Luc 23

E bèu Yesù ka fàan jɔɔndzin neè rè min niì

1 Tà shɔ̀ùn, kitsi kunun kur'là sapɛ dzyeemaa yè fù, yè dɔ̀n be Yesù ka jàmààntsi Pilatsì rè.

2 Àyìwà, è bèu wɔ mɔn, yè e maa, yè sɔn ì wɔɔ̀ à ra nèe tsuru ci: «Ɲe y'à kààwɔɔ, ɲe y'à jà, ci nèe kpir'lee ɲe re jàmààndzin neè ɲan suùsuɔ̀ ci è mà kɔnsɔɔn sarà Ɔ̀rɔmùn màsa blaa rè waa. È bà ci sa wò rii Ŋaablà Jaara Modzìàn, nìi y'à kpàdèe, ci wò màsa.»

3 Tɔ̀un, Pilatsì y'à tey ci: «Wo rìì dzyèèsìbee mòdzin neè rè màsà kpir'là ɔ̀ ?»

Yesù yè dzin à ra ci: «Wo rìì y'à dèu.»

4 Pilatsì yè dzin saaka jɔɔndzin neè, ko jàmaà nà tɔ̀un ci: «Mun na kùn pɛn jàa nìi dzia à to mòò yè dzi ɲaan fa nèe kpir'lee ra waa.»

5 Pilatsì tɔ̀ dèu min niì, yè dzin fàan na kɔn ci: «A goo nìi reè kàr'na mòdzian nà, à mòdzian ɲan suùsuɔ̀ ko twɛy ka. A y'à dzii kuun Galile mar'lɔn, è nà Yude mar'la ɲàn, à yɛ naɔ̀ fɔ mìin dòònun.»

6 Àyìwà, Pilatsì twɛy gooma reè myɛ̀un min niì, è tey fa, ci tà bwèy nèe kpir'le Galileka rii ɔ̀ ?

7 Jàmààntsì rìi ni Galile mar'la kùùn, tɔ̀ yeè bà Erodzì, Pilatsì y'à myɛ̀un min niì, ci Yesù tɔ̀ gànè dzian sɔn, è dzin ci yè bè à ka Erodzì rè. Tɔ̀ y'a tàrà Erodzì sa na ni Yerusalɛmùn tɔ̀ bwèy fii rɔ̀n.

8 Yesù bèu wɔ Erodzì tsɛ watsi riì bwèy, tɔ dzibeu tɔ̀ ra fɔ è bè geren, kàtsu à na goo giri myɛ̀ɔn Yesù tsɛ. Tà doùn, fɔ watsi gbaan, à sàò na n'a re wò y'a tɔ̀, tà ko wò y'a jà kabagoo goo sɔn fama.

9 Tɔ̀un, Erodzì y'à tey goo giri mà, ŋà, Yesù na à ɲancinan gooma pɛn ka waa.

10 Tɔ faa watsi riì bwèy, tɔ̀ y'a tàrà, saaka jɔɔndzin neè ko sàrìyà kaamoo reè na ni, twɛy yè bà sɔn ɲaan ɲaan kaatsià sapɛ wɔɔ̀ Yesù rà Erodzì jaa ra.

11 Erodzì ko e re kaadzin neè yè Yesù ɲanŋmɛn, y'à ɲanfyɛnbe cɛyn. È bè wɔ, fɔ Erodzì y'à to yè màsà mɛyɛ ji à mà, à y'à sèè bàji be Pilatsì rè e shɔùn.

12 Tɔ̀ sii sèè ko e sa, Erodzì ko Pilatsì yè bà dzunwɛynsima ì. Tɔ̀ to y'à tàrà è na e si ɲan ì nì.

E byɛ̀un à mà min niì, ci Yesù wù è vu

13 Àwà, è bèu wɔ Pilatsì tsɛ tɔ̀un, tɔ̀ yeè saaka jɔɔndzin neè, ko dzyèèsìbee mòdzin neè jɔɔndzin neè, ko dzyèèsìbee mòdzin neè sapɛ ladzyèè.

14 È dzin è ra ci: «Ye naɔ̀ ko nèe kpir'lee ka mun ne, ci à mòdzian ɲan suùsuɔ̀ yè e maban. Àwà, mun to y'à teron ye sa jaa ra. Ye ci à goo gè o ge faɔ̀, mun na tɔ̀ sɔn fyɛ jà à ra waa.

15 A to y'a jà, Erodzì sa y'a bàji naɔ ɲe re, tɔ̀ tsu na fyɛ̀ rìì jàunà à ra waa. Tà doùn, kpir'lee na fìrìgoo pɛn faɔ̀, nìi dzia bà à vua kùn waa.

16 Àwà, mun nà à to y'à dɔrɔ cɛyn sɛyn ka, tà shɔ̀ùn, min shi sin à ra, è bèe.»

17-19 Tɔ̀ y'a tàrà, kpiri sɔn na ni, ci Barabasì. Tɔ̀ kpir'la na baɔ̀ saabu mòdzian yè e maban goò sɔn na wɔ̀ɔ̀ doùn, tà ko, è bà na mòò vuɔ̀ sa. Twɛy goo rèè na à too, y'à ji kàso doùn. [Àwà, jii o jii Geren n tsɛɛ̀ sɛr'là ye ba na wɔu, Pilatsì na wù, è kàsòdòùndzian soo bo bàji.]

Tɔ̀ kàjaa kamà, jàmaà sapɛ yeè dzyèè, yè e maa yè dziàn nèe tsuru fààn na ci: «Barabasì bo bàji, e nèe kpir'lee vu !»

20 Àwà, à ni Pilatsì duùn, è shi sin Yesù rà è bèe nìi fa, è sèè è gooma jàmaà ka kɔn.

21 Jàmaà kpɛ̀ynto dziàn nì fààn na ci: «È gban gɔɔ̀ rà, è gban gɔɔ̀ rà !»

22 Tɔ̀un, Pilatsì yè è tey e jaa zhiigira ɲan nèe tsuru ci: «À to gooɲaan kɛnma ni soo fa ɔ̀ ? Mun kpɛ̀yn na fyɛ̀ pɛn jaɔ̀ à ra, nìi dzia à to mòò y'à vu waa. Tà doùn, mun nà à to y'à dɔrɔ cɛyn sɛyn ka, tà shɔ̀ùn, mun yè shi sin à ra, à yè bèe.»

23 Tà ko e sa ra, è sɛ̀ɛ nìi tsuru, è kpɛ̀yn sɛ̀ɛ tɔ̀ rii tsuru, ci Yesù yè gban gɔɔ̀ rà. È re goomaa fàan blàbe ɲaanfaa suun, è latamataa yè nà dzi Pilatsì dzuun.

24 Àwà, Pilatsì yè e tsiì à ra tɔ̀ rii ɲàn, ci è nìi gaa wò re, wo nà tɔ̀ shi sin è ra.

25 Tɔ̀un, è ci kpir'liì yè bo bàji, tɔ̀ yeè bà na jiɔ̀ kàsoò doùn mòdzian màbaunmaà raa goò kamà, ko à re mòò vuuŋmaà kamà, Pilatsì yè tɔ̀ bo bàji. Nìi Yesù, è tɔ̀ wɔ è suun, ci è sào ni y'à bà nìi tsuru, y'à bà tɔ̀ tsuru.

E Yesù gbaun gɔɔ̀ rà min niì

26 Àyìwà, kaadzin neè bèkɔɔn ko Yesù ka e vuma nɔ̀n, yè tsi kpiri sɔn ka, tɔ dɔ̀ɔn Yerusalɛmùn. Tɔ̀ kpir'la sa tsoo na ci Shimɔ̀n, è bà na boò wɔ̀ sɔn ɲan, ci Sirɛnì. Tɔ̀un, yè tɔ̀ kun, Yesù bèe gban gɔ̀ɔ nìi rà, ci è tɔ̀ sen, è gban Yesù kpɛyn.

27 È bèkɔɔn jàma brìsi yè e gban è kpɛyn. Tàan rèè swey sa na ni jàmaà ɲàn, twɛy yè bà gɛɛ, yè e matsùrùkɔɔn fa beè Yesù goojaa rà.

28 Yesù yè nà e jaa kere twɛy tàan rèè rà, è dzin è ra ci: «Yerusalɛmùn taan ì, e maà gɛɛy mun naa goojaa rà dɛ ! Ye gɛɛy e yɛr'leè ko e dzin nèè raà rìì là !

29 A y'a jà mun yè tɔ̀ dè, jisee ɲaan ì nàa, nìì reè doùn mòdzian nà dzin nèe tsuru ci: <Tàan nìì reè na dzia dzin kere kuraa, ko nìì reè na dzin kere jà ŋe, yè nà dzin ci yè cɛn sìn dzin na, twɛy sapɛ raa wùbeu.>

30 Tɔ̀un, mòdzian nà e maa yè dziàn jèn blà bla reè rà, ci yè mɛɛy ye tsɛ. Yè dziàn jènìì neè rà, ci yè ye mɛnɛn !

31 A y'a jà min tɔ̀ dè, nìi gɔ̀ɔ̀ ciraan, a y'a jà tɔ kuàn nèe kuun'n kur'lee ra, è na wɔ gɔɔ gɔ̀r'la tsɛ do !»

32 Àwà, è bèkɔɔn Yesù ka, gookoronfabaa mòkun fii swey sa na ni è suun, yè bà bèe twɛy sa vu à ka.

33 Àyìwà, yè bè wɔ gàne sɔn ɲan, è nìi kir'là, ci "Kungɔ̀ xɔɔ̀ gàneè". E bèu wɔ mɔn, yè Yesù gban gɔɔ̀ rà. Yè gookoronfabaa mòkun fii rèè sa gban à tɛyn gɔ̀ɔ kpɛrɛ ì rà. Soo ni à sirama re, soo yè bà ni à ɲɔ̀nma re.

34 Yesù gbaunmaà yè to gɔɔ̀ rà mɔn, è dzin ci: «Mun fàà, nìì reè yɛ nèe faa mun nà, a yɛrɛ to è re, kàtsu è na à tɔ̀, è nìi faa waa.»

Tɔ̀ faumaà shɔ̀ùn, yè Yesù rè vya rèè tanan e si ra. È ci e ye è tanan, yè kaan ji à ra.

35 Tɔ̀ sapɛ faa, tɔ̀ y'a tàrà, mòdzian tsìiŋnà yè siin faa. Dzyèèsìbee mòdzin neè jɔɔndzin neè kpɛ̀ynto na Yesù ɲanŋmɛɛ̀n nì, yè dziàn ci: «Wò rii ye ba Ŋaablà Jaara Modzìàn, Ŋaabla nìi boo e jaara taki, è yɛrɛ tsi m'a jà sa kɛ̀, n ci à to mòdzian swey tsiu !»

36 Kaadzin neè sa y'a ɲanŋmɛɛ̀n, yè e kpɛr'la à ra, yè mììn ge kùunma sìan à ra, yè dziàn ci:

37 «Wo rìì ye ba dzyèèsìbee mòdzin neè rè màsà kpir'là, a yɛrɛ tsi sa kɛ̀ !»

38 È na sɛbɛndzin sɔn fa gbaɔn gɔɔ̀ rà à kùngɔ tsɛ, nìi yɛ nèe ci: «Dzyèèsìbee mòdzin neè rè màsà kpir'là rìì yɛ nèe.»

39 Gookoronfabaa fii nìì reè sa gbaun gɔ̀ɔ fii rèè rà Yesù tààkuùn, twɛy ɲan mòò sɔɔ̀n y'à ɲɛ̀ɛn nèe tsuru ci: «Wo rìì na Ŋaablà Jaara Modzìàn gbɛ ? A yɛrɛ tsi, e mùn sa tsi sa kɛ̀ !»

40 Ŋà, nìi mòò sɔɔ̀n, tɔ̀ yeè fù e koòsià kpɛyn nèe tsuru ci: «Wo na shia Ŋaablà jɔɔn dɛ ? N ci tɔ̀ byɛnbe soo rìì ni wo ko à sa tsɛ.

41 Nìi yɛ faa ɲe ra nèe, à ni e shi tsɛ, kàtsu ɲe nìi fau, tɔ̀ tɔ̀n'nà nì yɛ ɲe tsɛ. Ŋà, nèe do, à fee soo rii faɔ̀ ?»

42 Tɔ̀un, è sèè è dzin Yesù sa rà ci: «Yesù, a ye na a tsuù a re màsàbe tsɛ watsi riì bwèy, a taa to n ne.»

43 Yesù yè dzin à ra ci: «Sààben na, mun nì ci a ra, ke ko e sa, wo nà bà ni mun ka àrìjinɛɛ̀ doùn.»

Yesu yè e xɔn bou min niì

44-45 Ayìwà, bwèè nàu wɔ sènfi watsi riì bwèy, bwèè yè kuu. A kuuŋmaà, tɔ̀ yeè tsitsii brìsi wɔ jàmaàn min niì sapɛ. È watsi daman fa tà tsuru, fɔ ɲɛ̀rɛɛ̀rà yè bè tsyɛnbe. Tà doùn, vya rìi Ŋaablà re gbà blàa doùn fii rèè fi kùnuɔ̀n, tɔ̀ yeè vyɛ̀ e shiɲaanfi pa, è bo jìran nɔ̀n, è nà dzɔn nɔ̀n.

46 Tɔ̀un, Yesù yè e vu bo fààn na ci: «Mun Fàà, min xɔɔn wɔɔ̀ wo suun.»

Àwà, Yesù twɛy gooma reè dè dòu min niì, è xɔn bo.

47 Tɔ fau min niì, kaadzin jɛrɛ̀ blàtsi rìi na tsìiŋnà mɔn, tɔ tɔ̀ jàu, è tsoo dzi ɲɛn Ŋaablà tsɛ, è dzin ci: «Sààben ci è de, nèe kpir'lee na mòdzin tereonma nì !»

48 Àwà, twɛy goo rèè faa watsi riì bwèy, jàma brìsi rìì na naɔ̀ e tsiì mɔn, yè bà siɛ̀n faa. Tɔ̀un, goo nìi fau, è jaadzin yeè ɲɛn tɔ̀ mà. È tɔ̀ jàu min niì, è taama ŋununbeuma yè e re tsii shi rèè kun, yè e kungɔ laban beè.

49 Yesù dzyèèsi rèè, ko tàan nìi reè y'à sàn mà jiu è bo fɔ Galile mar'lɔn, twɛy yè e tsiì jeenà, yè goo rèè fakɔɔn siɛ̀n.

Yesù fùàn wɔɔ̀ goo rèè

50-51 Àwà, kpiri sɔn na ni, tɔ̀ tsoo yè bà ci Yusufù. À na boò wɔ̀ sɔn ɲan, ci Arimate Yude mar'la ɲàn. Tɔ̀ kpir'la na mòdzin jaawuen è bà tereòn sa. À na Ŋaablà re Màsàbee fa watsia rìì màshua. À sa na dzyèèsìbee mòdzin neè rè kitsikunun kuru blàa mòdzian sɔn ni. À kòòsi kitsikun'neè byɛ̀un nìi mà, ci è fa Yesù rà, tɔ̀ na ba à sàò waa.

52 Tɔ̀un, è bè Pilatsì kpɛyn, è b'a màfyɛ̀n, ci è Yesù fùàn sìn wò ra.

53 Pilatsì na e nɔn waa. Àwà, Pilatsì yè e tsiìŋ, Yusufù yè bè Yesù fùàn jàà bo gɔɔ̀ rà, à y'à kasange. A tɔ̀ fau, à y'à sen be wɔ fùn kɔɔ sɔn ne, tɔ̀ yeè bà na ɲɛɛna faà ɲàn, a ci kpankɔɔ. Fùn pɛn naà wɔ jaɔ̀ tɔ̀ kɔ̀ɔ̀ rèe re ŋe waa.

54 À na è re ɲànwɔ siɛ̀ jɔɔnwɔɔ jisee ɲɛ̀rɛɛ̀ rɔ̀n nì. Ɲànwɔ siɛ̀ dzii kun bwèy na wɔɔ nòn.

55 Àwà, tàan nìi reè Yesù sàn mà ji nau, è bo fɔ Galile mar'la ɲàn, twɛy yè e gban Yusufù rà, yè bè fùn kɔɔ siin, yè Yesù fùàn ɲɛn'n kur'la siin.

56 Tà shɔ̀ùn, yè e kpɛyn sèè be e re tsii. È bèu wɔ, yè mà yɛ̀ ɲinin kinin dziu rèè ko làtsìkɔrɔ kinin dziu rèè lamɔnɔ̀n tsùù Yesù fùàn raa. Àwà, ɲànwɔ siɛ̀ wɔu, yè e ɲanwɔ, a ci Ŋaablà dzugooma xɔɔ̀ ci è fa nìi tsuru.