Yesù sèè kpunaun min niì, è bo saàn ɲàn
24
1 Ɲànwɔ siɛ̀ la gbee gbishɛɛ̀mà nɔ̀n, twɛy tàan rèè yè swɛ̀y muri, yè bè Yesù kɔ̀ɔ̀ rà. È bèkɔɔn, è na ɲinin kinin dziu ko làtsìkɔrɔ kinin dziu nìi reè lamɔnɔ̀n tsùuŋnà, yè bè twɛy ka e suun.
2 È bèu wɔ mɔn, y'à jà ci kpàà brisi rìi na kɔ̀ɔ̀ dzii tsyeeŋna, tɔ kòronkoron bou kɔ̀ɔ̀ dzii ra peu.
3 Yè dɔ̀n kɔ̀ɔ̀ doùn tɔ̀ rii ɲàn, ŋà, è na Tsìfa Yesù fùàn jà waa.
4 Tà goò yè è akiri dò. È ni tɔ̀ tsiìma nɔ̀n, è ci e ye fee jà, kpiri fii tsìiŋnà è jaaterema, twɛy mà vya reè yè bà den deèn mɛ̀nɛ̀n mɛ̀nɛ̀n mɛ̀nɛ̀n.
5 Tàan rèè shi ɲaanfaa suun, yè e kungɔ sùùru. Tɔ̀un, tɔ̀ kpiri fiɛ̀ yè dzin è ra ci: «Fee y'à to ye yè bà jaama gaa fun ì fi ?
6 À na ni mìin waa, à sèè kpunau. À nìi dèu ye ra, è bà na ni Galile mar'lɔn ŋe, ye e taa to tɔ̀ re.
7 À dziun ye ra, ci gooɲaan tsìɛ̀ ni nìì reè vu ra, fɔ mòò yè Adamà dziàn wɔ twɛy suun, y'à gban gɔɔ ra, y'à vu. Ci à saunmaà bwèy zhììgìraa sii sèè, è sèè kpunan.»
8 Tɔ dèu min niì, tàan rèè taa yeè to Yesù rè gooma deuma rèè rè.
9 Yè bo kɔ̀ɔ̀ rà tɔ̀un, yè bè tà goò sapɛ lakɛɛy Yesù rè kɛɛradzin teeŋ sɔɔn ko à re kàràndzìn dzyee reè sapɛ ra.
10 À na tàan nìì reè, Mariyamùn nìi kir'là ci Màngàdàràkà taàn tɔ̀ na ni, Yàxanà na ni, Yàkubà raa na Mariyamùn sa yeè bà na ni. Tàan dzyee niì reè sa na ni è ka, twɛy sa tɔ̀ gooma soo rìì lakɛrɔn kɛɛradzin neè rà.
11 Ŋà, kɛɛradzin neè jaa ra, ci twɛy tàan rèè gooma kunjaatan ì nì dèe, è na ɲɛn è ra waa.
12 Tà doùn, Piyɛrì yè fù tɔ̀ nɔ̀nkɔɔ rɔn ko e sa, è vwɛ̀ɛ̀y dɔ̀n be kɔ̀ɔ̀ rà. A bèu wɔ, è mɛɲɛn, è kɔ̀ɔ̀ doùn siin. È na Yesù fùàn kasangeò vya donsɔn niì ka, tà boshɔ̀ùn, à na gèsɔn jà mɔn dɛ. Tɔ̀un, tɔ̀ goò faumaà y'à to, à duungoo douma blà yeè e kpɛyn sèè na e re tsii.
Nìi fau Emayusì wɔ̀'ùn shià tsɛ
13 Àwà, tɔ̀ sii sèè ko e sa, Yesù rè kàràndzin fii yè fù, ci ye bèe wɔ̀ sɔn ɲan, nìi kir'là, ci Emayusì. Yerusalɛmùn wɔ̀ɔ̀ ko Emayusì wɔ̀ɔ̀ fia na gereon cilo teeŋ fii tsuru tsɛ.
14 Goo nìì reè sapɛ faunà, è na tɔ̀ rii bàrà fa beè.
15 È ni twɛy gooma reè rà ko e si ka, Yesù yɛ̀r'la yè nà e kpɛrɛ̀ è ra, è shia kun ko è ka.
16 È jaa yɛ Yesù rà, ŋà, à bàu jàci gèsɔn ni yè è jaa ra baun à mà, è na dzi à tɔ̀ waa.
17 Yesù yè è tey tɔ̀un ci: «Ye jìì bekɔɔn ni kɛ̀n tsuru gooma ni nà ko e si ka ?»
Yesù tà dèu min niì, è taama ŋununbeuma yè e tsiì.
18 È mòkun fiɛ̀ ɲàn, soo tsoo na ci Cilopasì. Tɔ̀ yeè dzin Yesù rà ci: «Goo nìi faɔ̀ Yerusalɛmùn bwèy fii rèe ɲan, wo soo boshɔ̀ùn, mòò pɛn na ni mɔn, ci wò na sɔn tɔ tɔ̀ ɲan waa.»
19 Yesù sa yeè è tey ci: «Fee rìì fa ɔ̀ ?»
Yè dzin à ra ci: «Goo riì Nazarɛtsika kpiri Yesù tàrau kɛ̀ ! À kabagoo goo niì reè fau, ko à gooma niì reè dèu, twɛy y'à kpàdèu, ci à bàu kɛɛra barakama Ŋaablà ko mòdzian sa re.
20 Ɲe re saaka jɔɔndzin neè, ko ɲe re jàmaàn jɔɔndzin neè y'à wɔu Ɔ̀rɔ̀mùnka reè suun ci y'à vu, twɛy sa yeè à gban gɔɔ̀ ra.
21 Ɲe si na xɔ mòo riì tsɛ, ci à nà Isirayɛli mòdzin neè kungɔ màbo, à na wò rii. E ɲɛn tɔ̀ tsɛ, twɛy goo rèè faumaà bwèy zhììgìraa rìì yɛ she.
22 Tà doùn, ɲe ko tàan nìì reè kuru soo dzin ì, twɛy dànma nàu gooma sɔn lakɛ̀ɛy ɲe ra, nìi ɲe duungoo dou, fɔ è bè geren. È ci ye swɛ̀y bèu kɔ̀ɔ̀ rà gbishɛɛ̀mà rèe ɲan.
23 Ye bèu wɔ, ye na Yesù fùàn jà kɔ̀ɔ̀ doùn dɛ. È na Yesù fùàn jà kɔ̀ɔ̀ doùn nìi fa, yè sèè na, yè nà à lakɛɛ̀y ɲe ra, ci Ŋaablà re Mɛ̀rɛ̀kɛ fii yè e yɛrɛ kpadèu ye ra, yè dzin ye ra, ci Yesù jaama.
24 Ɲe kòòsi rèè swey sa bèu kɔ̀ɔ̀ rà, yè b'a jà jàci tàan rèè y'à dèu ɲe ra nìi tsuru, è na b'a yɛ̀r'la jà n dzi waa.»
25 Twɛy kpiri fiɛ̀ raa goomaa shɔ̀ùn, Yesù yɛ̀r'la yè dzin è ra ci: «Ee, ye mòdzin akiri bɛy ree reè, Ŋaablà re kɛɛra reè nìi sapɛ deu, ye ɲɛn na dzi tɔ̀ ra tabe dɛ !
26 Ŋaablà Jaara Modzìàn yè byɛn tà tsuru, è kòmànà dɔ̀n Ŋaablà blabee doùn, tɔ̀ naà wù è fa ɔ ?»
27 À tà dè dòu min niì, goo gè o ge sɛbɛɔ̀n à yɛ̀r'la rè goò ɲàn Ŋaablà re Goomaa doùn, è tɔ̀ sapɛ jaa dè è ra. À y'à dzii kun kɛɛra Musà raa sàrìyaa kìtaabuà tsɛ, è geren bè kɛɛra dzyee reè raa rèè sa ka.
28 Àyìwà, è bèe wɔ̀ rìi ɲàn, è bèu wɔ tɔ̀ dɔ̀nma dziɛ rà watsi riì bwèy, Yesù yè e yɛrɛ ba, jàci wò geren bèe jɔɔn ni.
29 Ŋà, kpir'leè y'à sàn nà kun to ko màfyɛɛ̀n ka, yè dzin à ra, ci è to ye ka, kàtsu, ci bwèè dòu nòn, dzɔɔ̀n to gaa tsì. È dɔ̀n wɔ̀ɔ̀ doùn tɔ̀ rii ɲàn, è to ko è ka.
30 Àwà, è ci e ye ɲwɛɛ̀n dzii kun watsi riì bwèy, Yesù yè bur'la sen, è tswɛ̀y sin Ŋaablà ra, è kòmànà à kùnùn kùnùn, à y'à wɔ wɔ è suun.
31 Àwà, tɔ̀ fau min niì, è jaa tsɛ yɔ̀ɔ̀ yè vyɛ̀ bo sɔn, y'à tɔ̀ ci à Yesù rìì. È Yesù tɔ̀u min niì, yè bàràma fɔn à ra e biìn.
32 Yè dzin e si ra tɔ̀un ci: «À na goomaa ɲe ka watsi riì bwèy shia rè, è bà Kìtaabu rèè doùn gooma reè dèe ɲe ra, w'a tɔ̀ à na baɔ̀ taamadzibe brìsi ɲe mà dɛ ?»
33 Yè fù tɔ̀un suu, yè kpɛyn sèè na Yerusalɛmùn wɔ̀ɔ̀ doùn. È nàu wɔ mɔn, yè kɛɛradzin teeŋ sɔɔn ko e koòsi rèè jà mɔn, yè e ladzyèèŋnà.
34 Twɛy yè kpiri fiɛ̀ kùùntsi nèe gooma ree ka nèe tsuru ci: «Tsìfa Yesù sèè kpunaun n dzi rii, è bo saàn ɲàn ! È yɛrɛ kpadèu Shìmɔn nà !»
35 Goo nìi twɛy kpiri fiɛ̀ sa tarau shia rè, tà ko à bàu nìi tsuru yè Yesù tɔ̀, è bà na bur'la tanan tan'nà è ra, twɛy sa yeè bo tɔ̀ mà, yè tɔ̀ jaa dè e koòsi kàràndzin dzyee reè rà.
Yesù yè e yɛrɛ kpadèu e re kàràndzin neè rà min niì
36 È ni tɔ̀ goomaa nà, yè nà bàràma, yè Yesù jà e shiɲaanfi. È dzin è ra ci: «Ŋaa yè xɛɛrɛ fa e re !»
37 Kàràndzin neè ɲɛyn yè shɛn, yè shi fɔ è bè geren. È na à siɛ̀n, ci ye fùàn sɔn ni ɲɛyn jàɔ.
38 Ŋà, Yesù yè dzìn è ra ci: «Ye yè e akir'lèè fuɔ̀ feera ? Ye yè e cir'la feera ?
39 Ye n si rèè ko n san nèè siin: à mun yɛ̀r'la rìì. Ye dzyɛn siin n na kɛ̀ ! Shutswɛy ko xɔ bàa ni fùn ɲɛyn ɲan ɔ ? N ci ye jaa to yɛ twɛy rà mun ɲan kɛ !»
40 À tɔ̀ dèu min niì, è si rèè ko e san nèè kpàdè è ra, à gbanmàà fyɛ̀ɛ̀ yè bà ni twɛy rà.
41 Kàràndzin neè taama dzibe ɲaanfaa suun, è naà ɲɛɔ̀n à ra ŋe kuraa. È duungoo yeè dò tsùù. Yesù yè è tey tɔ̀un ci: «Ɲwɛynmageè sɔn na ni ye re mìin ɔn ?»
42 Àwà, yè ji dzuuma sɔn bo tɔ̀un, yè tɔ̀ sɔn tara sin à ra.
43 À y'à tsi, à y'à ɲɔn è jaa ra.
44 Tà shɔ̀ùn, è dzin è ra ci: «Mun na ni ye ka watsi riì bwèy, mun nìi dèu ye ra, tɔ̀ rii siin: mun dziun ye ra ci goo o goo sɛbɛɔ̀n mun ne goò ɲàn kɛɛra Musà rè sàrìyaa kìtaabuà doùn, ko kɛɛra dzyee reè rè kitaabu rèè doùn, ko Zàbùrù ye rèè kìtaabuà doùn, tɔ̀ sapɛ na wù è bo e shi tsɛ.»
45 Tà shɔ̀ùn, à nà dzi ba nìi tsuru, kàràndzin neè yè dzi Ŋaablà re Kìtaabuà doùn gooma reè fàànmun, Yesù yè è akir'là dzii san tɔ̀ ra.
46 À ci è ra: «Nìi sɛbɛɔ̀n Ŋaablà re goomaa kìtaabuà doùn, tɔ̀ rii siin: Ŋaablà Jaara Modzìàn wù è byɛn ni ŋe, è kòmànà san. A saunmaà bwèy zhììgìraa sii sèè, è sèè kpunan.
47 Waajibia yè fa à tsoò ka, sànko dziɲan tsiɛ mòdzian sapɛ yè sèè bo e re gooɲaan neè kpɛyn, yè e re jaamabee fau'n kur'la lakere, è re gooɲaan tsìɛ̀ yè mɛɛy bo è vu ra. Tɔ̀ waajibi ree wù à dzii yè kun Yerusalɛmùn wɔ̀ rɔ̀n.
48 À wù ye yè bà twɛy goo rèè lakɛɛ̀ybaa rèè kàtsu ye yè è jàu e jaadzin fiɛ̀ ka.
49 Tà doùn, mun fà Ŋaablà na e re Dzi riì làyiri seòn, ci wo nà à sìn ye ra, mun yɛr'la nà tɔ̀ bàji na ye tsɛ. Ŋà, sani tɔ̀ yeè fa, à wù ye yè to Yerusalɛmùn wɔ̀ɔ̀ doùn, fɔ dzia yè dan jìran nɔ̀n è nà jàà ye tsɛ.»
Yesù tèron ŋaablaxɔɔ̀ doùn min niì
50 Ayìwà, Yesù dòu twɛy gooma reè rà watsi riì bwèy, è re kàràndzin neè kiri bo wɔ̀ɔ̀ doùn, è bè è ka Betani wɔ̀ɔ̀ kpàkèrè. À bèu wɔ è ka wɔ̀ɔ̀ tɛyn, è tsiì mɔn, è si rèè ɲansen è kùùn, è dzwɛ ji è ra.
51 È Yesù to dzwɛ jia rà è ra, à ɲan yeè nà sen fu bo è ɲan, è dɔ̀n be jìrànxɔɔ̀ doùn.