Marc 7

Yesù nìi dèu Faridziɲɛn rèè rà goo bɔrɔɔ shi rèè tsɛ

1 Àyìwà Faridziɲɛn rèè, ko Sàrìyà kaamoo reè swey yè dan yè bo Yerusalɛmùn, yè nà e ladzyèè Yesù tɛyn.

2 Yè Yesù rè kàràndzin neè swey jà, twɛy ɲwɛɛ̀n ɲɔɔ̀n e si rèè nooŋmaà ka, tɔ̀ dzuɔn ci è na e sira foo e foòŋ'n kur'la waa.

3 Àwà, sani Faridziɲɛn rèè ko Dzyèèsìbee mòdzin neè yè ɲwɛɛ̀n ɲɔn, è na e si rèè fòòŋ'n kuru wuu faa, è ɲɛn à tsɛ, è na shiɔ̀ e fabɔɔ rèè rè shi bɔrɔɔ reè rà.

4 È ye dan yè bo jàmà làdzyeema nɔ̀n, è ma e foò fyeu, è na ɲwɛyn ɲɔɔ̀n waa. È na goo giri kpɛ̀rɛ̀kuru ì sa shi jiɛ twɛy shi bɔrɔɔ reè kàjaa tsɛ, nìi yɛ, yukuun neè, ko tsyɛn reè, ko tàànge dànɲànma reè fòòŋ kur'la.

5 Tà doùn, Faridziɲɛn rèè, ko sàrìyà kaamoo reè yè Yesù tey ci: «Fee y'à to wo re kàràndzin neè na fàbɔɔ rèè rè shi bɔrɔɔ reè shi jiɛ waa, è ɲwɛɛ̀n ɲɔɔ̀n e si rèè nooŋmaà ka ?»

6 Tɔ̀ yeè dzin è ra ci: «Kɛɛra Esayì gooma niì dèu ye duungoofiitsi rèè tsɛ, tɔ wùbeu taki, a ci à sɛbɛɔ̀n nìi tsuru ci: "Nèe mòdzin nee reè mun blàbee e dzii rìì ka, è duùn nɔ̀n, è dan gbàn mun na.

7 È mun blàbe niì faa, tɔ goo maana. È goo nìì reè kàr'na mòdzian nà, tɔ mòdzin ì dzugooma ni."»

8 Yesù yè dzin è ra ci: «Ye Ŋaablà dzugooma xɔù rèè bàtoo, ye yè e shi mòdzian raa shi bɔrɔɔ reè rà.»

9 È dzin è ra kɔn ci: «Ye jaa tàrau ye e nɔn Ŋaablà dzugooma xɔù rèè rè, sànko ye mà e re shi bɔrɔɔ reè mɛɛy waa.

10 Awà, kɛɛra Musà dziun ci: "A faà ko a naà blàbe." È bà ci kɔn: "Mòò riì dzii ɲaan nà wɔ e faà, tàmafa e naà tsɛ, tɔ wù è vu."»

11 Ŋà nìi ye, ye dziàn ci: «Mòo dzia dzin e faà, tàmafa e naà rà ci: "Mun na wù min nìi sìn wo ra m'a ka wo dzwɛ̀ma, tɔ kɔriban (nìi dzuɔn Ŋaabla kɔɔ gè)

12 Tà tsuru, y'a toò, tɔ̀ tsìfa na dzia gèsɔn fa e faà, tàmafa e naà rè dɛ.

13 Tà doùn, ye Ŋaablà re goomaa mɛɛ̀ twɛy goo bɔrɔɔ shi rèè ka, ye twɛy nìì reè dèe mòdzian nà. Ye to tɔ̀ tsuru goo giri kpɛ̀rɛ̀kuru ì sa faa.»

Yesù ci nìi mòò noo

14 Tà shɔ̀ùn, Yesù yè jàmaà kiri kpɛ̀rɛ̀ e ra kɔn, è dzin è ra ci: «E sapɛ yeè e toro wɔ n ne, ye nèe dzin sen:

15 Gè o ge boò da rɔn è bè mòò duùn, tɔ̀ pɛn na mòò noo waa. Ŋà nìi daàn è bo duùn nɔ̀n, tɔ̀ rii mòò noo. [

16 Toro ì ye ba ni mòò riì rè è bà è ka myɛ̀yn faa, è toro wɔu'n kuru wube dɛ !]

17 Àwà Yesù nàu bo jàmaà tɛyn watsi riì bwèy è bè tsii rɔ̀n, kàràndzin neè y'à tey tɔ̀ gooma bɔɔ̀ dzuun ma.

18 È dzin è ra ci: «Arì she akiri na ni ye tsu re o ? Ye na à tɔ̀ ci gè o ge boò da rɔ̀n è bè mòò duùn tɔ̀ na à noora ɔ ?

19 À na à noo waa, kàtsu à na beè vun'nà ɲàn waa, fɔ duùn nɔ̀n, tà shɔ̀ùn, à dànmààn yè bè ji.» Yesù y'à kpàdè tɔ̀ goomaa ka, ci ɲwɛyn ge pɛn na nooŋnà waa.

20 È dzin kɔn ci: «Mòdzian duungoo rìì y'à noo.

21 Àwà duungoo ɲaan neè boò mòdzian duùn nɔ̀n nì. Tɔ̀ rii daàn nèe goo rèe rèè ka: kɛ̀kɛ̀ɛ̀ybeè, shɔnbeè, mòdzìn vua,

22 ɲànmɔ̀ɔ̀beè, jaacɛnbɛybeè, ɲanbee, mòdzìn sànfir'la, kɛ̀kɛ̀ɛ̀y goo reè, jaaɲininbeè, mòdzìn tsòò bar'la, yɛ̀rɛ̀blàbeè, ko akiribɛybeè.

23 Twɛy goo ɲaan neè sapɛ boò mòdzian duùn nɔ̀n nì, y'à noo.»

Yesù kwey kaa bou tàan sɔn dzin taan kpɛyn min niì

24 Àyìwà, tà shɔ̀ùn, Yesù yè fù è bo mɔn, è bè Tsiirì wɔ̀ɔ̀ wòòɲaan ɲàn. À wɔu mɔn, è bè dɔ̀n gbà sɔn doùn. À sàò naà ni à re mòò y'à tɔ̀ ci wo ni mɔn waa. Ŋà, à na dzi e mɛnɛn waa.

25 À wɔumaà mɔn, tɔ̀ nɔ̀nkɔɔrɔn, tàan sɔn y'a goomaa myɛ̀n. Kwey na ni tɔ̀ taàn raa dzin taan kpɛyn. Tɔ̀un, è bè Yesù kpɛyn. À bèu wɔ, è kunun gban ji à bììn.

26 Tàan rèe na kun kpɛrɛ mòdzin, è bà kereu jàmaan sɔn ɲan, nìi kir'là Sirofenisi. È Yesù màfyɛ̀n, ci è kweè kaa bo wò dzin taan kpɛyn.

27 Yesù to yè dzin à ra ci: «À to dziin nèè yè cɛn ŋe. À na wù dziin nèè rè ɲwɛɛ̀n yè sen maa vììrìì reè rè waa.»

28 Taàn ci à ra ci: «Tsìfaà, arì ɲwɛyn bubui niì reè tɔr'nà dziin nèè rè ɲwɛyn ɲɔnma nɔ̀n, vììrìì reè tɔ̀ ɲɔɔ̀n do.»

29 Yesù yè dzin à ra ci: «Tɔ̀ goomaa kamà, à wa a re tsii, kweè bou wo dzin taan kpɛyn.»

30 Tɔ̀un, taàn yè dɔ̀n be tsii. A bèu wɔ è dziɛ̀n ɲɛn tsuuŋma jà ɲaangee tsɛ, kweè bou à kpɛyn.

Yesù kpiri toròtòròkɔɔn toro kperen sɔn cɛrɛmabeu min niì

31 Tà shɔ̀ùn, Yesù yè bo kɔn Tsiirì wòòɲaan màr'lɔ̀n. È nà dɔ̀n bo Sidɔ̀n wɔ̀ rɔ̀n, wɔ̀ tsyeùn nìì reè kir'là Dekapɔlì, è twɛy fi shɛn dɔ̀n, è nà Galile yu blàa kpàkèrè.

32 Tɔ̀un, yè nà kpiri toròtòròkɔɔn toro kperen sɔn ka à re, y'à màfyɛ̀n, è bà ni e si rèè tsùù à tsɛ, è cɛrɛmabe.

33 Àwà Yesù yè bo kpir'la ka jàmaà tɛyn tɔ̀un, è b'a ka e soone. Tà doùn, è siniin neè mùù à torokɔɔ re, è dzweeyuà sen è tɔ̀ dzyɛn à nɛɛ̀n nà.

34 Tà shɔ̀ùn, è jaà ɲansen jiran kèrè, è ŋɔ̀n fààn, è dzin à ra è re kungoòmà ɲàn ci: «Efatà, nìi dzuɔn ci: "Dzii san".»

35 Tɔ̀ nɔ̀nkɔɔrɔn, kpir'la tor'lèè dzii yè san, à nɛɛ̀n yè foro, è dzi gooma e saoma.

36 Tà shɔ̀ùn, à y'à dè màxɔbe è ra, ci è mà à gooma de mòò pɛn na. Ŋà à tɔ̀ dèe è ra vu rìi mà, è sa y'a gbango beè tɔ̀ vuà mà.

37 À na jiɔ̀ è dzii tsɛ fɔ è bè geren, yè dziàn ci: «À goo o goo faa, à sapɛ wù. A y'à faa torokper'neè yè myɛ̀yn fa, bobo reè yè bà dzia gooma.»