Faridziɲɛn jɔɔndzin sɔn Yesù kiriu ɲwɛɛ̀n nà min niì
14
1 Ɲànwɔ sii sɔn ma, Faridziɲɛn jɔɔndzin sɔn yeè Yesù kiri, ci ye yè bè ɲwɛyn fa wò re tsii. Nìì reè na ni tɔ̀ ɲwɛyn ɲɔnma nɔ̀n, è sapɛ na Yesù sɛ̀r'na.
2 Tɔ̀ y'a tàrà, kpiri sɔn na ni mɔn Yesù jaaterema, fuu ɲìnìn yè bà ni tɔ̀ rà.
3 Tɔ̀un, Yesù yè goomaa sen, è Sàrìyà kaamoo reè, ko Faridziɲɛn rèè tey nèe tsuru ci: «Ɲe re sàrìyaa doùn ɔn, e mòò cɛrɛmabe ɲànwɔ siɛ̀ mà, tɔ dàaŋnà raa, à na dàaŋnà ?»
4 Yè e mɛshɛ̀n, è na gèsɔn dè waa. Tɔ̀un, Yesù yè ɲìnìnkɔɔn kun e si ra, à y'à cɛrɛmabe, è dzin à ra, ci è bè tsii.
5 Tà shɔ̀ùn, è dzin è ra ci: «Ye sɔn dzin yè mɛɛy kɔ̀rɔn doùn, tàmafa ye re nìì, arì à kɛ̀nsɛɛn ye ba ɲànwɔ siɛ̀ mà, à tsìfa fa à sɔ̀ɔ̀n bo tabe o ?»
6 È na dzi gèsɔn pɛn jà dè, y'à ka twɛy gooma reè latsi à re waa.
7 Àyìwà, Yesù yè nà à kààwɔ, ci nìì reè kiriɔ ɲwɛɛ̀n nà, twɛy sapɛ ni tsùùmà wùù gaa rìì là. Tɔ̀un, è nèe gooma bɔɔ rèe ka tàlen ban è re nèe tsuru ci:
8 «Kɔnɲɔn goo jaaravi ye ba ni mòò rè, à ye a kiri, ci e bè ɲwɛyn fa wò re jaaravià rè, e be wɔ, tsùùma nìi wù è geren dzyee rèè sapɛ tsɛ, maà dzin, ci a tsuɔ̀ mɔn waa. Wo y'a tsuù, gè sɔ̀n ge mòdzian sɔn sa kiriɔ jaaravi rèe re, nìi ni dzii ra è geren wo tsɛ.
9 Tɔ̀ tsìfa ye na nà, mòò riì ye sa dzyeemaa kiriɔ, tɔ̀ nà nà dzin wo ra nèe tsuru ci: <Fù e nèe tsùùma rèe sìn à rà>.
Tɔ̀ ye de, w'a tɔ̀ wo ko seey rìì nà fù, wo yè b'à tsuù fɔ bònè kèrè dɛ !
10 Sani e tɔ̀ fa, e kiri tɔ̀ tsuru goò rà, e be wɔ, b'a tsuù bònè kèrè. Tɔ̀ ye fa, tsùùma wùù nìi reè ni jɔɔn, wo ye ba wù twɛy sɔn ka, mòò riì wo kiriɔ, tɔ̀ nà nà dzin wo ra nèe tsuru ci: <N dzunwɛynsi, fù e b'a tsuù jɔɔn>.
Tɔ̀ ye fa, wo ko nìi reè sapɛ tsùuŋnà ɲwɛɛ̀n nà, tɔ̀ nà bà blà rii wɔuma wo ɲan twɛy sapɛ jaa ra.
11 A jà min tɔ̀ dè, wo mòò o moò y'à yɛrɛ ɲanseen, Ŋaablà nà wo mà jàà. Wo mòò o moò to y'à yɛrɛ ma jàà, Ŋaablà nà wo ɲansen.»
12 Tɔ̀un, kpir'liì na Yesù kiri naɔ ci è nà ɲwɛyn fa wò re, Yesù yè dzin tɔ̀ ra ci: «Sii o sii, e ba nà ɲwɛyn ta ji e mòdzin ì kiri à ra, à bàu bwèytààrùn ɲwɛyn o, à to bàu fene ɲwɛyn o, a na nìì reè kiri à ra, maà to è bà à dzunwɛynsi reè, ko a ma moo rèè, ko a neema reè, ko a tsuùsi gètsi rèè waa. Wo ye tɔ̀ fa, twɛy sa dzia nà tɔ̀ tsuru fa sii sɔn see, yè wo sa kiri. Tà doùn, à bàu jàci è nàu nìi ɲɔn wo re, è tɔ̀ tsìɛ̀ rìì sàrà bou mɔn.
13 E ba nà tɔ̀ tsuru fa, e bà nà mòdzin ì kiri, à to è bà gbakɔɔn reè, ko mòdzin nɔɔ̀rɔ̀kɔɔn reè, ko jaana reè.
14 Tɔ̀ ye fa, wo raà nà wùbe, kàtsu twɛy mòdzin neè fa dzi à tsìì sàrà wo re waa. Kììyama tsìɛ̀ sii sèè, Ŋaablà rii nà tɔ̀ tsìɛ̀ sàrà wo re.»
Yesù tàlen nìi baun ɲwɛyn ta jiumaà raa goò tsɛ
15 Tɔ̀ ɲan, Yesù ko nìì reè ni ɲwɛɛ̀n nà e si re, twɛy mòò sɔn tɔ̀ gooma myɛ̀un min niì, tɔ̀ yeè dzin Yesù ra ci: «Aa ! Mòò riì kpɛ̀ynto nà e raa ɲwɛɛ̀n ɲɔn Ŋaablà re màsàbee gàne rɔ̀n, tɔ̀ tsìfa raa nà wùbe.»
16 Tɔ̀un, Yesù yè nèe gooma bɔɔ ree ka tàlen ban tɔ̀ kpir'la rè nèe tsuru ci: «Sii sɔn see, kpiri sɔn na n'a re wò yeè ɲwɛyn giri ta ji. Tɔ̀un, è ɲwɛyn nèe goo dè mòò gir'la.
17 Ɲwɛɛ̀n watsi nàu wɔ, è re faagoofadzian ka, ci è bè mòdzian kiri, ci ɲwɛɛ̀n goojaa sapɛ jaa bo dòu, ci yè nà.
18 Ŋà, faagoofadzian bèu è gè o ge kiri, è soo sookɔɔn sapɛ yeè bè e ŋoòma dè à ra, yè sàrìyà gaa fa à re. A bèu nìi jɔ̀na kiri, tɔ̀ yeè dzin à ra nèe tsuru ci: <Mun dzù sɔn fiunà, fɔ min bè tɔ̀ siin. A sao Ŋaa sàò, mun fa wɔuma tàrà waa>.
19 Soo kpɛrɛ yè nà bè dzin faagoofadzian nà ci: <Mun fɛɛ fa nìì tsyeùn fiɔ̀, mun to bèe è ka fɛɛ fa siin. A sao Ŋaa sàò, mun fa wɔuma tàrà waa>.
20 Tà shɔ̀ùn, soo kpɛrɛ yè bè dzin faagoofadzian nà kɔn ci: <Aa, mun furu faɔ̀ bwèy fii ree ɲan, mun fa wɔuma tàrà waa>.
21 Faagoofadzian sa yeè sèè na tɔ̀un, è nà twɛy gooma reè dè e kuntsiɛ̀ rà. Kùntsiɛ̀ sa vunun yè ta tɔ̀un, è dzin faagoofadzian nà ci: <Dɔn tabe, tabe wɔ̀ɔ̀ jaa rè, e bè gbakɔɔn reè, ko mòdzin nɔɔ̀rɔ̀kɔɔn reè, ko jaana reè kiri, ci yè nà mìin yè nà n ne ɲwɛɛ̀n ɲɔn>.
22 Tɔ̀un, faagoofadzian yè bè twɛy mòdzin neè gaa na. A nàu wɔ, è dzin e kuntsiɛ̀ rà ci: <Kùntsiɛ̀ mun kpɛyn wo re dèumaà fau, ŋà, gàneè na tsyɛn ŋe waa>.
23 A kùntsiɛ̀ yè dzin à ra tɔ̀un, ci: <Bo wɔ̀ɔ̀ kɛ̀yn, e bè shirii reè rè, e bè mòdzian kiri. A maxɔbe è kpɛyn ci yè nà, sànko mun ne gbàà yè tsyɛn.
24 Awà, mun nì ci e ra, mun mòdzin nìi reè kiriu jɔ̀na, yè e nɔn, mun ne ɲwɛyn nèe soo na wɔɔ̀ twɛy sɔn dzu waa>.»
Goo nìì reè mòò bàa Yesù rè kàràndzin
25 Twɛy goo rèè sapɛ shɔùn, Yesù yè shia kun, jàma brìsi yè bà ni à kpɛyn. Tɔ̀un, è nà e jaa kere è ra, è dzin è ra ci:
26 «Wo mòò riì ci wo nà à gban mun kpɛyn, wo ɲɛyn to ni a naà ko a faà tsɛ, wo ɲɛyn ni a re tààn ko a dzin nèè tsɛ, wo ɲɛyn ni a tsinà rèè ko a tseyn nèè tsɛ, wo ɲɛyn yè bà ni a yɛr'la sa tsɛ, wo na dzia bà mun ne kàràndzin waa.
27 Mòò riì ma e ɲɛyn bo e yɛrɛ tsɛ, è tsiì byɛnbee kuan sapɛ ra, è gban mun kpɛyn, arì è kɛ̀nsɛɛn ye ba à vua rìì, tɔ̀ tsìfa na dzia bà mun ne kàràndzin waa.
28 Y'a tɔ̀, ye sɔn ye ba nà sangaso ji, n ci ye yè tsuɔ rìì, ye akiri yaa bo fa à goo rèè tsɛ ŋe, ye ye ba nà dzi à ra, ye to ma ba nà dzi à ra o ?
29 A ma tɔ̀ akiri yaa boo fa, e fu a dzii kun bè a kun nè, wo dzia nà gba à goo rèè dzyeè rà. Wo to ye gba, mòò o moò nà gbà ree dzun baumaà jà, è nà jiran wo mà.
30 Yè dziàn nèe tsuru ci: <O ! Kpir'lee yè e re gbàà dzunbau, è nà gba à dzyeè rà>.
31 Tɔ̀ dɔ̀n bouma shɔ̀ùn, màsà kpir'la sɔn ye ba nà bè e masà kpìrì si kpɛrɛ dzii kun kaa ra, n ci è tsuɔ rìì, è akiri yaa bo fa à goo rèè tsɛ ŋe. Tà shɔ̀ùn, è kòmànà à siin à ko e re kaadzin gbaa tsyeò ye ba nà dzi be tɔ̀ màsà kpir'la ko e re kaadzin gbaa mòò dzii kun o ?
32 A y'a jà wò fa dzi, à y'à toò, tɔ̀ màsa kpir'la dàn yè bà gbàn, è mòdzin ì ka bè à kpɛyn, ci yè bè à màfyɛ̀n kaà yè dò.
33 Tɔ̀ fau'n kuru soo tsuru, ye ɲan mòò o moò ma e ɲɛyn bo e suun ge reè sapɛ tsɛ, tɔ̀ tsìfa na dzia bà mun ne kàràndzin waa.»
34 Tà shɔ̀ùn, Yesù yè dzin kɔn ci: «Kòo gè wùù rii, ŋà, à ye maà, mòo dzia à sèè dzibe dzùrù kɔn ?
35 Tɔ̀un, à na gèsɔn wùbee dzɔ̀nxɔɔ̀ mà, à to fa dzi ba noo. A bèe maa dà rɔ̀n nì. Toro ì kpɛ̀ynto ye ba ni mòò riì rè, è bà è ka myɛ̀yn faa, è toro wɔu'n kuru wube dɛ !»