Jean 8

E bèu tàan nìi ka Yesù rè, ci à ɲànmɔ̀ɔ̀be faɔ̀

1 Ayìwà, jèn nìi kir'là Oliviku rèè jèèn, Yesù, tɔ̀ yeè dɔ̀n be mɔn.

2 Ŋà, tɔ̀ raa gbee rɔn, è swɛ̀y na Ŋaablà re gbà blàa fɔɔn doùn, jàmaà yè nà, tɔ̀ yeè nà e ladzyèè à ka. Yesù yè e tsuù tɔ̀un, è mòdzian kàr'na.

3 Sàrìyà kaamoo reè ko faridziɲɛn rèè yè tàan sɔn kun na à re, yè nà à tsìì à jaaterema, ci ye tɔ̀ taàn kuɔn ɲànmɔ̀ɔ̀be ra.

4 Yè dzin Yesù rà ci: «Kàrànfaà, nèe tàan rèe beò kun ɲànmɔ̀ɔ̀be rii koòn.

5 Sàrìyaa doùn, kɛɛra Musà ci mìn twɛy tààn kaatsi rèè dzyɛn vu ko kpàa ì ka. Wo to ci dzùrù ?»

6 È na myɛ̀ɛ̀n nì ɲɛɛn à jɔɔn tɔ̀ goomaa ka, sànko yè kùn tàrà nìi nà à to yè jààma jà à ra. Ŋà, è Yesù tsùuŋma to è mɛɲɛn, è maa, è siiniɛn ka sɛbɛndzin faa dzɔn nɔ̀n.

7 È teè taɔ à mà nìi fa, è lateren, è dzin è ra ci: «Mòò riì ni ye ɲan, ci wò na gooɲaan fa ja ŋe fyeu, tɔ̀ jɔ̀na yeè kpàa sen, à y'à ka à dzyɛn.»

8 Tɔ̀ goomaa shɔ̀ùn, Yesù yè e mɛɲɛn kɔn, è sɛbɛn faa dzɔn nɔ̀n.

9 E dziu tɔ̀ goomaa myɛ̀n min niì, è sa yeè geren soo soo, è sen bɔɔ rèè rà, è bè suu fɔ bònè dzin neè rà. È to Yesù soo, taàn tsìiŋma ni à jaaterema.

10 Yesù yè e latereun tɔ̀un, è taàn tey ci: «Tàan, è ni min ? Pɛn na kitsia mɛɛy wo tsɛ dɛ ɔ ?»

11 Taàn yè dzin ci: «Mòò pɛn, Tsìfaà.»

Yesù yè dzin à ra ci: «Mun tsu fa kitsi mɛɛy wo tsɛ waa. À wa, ŋà, maà gooɲaan fa dɛ.»]

Yesù dziun min niì, ci wò rii dziɲaan vyevyeè

12 Tà shɔ̀ùn, Yesù yè e vu bo jàmaà nà kɔn ci: «Mun nì dziɲan tsiɛ vyevyeè, mòò riì ye e gban mun kpɛyn, tɔ̀ fa jìì tsitsiɛ̀ ɲàn dɛ, ŋà, à tsìfa nà jaamabee vyevyeè tàrà.»

13 Faridziɲɛn rèè yè dzin à ra tɔ̀un ci: «Wo ye ba a yɛrɛ shɛɛrɛbe faa, wo re shɛɛrɛbee na ni fààn ka waa.»

14 Yesù yè dzin è ra ci: «Arì mun kɛ̀nsɛɛn ye ba n yɛrɛ shɛɛrɛbe faa, m'a tɔ̀ ci mun ne shɛɛrɛbee sààben, kàtsu m'a tɔ̀ mun daɔn min niì, mun to bèe min niì, mun tà tɔ̀. Ŋà nìi ye, ye na mun danmà tɔ̀, ye to na mun bèma tsu tɔ waa.

15 Ye kitsia kùn'na a ci mòdzin neè ci è kùnùn nìi tsuru, ŋà, mun na kitsi kun'na mòò pɛn tsɛ waa.

16 Arì mun to kɛ̀nsɛɛn ye kitsi kunùn, mun ne kitsia sààben, kàtsu, à na mun soo waa, ŋà mun, ko mun Fà rìi mun ka naɔ, à ɲe rìì.

17 N ci à sɛbɛɔ̀n ye re sàrìyaa doùn, ci mòkun fii ye goo rìi shɛɛrɛbe fa, ci tɔ̀ shɛɛrɛbee sààben ?

18 Tà doùn, mun yè n yɛrɛ shɛɛrɛbe faa, mun Fà rìi to mun ka naɔ, tɔ̀ sa yeè bà mun shɛɛrɛbe faa.»

19 Yè Yesù tey tɔ̀un ci: «Wo Fàà ni min ?» Yesù yè dzin è ra ci: «Ye na mun tɔ̀, Ye to na mun Fàà tsu tɔ. Ye yè bà na mun tɔ̀, ye na nà mun Fàà sa tɔ.»

20 Mòdzian ɲɛyn nìi reè ka kɔ̀ì faa Ŋaa re, è na tɔ̀ jia gàne sɔn ɲan Ŋaablà re gbà blàa fɔɔn doùn. Yesù nèe goomaa ree dèe watsi riì bwèy, à na ni mɔn nì, è bà na mòdzian kàr'na. Mòò pɛn na e si dzi à tsɛ waa, kàtsu, à raa watsia naà wɔɔ ŋe waa.

Yesù ci wo mòò riì

21 Yesù yè dzin è ra kɔn ci: «Mun nà bè, mun bèumaà shɔ̀ùn, ye nà mun gaa, ŋà, ye nà san e re gooɲaan tsiɛ ka e vu ra. Mun bèe min niì, ye fa dzi be mɔn waa.»

22 Tɔ dèu min niì, dzyèèsìbee mòdzin neè yè e maa, yè e si teè ci: «À ci wo nà bè min niì, ɲe fa dzi be mɔn, è bà nà e yɛrɛ vu gbɛ ?»

23 Yesù yè dzin è ra ci: «Ye mìin dzɔ̀nxɔɔ̀ tsɛ raa rìì, min bà jìran nɔ̀n naa. Ɔ̀ɔn, ye dziɲan ree doùn naa rìì, ŋà, mun na dziɲan ree doùn naa waa.

24 Tɔ̀ rii y'à to, min dzin ye ra, ci ye nà san e re gooɲaan tsiɛ ka e vu ra. Ɔ̀ɔn, ye kpɛ̀ynto ma ɲɛn à ra fyeu, ci à mun nì, ye nà san e re gooɲaan tsiɛ ka e vu ra.»

25 Y'à tey kɔn ci: «Wo to tsì rii ?»

Yesù yè dzin è ra ci: «Fɔ à dzii kun bwèy rɔ̀n, mun dzii n'a na, m'a dèe ye ra.

26 Goo giri ni mun ne, mun y'à dè ye tsɛ, goo giri yè bà ni, mun y'à kitsi kunùn. Ŋà, nìi mun ka naɔ, sààben ni tɔ̀ ɲan, mun nìi myɛ̀un à re, mun tɔ̀ rii dèe dziɲan modzian nà.»

27 Mòò naà à tɔ̀, ci à Fà Ŋaablà rii gooma deè ye ra waa.

28 Yesù yè dzin è ra kɔn ci: «Ye ye na Adamà dziàn ɲansen fu bè jìran watsi riì bwèy, ye nà à tɔ̀ tɔ̀ rii bwèy, ci à Mun nì. Ye nà à tɔ̀, ci mun na goo sɔn pɛn faa n yɛrɛ ma waa, ŋà, Fà Ŋaabla mun kàraun nìi rà, mun tɔ̀ rii dèe.

29 Nìi to mun ka naɔ, tɔ ni mun ka. À na mun soo too waa, kàtsu nìi dzi à ra, mun tɔ̀ rii faa kudɛyn.»

30 Yesù goomakɔɔn tà tsuru, mòò giri yè ɲɛn à ra.

Yesù ko Ibraximà raa goò

31 Tɔ̀un, dzyèèsìbee mòdzin niì reè ɲɛun Yesù rà, è dzin twɛy rà ci: «Mun gooma niì dèu ye ra, ye ye e si kun à ra, ye yè to à shia tsɛ, ye nà bà mun ne kàràndzin sààben saàbèn.

32 Tà doùn, ye nà sààbeen tɔ̀, sààbeen to nà ye tsi bo jònbee ɲàn.»

33 Yè dzin Yesù rà ci: «Ɲe Ibraximà tsua dzin ì nì, ɲe na ba jà mòò pɛn ne jòn ŋe waa. Wo dzia dzin dzùrù, ci ɲe nà tsi bo jònbe ɲan ?»

34 Yesù yè dzin è ra ci: «Sààben na, mun nì ci e ra, mòò o moò ni gooɲaan fyɛ̀'ùn, tɔ̀ tsìfa gooɲaan rè jòn.

35 Jòòn na dan jàa fɔɔn re dzian sɔn waa, ŋà, dzin kpir'la, tɔ fɔɔn dzin nì kudɛyn.

36 Ŋaablà Dzin Kpir'la ye ye tsi bo gooɲaan jònbee ɲàn, ye tsi bou à ɲan taki rii.

37 Mun y'à tɔ̀, ci ye Ibraximà tsua dzin ì nì, ŋà, ye mun gaa vurama, kàtsu mun gooma niì reè dèe ye ra, ye na e tsiɛ twɛy rà waa.

38 Mun nìi jàu n Fa Ŋaablà re, mun tɔ̀ rii dèe, ŋà ye, ye nìi myɛ̀un e raa fàà rè, ye tɔ̀ rii faa.»

39 Yè dzin Yesù rà ci: «Ɲe fàà rìì Ibraximà.»

Yesù yè dzin è ra ci: «Ye ye ba na Ibraximà dzin ì taki, ye na nà e raa goo fa à raa goo fau'n kur'la.

40 Ye na tɔ̀ faa waa, ŋà, ye mun gaa vurama nì, kàtsu mun sààbeen dèe ye ra, a ci m'a myɛ̀un Ŋaablà re nìi tsuru. Ibraximà na ye raà tsuru fa waa.

41 Ye fàà goo nìì reè faa, ye sa twɛy rìì faa.»

Yè dzin Yesù rà ci: «Ɲe na ɲànmɔ̀ɔ̀ dzin ì dɛ, Fà soo pe rii ni ɲe re, nìi Ŋaablà.»

42 Yesù yè dzin è ra ci: «Ŋaablà rii ye ba na ye Fàà taki, ye na nà mun kɛ̀n, kàtsu, mun daɔn min bo wò rii lè, mun to ni wò rii kamà mìin. Mun na naɔ̀ n yɛrɛma dɛ, ŋà, wò rii mun ka naɔ.

43 Mun nìi dèe, fee y'à to ye akiri na tɔ̀ jàa waa ? Ye akiri na à jàa waa, kàtsu, ye na dzia e toro wɔ mun ne goomaa rè waa.

44 Ye fàà rìì Sùtana, nìi to y'à sàɔ, ye sa sao ni, ye yè tɔ̀ rii fa. Sùtana, tɔ bàu vuifabaa fɔ goo rèè dzun jɔn bwèy, à na to sààbeen tsɛ waa, kàtsu, sààben soo, tɔ̀ na ni à ɲan waa. À ye ba doò dèe, à yɛ̀r'la juɔ nìi, à tɔ̀ rii dèe, kàtsu, à doodebaa, è ba doò fàà.

45 Ŋà, nìi mun, mun sààbeen dèe nìi fa, tɔ̀ rii y'à to, ye na ɲɛɛn mun na waa.

46 Ye ɲan, tsì rii soo dzia à kpàdè, ci mun gooɲaan fau ? Mun to ye ba sààbeen rìì dèe, fee y'à to ye na ɲɛɛn mun na ?

47 Mòò riì Ŋaablà re mòdzin, tɔ̀ yeè e toro wɔɔ̀ Ŋaablà re gooma rè, à y'à myɛ̀n. A y'a jà ye na tɔ̀ faa, ye na à re mòdzin ì nì waa.»

48 Mòdzian yè dzin Yesù rà ci: «À dzi ni ɲe re, ɲe yè dzin ci wo Samarika, wo yè bà kweykɔɔn.»

49 Yesù yè dzin ci: «Mun na kweykɔɔn waa, mun cèù rii wɔɔ̀ n Faà ɲàn. Ŋà ye, ye mun cèù rii boò.

50 Mun na blàbe gaa n yɛrɛ kɔ waa. Mòo ni, nìi y'à gaa mun kɔ̀, à to nà kitsia kùnùn, è mun dzià sìn mun na.

51 Sààben na, mun nì ci e ra, mòò riì ye mun ne goomaa to e duùn, tɔ̀ tsìfa fa san kuraa.»

52 Mòdzian yè dzin à ra ci: «Dòònun kpɛ̀yn, ɲe y'à tɔ̀u, ci wo kweykɔɔn ! Ibraximà saun, kɛɛra reè sa yeè san, wo to ci mòò riì ye wo re goomaa to e duùn, tɔ̀ tsìfa fa saàn nèè jà kuraa.

53 Ɲe fà Ibraximà nìi saun, w'a siɛ̀n ci wo rìì blà tɔ̀ mà gbɛ ? Kɛɛra reè sa na san ɔn ? W'a yɛrɛ baà tsi rii tɔ̀ tsuru ?»

54 Yesù yè dzin ci: «Mun nì yè bà na blàbe ɲɛɛn n yɛrɛ tsɛ, tɔ̀ blàbee naà gèsɔn pɛn waa. Mun Fà Ŋaablà rii blàbee ɲɛɛn mun tsɛ, ye ci tɔ̀ niì ye re Ŋaablà,

55 tà to y'a tàrà, ye na à tɔ̀ waa. Ŋà mun, mun y'à tɔ̀. Min dzin ci mun na à tɔ̀, mun bàu ye tsuru doodebaa. Ŋà, mun y'à tɔ̀, à re gooma reè yè bà toò mun duùn.

56 Ye fà Ibraximà taa na ni à mà, ci wo nà mun naa jisee jà nìi fa, tɔ̀ y'a taama dzibeu, fɔ è bè geren. A to y'à jàu, à taama yè dzibe cɛyn.»

57 Mòdzian yè dzin à ra tɔ̀un ci: «Ci fee, wo na jii dzyeè tsyeun tsu bo ŋe, wo Ibraximà jàu !»

58 Yesù yè dzin è ra ci: «Sààben na, mun nì ci e ra, sani Ibraximà yè nà dziɲan na, tɔ̀ y'a tàrà mun ni.»

59 È tɔ̀ goomaa myɛ̀un min niì, yè kpàà reè sen tɔ̀un, ci ye nà à ka Yesù dzyɛn. Ŋà, Yesù yè e mɛnɛn bo Ŋaablà re gbà blàa fɔɔn doùn, è geren.