Marc 6

Yesù bèu min niì Nazarɛtsì wɔ̀ rɔ̀n

1 Àyìwà, tà shɔ̀ùn, Yesù yè bo tɔ̀ gàne rɔ̀n, è dɔ̀n be e ta rɔ̀n. À re kàràndzin neè sa yeè bè ko à ka.

2 Ɲànwɔ siɛ̀ nàu wɔ, è bè dɔ̀n Ŋaa blabe gbaà doùn, è maa, è mòdzian kàr'na. Nìì reè sapɛ na e toro wɔɔ à re, à na jiɔ̀ twɛy giri dzii tsɛ, yè dziàn ci: «È bà nèe tàrau min ? Tsi ye bà nèe akiriblabe rèe sìun à ra ? È bà nèe kabagoo goo ree reè faa dzùrù ?

3 À na gɔ̀ɔ̀kpaabaà dɛ ? Mariyamùn dzin kpir'la kɛ̀ ? À keresi reè rìì na Yàkubà, ko Yosè, ko Yudè ko Shimɔ̀n gbɛ ? À tseyn taan ree rìì na tsùuŋnà ɲe ka mìin dɛ ?» Tɔ̀ kɛ̀sɛmà nìi na ni è ɲan, tɔ bàu saabu, è na ɲɛn Yesù rà waa.

4 Tɔ̀ ɲan, Yesù yè dzin è ra ci: «Bla wɔɔ̀ kɛɛraa ɲàn min niì sapɛ fɔ à yɛ̀r'la fàtsiɛ doùn, à fàdzin nèè fi, ko à yɛ̀r'la rè mòdzìnbee doùn.»

5 Yesù na dzi kabagoo goo giri fa mɔn waa, è si rèè tsùuŋ ɲìnìnkɔɔn danman basɔùn nì tsɛ, è twɛy cɛrɛmabe.

6 È re ɲɛynabɛybeè na jiɔ̀ à dzii tsɛ. Tɔ̀un è bèe è lagur'la wɔ̀ rèè ɲàn, è mòdzian kàràn beè.

Yesù yè e re kàràndzin teeŋ fiɛ̀ kau min niì

7 Tà doùn, è re kàràndzin teeŋ fiɛ̀ kiri, à yè è ka mòkun fii fii. È dzi sin è ra, yè bà dzia kwey rèè kaa bo kweykɔɔn reè kpɛyn.

8 Jìɛ̀ doùn, è dzin è ra ci è mà gèsɔn pɛn sen fɔ kɔ̀n bàsɔùn. È mà ɲwɛyn sen, è mà gàànfaa sen, è to mà ɲɛyn ji e kuùn.

9 Yè seereyn ì wɔ, è to mà mɛ̀yɛ̀ dzin fii wɔ.

10 È dzin è ra sa ci: «E ye be dɔ̀n fɔɔn o fɔɔn re, ye to mɔn, fɔ e bo jisee yè bè wɔ.

11 E ye be gàne o gàne ɲan, twɛy gànèdzin neè yè bè e nɔn ci e fa e jaà ye re, è to mà e toro wɔ e re goomaa rè, e bokɔɔn mɔn, ye san nà kpankpaàn ban ji to. Tɔ nà bà tàànmàshɛn è re, è kpàdè è ra, ci è ɲaan fau.»

12 Àwà kàràndzin neè yè bè tɔ̀un, yè bè à gbango mòdzian nà, yè bà ni e re jaamabee fau'n kur'la lakere.

13 È na kwey giri kaa boò kweykɔɔn reè kpɛyn, yè ɲin'nà ji ɲìnìnkɔɔn giri kùùn, yè è cɛrɛmabe.

Mòdzìn jààràfoobaa Yùxanà vuu'n kur'la

14 Àyìwà, Yesù goomaa yè nà dzi màsà kpiri Erodzì tsɛ, kàtsu à tsoò na boo min niì sapɛ. Mòdzian na dziàn ci: «À Mòdzìn Jààràfoobaa Yùxanà nì sèè kpunaunma è bo fùn nèè fi, tɔ̀ rii kamà, è bà dzia kabagoo goo reè faa.»

15 Swey dziàn ci: «À kɛɛra Aliì rìì.» Swey yè bà dziàn ci: «À kɛɛra dzyee reè tsuru kɛɛraa sɔn ni.»

16 Màsà kpiri Erɔdzì nàu à goomaa myɛ̀n min niì, tɔ̀ yeè dzin ci: «Mun Yùxanà nìi kungɔ kùnuun, à wò rii sèè kpunaunma è bo fùn nèè fi.»

17 Àwà Erɔdzì na e tseyn kpiri Fìlipù rè tààn tsi baɔ̀ e re tààn, nìi tsoo Erodziyadzì. Yùxanà dzii wɔ nìi fau tɔ̀ goò goomaa tsɛ, tɔ̀ na baɔ̀ saabu Erɔdzì y'à to y'à kun shì ji kàsoò doùn.

18 Yùxanà na dziɔn à ra rii ci: «À na dàaŋnà wo y'à tseyn kpir'la rè tààn bà a re tààn waa.»

19 Tɔ̀ goò na Erodziyadì sa vunun taɔ Yùxanà kpɛyn, fɔ à sàò na ni è vu, à yɛ̀r'la to fa ni dzi tɔ̀ fa waa.

20 À fa ni dzi tɔ̀ fa waa, kàtsu Erɔdzì sa na shia Yùxanà jɔɔn, è ɲɛn à tsɛ à na à tɔ̀ à mòdzin tereonma, è bà fɛnɛ. À na à kààwɔu'n kuru wubeò. Yùxanà rè gooma reè myɛ̀nkɔɔn na à akiri gbiimaan. Tɔ̀ ko e sa ra, è myɛ̀nkɔɔn na dzi à ra.

21 Àwà Erodziyadì yè nà à goò jisee wuu tara, nìi màsà kpiri Erɔdzì kere jisee jii laker'la jaaravià. Tɔ̀ sii sèè, Erɔdzì na tɛy fa jiɔ̀, è re fàan kɔ̀n jɔ̀ɔ̀ndzin neè, ko kaadzin kuntsii reè, ko Galile mar'la jɔɔndzin neè kiri.

22 Tɔ̀un, Erodziyadzì dzin taan yè nà dɔ̀n, è ɲɔɔ̀n ji jiu'n kur'la tà goò ko'un, fɔ à goo yè bè dzibe Erodzì ko mòdzin kiriuma rèè sa ra. Tɔ̀ faumaà, Erodzì yè dzin cangur'liɛ rà ci: «Gè riì y'a dzibe tɔ̀ gaa n ne, mun nà à sìn wo ra.»

23 È kɛɛ̀y à re xɔù, ci è gè o ge gaa wò re, wo nà à sìn à ra, à kɛ̀nsɛɛn ye ba wò re màr'là tara soo rìì.

24 Cangur'la yè bo è bè e naà tey ci: «Mun nà fee rìì gaa à re ?» Tɔ̀ ci: «Mòdzìn Jààràfoobaa Yùxanà kùngɔɔ̀.»

25 È tabe dɔn tɔ̀un è bè màsà kpir'là kpɛyn, è bè dzin à ra ci: «Mun sào ni wo yè Mòdzìn Jààràfoobaa Yùxanà nì kùngɔɔ̀ sìn mun na mìin tasaà sɔn doùn dòoneen ɲan.»

26 Màsà kpir'là taama yè ŋununbe fɔ è bè geren, ŋà à kɛ̀rɔnmaà kamà, ko à re mòdzin kiriuma rèè kamà, à fa ni dzi e nɔn à mà à re waa.

27 Tɔ̀ nɔ̀nkɔɔrɔn màsà kpir'là yè e kplatsuubaa kaadzian soo ka ci è nà ko Yùxanà kùngɔɔ̀ ka. Tɔ̀ sa yeè bè, è bè Yùxanà kùngɔɔ̀ kùnùn kàsoò doùn.

28 Àwà, è nà à ka cangur'liɛ kɔ̀ tasa doùn, à y'à sìn à ra. Tɔ̀ sa y'a tsi, à y'à sìn e naà nà.

29 Yùxanà rè kàràndzin neè y'à goomaa myɛ̀un min niì, yè b'a fùàn sen, yè b'a wɔ.

Yesù buru kunun nun ko ji dzin fii ka jàma brìsi dziira gaaŋ min niì

30 Àyìwà, kɛɛradzin neè daun yè bo jìɛ̀ rà, yè nà e ladzyèè Yesù tɛyn. È goo o goo fau jìɛ̀ doùn, ko è goo o goo kàraun mòdzian nà, yè tɔ̀ sapɛ lakɛ̀ɛ̀y à ra.

31 Tà shɔ̀ùn, Yesù yè dzin è ra ci: «Ye nà mìn bè jènjaà gàneè sɔn ɲan e soone, ye bà ni be e ɲanwɔ dɛ̀ɛnin.» Àwà Yesù tà dèu, kàtsu è kpà nàbaa rèè ko sèèbaa rèè giribe ɲaanfaa suun, watsi tsu naà ni è suun, yè bà ni dzi ɲwɛyn ɲɔn waa.

32 Tɔ̀un, yè dɔ̀n konkor'na doùn, yè bè jènjaà gàne sɔn ɲan e soone.

33 Ŋà è bèkɔɔn, mòò giri yè è jà, yè è tɔ̀. Tɔ̀un mòdzian yè bo e san nà wɔ̀ rèè sapɛ ɲan, yè vwɛ̀ɛ̀y be mɔn, yè bè wɔ è jɔɔn tɔ̀ gàne rɔn.

34 Àwà, Yesù bèu bo konkor'na doùn min niì, è jàma brìsi jà. Tɔ̀un, è màtsuru y'a kun fɔ è bè geren, kàtsu è na ni a ci saa ì, kplatsuubaa na ni nìì reè rà waa. È maa, è goo giri kàr'na è ra.

35 À ni kàr'nà nà à re kàràndzin neè yè nà à jà watsia gbàmaun. Tɔ̀ ɲan yè e kpɛrɛ̀ à ra, yè dzin à ra ci: «À jènjàà kor'nì, bwèè to doò nòn.

36 À to yè bè ten dzii reè ko dzii re wɔ rèè ɲàn, yè bè ɲwɛyn gaa fi ɲɔn.»

37 Yesù yè dzin è ra ci: «Ye yɛ̀r'leè yè è kɔ̀ ɲwɛyn.» È ci à ra ci: «Mìn bà ni be faagoofadzin soo kuu ŋaalòn sàr'là ɲɛyn xɛkɛ rìì wɔ ɲwɛɛ̀n ɲàn, mìn nà à sìn è ra y'à ɲɔn gbɛ ?»

38 Yesù yè è tey ci: «Buru kunun fɛrɛn ni ye re ? Ye b'a siin.» Y'à lafyɛu, yè dzin ci: «Buru kunun nun ko ji dzin fii.»

39 Tɔ̀un è dzin è ra, ci yè mòdzian sapɛ tsuù bè kuru kuru vun tswɛɛ tsɛ.

40 Mòdzian yè dzyèè dzyèè yè e tsuù be tà tsuru mòkun caànmoò mòò, swey dzyèè tsye tsyeùn.

41 Tà shɔ̀ùn Yesù yè buru kunun nuàn ko ji dzin fiɛ̀ sen. À yè è seun, è jaà ɲansen jiran nɔ̀n, è Ŋaablà tswa, è bur'leè tara tara, à y'à wɔ kàràndzin neè suun, ci y'à tanan mòdzian nà. È ji dzin fiɛ̀ sa sen, à y'à tanan è sapɛ ra.

42 È sapɛ yeè ɲwɛɛ̀n ɲɔn, yè cɛn kpan.

43 Bur'leè ko ji rèè dzyee nìi tou, tɔ̀ tsɛumaà yè sèè teeŋ fii tsyɛn.

44 Nìì reè tɔ̀ ɲwɛɛ̀n ɲɔun, kpir'leè na mòkun gbaa nùn.

Yesù jìiŋ min niì yu blàa tsɛ

45 Tɔ̀ nɔ̀nkɔɔrɔn, Yesù y'à ji e re kàràndzin neè jɔɔn, ci yè dɔ̀n konkor'na doùn, yè e maa be wò jɔɔn yu blàa kɛ̀yn nɔn, Bɛtsisayidà wɔ̀ɔ̀ kpà, sani w'e shi sin dò jàmaà nà.

46 À shia sìn dòu watsi riì bwèy, è bè jèèn kpàkèrè, ci wo bèe Ŋaablà mafyɛ̀n.

47 Àwà, dzɔɔ̀n yè nà tsì è konkor'na to yu blàa shiɲaanfi, Yesù soo yeè bà ni kpee rà.

48 Tɔ̀un, Yesù yè nà à jà konkor'na vwɛ̀ɛ̀ kàràndzin neè byɛɔ̀n fɔ è bè geren, kàtsu fyɛɛn na tsià è mà. Tsɛ̀kèn ben bwey Yesù yè fù è jìì beè yuà tsɛ, è kpàkèrè, è bà na ni à re, è bè dɔ̀n geren è tsɛ.

49 Twɛy y'à jììkɔɔn jau yuà tsɛ min niì, è na à siɛ̀n ci à ɲɛyn nì. Yè gɛɛ bo fààn na.

50 Àwà è sapɛ y'a jàu, è akiri na tsuù waa. Tɔ̀ nɔ̀nkɔɔrɔn Yesù sa yeè gooma è ka ci: «Ye akir'là tsùù, à mun nì. E maà shi waa.»

51 Tɔ̀un è tèyn è ka konkor'na doùn, fyɛɛn sa yeè e tsiì. Tɔ̀ goò yè ji kàràndzin neè dzii tsɛ fɔ è bè geren.

52 Àwà Yesù kabagoo goo niì fau bur'leè ka, è akiri naà tɔ̀ goò jaɔ̀ waa. È akiri na ŋununbeò.

Yesù ɲìnìnkɔɔn giri cɛrɛmabeu min niì Genɛzarɛtsi mar'la ɲàn

53 Àyìwà, Yesù ko e re kàràndzin neè yè yu blàa fuu tɔ̀un, yè bè dzi Genɛzarɛtsi mar'la ɲàn. Yè konkor'na tsìì to yu dziɛ rè mɔn.

54 È dziu bo konkor'na doùn min niì, tɔ̀ nɔ̀nkɔɔrɔn, mòdzian yè Yesù tɔ̀.

55 Yè vwɛ̀ɛ̀y be tɔ̀ gàneè màr'là min niì sapɛ. È y'a myɛ̀n ci Yesù ni min o min, yè e maa yè ɲìnìnkɔɔn reè sen beè ɲaange ì tsɛ à re mɔn.

56 Yesù ye ba na dɔ̀un min o min, à bàu wɔ̀ blà reè doùn ò, wɛ̀ɛ̀rìì reè doùn ò, ten dzii reè rà ò, è na bèe ɲìnìnkɔɔn reè tsùù jàmà làdzyèè gane reè ɲàn, y'à màfyɛ̀n ci à y'à to yè e dzyɛn à re vyaà dziikuan bàsɔùn nà. Nìì reè sapɛ ye ba na e dzyɛun à ra, è na cɛrɛmabeè.