Luc 18

E bà Ŋaablà mafyɛ̀ɛn kudɛyn, nìi ni tɔ̀ doùn

1 Ayìwà, twɛy goo rèè shɔ̀ùn, Yesù yè nèe gooma ree ka tàlen ban e re kàràndzin neè rè, nìi nà à kpàdè è ra, ci è wù yè bà Ŋaablà mafyɛ̀ɛn kudɛyn, è mà e gɔn vu ja kuraa.

2 À ci: «Kitsikununbaa sɔn na ni wɔ̀ sɔn ɲan, à naà shia Ŋaablà jɔɔn waa, à to naà mòò pɛn gàsin tsuɔ̀ waa.

3 Fùnshɔ̀ùntaan sɔn sa na ni tɔ̀ wɔ̀ rɔ̀n, tɔ nàa à kpɛyn kudɛyn. Tàan ye na wɔ, è dzin ci: <Goo dɔɔ̀n mun ko mòò fi, sàrìyaa kùnùn e n dzià sìn n na>.

4 À bè tàrà watsi gbaan tà tsuru, à naà kitsikununbaa sào wò y'a shi jii waa. Tàan nàu ta à mà, è ta à mà, kitsikununbaà yè nà dzin e duùn ci: <Mun kpɛ̀yn na shia Ŋaablà jɔɔn waa, mun to na mòò pɛn gàsin tsuɔ waa.

5 Ŋà, tàan rèe nàa mun byɛɛn nìi fa, mun nà è re sàrìyaa kùnùn m'a dzià sìn à ra. Mun ma tɔ̀ fa fyeu, à fa to nà bɛy è nà goo kurushia mun na mìin waa>.»

6 Yesù yè dzin kɔn ci: «Tɔ̀ kitsikununbaa ɲaan nìi dèu, ye tɔ̀ myɛ̀un kɛ̀ !

7 Awà, Ŋaabla nìì reè bo baɔ̀ e jaara, yè bà e vu boò à ra, y'à màfyɛ̀ɛn feèn ko bwèè sa, y'a kɛ̀sɛɛ̀ ci Ŋaablà fa sàrìyaa kùnùn è twɛy dzià sìn è ra gbɛ ? Ye yè bà à kɛ̀sɛɛ̀, ci è bà nà cin è kòmànà wɔ è ra gbɛ ?

8 Awà, mun nì ci e ra, à nà sàrìyaa kùnùn tabe tabe, à yè è dzià sìn è ra. Tà doùn ɔn, Adamà dziàn ye na nà sii rìi sèè o, à nà nà mòò jà dzɔ̀nxɔɔ̀ tsɛ ŋe, nìi ɲɛɔ̀n Ŋaablà ra ɔ ?»

Tàlen nìi baun Faridziɲɛn kpir'là ko kɔnsɔɔntsibaa tsɛ

9 Tɔ̀un, nìì reè yè e yɛrɛ jaà mòdzin tereonma, yè bà dzyee rèè kɔɔ̀n, Yesù yè nèe gooma ree ka tàlen ban, è bè twɛy kàjaa tsɛ. À ci:

10 «Kpiri fii bèu Ŋaablà re gbà blàa doùn, yè bè Ŋaablà mafyɛ̀n. Twɛy kpiri fiɛ̀ ɲàn, soo na Faridziɲɛn, soo yè bà na kɔnsɔɔntsibaa.

11 Faridziɲɛn kpir'là, è bè e tsiì e san tsɛ, è Ŋaablà mafyɛ̀ɛn e duùn nèe tsuru ci: <Ŋaablà, n ne tswɛ̀y ni a re, kàtsu, mun na ni a ci mòdzìn dzyee reè tsuru waa. Twɛy nìì reè shɔnbee faa, è gooɲaan faa, yè bà ɲànmɔ̀ɔ̀bee faa. N ne tswɛ̀y yeè bà ni a re, kàtsu, mun na ni a ci nèe kɔnsɔɔntsibaa rèe tsu waa.

12 Shikun soo doùn, mun bwèy fii sun nì wɔɔ̀, mun to ye gè o ge tàrà, mun y'à sapɛ yaà boò>.

13 Kɔnsɔɔntsibaa rà, tɔ̀ yeè bè e tsiì è dan gbànbe. A kùngɔ sùùruumaà ni, arì à na e jaà ɲanseen, è siin fa jìran kèrè tsu waa. À kpɛ̀yn ni nìi rà, à jaakɔrɔn kùunma nì yè e ɲiɛ̀ ban baan, è dziàn ci: <Ee, Ŋaablà, mun wo màfyɛ̀ɛn, wo yè màtsuru mun na, kàtsu, gooɲaan tsìɛ̀ ni mun vu ra>.»

14 Yesù yè dzin kɔn ci: «Àwà, mun nì ci e ra, tɔ̀ kɔnsɔɔntsibaà ci e ye sèè tsii doùn watsi riì bwèy, goo sɔn pɛn naà ni à ko Ŋaablà fi dɛ. Ŋà, nìi Faridziɲɛn kpir'là, tɔ̀ raà na ni e nima nɔ̀n. Awà, wo mòò o moò y'à yɛrɛ ɲanseen, Ŋaabla nà wo mà jàà. Wo mòò o moò to y'à yɛrɛ ma jàa, Ŋaablà nà wo ɲansen.»

Yesù dzwɛ jiu dziin nèè rà min niì

15 Awà, mòdzian yè nà nà dzinii ì ka Yesù rè, sànko è si dzyɛn è ra, è dzwɛ ji è ra. Yesù rè kàràndzin neè tɔ̀ jàu min niì, yè fù fù twɛy mòdzin neè kpɛyn.

16 Tɔ̀un, Yesù yè dziin nèè kiri kpɛ̀rɛ̀ e yɛr'la, è dzin ci: «Y'a to dziin nèè yè nà n na ! E maà è jɔɔn kunùn nàà tsɛ waa. Mòdzin niì reè duùn fyɛɔ jàci dziin nèè, Ŋaablà re Màsàbee twɛy rìì laa.

17 Sààben na, mun nì ci e ra: Wo mòò o moò ma a tsiì Ŋaablà re Màsàbee rà, a ci dziin kòòmɛyn tsuru, wo na dzia dɔ̀n à doùn byɛ.»

Kpiri nafòròtsi blàa raa goò

18 Ayìwà, Dzyèèsìbee Mòdzin neè jɔɔndzin sɔn yeè nà Yesù tey nèe tsuru ci: «Mùn kàrànfa wùù, à wù min fee rìì fa sa, min dzi jaamabe wùù tarà gbee, nìi na doò waa.»

19 Yesù yè dzin à ra ci: «Feera wo yè bà mun kir'là kàrànfa wùù ? Ŋaablà soo boshɔ̀ùn, mòò pɛn na wù waa.

20 Wo na fìriɔ̀ Ŋaablà dzugooma xɔu rèè mà waa. Twɛy doùn, à ci:

E maà ɲànmɔ̀ɔ̀be fa waa.

E maà e modzìn si vu waa.

E maà shɔnbe fa waa.

E maà doò wɔ e koòsi ra waa.

Ye e na rèè ko e fa rèè blàbee.»

21 Kpir'la yè dzin Yesù rà ci: «Wo yɛ twɛy goo nìì reè dèu nèe, fɔ mun dzin kòòmɛynkɔɔn nà, mun twɛy sapɛ shi jiɛ.»

22 Awà, Yesù tà myɛ̀un min niì, è dzin kpir'la rà ci: «Goo soo wo fɔɔn ŋe. B'à suun ge reè sapɛ gɔɔ, a ɲɛɛn tanan gbakɔɔn reè rà. Tɔ̀ tsuru, nàforo bla nà bà ni wo re àrìjinɛɛ̀ doùn. Tà faumaà shɔ̀ùn, e nà a gban mun kpɛyn.»

23 Aa, kpir'la dziu twɛy gooma reè myɛ̀n min niì, à taama yè ŋununbe fɔ è bè geren, kàtsu à na nàfòròtsi blà rii.

24 Yesù y'à tɔ̀u kpir'la rà ci à taama ŋununbeu tɔ̀ tsuru min niì, è dzin ci: «Nàforo ni nìì reè suun, twɛy dɔn ɲan Ŋaablà re Màsàbee doùn dɛ !

25 Ɲɔ̀ɔ̀nmɛɛ̀n yè dɔ̀n mɔnsɛyn kɔɔ rè, tɔ̀ fa dzi nàfòròtsià dɔ̀ɔ̀n mà Ŋaablà re Màsàbee doùn.»

26 Nìì reè na e toro wɔɔ à re, twɛy yè dzin ci: «Tà bwèy, tsì rii soo to nà dzi tsi sa ?»

27 Awà, Yesù yè dzin ci: «Mòdzian gbaa goo nìi rà, Ŋaablà na gbaa tɔ̀ ra waa.»

28 Yesù rè kàràndzin neè ɲàn, nìi tsoo ci Piyɛrì, tɔ̀ yeè dzin tɔ̀ rii ɲàn ci: «Ɲe do ? Ɲe kaariu e suun ge reè sapɛ shɔùn, ɲe yè e gban wo kpɛyn.»

29 Yesù yè dzin è ra ci: «Sààben na, mun nì ci e ra: Wo mòò riì nà kaari a re gbàà shɔ̀ùn, wo yè kaari a re tààn shɔ̀ùn, wo yè kaari a tseyn nèè, ko a tsinà rèè shɔ̀ùn, wo yè kaari a ker'làgè rèè shɔ̀ùn, wo yè kaari a dzin nèè shɔ̀ùn Ŋaablà re Màsàbee kamà,

30 wo nà tɔ̀ tsuru gè rèè giri tàrà mìin dziɲaan doùn, è geren twɛy sapɛ tsɛ. Tà shɔ̀ùn kɔn, wo yè bè jaamabe wùù tàrà gbee, jaamabe niì na doò waa.»

Yesù yè e saàn ko e seè kpunaàn dèu min niì kɔn

31 Tà shɔ̀ùn, Yesù yè e re kàràndzin teeŋ fii rèè kiri bo e si, è dzin è ra ci: «Awà, mùn bèkɔɔn yɛ Yerusalɛmùn nèe, Ŋaablà re kɛɛra reè na gè o ge dè dɔɔ̀n Adamà dziàn rè goo rèè ɲàn, mìn be wɔ mɔn, à sapɛ nà bo e shi tsɛ.

32 È nà à wɔ kaafir'leè suun, twɛy y'à ɲanŋmɛn, y'à ɲɛ̀n, yè dzweeyuà fyɛ à tsɛ.

33 E nà à dɔrɔ bɔbwɛy ka, tà shɔ̀ùn y'à vu. Ŋà, à saunmaà bwèy zhììgìraa sii sèè, à nà sèè kpunan.»

34 Yesù tà goomaa dèu, kàràndzin neè na à bè shi jà à re waa. A dzuɔn nìi taki, è na dzi tà tɔ̀ waa.

Yesù jaana sɔn jaa dzii saun min niì

35 Awà, Yesù ko e kpɛyn dzin neè bèu tsyɛnbe Yerikò wɔ̀ɔ̀ rà, yè jaana kpiri sɔn tsuuŋma jà mɔn shi dziɛ rè, tɔ fyɛ̀yn faa.

36 Tɔ̀ jaana kpir'là nàu jàmaà dɔ̀n vu myɛ̀n nìi fa, è tey fa ci: «Nèe kɛ̀n tsuru màànkan ni ?»

37 A tɔ̀ teè fau, yè dzin à ra, ci Nazarɛtsika kpiri Yesù rìì dɔ̀ɔn.

38 Tɔ̀un, è vu bo fààn na ci: «Yesù, màsà kpiri Dawudà tsua dziàn, a yɛrɛ to, e cinan n ma !»

39 Nìì reè na jìɛ jàmaà jɔɔn, twɛy yè fù à kpɛyn nèe tsuru ci: «Aa kpiri, a to min myɛ̀yn fa !»

Tɔ̀ dèumaà ko e raà sa, è vu bo ŋe fààn na ci: «Màsà kpiri Dawudà tsua dzin Yesù, a yɛrɛ to e cinan n ma !»

40 Yesù y'à gooma vuà myɛ̀un tà tsuru min niì, tɔ̀ yeè e tsiì. Tɔ̀un, è dzin ci yè nà à ka wò kɔ̀. È nàu à ka à kɔ̀, Yesù y'à tey ci:

41 «Wo sào ni min fee rìì fa wo re ?»

E dzin ci: «Tsìfaà, à fa min jɛ̀y fa e shɔùn.»

42 Tɔ̀un, Yesù yè dzin à ra ci: «Mun ci e jɛ̀y fa ! Wo ɲɛn niì fau mun na, tɔ wo tsiu a re ɲìn'nà nà.»

43 Tɔ̀ nɔ̀nkɔɔ rɔn ko e sa, kpir'la yè dzi jɛ̀y fa. Tà faumaà shɔ̀ùn, è gban Yesù kpɛyn, è tsoo dzi ɲɛn beè Ŋaablà tsɛ. Jàmaà jaadzin tɔ̀ jàu min niì, è sa yeè e maa, yè tsoo dzi ɲɛɛn Ŋaablà tsɛ.