À na Dzyèèsìbee mòdzin, è bà dziàn, ci wo Ŋaablà re kɛɛra.
7 Tɔ̀ gàneè jàmààntsi rìi na ni, ci Sɛriyusì Polusì, è bà Ɔ̀rɔ̀mùnka, à sa na tɔ̀ tɛyn dzian sɔn ni. Tɔ̀ jàmààntsià na mòdzin akiri dzi. Àwà, è Barinabasì ko Sɔlì kiri tɔ̀un, kàtsu à sàò na n'a re, yè wò toro kɔ̀ Ŋaablà re goomaa nà.
8 Nìi Bariyesù, twɛ̀y ɲan goofabaà, è na tɔ̀ kir'là Gɛ̀rɛ̀kì goòmà nɔ̀n sa, ci Elimasì. Tɔ̀ na e tsiì Barinabasì ko Sɔlì rà waa, kàtsu, à sàò na n'a re, wò yeè jàmààntsià kùnàn ban, à mà ɲɛn Yesù rà waa.
9 Tà doùn, nìi Sɔlì, yè bà à kir'là sa, ci Pɔlì, tɔ̀ ɲantsyɛunmaà Ŋaablà re Dzi Fɛnɛɛ rà, è jaà gban to twɛ̀y ɲan goofabaà jaakɔɔ doùn, è dzin à ra ci:
10 «Mòdzìn ɲan, namaramoo ! Sùtànà dzin, goowuubarabaa. A fa mùn Tsìfaà rè shi tereonma rèè nwɛɛ̀n dzii bà ɔ̀ ?
11 Àwà, dòònun, à siin, mùn Tsìfaà sià ni wo tsɛ, wo nà bà jaana. è bè wɔ fɔ watsi ma, wo fa bwèè vyeè jà dɛ.»
Tɔ̀ nɔ̀nkɔɔrɔn ko e sa, Elimasì jaadzin neè swɛyn nèè yè dzi, è yɛrɛ ja tsitsiì brìsi ɲan. Tɔ̀un, è mɛnmɛn bèe min niì sapɛ, è mòò gaa beè nìi nà dzi à si kun, à ji shi re.
12 Àwà, jàmààntsià tɔ̀ goò faumaà jàu min niì, è ɲɛn Yesù rà. Nìi sapɛ kàraun à ra Tsìfaà rè goò ɲàn, tɔ̀ na jiɔ̀ à dzii tsɛ fɔ è bè geren.
Pɔlì waajibi niì fau Pisidzi jamaan Antsiyɔshì waajibi fa gbaà doùn
13 Àyìwà, Pɔlì ko e jiìfàsi rèè yè bo Pafɔsì wɔ̀ rɔ̀n, yè konkoron bla sen, yè kòòyua fuu. È kòòyua fuuŋ, yè bè wɔ wɔ̀ sɔn ɲan, ci Pɛrizhì, tɔ̀ wɔ̀ɔ̀ ni jàmàan sɔn ɲan, ci Panfili. È wɔu mɔn, Yùxanà nìi kir'là, ci Marikì, tɔ̀ yeè bo è kpɛyn mɔn, è sèè dɔ̀n na Yerusalɛmùn.
14 Àwà, nìi Pɔlì ko Barinabasì, twɛy yè bo Pɛrizhì, yè geren dɔ̀n be wɔ̀ sɔn ɲan, tɔ̀ sa tsoo ci Antsiyɔshì, è bà ni jàmàan sɔn ɲan, ci Pisidzi. È wɔu mɔn, ɲanwɔ siɛ̀ wɔu do, yè dɔ̀n be waajibi fa gbaà rà, yè bè dɔ̀n, yè e tsuù.
15 Tà doùn, nìi Musà reè sàrìyaa kìtaabuà, ko kɛɛra reè rè gooma reè kìtaabuà, sɔn yeè twɛy doùn gooma reè swey kàràn mòdzian rè. Tɔ̀ kar'nà fa doumaà shɔ̀ùn, waajibi fa gbaà kùntsii rèè yè goomaa sìn Pɔlì ko Barinabasì rà nèe tsuru ci: «Mùn neema ì, gooma ye ba ni e re, y'a dè jàmaà nà, y'a ka è màxɔ̀n, tɔ dzia fa.»
16 Tɔ̀un, Pɔlì yè fù, è sià ɲansen, à y'à gaa jàmaà rè, ci yè e mɛshɛ̀n. Tà doùn, è dzin ci: «Isirayɛlì mòdzin ì, ko ye mòdzìn dzyee niì reè sapɛ shia Ŋaablà jɔɔn, ye e toro wɔ n ne.
17 Àwà, ɲe Isirayɛlì mòdzin neè rè Ŋaabla ɲe fàbɔɔ rèè bou e jaa ra. È watsi riì fau Misiran jamaan doùn, à y'à fau yè giribe. Tà shɔ̀ùn, è re dzia kpàdè, è tɔ̀ ka è bo tɔ̀ jàmàan nɔ̀n.
18 È magoo wɔ è ɲan jènjàà kor'nà doùn, è bè tàrà fɔ jii dzyeè tsuru.
19 Tà shɔ̀ùn, è kun ɲɛɛ̀nun bara bo Kananin jamaan doùn, è re dzɔ̀nxɔɔ̀ sìn e re mòò rèè rà.
20 Àwà, twɛy goo rèè sapɛ faumaà bèu byɛ̀n jii caànmoò nààlen ko dzyèè tsyeùn tsuru mà. Tà shɔ̀ùn, è kitsikununbaa ì sìn ɲe fàbɔɔ rèè rà, è bè wɔ fɔ Ŋaablà re kɛɛra Samuyɛlì raa watsia dzu.
21 Ɲe fàbɔɔ rèè to y'à gaa Ŋaablà re tɔ̀un, ci è màsa sin ye ra. Ŋaablà sa yeè Sawulì sìn è ra. Tɔ kpiri sɔn naa dzin, ci Kisì nìi Bɛnyamɛ̀n raa tsua mòdzian sɔn. Sawulì yè e tsuù màsàbee rà è kùùn, è bè tàrà fɔ jii dzyeè.
22 Tà shɔ̀ùn, Ŋaablà yeè nà Sawulì maa bo màsàbee tsɛ, è Dawudà bà è re màsa. Ŋaabla dziun Dawudà raa goò rìì ɲàn nèe tsuru ci:
Mun mòò riì jaɔ̀, è bà mun dzibee moo,
tɔ Yesè dzin kpiri Dawudà rìì.
À nà mun sàɔ sapɛ fa.
23 Tà doùn, Ŋaabla mòò bou Dawudà tsua dzin nèè ɲàn, à y'à bà Isirayɛlì Tsibaa, a ci à na à làyiri seòn nìi tsuru. Tɔ̀ Tsibaà rìì Yesù.
24 Àwà, sani è nà, Yùxanà waajibia fau, è dzin Isirayɛli dzin neè sapɛ ra, ci y'à to yè è jaara foò Ŋaablà re shia goo rèè rà, yè e re jaamabee fau'n kur'la lakere.
25 Yùxanà ci e ye wɔ e re faagoò latanma nɔ̀n watsi riì bwèy, à na dziàn mòdzian nà ci: <Ye mun siɛ̀n tsì rii jaa ka ? Ye mòò riì màshua, tɔ̀ na mun waa ! Ɔ̀ɔɔn, tɔ̀ na mun waa, mun shɔ̀ùn nì, à nà nà. Mun yè bà ni à re seereyn fɛɛ̀ takia foro bo à sàn nà, mun na wù tà tsu ka waa.>»
26 Tà shɔ̀ùn, Pɔlì yè dzin ci: «N neema ì, ye nìì reè Ibraximà tsua dzin nèè ko ye dzyee nìì reè sapɛ shia Ŋaablà jɔɔn, mùn tsià gooma ree, Ŋaabla tɔ̀ deò mùn sapɛ rii laa.
27 Tà doùn, Yesù mòò riì kuru, Yerusalɛmunka reè ko e kuntsii rèè akiri na tɔ̀ jà waa. Kɛɛra reè nìi sapɛ deu Yesù tsɛ, tɔ̀ kàrànkɔɔn ko e raà sa ɲanwɔ sii sapɛ, è akiri na à jà waa. Kɛɛra reè twɛy gooma niì reè dèu, Yesù kuunmaà tɔ̀ kuun'n kur'la rà, twɛy gooma reè rìì bou e shi tsɛ.
28 È na kùn pɛn jà, nìi dzia bà à vua kùn waa, tà ko e sa ra, y'à gaaŋ Pilatsì rè, ci à y'à to y'à vu.
29 Goo o goo na sɛbɛɔ̀n à re goò ɲàn, è tɔ̀ sapɛ bo dòu e shi tsɛ watsi riì bwèy, à na gbaɔn gɔ̀ɔ rìi rà, yè b'a jàà bo tɔ̀ ra, yè b'a wɔ fùn kɔɔ sɔn ne. Tɔ̀ ɲɛɛna faà ɲàn, jàci kpankɔɔ.
30 Ŋà, Ŋaablà y'a sèè kpuna bou saàn ɲàn.
31 Tà doùn, Yesù ko nìì reè na ni esire, è bo Galile mar'lɔn è bè fɔ Yerusalɛmùn, è yɛrɛ kpadèu twɛy rà, è bè tàrà fɔ jisee giri. Twɛy nìì reè na ni à ka, twɛy rìì yɛ à shɛɛrɛbe faa Isirayɛli dzin neè rè dòònun.
32 Àwà, ɲe sa naɔ̀ ye toro kɔ̀ tɔ̀ Kùnàgoo Dziɔ̀ rìì là, nìi yɛ, ci Ŋaabla làyir'lìi seun ɲe fàbɔɔ rèè rè, ɲe nìì reè twɛy dzin nèè, à tɔ̀ bou e shi tsɛ ɲe re.
33 À tɔ̀ làyir'là bou e shi tsɛ, kàtsu à Yesù kpunan bou saàn ɲàn, a ci à sɛbɛunma yɛ Zàbùrù ye rèè fiiraa ɲàn nìi tsuru ci:
Wo rìì mun Dzin Kpir'la,
mun bàu wo fàà she.
34 Ŋaablà na à deò, ci wo nà Yesù sèè kpunan bo saàn ɲàn, ci à to fa sèè kɔ̀ɔ̀ doùn dɛ. À na tɔ̀ rii deò e re goomaa doùn nèe tsuru ci:
Mun na dzwɛ cèreoma nìi reè làyiri seòn Dawudà rè,
mun nà twɛy bo e shi tsɛ ye re,
mɛɛy na ni twɛy mà waa.
35 È bà deò Ŋaablà re goomaa gàne kpɛrɛ ɲan kɔn ci:
Mun nìi yè n shiɔ̀ wo ra,
wo fa à to min fyee kɔ̀ɔ̀ doùn waa.
36 Tɔ̀ y'a tàrà, Dawudà raa watsi rɔn, à Ŋaablà saɔ̀ shi jiiŋ, è bè suu fɔ à raa jisee dzu. Tà doùn, à fà rèè wɔu min niì, à sa yeè bè wɔ mɔn. À fùàn to fyeeŋ.
37 Ŋà Yesù, Ŋaabla tɔ̀ sèè kpunan bou saàn ɲàn, à na fyee kɔ̀ɔ̀ doùn waa.
38 Àyìwà, n neema ì, ye bà à tɔ̀, ci e re gooɲaan neè tsìɛ̀ yè mɛɛy, tɔ faa Yesù baraka rɔ̀n nì. Ɲe to yɛ tɔ̀ rii dèe ye ra nèe.
39 Musà raa sàrìyaa na ye re gooɲaan tsìɛ̀ mɛɛy bo ye mà waa. Ŋà, mòò o moò nà ɲɛn Yesù rà, tɔ̀ raa gooɲaan tsìɛ̀ nà mɛɛy bo tɔ̀ mà peu, è bà mòdzin tereonma.
40 Tà doùn, ye e yɛrɛ kaàwɔ, sànko kɛɛra reè nìi dèu, tɔ̀ mà nà e tarà waa. È dziun ci:
41 Ye nìì reè Ŋaablà ɲanfyɛnbee, ye siin fa.
È bà jiɔ̀ e dzii tsɛ, ye bara bo mɔn.
Mun nà goò sɔn fa ye jaa ra,
è kɛ̀nsɛɛn ye ba na nìi lakɛrɔn ye ra,
ye fa ɲɛn à ra waa.»
Nìi Pɔlì ko Barinabasì tàrau Pisidzi jamaan Antsiyɔshì
42 Àyìwà, è nàu bà boò waajibi fa gbaà doùn watsi riì bwèy, mòdzian y'à gaa Pɔlì ko Barinabasì rè, ci yè sèè na tɔ̀ ɲanwɔ sii dzunmaa, yè nà gooma re sèè dè e shɔùn.
43 Jàmaà nàu jee watsi riì bwèy, Dzyèèsìbee mòdzin neè, ko nìì reè dɔɔ̀n è re dzinɛɛ ɲàn, è giri yè e gban Pɔlì ko Barinabasì kpɛyn. Tà doùn, Pɔlì ko Barinabasì yè làtsìì gooma ì giri dè è ra, yè è màxɔ̀n, ci Ŋaabla xɛɛrɛ nìi faa è re, yè e shi tɔ̀ ra.
44 Àyìwà, tɔ̀ ɲanwɔ sii dzunmaa nàu wɔ, wɔ̀dòùndzin neè fàan sapɛ yeè bo, yè bè e ladzyèè, sànko, yè mùn Tsìfaà rè goomaa myɛ̀n.
45 Dzyèèsìbee mòdzin neè dziu jàmaà jà tà tsuru min niì, à goò jaaɲininbe yè è kun. Tɔ̀un, yè e maa, yè Pɔlì sɔ̀swɛɛ̀, y'à ɲɛ̀ɛn.
46 Pɔlì ko Barinabasì akiri tsùuŋma yè dzin è ra ci: «Ye dzyèèsìbee mòdzin neè, Ŋaablà re goomaa na wù, è dè ye rìì jɔ̀na na ŋe. Ŋà, ye to yè e nɔn niì faa à re, ye y'à jaɔ̀ ci ye na wù ko jaamabe dòbɛɛ ka waa. Tà doùn, nìì reè na dzyèèsìbee mòdzin ì waa, ɲe nà e kpɛrɛ̀ à ka twɛy rà.
47 Mùn Tsìfaà na tɔ̀ rii deò mùn na e re goomaa kàjaa sɔn ɲan nèe tsuru ci:
Mun wo tsùuŋ, min wo bà vyevyee mòdzìn dzyee reè sapɛ re,
sànko wo yè è tsià goomaa dè è ra,
è bè fɔ dziɲantsiɛ min niì sapɛ.»
48 Àyìwà, nìì reè na dzyèèsìbee mòdzin ì waa, twɛy dziu twɛy gooma reè myɛ̀n è dzu min niì, è taama yè dzibe fɔ è bè geren. Yè e maa yè tsoo dzi ɲɛɛn Ŋaablà tsɛ e re goomaa kamà. Tà doùn, Ŋaablà na jaamabe dòbɛɛ ɲɛɔ̀n nìì reè sapɛ rà, twɛy sapɛ yeè ɲɛn Tsìfaà rà.
49 Tà tsuru, mùn Tsìfaà rè goomaa na jee ji beè, tɔ̀ gàneè wòɲaan sapɛ ɲan.
50 Tɔ̀un, tàan mòdzin bla niì reè na ni wɔ̀ɔ̀ doùn, yè bà e shiɔ̀ Ŋaablà ra, y'à blàbee, Dzyèèsìbee mòdzin neè yè twɛy, ko wɔ̀ɔ̀ jɔɔndzin neè dzu wɔ Pɔlì ko Barinabasì kpɛyn. Twɛy yè Pɔlì ko Barinabasì byɛn, yè è kaa bo e re gàne rɔ̀n.