Luc 22

Yesù jàànfamàà

1 Àyìwà, dzyèèsìbee mòdzin neè rè sɛr'lìi na ni ci Geren n tsɛ, è na tɔ̀ kir'là sa ci buru fu bɛɛ sɛr'là. Àwà, tɔ̀ buru fu bɛɛ sɛr'là fa watsi na e kpɛrɛ̀ naɔ.

2 Nìi saaka jɔɔndzin neè, ko sàrìyà kaamoo reè, twɛy na jaa rìì gaa, nìi nà à to yè Yesù kuunma tàrà, y'à vu. Ŋà, è naà à tɔ̀, è nà nìi fa waa, kàtsu jàmaà nà nìi fa, è na shiɔ̀ tɔ̀ jɔɔn.

3 Tɔ̀un, Yesù rè kàràndzin teeŋ fii rèè ɲàn, nìi tsoo ci Yudà Sikariyɔsika kpir'là, Sùtana yè tɔ̀ akir'là lakere.

4 Yudà yè fù tɔ̀ rii ɲàn, è bè saaka jɔɔndzin neè, ko Ŋaablà re gbà blàa kplatsuubaa rèè jɔɔndzin neè kpɛyn. À nà dzi Yesù wɔ è suun nìi tsuru, yè byɛ̀n fa tɔ̀ tsɛ.

5 Twɛy jɔɔndzin neè taama dzibe ɲaanfaa suun tà goò rè, yè dzin, ci è dzi à fa tɔ̀ tsuru, ci ye nà ɲɛyn sin à ra.

6 Àwà, Yudà yè e tsiì tɔ̀ ra. Tɔ̀un è maa, è jaa wùù gaa nìi nà à to è dzi Yesù wɔ è suun, jàmaà tɔ̀ mà bà ni à ɲan waa.

Yesù ko e re kàràndzin neè Geren n tsɛɛ̀ sɛrɛ ɲwɛɛ̀n ɲɔun e si re min niì

7 Ayìwà, buru fu bɛɛ sɛr'là jisee yè nà wɔ. Tɔ̀ sii sèè rìì dzyèèsìbee mòdzin neè wù yè sààtòmòrii vu, y'à bà saaka, è bà Geren n tsɛɛ̀ sɛr'là ɲwɛyn.

8 Tɔ̀ ɲan, Yesù yè Piyɛrì ko Yùxanà ka. È dzin è ra ci: «Ye bè Geren n tsɛɛ̀ sɛr'là ɲwɛyn goo jaa bo tsùù mùn ne.»

9 Twɛy y'à tey ci: «Wo sàò to ni mùn yeè b'a jaa bo min na ?»

10 È dzin è ra ci: «Awà, ye ye be dɔ̀n wɔ̀ɔ̀ doùn watsi riì bwèy, ye nà tsi kpiri sɔn ka, yu dziniin ni à kùùn. Ye e gban à kpɛyn, fɔ è be dɔ̀n fɔɔn riì rè.

11 Ye bè dɔ̀n fɔɔn doùn, ye dzin fɔɔntsià rà ci: <Kàrànfaà ci ɲe yè wo tey, ci wò ko e re kàràndzin neè nà Geren n tsɛɛ̀ sɛr'là ɲwɛɛ̀n ɲɔn gbà nìi doùn, ci tɔ̀ gbàà ni min na ?>

12 Tɔ̀un, à nà gbà blà sɔn kpadè ye ra sangasoò tsɛ. Tɔ̀ gbà rèe doùn, ye nà ɲwɛyn ɲɔnmaà màbyɛ̀unma jà, ye ɲwɛyn goo jaa bo mɔn.»

13 Àwà, Piyɛrì ko Yùxanà yè fù tɔ̀un, yè dɔ̀n be. È bèu wɔ, y'à sapɛ ja, jàci Yesù y'à dèu è ra nìi tsuru. Tɔ̀un, yè Geren n tsɛɛ̀ sɛr'là ɲwɛyn goo jaa bo.

14 Àyìwà, ɲwɛɛ̀n watsi nàu wɔ, Yesù ko e re kɛɛradzin dzyee reè yè nà bà Piyɛrì ko Yùxanà tɛ̀y, tɔ̀un, yè ɲwɛɛ̀n dzii kun.

15 È ni ɲwɛɛ̀n nà, Yesù yè dzin è ra ci: «Mun na à dzwɛ rìì jia taki, min nèe Geren n tsɛ rèe sɛr'là ɲwɛɛ̀n ɲɔn ye ka, min kòmànà byɛn.

16 A jà min tɔ̀ dè, mun nì ci e ra, nèe shɔ̀ùn, mun fa à tsuru ɲɔn dɛ fyeu, fɔ jisee riì, tɔ̀ sɛr'là dzuɔn nà bo e shi tsɛ Ŋaablà re Màsàbee gàne rɔ̀n.»

17 Àwà, è yukuun ko e doùn mììnge sen tɔ̀ rii ɲàn, è tswɛ̀y sin Ŋaablà ra, è dzin ci: «Ye nèe tsi, y'a mìn ye e si kɔ̀.

18 Awà, a y'a jà min tɔ̀ fa, mun nì ci e ra, è sen dòònun nà, mun fa nèe mììn ge rèe tsuru mìn dɛ fyeu, fɔ Ŋaablà re Màsàbee fa watsi yeè bè wɔ.»

19 Tà shɔ̀ùn, è buru sen, è tswɛ̀y sin Ŋaablà ra, à y'à kùnùn kùnùn, à y'à tanan è ra, è kòmànà dzin ci: «Nèe mun gɔɔ̀n rìì yɛ nèe, nìi nà bo saaka ye re gooɲaan tsɔ̀saan ɲàn. Ye nà bur'la tan'nà e si ra, tɔ̀ yeè e taa toò mun ne.»

20 Tɔ̀ fau'n kuru soo rà ɲwɛɛ̀n ɲɔn dòuma shɔ̀ùn, Yesù yè yukuɔn ko e doùn mììnge sen kɔn, è dzin ci: «Nèe mun tsìɛn nì yɛ nèe, nìi nà kon ye re gooɲaan tsɔ̀saan ɲàn. Dzyèèsìbe riì kùnuun dan, tsììn nee nà tɔ̀ rii lamɔnɔ̀n yeu.

21 Awà, y'a siin, mòò riì nà mun jàànfa, tɔ̀ sa ni mìin ɲwɛɛ̀n nà mun ka.

22 Awà, Adamà dziàn kpɛ̀ynto nà san, jàci Ŋaablà ci è fa nìi tsuru. Ŋà, à jàànfaà nà bo wo mòò riì ɲàn, wo raà barau !»

23 Kɛɛradzin neè tɔ̀ goomaa myɛ̀un min niì, yè e maa yè e si tey tey bèe tɔ̀un, ci tsì rii to yè bà nà nà tɔ̀ goò fa ye ɲan sa.

Yesù rè kɛɛradzin neè ci min niì, ye ɲan mòò riì ni jɔɔn

24 Ayìwà, sɔ̀swɛy xɔù sɔn yeè nà fù Yesù rè kɛɛradzin neè ko e si fi. Tɔ̀ sɔ̀swɛɛ̀ doùn, è na ni à re, ye y'à tɔ̀, ye sapɛ ɲan mòò riì ni jɔɔn.

25 Yesù yè dzin è ra ci: «Màsa niì reè tsùuŋnà jàmaàn rèè kùùn yè è màrà, twɛy fààn ɲinaɔn e re jàmààndzin neè mà. Nìì reè to ni fàan nà twɛy jàmàan rèè tsɛ, twɛy ci ye yè bà kiriɔ, è ra "goowuu fa reè".

26 Ŋà, nìi ye, à na wù y'a fa tà tsuru waa. Àwà, ye ɲan, mòò riì ni jɔɔn, tɔ wù, è bà a ci ye ɲan mòdzin kiɲaaniàn. Mòò riì to ni kùntsììbee rà, à wù, tɔ̀ yeè bà ni à ci faagoofadzian.

27 Tà doùn, mòò riì ɲwɛɛ̀n ɲɔɔ̀n, ko nìi ɲwɛyn nèe sen naà tsùù à re, ye re o, twɛy mòkun fiɛ̀ ɲàn, tsì rii blà tsi mà ? Ɲwɛyn nèe sen tsuɔ mòò riì rè, à y'à ɲɔn, à na tɔ̀ ɔ̀ ? Àwà, mun ni ye fi, a ci ɲwɛɛ̀n sen tsuùbaà rìì !

28 Goo gè o ge mun tàrau, à sɔn na fa ye shɔ̀ùn waa.

29 Tɔ̀ doùn, mun fà Ŋaablà e re Màsàbee labau mun na nìi tsuru, mun sa y'a labau ye ra tà tsuru.

30 Tɔ̀ kamà, ye nà ɲwɛɛ̀n ɲɔn, ye yè e min mun ka n ne màsàbee gàne rɔ̀n. Ye to nà bà tsùuŋnà màsà gbaniin ì tsɛ, ye yè kitsia kùnùn Isirayɛlì fàdzìn kuru teeŋ fiɛ̀ mòdzin neè tsɛ.»

Yesù ci Piyɛrì nà dzin min niì, ci wò na wò tɔ̀ waa

31 Tà shɔ̀ùn, Tsìfa Yesù yè dzin Shimɔ̀n nà ci: «Shimɔ̀n, Shimɔ̀n ! A yɛrɛ kun: Sùtana y'à gaaŋnà, ci wo nà ye sapɛ ɲan yuuyuu siin a ci mòo shìmàndzin yuuyuu boò e ɲaan ɲàn nìi tsuru.

32 Ŋà, mun Ŋaablà mafyɛɔ̀n wo re, sànko wo ɲɛn niì faɔ̀ Ŋaablà ra, tɔ mà bo wo ɲan waa. Wo ye na bà a yɛr'laa watsi riì bwèy, wo yè sèè na mun na, a koòsì dzyee reè màxɔ̀n.»

33 Shimɔ̀n yè dzin à ra ci: «Tsìfaà, à bàu wo jikɔɔn kàso rìì doùn ò, à yɛ̀rɛ̀ to bàu wo san nì ò, à ni mun sa ma, mun y'à fa wo ka.»

34 Yesù yè dzin à ra ci: «Piyɛrì mun nì ci a ra, sani tsɛ̀keen yè ben she, wo nà bà à dè jaa zhììgi faɔ̀, ci wo na mun tɔ̀ waa.»

35 Tà shɔ̀ùn, Yesù yè dzin e re kɛɛradzin neè rà ci: «Mun ye ka bèu jìɛ̀ rà watsi riì bwèy ɔ, min bà na dziɔn ye ra, ci e maà ɲɛyn jia gè sen, e maà bɔ̀tɛ sen, seereyn kpɛrɛkuru ì to ma bà ni ye re, ye bèu, gèè sɔn bèu gba ye mà ɔ̀ ?»

Yè dzin ci: «Gèsɔn pɛn na gba ɲe mà waa.»

36 Yesù yè dzin è ra kɔn ci: «Awà, dòònun, ɲɛyn jia gè ye ba ni a moò riì rè, à sen. Bɔ̀tɛ ye ba ni a moò riì rè, à sen. Kaa faa mùnùn gbaan ma ba ni a moò riì rè, mɛ̀yɛ bla riì ni a re, tɔ̀ gɔɔ e soo fi.

37 A y'a jà mun tɔ̀ dèe, à sɛbɛɔ̀n Ŋaablà re Goomaa doùn nèe tsuru ci: <Y'à sa dzii jiu goo koron fa reè ka>. Àwà, tɔ̀ gooma niì sɛbɛunma yɛ nèe, fɔ tɔ̀ yeè mun tàrà. Tà doùn, à goò fa watsia tsyɛnbe naɔ.»

38 Kɛɛradzin neè yè dzin à ra ci: «Tsìfaà, kaa faa mùnùn gbaan fii yɛ nèe.»

Yesù yè dzin ci: «Tɔ̀ y'a boò.»

Yesù Ŋaablà mafyɛ̀un min niì, yè bà ni Oliviku rèè jèèn tsɛ

39 Àwà, Yesù yè bo tɔ̀ rii ɲàn, è dɔ̀n be Oliviku rèè jèèn rà, jàci à dɛ̀rɔɔ̀ à y'à faa nìi tsuru. Tɔ̀un, à re kàràndzin neè yè e gban à kpɛyn.

40 È bèu wɔ mɔn, Yesù yè dzin è ra ci: «Ye Ŋaablà mafyɛ̀n, sànko Sùtana ye ba e sɔn màsiɛ̀n, à mà dzi e dzuun waa.»

41 Tɔ̀ dè dòumaà shɔ̀ùn, è ma bo è ra, è bè jeenà dɛyn, è bè e kunun gban, è Ŋaablà mafyɛ̀n.

42 À ci: «Mun fàà, è ba a sao, byɛnbe riì nàkɔɔn yɛ mun tàrà, à dàn gbànbe n na. Ŋà, mun naa sào to mà fa dɛ, wo raà rìì yè fa.»

43 [Tɔ̀un, Ŋaablà re mɛ̀rɛ̀kɛɛ̀ sɔn yeè bo na jìrànxɔ rɔ̀n, è nà e yɛrɛ kpadè à ra, è fààn wɔ à ɲan.

44 Tɔ fau, Yesù yè sɔn ba màfyɛɛ̀n tɛ̀y ŋe, kàtsu à duungoo na dòunà, fɔ è bè geren, à taama yè bà na ŋunun. Yesù ni Ŋaabla mafyɛɛ̀n nà, à màŋmunà yua bèu jàa nèe tsuru, a ci tsììn twɛynkɔɔn dzɔn nɔ̀n.]

45 À nàu Ŋaabla mafyɛɛ̀n fa do watsi riì bwèy, è fù è nà e re kàràndzin neè kpà. A nàu wɔ, à y'à jà, taamaŋununbe ɲaanfaa suun, twɛy sapɛ cìiŋ.

46 E dzin è ra ci: «Ye ciɛ̀ feera ? Ye fù, ye Ŋaablà mafyɛ̀n, sànko Sùtana mà nà dzi e dzuun, è dɔn fabɛy goo ɲan waa.»

È Yesù kuun min niì

47 Àwà, Yesù ni tɔ̀ goomaa nà, jàma sɔn yeè nà e kungɔ bo. Yesù rè kɛɛradzin teeŋ fiɛ̀ ɲàn, nìi tsoo na ci Yudà, tɔ̀ rii na e ji naɔ jàmaà jɔɔn. È nàu wɔ Yesù ì tsɛ min niì, Yudà yè e kpɛrɛ̀ Yesù rà, ci wo nà à tswà a ci mòò yè e dzunwɛynsi tswaà nìi tsuru.

48 Tɔ̀un, Yesù yè dzin à ra ci: «Yudà, wo nà Adamà dziàn jàànfa ɔ, wo yè sèè kɔn, wo nà à tswà a ci a dzunwɛynsi kɛ ?»

49 Àwà, Yesù dzyèèsi rèè y'à jaa tɔ̀u watsi riì bwèy, ci goo rìi nà fa, yè Yesù tey ci: «Tsìfaà, mùn dzia e re kaa faa mùnùn gbaan gbaan neè ka banbwee fa ɔ ?»

50 Tɔ̀un, è ɲàn mòò sɔn yè e raa mùnùn gbaan ka Yesù kunbaà sɔn naa sirama si jaa re raa tor'là sen bo mɔn caù. Tɔ̀ kpir'liì toro kùnuun, tɔ̀ na saaka jɔɔndzin blaa raa faagoofadzian sɔn.

51 Yesù yè dzin tɔ̀un ci: «Y'a to tà tsuru.»

À tɔ̀ dèu min niì, è dzyɛn kpir'la tor'là rà, à y'à cɛrɛmabe e shɔùn.

52 Tɔ̀un, nìì reè na naɔ̀ Yesù kun, tɔ̀ yeè bà saaka jɔɔndzin neè, ko Ŋaablà re gbà blàa kplatsuubaa rèè jɔɔndzin neè, ko bɔɔ rèè, Yesù yè dzin twɛy rà ci: «W'e jà, ye naɔ̀ kaa faa mùnùn gbaan gbaan ì, ko kɔ̀n ì ka mun kpɛyn, a ci mun sa gookoronfabaà sɔn ni.

53 Mun naà ni ye ka Ŋaablà re gbà blàa fɔɔn doùn jisee sapɛ ɔ ? Feera ye na mun kun tà bwèy ? Àwà, dòònun ye raa watsia wɔu, tsitsiɛ̀ fàan watsia yè wɔ.»

È bèu Yesù ka saaka jɔɔndzin blaa rè min niì

54 Àyìwà, yè Yesù kun tɔ̀un, yè dɔ̀n be à ka saaka jɔɔndzin blaa rè gàne rɔ̀n. Piyɛrì yè to jeenà, tɔ̀ yeè è kɔ̀rɔ̀n jìì beè.

55 Àwà, è na sà sɔn wɔɔ fɔɔn shiɲaanfi, mòdzian yè bà e tsuuŋnà, yè tɔ̀ laguru. Piyɛrì bèu wɔ, à sa yeè bè e tsuù twɛy mòdzin neè ka.

56 Faagoofadzin taànmɛ̀yn sɔn nàu Piyɛrì tsùuŋma jà mɔn sà vyeè rà, à y'à lamɔnɔ̀n siin, è dzin ci: «Nèe kpir'lee sa na ni ko à ka !»

57 Ŋà, Piyɛrì yè e sɔ̀swɛy, è dzin à ra nèe tsuru ci: «Mun na nèe kpir'lee tɔ̀ dɛ.»

58 Dɛ̀ɛ̀ninii tà shɔ̀un, mòò kpɛrɛ y'à jà kɔn, tɔ̀ yeè dzin ci: «Wo sa yeè è sɔn ni !»

Piyɛrì yè dzin tɔ̀ rii ɲàn ci: «Aa, ɔɔɔn mun na è sɔn dɛ !»

59 Watsi soo tsuru dɔ̀unma tà shɔ̀ùn, mòò kpɛrɛ yè nà à dè xɔbe nèe tsuru ci: «Sɔ̀swɛy na ni à ɲan waa, nèe kpir'lee sa na ni à ka. Tɔ̀ nìn yè bo à ra, à sa Galilekaa sɔn ni.»

60 Piyɛrì yè kaba ci: «Ee kpiri, wo fee dèe nèe tsuru ?»

Piyɛrì ni tɔ̀ goomaa nà, tɔ̀ watsi soo ɲàn tsɛ̀keen yè ben.

61 Tɔ fau min niì, Tsìfa Yesù yè e jaa kere Piyɛr'là, à y'à siin to. Tɔ̀un, Piyɛrì taa yeè to, ci Yesù na à deò wò ra nèe tsuru ci: «Sani tsɛ̀keen yè ben she, wo nà bà à dè jaa zhììgi faɔ̀, ci wo na mun tɔ̀ waa.»

62 Piyɛrì yè fù bo mɔn tɔ̀ rii ɲàn, è bè gɛɛy da rɔ̀n cèreoma.

63 Awà, Yesù ni nìi reè suun, twɛy y'à ɲanŋmɛɛ̀n, y'à baan.

64 Yè do, y'à jaà shì, y'à ban, y'à tey ci: «Tsì rii soo wo baun, à tsìfa dè mùn na ?»

65 Y'à ɲɛ̀ɛn gooma ɲaan ɲaan giri kpɛ̀rɛ̀kuru ì ka.

66 Àyìwà, jià nàu seey min niì, dzyèèsìbee mòdzin neè rè kitsi kunun kuru blàa mòdzin neè yè e si ladzyeè. Tɔ̀ na è re bɔɔ rèè, ko saaka jɔɔndzin neè, ko sàrìyà kaamoo reè. Tɔ̀un, yè Yesù kiri bè twɛy rè.

67 Àwà, Yesù nàu wɔ, yè e maa y'à teè. È ci: «Wo rìì ye ba Ŋaablà Jaara Modzìàn, à dè mùn na.»

Yesù yè dzin è ra ci: «Mun y'a dè ye ra, ye fa ɲɛn à ra waa.

68 Mun to ye ye tey goo soo ma, ye fa à ɲancinan mun ne waa.

69 Ŋà, è sen dòònun nà, Adamà dziàn nà e tsuù Dzitsi Ŋaablà sirama si jaa rè.»

70 È sapɛ yeè dzin tɔ̀un ci: «Tà bwèy, wo rìì Ŋaablà Dzin Kpir'la kɛ̀ ?»

È dzin è ra ci: «Ye yɛ̀r'leè sa to yɛ à dèe nòn ɔn, à mun nì.»

71 Àwà, yè dzin tɔ̀un ci: «À na wɔɔ̀ shɛɛrɛ gaama dɛ, nìi bou à dzu, ɲe yɛ̀r'leè tɔ̀ myɛ̀un !»