Yesù ci à wù a re jaamabee fau'n kur'la lakere
13
1 Tà watsi rɔn, mòdzin swey yè nà Yesù kpɛyn. À nàu wɔ, yè dzin à ra, ci jàmààntsi Pilatsì mòdzin swey bàji beu yè bè Galileka swey vu, tɔ̀ y'a tàrà twɛy Galileka reè na e ree saaka ì boò.
2 Twɛy nàu tɔ̀ goomaa dè min niì, Yesù yè dzin è ra ci: «Twɛy Galileka niì reè vuu tɔ̀ vuu'n kur'la rà ɔ, y'a siɛ̀n ci twɛy Galileka reè raa gooɲaan tsiɛ rìì giri è geren Galileka dzyee reè raà tsɛ gbɛ ?
3 À na tɔ̀ dɛ, m'a dè e ra. Ye ma seè bo gooɲaan kpɛyn, ye yè e re jaamabee fau'n kur'la lakere, ye sapɛ sa nà san tɔ̀ rii tsuru.»
4 Tà shɔ̀ùn, è dzin è ra kɔn ci: «Silowe sangaso gbaan mɛrɔn mòkun teeŋ ŋaalòn nìì reè tsɛ Yerusalɛmùn wɔ̀ɔ̀ doùn, è vu, ye taa ni tɔ̀ re kɛ̀. Y'a siɛ̀n ci twɛy mòkun teeŋ ŋaalòòn raa faadziɛ na ɲaan ni è geren Yerusalɛmùn wɔ̀ dòùn dzìn dzyee reè raà tsɛ gbɛ ?
5 À na tɔ̀ dɛ, m'a dè e ra. Ye ma seè bo gooɲaan kpɛyn, ye yè e re jaamabee fau'n kur'la lakere, ye sapɛ sa nà san tɔ̀ rii tsuru.»
6 Tà shɔ̀ùn, Yesù yè nèe gooma bɔɔ rèe ka tàlen ban è re nèe tsuru ci: «Gɔ̀ɔ̀dzu sɔn na ni kpiri sɔn ne. À na gɔ̀ɔ̀ku sɔn tsiɔ̀ tɔ̀ gɔ̀ɔ̀dzu rèe ɲan, nìi kir'là fiigiku. Kpir'la bè o be, ci wo bèe dzin bo tɔ̀ gɔ̀ɔ̀kuà rà, à na beè dzin jà waa. È nà bè sii sɔn see, à na dzin jà kɔn waa.
7 Tɔ̀ sii sèè, è dzin e re dzùà faagoofadzian nà ci: <À jii zhiigi rii yɛ nèe, mun nàa, ci mun nàa gɔ̀ɔ̀dzìn xe bo n ne gɔ̀ɔ̀ku rèe ra, mun to na naà gèsɔn pɛn jà waa. À jèè bo mɔn ! À gàneè seòn maana à to na dziàn, ci fee daɔn tɔ̀ ka ?>
8 Faagoofadzian yè dzin ci: <N kuntsii, à to mɔn jòòn naa jii soo ree ɲan, mun nà à dzuun ɲɛɛn, min noo ji siin à re.
9 Jii kpɛrɛ è dzin, à tɔ̀ rii, à to ma dzin tà bwèy, a dzia a jèè bo mɔn>.»
Yesù tàan sɔn cɛrɛmabeu min niì, ɲànwɔ siɛ̀ mà
10 Sii sɔn see, Yesù na mòdzian kàr'nà waajibi fa gba sɔn doùn. A na ɲànwɔ sii rìì mà.
11 Tɔ̀ y'a tàrà, tàan sɔn na ni mɔn, kwey sɔn yeè bà na e gbaɔn tɔ̀ kpɛyn. Tɔ̀ kwey rèe na ɲìnìn sɔn kaɔ à ra, à y'à bòòn kpɛ̀n, è bè tàrà fɔ jii teeŋ ŋaalòn. Tàan rèe naà dzia e lateren tsiì waa.
12 Yesù tɔ̀ tàan jàu min niì, à y'à kiri na. Taàn nàu, è dzin à ra ci: «Tàan, wo cɛrɛmabeu she, wo yè bo a re ɲìn'nà ɲàn.»
13 À tà dèu min niì, è sià tsùù tàan tsɛ. Tɔ̀ nɔ̀nkɔn rɔn, taàn yè cɛrɛmabe. Tɔ̀un, è dzi è teren tsiì, è maa, è tsoo dzi ɲɛɛn Ŋaablà tsɛ.
14 Yesù taàn cɛrɛmabe nìi fau ɲànwɔ siɛ̀ mà tɔ̀ tsuru, tɔ̀ goò yè waajibi fa gbaà kùntsiɛ̀ vunun ta.
Tɔ̀un, waajibi fa gbaà kùntsiɛ̀ yè fù, è dzin jàmaà nà ci: «Shikuan doùn, bwèy tsùnmɛn ni ni, twɛy yè bà faagoo fa jisee reè. Ye nà, yè nà e cɛrɛmabeè twɛy jisee reè mà. Nìi ɲànwɔ siɛ̀, e ma nàa tɔ̀ mà waa.»
15 Tɔ̀un, Tsìfa Yesù yè dzin à ra nèe tsuru ci: «Mòdzin duungoo fii ì ! Tsì rii dzia dzin ye ɲan, ci wò na e re nìì rèè, ko e re shùkwɛ̀yn neè for'là è bè è mìn ɲànwɔ siɛ̀ mà. Tɔ̀ na fara ɔ̀ ?
16 Nèe tàan nìi yɛ, à Ibraximà tsua mòdzian sɔn ni. Sùtana y'à byɛɔ̀n, à jii teeŋ ŋaalòn nì yɛ. Ye re o, mun ye tɔ̀ cɛrɛmabe ɲànwɔ siɛ̀ mà, tɔ̀ na wù ɔ̀ ?»
17 Yesù tɔ̀ goomaa dèu min niì, tɔ̀ y'a ɲan rèè sapɛ kungɔ sùùru. Ŋà, jàmaà dzyeè sapɛ taama na dzibeo, Yesù rè goowùù wuu fakɔɔn reè rà.
Yesù ci Ŋaablà re màsàbee jɔ̀ɔn kiɲaanin nì
18 Tɔ̀ ɲan, Yesù yè dzin kɔn ci: «Ŋaablà re màsàbee ni nìi tsuru, ye tɔ̀ tɔ̀ ɔ̀ ? Mun nà à ko gè niì gɔ̀n, tɔ̀ rii siin.
19 A dzyɛ̀n a ci kaanindzin. Kpiri sɔn y'a seun, tɔ̀ yeè bè à sì e re naankɔɔ rɔ̀n. A nàu xe, è bà gɔ̀ɔ̀ku. Tɔ̀un kɛ̀yn neè yè bè e tan ji à ɲan.»
20 Yesù yè dzin kɔn ci: «Mun dzia Ŋaablà re màsàbee gɔ̀n gè niì ka kɔn, tɔ̀ rii siin.
21 A ni a ci gè nìi bur'la fùa. Tàan buru fua gè kiɲaanin seen, à y'à ji buru fa giri ɲan à guu. Gè re siɛ̀n, è buru fa guuŋma rèè sapɛ fu.»
Yesù ci e tsi, tɔ̀ shia ni a ci dɔ̀nma dzii kiɲaanin
22 Tɔ̀un, Yesù re shia kuunmaà, è bà bèe Yerusalɛmùn wɔ̀ɔ̀ kèrè, è dɔ̀n beè wɔ̀ blà bla reè, ko wɛ̀ɛ̀rìì reè doùn, è mòdzian kàràn beè, è bèe.
23 Tɔ̀ ɲan, sɔn yeè Yesù tey ci: «Tsìfaà, nìì reè nà tsi, twɛy fa giribe dɛ ?»
Yesù yè dzin ci:
24 «Ye e maxɔbe, ye dɔ̀n dɔ̀nmà dzii kiɲaaniàn nà. A jà min tɔ̀ dè, giri nà à gaa ye yè dɔ̀n, è to fa dzi dɔn waa.
25 Fɔɔntsià ye na fù watsi riì bwèy, è tɔ̀ dziɛ̀ sòò, ye yè to da rɔ̀n, tà bwèy, ye nà dziɛ̀ mà baan, ye yè dziàn nèe tsuru ci: <Mùn tsìfaà, dziɛ̀ san mùn ne !>
A nà dzin ye ra tɔ̀un ci: <Mun na ye tɔ̀ waa>.
26 Awà, ye nà dzin à ra ci: <Mùn tsìfaà, ɲe rìì ɲwɛɛ̀n ɲɔun wo ka, ɲe yè mìɛn fa wo ka. Wo na tsyeere beè ɲe re wɔ̀ɔ̀ jaa rìì lè, wo yè mòdzian kàràn beè>.
27 Tɔ̀un, à nà dzin ye ra kɔn ci: <N ci mun na ye bomà tɔ̀ sa. Ye bo n jaa dzuun, gooɲaan fa ree reè>.
28 Tɔ̀ sii sèè, ye nà gɛɛy, fɔ ye yè bè e ɲi'un taa. Ye jaa yɛ Ibraximà, ko Ishakà, ko Yàkubà, ko Ŋaablà re kɛɛra reè sapɛ ra, è ni Ŋaablà re màsàbee gàne rɔ̀n, ye to yè bà maaŋnà da rɔ̀n.
29 Mòdzian nà bo dziɲan nɔnkɔn nààleèn sapɛ ɲan: kir'la rà, bwèydo re, kiribaanbiri, yè nà Ŋaablà re màsàbee gàne rɔ̀n, yè ɲwɛyn fa.
30 Awà, tɔ̀ sii sèè, nìì reè bònè dzin she, twɛy swey nà bà ni jɔɔn. Nìì reè to ni jɔɔn she, twɛy swey nà bà bònè dzin.»
Yesù nìi dèu, è bà bèe Yerusalɛmùn
31 Awà, è Yesù to Yerusalɛmùn wɔ̀'ùn shià tsɛ, Faridziɲɛn rèè swey yè nà dzin à ra ci: «A ma bo mìin, e bè min kpɛrɛ, jàmààntsi Erodzì wo gaa vurama cɔ.»
32 Yesù yè dzin è ra ci: «Ye b'a dè tɔ̀ kpiri tsɛ kùn kpar'nà nà, ci mun nà kwey rèè kaa bo kweykɔɔn reè kpɛyn, min ɲìnìkɔɔn reè cɛrɛmabe bwèy fii ree ɲan, tà shɔ̀ùn mun ne faagoò yè kòmànà dò.
33 Tà ko e sa ra, à fààn ni mun mà, mun yè geren n ne jìɛ̀ rè nee bwèy fii ree ɲan. A jà min tɔ̀ dè, Ŋaablà re kɛɛra pɛn na vua min kpɛrɛ nìi na Yerusalɛmùn waa.
34 E ! Yerusalɛmunka reè, Yerusalɛmuka reè, ye rìì Ŋaablà re kɛɛra reè vua. A nìì reè kaà ye re, ye rìì twɛy dzyɛn vua kpàà ka ! E bè tàrà, fɔ shiɲaan jaa fɛ̀rɛ̀n sa, mun y'à gaaŋ, mun yè ye ladzyeè n tɛyn, a ci tsɛ̀na yè e kuɔ̀ e dzin ì tsɛ nìi tsuru, ye to na e tsiì tɔ̀ ra waa.
35 Awà, à siin, dòònun Ŋaabla nà e magoo bo ye re gàneè ɲàn, yeè to e soone. Mun nì ci e ra, ye jaa na naà ɲɛn mun mà dɛ, fɔ jisee riì, ye nà dzin nèe tsuru ci:
Mòò riì nàa mùn Tsìfa Ŋaablà tsoo ra, dzwɛ ni tɔ̀ kpɛyn.»