Luc 19

Yesù ko Zakè raa goò

1 Awà, Yesù bèu wɔ Yerikò wɔ̀ɔ̀ doùn, è maa, è wɔ̀ɔ̀ fi shɛɛ̀n.

2 Kpiri sɔn na ni tà wɔ̀ rɔ̀n, tɔ̀ tsoo yè bà na ci Zakè. Awà, Zakè na kɔnsɔɔntsi reè kùntsii rìì, è bà na gètsi sa.

3 Zakè sàò na n'a re, wò jaadzin yeè ɲɛn Yesù mà, wò y'a tɔ̀ à moo riì. Ŋà, è bà ni Yesù jà, tɔ̀ naà dzia fa waa, kàtsu jàmaà na blà, wò yeè bà na kuru.

4 Yesù nà dɔ̀n bo min niì, gɔ̀ɔ̀ku sɔn na ni mɔn shi dziɛ rè, a ci fyɛ̀ɛ̀ku. Tɔ̀un, Zakè yè vwɛ̀ɛ̀y dɔ̀n be jàmaà jɔɔn, è bè tèyn tɔ̀ gɔ̀ɔ rɔ̀n, sànko Yesù ye ba dɔ̀n boo mɔn, wò yeè dzi à jà.

5 Awà, Yesù bèu wɔ à gàneè ka sɛ̀rɛ̀n, è jaà ɲansen, è dzin Zakè rà ci: «Zakè, a tabe jaà bo gɔ̀ɔ rèe ɲan, fɔ min bè n jaà wo re tsii she.»

6 Zakè tɔ̀ myɛ̀un min niì, è tabe jaà bo gɔ̀ɔ̀ rɔ̀n. Tɔ̀un, à taama dzibeuma brìsi yè dɔ̀n be Yesù ka e re tsii rɔ̀n.

7 Gè o ge jaadzin ɲɛun tɔ̀ goò mà, tɔ̀ na byɛn è pɛn mà waa. Y'à ŋùnùnŋun'na e si toro doùn nèe tsuru ci: «Gooɲaan tsìɛ̀ ni mòò riì vu ra, à siin bèu e jaà tɔ̀ rii lè !»

8 Awà, Zakè yè fù tɔ̀ rii ɲàn è tsiì, è dzin Tsìfa Yesù rà ci: «Tsìfaà, mun nà n suun ge reè sapɛ sen, m'a tar'la sìn gbakɔɔn reè rà. Mun to ye ba mòò rè ɲɛyn namaraɔ, mun nà ɲɛyn nee tsuru nààlen sèè sìn à tsìfa ra.»

9 Yesù yè dzin à ra ci: «Wo ko a re fɔɔn re dzin neè sapɛ tsiu she, kàtsu, wo sa Ibraximà tsua dziàn sɔn ni.

10 Nìì reè fìriɔ̀ Ŋaablà re, Adamà dziàn naɔ̀ twɛy rìì gaa, à yè è tsi bo tɔ̀ goò ɲàn.»

Warifyɛɛ kuun'n kur'la tàleèn

11 Àwà, è mòdzian to twɛy gooma reè lamyɛɛ̀n nà, Yesù yè geren goomaa rè ko gooma bɔɔ soo ka. È tsyɛnbeumaà Yerusalɛmùn wɔ̀ɔ̀ rà, mòdzian na à siɛ̀n tɔ̀ ɲan, ci Ŋaablà re Màsàbee nàkɔɔn ni yɛ e yɛrɛ kpadè tà nɔ̀nkɔɔ rɔn.

12 Tɔ̀ kamà, Yesù yè dzin è ra ci: «Màsàdzin sɔn ni bou, ci wo bèe jàmaan gbààn sɔn ɲan, wò yeè bè màsàbee shi gaa mɔn, wò yeè kòmànà sèè na, wò yeè nà e tsuù e re jàmaàn kùùn.

13 À ci e ye bè, è re faagoofadzin neè mòkun tsyeùn kiri, è nà ɲɛyn xɛkɛ soo sin twɛy soo sookɔɔn sapɛ ra. Tɔ̀un, è dzin è ra ci: <Ye nèe ka duru faa, fɔ min bè sèè na.

14 Awà, à goo na xɔ e re jàmààndzin neè mà, fɔ è bè geren. Tɔ̀un, à dɔ̀n bèumaà shɔ̀ùn, twɛy sa yeè siin yè kɛɛra ì fù à kpɛyn, ci yè bè dzin tɔ̀ jàmaan gbaan màsà kpir'là rà, ci ye na gaa à ra, è bà yè re màsa waa>.

15 Twɛy goo rèè sapɛ faumaà ko e raà sa, kpir'la yè màsàbee tàrà, è sèè na e re jàmaàn doùn. À nàu wɔ, à na ɲɛɛn siɔ̀n e re faagoofadzin niì reè rà, è twɛy kiri, è nà è tey, yè ba nìi tàrau tɔ̀nɔ̀n.

16 Jɔ̀naà yè nà, tɔ̀ yeè nà dzin ci: <Kùntsiɛ̀, wo ɲɛyn xɛkɛ rìi sìun mun na, mun faagoò fau à ka, mun y'à tsuru tsyeùn tàrà>.

17 Màsà kpir'là yè dzin à ra ci: <Tɔ wùbeu, wo faagoofadzin wuu. Mun ɲɛn niì fau wo ra nèe goo kiɲaanin nèe kuun'n kur'la doùn wo re, àwà, mun wo tsùuŋ wɔ̀ tsyeùn kùùn, wo yè bà twɛy jàmààntsi>.

18 Tà shɔ̀ùn, faagoofadzin fiiraa yè nà, tɔ̀ yeè nà dzin ci: <Kùntsiɛ̀, wo ɲɛyn xɛkɛ rìi sìun mun na, mun faagoò fau à ka, mun y'à tsuru nùn tàrà>.

19 Màsà kpir'là yè dzin tɔ̀ ra ci: <Awà, mun wo sa tsuuŋ wɔ̀ nùn kùùn, wo yè bà twɛy jàmààntsi>.

20 Tà shɔ̀ùn kɔn soo kpɛrɛ yè nà, tɔ̀ yeè nà dzin ci: <Kùntsiɛ̀, wo ɲɛyn xɛkɛ rìi sìun mun na, à yɛ nèe. Mun y'à shìu vya doùn, m'a lamɔnɔ̀n tsùù.

21 Awà, mun na shiɔ̀ wo rìì jɔɔn, kàtsu m'a jàu, ci wo re goò xɔ. Wo nìi tsuru mòdzin, wo na gè niì tsuùŋnà waa, wo tɔ rii seen. Wo to na shìmàn niì siɔ̀ waa, wo tɔ̀ shìmàndzian nì gaa>.

22 Màsà kpir'là yè dzin à ra ci: <Faagoofadzin ɲaan, mun nà kun wo dèvuà yɛ̀r'la rìì mà, min sàrìyaa vwɛ̀ɛ̀y wo bòòn. Wo na à tɔ̀ ci mun ne goò xɔ kɛ̀ ? Ci mun gè seen mun na nìi tsùuŋnà, min bà shìmàndzin gaa, mun na nìi siɔ̀ waa.

23 Wo to tɔ̀ tɔ̀ ɔ, feera wo na be mun ne ɲɛɛn màrà nàfòrò màrà gba doùn ? Tɔ̀ tsuru, à na dzia tɔ̀nɔ̀n ji e tsɛ mɔn, min nà à ko tɔ̀ tɔ̀n'nà sen>.

24 Awà, nìì reè na ni màsà kpir'là tɛyn, è dzin twɛy rà ci: <Nìi yè e raa ɲɛɛn tsuru tsyeùn tàrau, y'a faagoofadzin ɲaan raà tsi bà tɔ̀ raa tɛ̀y>.

25 Twɛy yè dzin à ra ci: <Kùntsiɛ̀, tɔ̀ raà tsuru tsyeùn ni tɔ̀ re nòn ɔn !>

26 Màsà kpir'là yè dzin ci: <Awà, sɔn ni nìi rè, ge nà bà tɔ̀ raà tɛ̀y. Ŋà, pɛn to na ni nìi rè, kiɲaanin nìi ni à re, à nà fɔn tɔ̀ sa ɲan.

27 Awà dòònun, mun ɲan nìì reè sào naà ni à re min tsuù ye kùùn màsàbee rà, ye nà twɛy sapɛ ka mìin, ye nà è vu n jaa ra>.»

Yesù dɔ̀ùn'n kur'la Yerusalɛmùn

28 Ayìwà, Yesù nàu twɛy gooma reè sapɛ de dò watsi riì bwèy, è ji jàmaà jɔɔn, yè bèe Yerusalɛmùn.

29 È bèkɔɔn nà shia rè, yè bè tsyɛnbe jèn sɔn na, yè bà tɔ̀ kir'là ci Oliviku rèè jèèn. Tɔ̀ y'a tàrà wɛ̀ɛ̀rii fii swey ni tɔ̀ jèèn tsɛ, nìì reè kir'là ci Bɛtsifaazhì ko Betanìn. E ni mɔn, Yesù yè e re kàràndzin neè mòkun fii ka.

30 E dzin twɛy rà ci: «Wɔ̀ rìi yɛ mùn jɔɔn nuu, ye bè mɔn. Ye ye be wɔ, ye nà shùkwɛ̀yn kpèr'nii sɔn shiuma jà mɔn, mòò na tèyn jaɔ̀ nìi tsɛ ŋe waa. Y'a foro, ye nà à ka mìin.

31 Mòò to ye e tey, ci y'a for'là feera, ye dzin à tsìfa ra ci: <Tsìfaà rìì màgoo n'a na>.»

32 Awà, kɛɛra reè yè dɔ̀n be. E bèu wɔ, y'à jà jàci Yesù na à deò è ra nìi tsuru.

33 E ni shùkwɛ̀yn kpèr'niɛ for'là rà watsi riì bwèy, à tsìfa rèè yè è tey ci: «Y'a for'là feera ?»

34 Yè dzin ci: «Tsìfaà rìì màgoo n'a na.»

35 Tɔ̀un, y'à forou, yè nà à ka Yesù kpà. E nàu wɔ Yesù tsɛ min niì, yè e re mɛ̀yɛ bla reè bo bà shùkwɛ̀ɛn tsɛ, yè kòmànà Yesù tèyn à tsɛ.

36 À bèkɔɔn, mòdzian yè e re mɛ̀yɛ bla reè bo bà bà beè à jɔɔn shia tsɛ.

37 Àwà, Oliviku rèè jèèn tenteèn jàà bekɔɔn è re, yè e kpɛrɛ̀ beè Yerusalɛmùn nà. Tɔ̀un, Yesù kabagoo goo niì reè sapɛ fau e re kàràndzìn kur'là jaa ra, twɛy goo rèè kamà, è taama dzibeuma brìsi yè e maa, yè tsoo dzi ɲɛn beè Ŋaablà tsɛ fààn na.

38 Yè dziàn ci:

«Màsa riì nàa mùn Tsìfa Ŋaablà tsoo ra,

dzwɛ yè bà ni tɔ̀ kpɛyn !

Jaancin yè bà ni jìran nɔ̀n,

tsoo dzi yeè bà ni Ŋaablà tsɛ fɔ jirànxɔɔ̀ doùn mɔn !»

39 Awà, Faridziɲɛn rèè swey na ni jàmaà ɲàn mɔn. Twɛy yè dzin Yesù rà tɔ̀un ci: «Kàrànfaà, à dè a re kàràndzin neè rà, ci yè e mɛshɛ̀n.»

40 Yesù yè dzin è ra ci: «Mun nì ci e ra, è ye e mɛshɛ̀n, Ŋaablà nà à fa kpàà reè yè e vu bo !»

Yerusalɛmùn wɔ̀ɔ̀ ɲììɲii Yesù kuun min niì

41 Àwà, Yesù nàu wɔ Yerusalɛmùn wɔ̀ɔ̀ tsɛ watsi riì bwèy, à y'à jàu min niì, è gɛɛy à goò rà.

42 E dzin ci: «Yerusalɛmuka reè goo nìi nà dzi ye jaan cin, e ba na ni a ci ye tɔ tɔ̀ she, ùùn ! Ŋà, à to yɛ nèe sa, tɔ̀ goò mɛnɛɔn ye mà, ye fa dzi à jà !

43 Àwà, jisee ì nàa, nìì reè doùn gooɲaan brisi nà mɛɛy ye tsɛ. Ye ɲan rèè nà nà ye tsyee twɛy jisee reè doùn, yè gbàmàkuru gbààn gbaan ì tsùù tsùù be ye re wɔ̀ɔ̀ sian min niì sapɛ ra, yè ye laguru, yè ye xɔn biì tsùù kàjaa sapɛ tsɛ.

44 È nà ye re wɔ̀ɔ̀ ci mɔn, mɔn, mɔn, y'à doùn tsùùbaà sapɛ bara. È na naà à kpàà dzin soo to soo tsɛ waa. Tɔ̀ sapɛ nà fa, kàtsu Ŋaablà na naɔ̀ wɔ ye ra watsi riì bwèy, ye na e ba à jaa tà bwèy waa !»

Yesù gɔi fa reè kaa bou Ŋaablà re gbà blàa fɔɔn doùn min niì

45 Tà shɔ̀ùn, Yesù yè bè wɔ wɔ̀ɔ̀ doùn. À wɔu mɔn, è bè Ŋaablà re gbà blàa rà. Tɔ̀un, à bèu gɔi fa reè jà gbà blàa fɔɔn doùn min niì, è maa, è kaa boò mɔn.

46 E dziàn è ra ci: «À sɛbɛɔ̀n Ŋaablà re Goomaa doùn nèe tsuru ci:

Mun ne gbàà nà bà sɛrɛ fama nì.

À sɛbɛɔ̀n Ŋaablà re Goomaa doùn tɔ̀ tsuru, ŋà, ye y'à baɔ̀ goo koron fa reè mɛnɛnmà !»

47 Tɔ̀un, jisee sapɛ, Yesù na mòdzian kàr'na Ŋaablà re gbà blàa fɔɔn doùn. Saaka jɔɔndzin neè, ko sàrìyà kaamoo reè, ko wɔ̀ɔ̀ jɔɔndzin neè na à vu jaa gaa.

48 Ŋà, è nà à goò fa nìi tsuru, è naà tɔ̀ tɔ̀ waa, kàtsu, Yesù rè goomaa na mòdzian ɲɛyn seòn fɔ è bè geren, è sapɛ toro yè bà na wɔɔ à re.