Luc 20

Yesù teron e re goo rèè faa shi taràmaà mà min niì

1 Awà, sii sɔn see, Yesù na mòdzian kàr'na Ŋaablà re gbà blàa fɔɔn doùn, è bà è toro kɔ̀ɔ Kùnàgoo Dziɔ̀ rà. Tɔ̀un, saaka jɔɔndzin neè, ko sàrìyà kaamoo reè, ko bɔɔ rèè yè nà à kpɛyn.

2 È nàu wɔ, y'à tey ci: «A baɔ̀ dzùrù wo yè bà nèe goo rèe reè faa ? Tsì rii twɛy faa shi wɔɔ wo suun ? A dè mùn na.»

3 Yesù yè dzin è ra ci: «Mun sa nà ye tey goo soo ra.

4 Tsì rii Mòdzìn Jààràfoobaa Yùxanà ka nau, ci è nà mòdzian jaara foò Ŋaablà re shia goò rà ? À Ŋaablà rii làà, à mòdzian nì ? Ye tɔ̀ dè n na.»

5 Tɔ̀un, yè e maa, yè dziàn è ko e si fi ci: «Ɲe ye dzin ci Ŋaablà rii y'à ka nau, à nà ɲe tey, ci feera ɲe to na ɲɛn Yùxanà nà.

6 Ɲe to ye dzin ci mòdzian nì y'à ka nau, jàmaà ko e kur'la nà ɲe dzyɛn vu ko kpàa ì ka, kàtsu è sapɛ ɲɛɔ̀n à ra, ci Yùxanà Ŋaablà re kɛɛra rii.»

7 Yè dzin Yesù rà tɔ̀ rii ɲàn ci: «Nìi y'à ka nau, ci è nà mòdzian jaara foò Ŋaablà re shia goo rèè rà, ɲe na tɔ̀ tɔ̀ waa.»

8 È tà dèu, Yesù sa yeè dzin è ra ci: «Ayìwà, tɔ̀ doùn, nìi nèe goo rèe rèè faa shi wɔɔ mun suun, mun tsu fa tɔ̀ dè ye ra waa.»

Yesù tàlen nìi baun gɔ̀ɔ̀dzuà faagoo fa reè swey tsɛ

9 Àwà, tà shɔ̀ùn, Yesù yè nèe goo rèe ka tàlen ban mòdzian rè nèe tsuru ci: «Kpiri sɔn na gɔ̀ɔ̀dzu sɔn wɔɔ. Tɔ̀un, à ci e ye bè jìì rà, à nà bè watsi fa min niì, è gɔ̀ɔ̀dzu rèe kɛ̀ɛ̀yfa to swey mà, sànko wò ko twɛy yè nà à tɔ̀n'nà boò e si ra.

10 A dɔ̀n bèumaà shɔ̀ùn, àwà gɔ̀ɔ̀dzian bo watsi yeè nà wɔ. Tɔ̀ watsi wɔu, à gɔ̀ɔ̀dzuà kɛ̀ɛ̀yfa too nìì reè mà, è to mɔn, è re mɔn faagoofadzian soo ka na twɛy rè, sànko nìi wò raa nìan, yè tɔ̀ sìn. Awà, tɔ̀ faagoofadzian nàu, gɔ̀ɔ̀dzuà faagoo fa reè yè tɔ̀ ban, y'à si xɔɔma baji be.

11 Tà shɔ̀ùn, gɔ̀ɔ̀dzutsià yè faagoofadzin kpɛrɛ ka na kɔn. Tɔ̀ sa nàu wɔ, yè tɔ̀ sa ban, y'à ɲɛ̀n, y'à si xɔɔma baji be.

12 Tɔ̀un, gɔ̀ɔ̀dzutsià yè e re faagoofadzin neè zhììgira ka na kɔn. Tɔ nàu wɔ, yè tɔ̀ ban, fɔ y'à mɛ̀ɲɛ̀n, y'à kaa bo dzù rɔ̀n.

13 Dzùtsià yè dzin tɔ̀ rii ɲàn ci: <Mun nà fee rìì fa ? Tà doùn, mun dzin kpir'liì goò dzi mun na, fɔ è bè geren, mun nà tɔ̀ ka bè è re. Gè sɔn ge, è nà blà wɔ tɔ̀ ɲan>.

14 Tɔ̀un, è dzin kpir'la ka bè. Gɔ̀ɔ̀dzuà faagoo fa reè dzùtsià dzin kpir'la nàkɔɔn jau min niì, yè e maa yè dziàn e si ra ci: <Cɔ ! Mòò riì nà nà à shɛɛ̀n sen sii sɔn see, tɔ̀ rii nàkɔɔn yɛ nèe. Y'a wa, mùn y'a vu, sànko gɔ̀ɔ̀dzuà yè bà mùn naa>.

15 Tɔ̀un, à nàu wɔ è tsɛ, y'à kun, yè bo à ka gɔ̀ɔ̀dzuà bònè, yè b'a vu.»

Àwà, Yesù tà goomaa dè dòu min niì, è dzin jàmaà nà tɔ̀ rii ɲàn ci: «Ye re o, dzùtsià gɔ̀ɔ̀dzuà kɛ̀ɛ̀yfa too nìì reè mà, à nà fee rìì fa twɛy rà ?

16 Àwà, dzùtsià nà nà è sapɛ vu rii, è re gɔ̀ɔ̀dzuà kɛ̀ɛ̀yfa mòò kpɛrɛkuru ì mà.»

Mòdzian tɔ̀ goomaa myɛ̀un min niì, yè dzin ci: «Ee, Ŋaa yè mùn kishi tà tsuru mà !»

17 Tɔ̀un, Yesù yè è siin, è dzin ci: «Gooma sɔn sɛbɛɔ̀n Ŋaablà re Goomaa doùn nèe tsuru ci:

Gbà ji reè kpàà niì maaŋ,

tɔ̀ rìì nàu sèè, è bà gbàà nɔ̀nkɔ̀n kpaa,

nìi ni kpàà dzyee reè sapɛ jɔɔn.

Ye re o, tà goomaa dzuɔn fee rìì ?

18 Mòò o moò kpɛ̀ynto ye mɛɛy kpàà ree tsɛ, tɔ̀ min niì sapɛ nà kɛɛy kɛɛy. Kpàà ree to ye mɛɛy mòò riì tsɛ, à nà à ko kpankpan sa ba soo.»

E gooma niì ka myɛ̀ɛ̀n ɲɛun Yesù jɔɔn kɔnsɔɔn goo tsɛ

19 Awà, Yesù tà goomaa dèu tà tsuru min niì, tɔ̀ gàne soo ɲàn, sàrìyà kaamoo reè, ko saaka jɔɔndzin neè yè e maa, y'à gaa kunàma, kàtsu, è na à tɔ̀, ci Yesù gooma ree ka ye rìì vuɔn. Ŋà, yè shi jàmaà jɔɔn.

20 Tɔ̀un, yè e maa yè Yesù kààwɔɔ̀. Awà, yè siin tɔ̀un, yè namara moo ì ka à kpɛyn. Tà tsuru twɛy ye be wɔ, yè e yɛrɛ ba mòdzin cereoma ì, gè riì ni à to yè dzi goomaa sɔn ka myɛ̀ɛ̀n ɲɛn Yesù jɔɔn, y'à kun tɔ̀ ka. Tɔ̀ ye fa, è nà dzi à wɔ fàan suun, tɔ̀ yeè sàrìyaa vwɛ̀ɛy à bòòn.

21 Àwà, twɛy mòdzin neè y'à tey tɔ̀ rii ɲàn nèe tsuru ci: «Mùn kàrànfaà, ɲe y'à tɔ̀, ci wo nìi dèe, ko wo nìi sapɛ kar'na mùn na, à sapɛ tereon. Mòdzian sapɛ soo wo re. Ŋaablà to ci mìn re jaamabee shi jiì nìi tsuru, wo re kàr'nà tɔ̀ sààbeen rìì xu kpadèe.

22 Awà, ɲe nà wo tey ɔ, mùn yeè kɔnsɔɔn sarà Ɔ̀rɔmùn màsà kpiri blàa rè, tɔ dàaŋnà ràa, à na dàaŋnà ?»

23 Ŋà, è kàjaa riì kaà tɔ̀ goomaa ka, Yesù yè tɔ̀ jà. E dzin è ra tɔ̀un ci:

24 «Ye ɲɛɛn tanma soo kpadè n na siin !»

È nàu tɔ̀ ka à kɔ̀, è dzin ci: «Tsì rii ɲɛyn, ko à tsoo ni tanma ree tsɛ ?»

Yè dzin ci: «A Ɔ̀rɔmùn màsà kpiri blàa rìì.»

25 Yesù yè dzin è ra tɔ̀un ci: «Tà bwèy nìi Ɔ̀rɔmùn màsà kpiri blàa raa, ye tɔ̀ sìn tɔ̀ ra. Nìi to Ŋaablà raa, ye tɔ̀ sìn Ŋaablà ra.»

26 Yesù na nìi dèe jàmaà jaa ra, è na dzi fìrìgoo pɛn jà tɔ̀ goomaa ɲàn, è nà à kun nìi ka waa. Ŋà, Yesù rè goomaa bònbàrè see jiu è sapɛ dzii tsɛ rìì, è mɛ̀shɛ̀unma yè to kpleu.

Yesù teron fùn nèè sèè kpunan goo mà min niì

27 Àyìwà, dzinɛ sɔn modzin ì na ni dzyèèsìbee mòdzin neè ɲàn, yè bà twɛy kir'là, ci Sadzusiɲɛn rèè. Twɛy rìì ci e san nòn, sèè kpunan goòmà na ni à ɲan dɛ. Tɔ̀un, twɛy mòdzin neè swey yè nà e kpɛrɛ̀ Yesù rà,

28 y'à tey nèe tsuru ci: «Kàrànfaà, kɛɛra Musà nèe sàrìya ree sɛbɛn tou mùn ne nèe tsuru ci:

<Àwà, kpir'la sɔn ye san, è re tààn to e shɔùn, è ma ba dzin tàraɔ̀ waa, tseyn ye ba ni kpir'lee re, tɔ wù è tàan rèe sen, à y'à bà e re tààn. A wù è tɔ̀ fa, sànko è dzin tàrà tàan rèe ka, tɔ̀ dziin nèe yè bà kpiri sanbaa rèe tsu>.

29 Ayìwà, dzin kpiri ɲɛɛ̀nun na ni kpiri sɔn ne. Nìi dzin kpiri jɔnaa, tɔ̀ yeè tàan màgoo fa. Àwà, è nà san, à na dzin tàrà tàan rèe ka waa.

30 Tɔ̀un, nìi baɔ̀n à ra, tɔ̀ yeè tàan rèe sen. Àwà, tɔ̀ sa yeè nà san à tsu na dzin tàrà à ka waa.

31 Ayìwà, nìi zhììgìraa, tɔ̀ sa tàan rèe seun, tɔ̀ sa raà yè kun tɔ̀ tsuru. Tɔ̀ tsuru fur'lu, fɔ dzin kpiri ɲɛɛ̀nun nèe sapɛ yeè bè dò, è pɛn na dzin tàrà tàan rèe ka waa.

32 Tà shɔ̀ùn, taàn yɛ̀r'la sa yeè nà san.

33 Ayìwà, fùn nèè to ye na sèè kpunan sii rìi sèè o, tààn rèe nà bà tsì rii soo raa keresima ɲɛɛ̀nun nèe ɲan sa ? È soo sookɔɔn sa to y'à sen jau e re tààn !»

34 Àyìwà, è re goomaa shɔ̀ùn, Yesù yè dzin è ra ci: «Dziɲan doùn mìin nɔn ni, kpiri tàan màgoo faa, tàan sa yeè e tsuù kpir'le.

35 Ŋà gbee, tɔ̀ tsuru fa bà ni mɔn waa. Ŋaablà ye na à jà nìì reè wù yè sèè kpunan yè dɔ̀n arìjinɛɛ̀ doùn, twɛy nà to tɔ̀ rii tsuru mɔn. Kpiri fa tààn màgoo fa, tàan tsu to fa e tsuù kpir'le.

36 È fa san dɛ, è nà bà a ci mɛ̀rɛ̀kɛ rèè. E nà bà Ŋaablà dzin ì, kàtsu è saun, yè sèè kpunan.

37 Tɔ̀ doùn, Ŋaablà re kɛɛra Musà yɛ̀r'la y'à dè fyɛɔ, ci fùn nèè nà sèè kpunan. Gɔ̀ɔ̀kùìrii tsuunmaà goo dèu min niì sàà yè bà ni à ɲan, à mùn Tsìfa Ŋaablà kiriu mɔn ci: <Ibraximà rè Ŋaablà, ko Ishakà rè Ŋaablà, ko Yàkubà rè Ŋaablà>.

38 Àwà, Ŋaablà jaama ì rìì lè Ŋaablà, à na fùn ì raa waa, kàtsu twɛy gè o ge saun, è sapɛ jaama ni Ŋaablà re.»

39 Àyìwà, twɛy gooma reè dèumaà shɔ̀ùn, Sàrìyà kaamoo reè swey yè goomaa sen tɔ̀un, yè dzin ci: «Aa kàrànfaà, wo re goomaa wùbeu.»

40 Àwà, è sen tɔ̀ jisee rà, mòò pɛn kùùn naà xɔ è Yesù tey tà tsuru dɛ.

Ŋaablà Jaa ra Modziàn, ko Dawudà fia

41 Tɔ̀un, Yesù yè dzin è ra ci: «Fee kamà, mòdzian yè bà dziàn, ci Ŋaablà Jaara Modzìàn màsà kpiri Dawudà tsua mòdzin ?

42 Dawudà yɛ̀r'la to y'à dèe Zabur'leè sɛbɛɛn doùn nèe tsuru ci:

Mùn Tsìfa Ŋaabla dziun mun Tsìfaà rà ci:

Nà a tsuù n sirama si jaa rè.

43 Nà a tsuù mɔn,

fɔ min b'à ɲan rèè sapɛ wɔ a san dzuun.

44 Awà, Dawudà yɛ̀r'la ye ba Ŋaablà Jaa ra Modziàn kir'là, ci wò Tsìfaà, tɔ̀ y'a kpàdèe, ci à na Dawudà tsua mòdzin basɔùn kɛ̀ ! »

Yesù ci sàrìyà kaamoo reè ni nìi tsuru

45 Àwà, jàmaà sapɛ ni Yesù lamyɛɛ̀n nà, è dzin e re kàràndzin neè rà ci:

46 «Ye e yɛrɛ kun sàrìyà kaamoo reè rà dɛ ! Nìi dzi è ra, yè bà e ɲantsyeere beè mɛ̀yɛ bla bla reè ka e ma, tà ko, yè bà è tsɔ̀ beè blàbèma jàmà gane reè ɲàn. È ba waajibi fa gba rèè doùn, mòdzian jaa nà bà ni è ra tsùùma nìì reè ɲàn, è twɛy rìì gaa beè. Mòò to ye è kiri e re jaaravi ɲwɛyn na, è ye be wɔ, è gaa tsùùma rèè sapɛ ɲan wùù reè rìì là.

47 È fùnshɔ̀ùntaan rèè màniɛ̀n, yè è suun gee sapɛ tsi è ra. Tɔ̀un, yè ba Ŋaablà mafyɛ̀ɛn, è tɔ̀ fa toò rìì fur'lu, yè tɔ̀ ka e juɔ mà mɛnɛn mòdzian mà. Àwà, byɛnbe niì nà ɲɛn è tsɛ tsìɛ̀ sii sèè, tɔ̀ nà ɲanbe, fɔ è bè geren.»