Jean 7

Yesù ko e tseyn nèè rè kaangoo

1 Ayìwà, tà shɔ̀ùn, Yesù yè bèe Galile mar'la min niì sapɛ. A naà n'a re wò yeè bè Yude mar'la tsyeere waa, kàtsu, dzyèèsìbee mòdzin neè jɔɔndzin neè na à gaa mɔn, ci ye nà à vu.

2 Dzyèèsìbee mòdzin neè rè sɛr'lìi na kir'là ci ten nèè sɛr'là, tɔ̀ fa watsi na tsyɛnbeò.

3 Tà doùn, Yesù tseyn nèè yè dzin à ra ci: «Bo mìin a wa Yude mar'la ɲàn, sànko wo re kàràndzin neè, twɛy sa yeè wo re goo fakɔɔn reè jà.

4 E ba n'a re e tɔ̀, a na a re goo sɔn pɛn faa mɛnɛn doùn waa. Wo to tà tsuru goo rèè faa nòn, à fa mòdzian sapɛ y'a ja kɛ̀.»

5 Tɔ̀ y'a tàrà, Yesù tseyn nèè yɛ̀r'la naà ɲɛɔ̀n à ra waa.

6 Yesù yè dzin è ra ci: «Mun naa watsia na wɔ ŋe waa, ŋà, ye re, watsia sapɛ kòroò.

7 Ye goo fa dzi xɔbe dziɲan modzian mà waa, ŋà mun, mun goò xɔ è mà, kàtsu mun dziɲan modzian faadzii ɲaan kpàdèe.

8 Ye y'à wa sɛr'là koòn, nìi mun, mun na naà bè waa, kàtsu, mun naa watsia na wɔ ŋe waa.»

9 Tɔ̀ dèumaà shɔ̀ùn Yesù rè, è to Galile mar'la ɲàn.

Yesù bèu min niì Ŋaablà re gbà blàa rà, è mòdzian kàràn

10 Awà, Yesù tseyn nèè dɔ̀n bèumaà shɔ̀ùn sɛr'là koòn, Yesù sa yeè e mɛnɛn dɔ̀n bè mòdzian jaa bònè.

11 Dzyèèsìbee mòdzin neè jɔɔndzin neè na à gaa beè sɛr'là bwèy, yè bà na dziàn ci: «È bà ni min ?»

12 Jàmaà ɲàn, mòdzian na gooma giri dèe sàn dzuun Yesù rè goò ɲàn, swey dziàn ci à mòdzin wuu, swey ci à mòdzian sàn fìr'la.

13 Mòò pɛn naà Yesù goomaa dè boò da waa, kàtsu è sapɛ na shiɔ̀ dzyèèsìbee mòdzin neè jɔɔndzin neè jɔɔn.

14 Àwà, sɛr'là wɔumaà shɔ̀ùn e shiɲaanfi, Yesù yè dɔ̀n be Ŋaablà re gbà blàa rà, è bè mòdzian kàr'na.

15 À re kàr'nà na jiɔ̀ dzyèèsìbee mòdzin neè dzii tsɛ, yè dziàn ci: «Nèe twɛ̀y ree sapɛ dzia bà ni nèe kpir'lee ɲan dzùrù, à to na kàràn faɔ̀ waa ?»

16 Yesù yè dzin è ra ci: «Mun ne kàr'nà na boò mun yɛ̀r'la ɲan waa, nìi mun ka naɔ, à boò tɔ̀ rii ɲàn.

17 Mòò riì ye ba n'a re è Ŋaablà saɔ fa, tɔ nà à tɔ̀, mun ne kàr'nà ye ba boò Ŋaablà rii ɲàn, à to ye ba boò mun yɛ̀r'la rìì ɲàn o.

18 Mòò riì goomaa e yɛr'la tsoo ra, tɔ blabee gaa e yɛr'la rìì kɔ̀. Ŋà, mòò riì y'à gaa ci wò kabaà rìì yè blàbe, tɔ̀ raà sààben, namara goo pɛn na ni à tsìfa ɲan waa.

19 Kɛɛra Musà rìì na Sàrìyaa sìn ye ra gbɛ ? Sàrìyaa to ci nìi yè fa, ye sɔn na tɔ̀ shi jiɛ waa. Feera, ye yè bà mun gaa vurama ?»

20 Jàmaà yè dzin à ra ci: «Wo mòdzin kweykɔɔn. Tsì rii wo gaa ci wo nà wo vu ?»

21 Yesù yè dzin è ra ci: «Mun goo soo rii faɔ̀, tɔ̀ to yɛ jiɔ̀ ye sapɛ dzii tsɛ

22 Musà kpɛ̀yn kpirimɛyn shɛɛn shi wɔu ye suun, ŋà, à na daɔn Musà rè dɛ, à goo daunma fɔ fàbɔɔ rèè rè. Tɔ̀ rii kamà, arì ɲànwɔ siɛ̀ mà, ye mòò shɛɛ̀n.

23 Ye ye ba à jàa, ci ye dzia kpirimɛyn shɛn ɲànwɔ siɛ̀ mà, tɔ̀ yeè bà kɛɛra Musà rè Sàrìyaa latsuù shi, fee bèe à to, ye yè e vununta mun kpɛyn, ci mun dzùrùma mòdzin ko e kuru cɛrɛmabeu ɲànwɔ siɛ̀ mà.

24 E maà goo rèè siin jaara jaumaà mà, ye kitsia fa ɲɛn tà tsɛ waa. Ye kitsia fa rii è bà tereòn.»

25 Yerusalɛmùn wɔ̀ùndzin neè swey na dziàn ci: «È kpir'liì gaa, ci ye nà à vu, à na nèe dɛ ?

26 À to yɛ goomaa e saoma mòdzian jaa ra, mòò pɛn to na gèsɔn dèe à ra waa. Ɲe re kùntsii rèè yè bà à tɔ̀u taki ci wò rii Ŋaablà Jaara Modzìàn gbɛ ?

27 Nèe kpir'lee, ɲe tɔ̀ danmà tɔ̀, ŋà, Ŋaablà Jaara Modzìàn to ye na nà, mòò fa bà tɔ̀ danmà tɔ̀ do.»

28 Yesù rè mòdzian kàrànkɔɔn Ŋaablà re gbà blàa doùn, è sɛ̀ɛ̀y ci: «Ye kpɛ̀yn ci ye mun tɔ̀, ye yè bà mun danmàà tɔ̀, ŋà, ye bà à tɔ̀, ci mun na naɔ̀ n yɛrɛ ma waa, mòò rìì mun ka naɔ. Mòò riì to mun ka naɔ, sààben n'a ɲan, ŋà, ye na à yɛ̀r'la tɔ̀ waa.

29 Mun y'à tɔ̀, kàtsu mun daɔn wò rii lè, wò rii to mun ka naɔ.»

30 È na à gaa kunàma tɔ̀un, ŋà, mòò pɛn si na dzi à tsɛ waa, kàtsu à re watsia naà wɔɔ ŋe waa.

31 Mòò giri yè ɲɛn à ra jàmaà ɲàn, yè dziàn ci: «Ŋaablà Jaara Modzìàn kɛ̀nsɛɛn ye na nà, à ni tàànmàshɛn kabagooma ì fa, è geren nèe kpir'lee raà tsɛ ɔ̀ ?»

Ŋaablà re gbà blàa kplatsuu reè kau min niì, ci yè bè Yesù kun

32 Jàmaà nìi sapɛ deè Yesù rè goò ɲàn sàn dzuun, Faridziɲɛn rèè toro yè ji tɔ̀ ɲan. Tɔ̀un, è ko saaka jɔɔndzin neè yè Ŋaablà re gbà blàa kplatsuubaa rèè swey ka, ci yè bè Yesù kun.

33 Twɛy bèu wɔ, Yesù yè dzin ci: «Mun ni ye ka, min watsi dɛɛnin fa ŋe, tà shɔ̀ùn, mòò riì mun ka naɔ, mun nà sèè be tɔ̀ re.

34 Ye nà mun gaa, ŋà, ye fa mun jà waa, kàtsu, mun nà bà ni min niì, ye fa dzi be mɔn waa.»

35 Tɔ dèu min niì, mòdzian yè e si teè ci: «È bà nà bè min, sànko ɲe mà dzi à jà ? Dzyèèsìbee mòdzin niì reè jee jiɔ̀ yè e tsuù tsùù bè kun kpɛrɛ mòdzin neè fi, è bà nà bè twɛy rìì lè, è kun kpɛrɛ mòdzin neè kàr'na gbɛ ?

36 À re gooma ree reè dzuɔn yè bà fee dèe: <Ye nà mun gaa, ye to fa mun jà waa, mun to nà bà ni min niì, ye fa dzi be mɔn waa> ?»

37 Àyìwà, sɛr'là jisee lataan sii sèè, tɔ̀ riì sɛr'là jisee blaa yɛ̀r'la, Yesù tsìiŋmaà jàmaà fi, è sɛ̀ɛ̀y ci: «Mìnoo ye ba ni mòò riì rà, è nà mun na, è min.

38 Mòò riì ye ɲɛn mun na jaamabee yuà nà biri boò tɔ̀ tsìfa ɲan ba yu ì tsuru, a ci à sɛbɛɔ̀n Ŋaablà re Goomaa doùn nìi tsuru.»

39 Yesù na Ŋaablà re Dzia rìì gooma deè tɔ̀ tsuru. Nìì reè nà ɲɛn à ra, twɛy nà tɔ̀ tàrà nìi fa, à na tɔ̀ rii dèe. Tɔ dèe watsi riì bwèy, Ŋaablà re Dzia naà jàaŋnà è tsɛ ŋe waa, kàtsu Yesù yè sen teyn jìrànxɔɔ̀ doùn, è dɔ̀n e blabee ɲàn, tɔ naà faɔ̀ ŋe waa.

40 Swey twɛy gooma reè myɛ̀un min niì jàmaà ɲàn, yè dziàn ci: «Nèe kpir'lee Ŋaablà re Kɛɛra goo dèumaà nì taki !»

41 Swey dziàn ci: «Nèe rìì Ŋaablà Jaara Modzìàn !»

Swey yè bà dziàn ci: «Ŋaablà Jaara Modzìàn bomàà nì Galile mar'la ɔ̀ ?

42 N ci à sɛbɛɔ̀n Ŋaablà re Goomaa doùn, ci Ŋaablà Jaara Modzìàn nà bo màsà kpiri Dawudà tsua rìì ɲàn, Bɛtsilɛmùn wɔ̀ rɔ̀n, Dawudà na ni min niì.»

43 Yesù kamà, jàmaà yè tara kuru fii tɔ̀un.

44 Tà doùn, swey na n'a re, y'à kun, ŋà, mòò pɛn si na dzi à tsɛ waa.

45 Àyìwà, Ŋaablà re gbà blàa kplatsuubaa rèè yè sèè be saaka jɔɔndzin neè ko Faridziɲɛn rèè rè. È bèu wɔ, twɛy yè è tey ci: «Feera, ye na na ko à ka ?»

46 Gbà blàa kplatsuu reè yè dzin è ra ci: «Mòò pɛn na gooma ja nèe kpir'lee tsuru ŋe kuraa.»

47 Faridziɲɛn rèè yè dzin è ra ci: «Ye sa y'a tou, è ye sàn fìrì ɔ̀ ?

48 Y'a jau ɲe kùntsii rèè sɔn tàmafa Faridziɲɛn rèè sɔn ɲɛun à ra nòn ɔ̀n ?

49 Jàma nìi ɲɛunma yɛ à ra, twɛy na Musà rè sàrìyaa shi tɔ waa, è mòdzin dangauma ì nì.»

50 Àyìwà, Faridziɲɛn rèè ɲàn, mòò sɔn na ni, tɔ̀ tsoo ci Nikodɛmùn. Watsi sɔn ɲan, tɔ̀ kpir'la rìì na beò Yesù kpà. Àwà, tɔ̀ yeè dzin è ra tɔ̀un ci:

51 «È bè ɲe re sàrìyaa shi tsɛ, à dàaŋnà ɲe yè kitsi kunùn mòò tsɛ, ɲe mà bà à vu myɛɔ̀n, à to goo rìi faɔ̀, ɲe mà bà tɔ̀ tɔ̀ ɔ̀ ?»

52 Yè dzin à ra ci: «Tà bwèy, wo sa Galile mar'la mòdzian sɔn gbɛ ? A yɛr'la yè Ŋaablà re goomaa kìtaabuà doùn gaa cɛyn, wo nà à jà, ci kɛɛra pɛn na bo jà Galile mar'lɔn ŋe waa.»

53 [Tɔ̀ goomaa shɔ̀ùn, è sa yeè geren e re tsii.