Luc 21

Fùnshɔ̀ùntaan gbakɔɔn rè saakaà goò

1 Awà, ɲɛyn jia ge ì na ni Ŋaablà re gbà blàa doùn, mòdzian ɲɛɛn jia min niì, Ŋaablà re blàbe. Tɔ̀un, è Yesù to gbà blàa doùn, è nà e kuùn sen, è lagur'la siin. Tɔ̀ siɛ̀n doùn, è nàfòròtsi ì jà, twɛy yè e raa blàbè ɲɛɛ̀n jia ɲɛyn jia gèè doùn.

2 È fùnshɔ̀ùntaan gbakɔɔn sɔn sa ja, tɔ sa ɲɛɛn tànga fii jiɔ̀ ɲɛyn jia gèè doùn.

3 Yesù yè dzin tɔ̀un ci: «Sààben na, mun nì ci e ra, nèe fùnshɔ̀ùntaan gbakɔɔn ree nìi jiu, à giribeu dzyee rèè sapɛ raa mà.

4 A y'a jà min tɔ̀ dè, dzyee rèè màgoo naà ni ɲɛyn niì nà e re ɲɛɛn ɲàn dɛ, è tɔ̀ rii jiu. Ŋà, tàan rèe ko e re gbaa doùn, è shɛɛ̀n nì jiu, arì ɲwɛyn sɔɔn tsu na ni à suun dɛ.»

Yesù ci goo nìi reè nà fa, sani dziɲaan dò bwèy

5 Tà shɔ̀ùn, swey yè nà e maa yè Ŋaablà re gbà blàa goo dèe. E ci à na gè wùbè san. Ci kpàà niì reè ka à jiɔ̀, ko gè nìì reè ni à doùn, yè bà siɔ̀n Ŋaablà ra blàbè ge, twɛy sapɛ yeè bà wùù wuu. Yesù yè dzin tɔ̀ rii ɲàn ci:

6 «Jisee nàa jisee ra, ye jaa yɛ nèe gbà rìi rà nèe, à kpàà dzin soo na naà to soo tsɛ waa. A sapɛ nà jee bo e si tsɛ.»

7 Àwà, yè Yesù tey tɔ̀un ci: «Mùn kàrànfaà, twɛy goo rèè to nà fa watsi kɛn ? Tàànmashɛn kɛnma ni nà è fa watsia kpàdè mùn na ?»

8 Yesù yè dzin ci: «Ye e yɛrɛ kaàwɔ, e maà à to mòò yè e san fìrì waa. A y'a jà min tɔ̀ dè, mòò giri nà nà mun tsoo ka, yè nà dzin, ci ye rìì Ŋaablà Jaa ra Modzìàn, ci dziɲaan do bwey to tsyɛnbeu. Ŋà, e maà e gban twɛy kpɛyn dɛ !

9 Ye na bà kaa goo ɲan gooma reè myɛ̀ɛn watsi riì bwèy, mòdzian yè bà fùa e si kpɛyn, e maà shi waa. Fɔ twɛy goo rèè yè fa rii ŋe, ŋà, tɔ̀ na naà bà à kpàdèe, ci dziɲaan dòkɔɔn ni yɛ tɔ̀ nɔ̀nkɔɔ rɔn waa.»

10 E dzin kɔn ci: «Kaà nà bà fùa kun neè ko e si fi, jàmaan ko jàmaan yè bà fùa e si kpɛyn.

11 Dzɔ̀nxɔ̀ɔ̀mà kpinin bla blaà nà bà ni. Dzua ko ɲìnìn ɲan ɲaun nèè nà bà ni gàne giri ɲan. Tɔ̀ nìn yè bo à ra, shiɲaan goo giri sa nà bà ni, ko tàànmàshɛn bla bla ì yè bo jìrànxɔ rɔ̀n.

12 Ŋà, sani twɛy goo rèè sapɛ yeè fa, è nà ye kun, yè ye byɛn cèreoma. E nà bè ye ka waajibi fa gba rèè doùn, yè kitsi kunun ye tsɛ. Yè ye ji kàsoò doùn. E nà bè ye ka màsa ì, ko jàmààn jɔɔndzin ì rè. Tɔ̀ sapɛ nà fa ye ra mun kamà.

13 Twɛy goo rèè rìì nà à to, ye yè bà mun shɛɛrɛ mòdzian jaa ra.

14 Àwà, ye e taa to goo soo re, nìi yɛ, ci ye nà gooma niì dè, tɔ̀ yeè ye tsi, e maà tɔ̀ ka e vyɛɛ̀y waa.

15 Tà doùn, mun yɛ̀r'la rìì nà akiri goòmà ì wɔ ye dzu, nìi nà à to ye ɲan rèè fa dzi goomaa latsi ye dzu, yè nà dzin ci yè ye sɔ̀swɛy.

16 Arì nìi ye ker'làgè rèè, ye tseyn nèè, ko ye tsìnà rèè, ye neema reè, ko ye dzunwɛynsi reè, twɛy sa nà ye jàànfa. Tɔ̀ doùn, mòò giri nà vu ye ɲan.

17 Mun kamà, ye goo nà xɔbe mòdzian sapɛ ma.

18 Ŋà, tà ko e sa ra, arì ye kùngwɛyn dzin soo fa fìrì waa.

19 Y'a tsi e ma, tɔ̀ rii nà ye xɔɔn tsi gbee.»

20 Yesù yè dzin kɔn ci: «Ye na à jà kaadzin ì Yerusalɛmùn wɔ̀ɔ̀ laguruɔ watsi riì bwèy, ye bà à tɔ̀, ci à ci bwèy rìì wɔɔ tà bwèy.

21 Tɔ̀ watsia ye wɔ, à y'à tàrà nìì reè ni Yude mar'la ɲàn, twɛy yè vwɛ̀ɛ̀y be jèn nèè kpàkèrè. Nìì reè ni Yerusalɛmùn wɔ̀ɔ̀ doùn, twɛy yè e dan gbànbe à ra. Nìì reè to nà bà ni wɛ̀ɛ̀rìì reè ɲàn, è mà dzin, ci ye nàa Yerusalɛmùn wɔ̀ɔ̀ doùn waa.

22 Twɛy jisee reè rìì doùn, Ŋaabla nà tɔ̀ gooɲaan ka e wɛɛy bo e re mòò rèè ɲàn. Tɔ̀ tsuru nìi sapɛ sɛbɛɔ̀n à re Goomaa doùn, tɔ̀ nà bo e shi tsɛ.

23 Twɛy jisee reè sii sèè, tàan fwɛynma reè, ko dzin ni nìi reè suun, à na naà bà byɛnbe san twɛy tsɛ ! È nà byɛn, kàtsu taama ŋununbe bla nà jàmaàn ko e kur'la sapɛ tarà, Ŋaablà re vununta kpàdèkɔɔn doùn jàmaàn mòdzian nà.

24 Swey nà vu kaamunun ka, jàmààn dzyee reè sapɛ modzin ì yè swey kun bè e re. Kaafir'leè nà Yerusalɛmùn wɔ̀ɔ̀ tɔ̀rɔ̀ e sao, fɔ è bo watsi yeè bè wɔ à doùn.»

25 Yesù yè dzin kɔn ci: «Awà, Ŋaablaxɔɔ̀ rà, bwèè, ko kuɔ̀, ko swɛyn nèè, tàànmashɛn ì nà bà ni twɛy rà. Dzɔ̀nxɔɔmaà tsɛ mòdzian sapɛ duungoo do ɲaanfaa suun kòòyua fù tèynkɔɔn, ko à ku reè màànkaan blàbee rè, è sapɛ shiuma blà rii nà bà ni.

26 Goo nìì reè nà bà ni dzɔ̀nxɔɔ̀ tsɛ, swey ɲɛyn shɛn ɲaanfaa suun twɛy goo rèè kɛ̀sɛɛ̀ rè, è nà cìrì. Tɔ nà fa, kàtsu gè o ge ni Ŋaablaxɔɔ̀ doùn, è sapɛ nà yuuyuu bo e shɔùn.

27 Tɔ̀un, Adamà dziàn nàkɔɔn nà jà ŋaamun'na tsɛ, dzi brisi ko blàbe brisi yè bà ni à ɲan.

28 Àwà, ye na twɛy goo rèè sapɛ dzii kuunma jà watsi riì bwèy, ye e kuùn sen, ye siin fa jìran, kàtsu ye tsi watsia rìì nà bà e kpɛrɛ̀ naɔ tà tsuru.»

29 Tà shɔ̀ùn, Yesù yè nèe gooma bɔɔ rèe ka tàlen ban è re. À ci: «Gɔ̀ɔ rìi kir'la fiigiku, ye yè tɔ̀ kuà ko gɔ̀ɔ̀kù dzyee reè siin bè ŋe siin.

30 N ci ye yè à jà, ci yè e maaŋnà yè tsɔɔ watsi riì bwèy, ye bàa à tɔ̀ ci ŋaayua tsyɛnbe naɔ.

31 Tɔ̀ fau'n kuru soo rà, ye na à jà twɛy goo rèè faa watsi riì bwèy, ye bà à tɔ̀, ci Ŋaablà re Màsàbee fa watsia tsyɛnbe naɔ.

32 Sààben na, mun nì ci e ra, ɲe bwèy rèe ɲan mòdzian sapɛ fa san dò fyeu, twɛy goo rèè mà bà faɔ̀ waa.

33 Ŋaablaxɔɔ̀ ko dzɔ̀nxɔɔ̀ sa nà dò. Ŋà, nìi mun dzugoomaa, tɔ̀ fa dò ja kuraa.

34 Ye e yɛrɛ kun ! E maà to ji tsuù ɲwɛyn bla bla ɲɔɔn, ko mìɛn ko dziɲan kpɛyn màànkàn goo reè vyɛ̀ɛ̀ rà, fɔ Adamà dziàn nà jisee yè bè bàràma e ɲan waa.

35 E maà à to tɔ̀ yeè e tarà waa, kàtsu tɔ̀ jisee nà bàrà dzɔ̀nxɔɔ̀maà tsɛ mòdzian sapɛ ra, jàci myɛ̀ɛn shu kuàn nìi tsuru.

36 Tà doùn, e maà cìi waa, ye Ŋaablà mafyɛ̀ɛn kudɛyn. Tɔ̀ ye fa, ye nà dzi fààn tarà, ye yè goo nàkɔɔn reè sapɛ ku e ɲan. Adamà dziàn to ye na nà, ye nà dzi e tsiì à jaaterema.»

37 Àyìwà, jisee sapɛ, Yesù na nàa mòdzian kàr'na Ŋaablà re gbà blàa fɔɔn doùn bwèy rɔ̀n. Ɲɛ̀rɛɛ̀rà ye wɔ, jèn nìi kir'là, ci Oliviku rèè jèèn, è bo, è bè feèn fa mɔn.

38 Mòdzian sapɛ na swɛ̀ɛ̀y naà Ŋaablà re gbà blàa fɔɔn doùn gbishɛɛ̀mà nɔ̀n, yè nà e toro wɔɔ̀ à re.