Marc 5

Yesù kpiri kweykɔɔn sɔn cɛrɛmabeu min niì Gerasa mar'la ɲan

1 Àyìwà, twɛy goo rèè shɔ̀ùn, Yesù ko e re kàràndzin neè yè yu blàa fuu, yè b'a kɛ̀yn, Gerasaka reè rè màr'là ɲàn.

2 È wɔu mɔn, Yesù yè bo konkor'na doùn. À bou min niì, kpiri kweykɔɔn sɔn yeè bo kabur'lèè rà, à y'à kùùntsi.

3 Kabur'lèè na baɔ̀ tɔ̀ tsùùma, kàtsu à naà kuà mòò ɲàn è dzi jɔ̀rɔ̀kɔ tsu wɔ à ra dɛ.

4 Watsi giri è na jòòroon wɔɔ̀ à ra, yè jɔ̀rɔ̀kɔ ì ka à shì, ŋà, à na twɛy sapɛ shɛn shɛɛ̀n. È bà ni maɲinan, tɔ̀ fààn naà ni mòò pɛn ɲan waa.

5 Fen ko bwèy sa, kudɛyn à na e ɲantsyeere beè kabur'là rà, ko jèn nèè tsɛ, è sɛ̀ɛ, è yɛrɛ vyɛ vyɛ̀ɛ ko kpàà reè ka.

6 À tou è Yesù jà jeenà, è vwɛ̀ɛ̀y na, è nà e maa ji à sàn dzuun.

7 È sɛ̀ɛ̀y fààn na ci: «Yesù, Jiran nɔ̀n Ŋaablàa Dzin Kpir'la, fee rìì ni wo ko mun fi ? A yɛrɛ sa rii to, a fa Ŋaablà kamà, a maà gooɲaan fa n na waa.»

8 À tɔ̀ goomaa dèu, kàtsu, Yesù na dziàn ci kweè yè bo à kpɛyn.

9 Tɔ̀un, Yesù y'à tey ci: «Wo tsoo fee ?» À ci: «Mun tsoò rìì jàma brìsi, kàtsu ɲe giri.»

10 È Yesù màfyɛ̀ɛn cɛyn, à mà nà to è kaa bo bè tɔ̀ gàneè màr'là kɛ̀yn waa.

11 Àyìwà, tɔ̀ y'a tàrà, bɛ̀y kuru brìsi sɔn na ni ɲwɛɛ̀n nà jèèn tààkuùn mɔn kèrè.

12 Kwey rèè yè Yesù màfyɛ̀n tɔ̀un. È ci à ra ci: «Mùn bàji be, mìn bè dɔ̀n bɛy rèè ɲàn.»

13 Yesù yè tɔ̀ shi sin è ra. Tɔ̀un, kwey rèè yè bo kpir'la kpɛyn, yè bè dɔ̀n bɛy rèè ɲàn. Tɔ fau min niì, bɛy rèè yè soso bo na jèèn tenteyn jaa tsɛ mɔn, yè nà e kpinin yu È sapɛ yeè san. È na bɛy gbaa fii tsuru boò.

14 Bɛ̀y kplàtsuu reè yè vwɛ̀ɛ̀y, ye b'a goò lakɛɛ̀y wɔ̀ɔ̀ doùn, ko ten dzii reè rà. Mòdzian yè bo tɔ̀un, nìi faɔ̀ yè bè tɔ̀ lafyɛ.

15 Àwà, è bèu wɔ Yesù tsɛ, kwey giri na ni kpir'liì kpɛyn, yè tɔ̀ tsùuŋma jà, vya ì ni à mà, à jaamà yè bà tsìiŋnà. Yè shi.

16 Goo nìi fau tɔ̀ kpiri kweykɔɔn ko bɛy rèè rà, nìì reè tɔ̀ jàu, twɛy y'à lakɛɛ mòdzian nà.

17 È tɔ̀ myɛ̀un min niì, yè maa yè Yesù màfyɛ̀ɛn ci è bè, è bo ye re màr'là doùn.

18 Àwà Yesù dɔ̀nkɔɔn konkor'na doùn tɔ̀un, à kweykɔɔn niì cɛrɛmabeu, tɔ̀ y'a màfyɛ̀ɛn ci à y'à to w'e b'a ka.

19 Yesù na e tsiì tɔ̀ ra à re waa, ŋà è dzin à ra ci: «B'à re tsii, a re mòdzìnbee doùn, Tsìfaà màtsuruu wo ra, è goo o goo fa wo re, e tɔ̀ sapɛ lakɛ̀ɛ̀y è ra.»

20 Tɔ̀un, kpir'la yè dɔ̀n be. Yesù goo o goo fau à re, è bè e maa è tɔ̀ lakɛɛ̀y beè wɔ̀ tsyeùn nèè màr'là doùn, tɔ̀ niì kir'là Dekapɔlì. Gè o ge y'a myɛ̀n, è ji è sapɛ dzii tsɛ.

Yesù tàan tsììnàbànkɔɔn sɔn cɛrɛmabeu min niì, è tàànmɛ̀yn sɔn fun kpunan

21 Àwà, Yesù yè yu blàa sèè fuu konkor'na ka kɔn, è nà à kɛ̀yn nɔn. À wɔumaà mɔn, jàma brìsi yè nà e ladzyèè à tɛyn, è bà ni yu bla dziɛ rè.

22 Tà doùn, tɔ̀ gàneè Ŋaa blabe gbaà kùntsiɛ̀ soo yeè nà, tɔ̀ tsoo Yayirusì. À Yesù jàu min niì, è kunun gban ji à bììn.

23 À y'à màfyɛ̀n cɛyn, è dzin ci: «Mun dzin taan gaa san, a yɛrɛ to e nà a si rèè tsùù à tsɛ, è bà ni cɛrɛmabe, è jaamabe fa kɔn.»

24 Àwà, Yesù yè dɔ̀n be à ka. Tɔ̀ y'a tàrà, jàma brìsi na gbaɔn à kpɛyn, twɛy y'à ŋòò tsùù min niì sapɛ.

25 Tàan sɔn na ni jàmaà ɲàn, tsììnàban ni tɔ̀ ra, tɔ̀ y'a jii teeŋ fii.

26 À na byɛɔ̀n jangoofabaa gir'le fɔ è bè geren. È bè wɔ à suun gee sapɛ yeè bè dò, à pɛn na dzi goo wùbe, fɔ à ɲanbe beè nìi tsuru, à ɲanbe beè tɔ̀ rii tsuru.

27 À na Yesù gooma myɛɔ̀n nìi fa, tɔ̀ rii ɲàn, è bè jàmaà ɲàn Yesù bònè, è bè e dzyɛn à re vyaà rà.

28 À na dziàn e duùn ci: «Min dzyɛunma tàrà à re vya rèè bàsɔùn nà, mun nà cɛrɛmabe.»

29 À to yè e dzyɛun vya rèè rà min niì, tɔ̀ nɔ̀nkɔɔrɔn, tsììnàbaan yè dò, à y'à tɔ̀ e gɔn nɔ̀n, ci wo cɛrɛmabeu.

30 Àwà Yesù sa y'a tɔ̀ e yɛr'la tɔ̀ nɔ̀nkɔɔrɔn, ci fàan sɔn bou wò ɲan. Tɔ̀un è jaa kere jàmaà ɲàn, è tey fa ci: «Tsì rii yè e dzyɛun mun ne vya rèè rà ?»

31 À re kàràndzin neè yè dzin à ra ci: «Wo tey faa ci tsì rii yè e dzyɛun wo ra, wo na à jàa jàmaà wo ŋòoŋnà nìi tsuru ɔ ?»

32 Yesù to yè e lagur'la siin bè, gè riì n'a to mòò riì y'à goò fau, wò yeè tɔ̀ jà.

33 Àwà, nìi fau taàn nà à tɔ̀ tɔ̀ nìi fa, à shiumaà tɔ̀un, à mà sɔ̀ɔ̀nkɔɔn yeè nà e kunun gban ji Yesù bììn, è sààbeen sapɛ de à ra.

34 Yesù yè dzin à ra ci: «N dzin taan, wo ɲɛunmaà mun na, tɔ wo cɛrɛmabeu. Bè, Ŋaa yè bè a ko xɛɛrɛ tsi, à y'à cɛrɛma to.»

35 Àyìwà, Yesù ni twɛy gooma reè rà ŋe, mòdzin ì yè dan Ŋaa blabe gbaà kùntsiɛ̀ rè tsii rɔ̀n, twɛy yè nà dzin ci: «Kàrànfaà byɛn kun na ni dɛ waa, wo dzin taan na ni dɛ waa.»

36 Àwà, Yesù na e toro wɔ twɛy gooma reè rè è dzu waa, è dzin Ŋaa blabe gbaà kùntsiɛ̀ rà rìì ci: «Maà shi waa, ɲɛn mun na bàsɔùn.»

37 Tɔ̀un Yesù bèkɔɔn Ŋaa blabe gbaà kùntsiɛ̀ rè tsii rɔ̀n, Piyɛrì, ko Yàkubà, ko Yàkubà raa keresi Yùxanà boshɔ̀ùn, à na à to mòò pɛn yè b'a ka waa.

38 Àwà, è beu wɔ Yayirusì rè tsii rɔ̀n, Yesù y'à jà màànkaan na màànkàn san. Swey gɛɛ, swey yè bà e matsùrùkɔ̀ɔ̀n fa beè.

39 A dɔ̀un tɔ̀un, gbàà doùn, è dzin è ra ci: «Feera ye nèe màànkan nee sapɛ faa, ye yè bà gɛɛ ? Dziɛ̀n na dòonà waa, à ciɛ̀ rìì.»

40 À tɔ̀ goomaa dèu, yè jiran à mà. Tɔ̀un è mòdzian sapɛ bo da rɔ̀n, è to dziɛ̀n fàà ko à naà, ko kàràndzin zhiigia à ka. Tà shɔ̀ùn dziɛ̀n ni min niì è dɔ̀n mɔn.

41 Tɔ̀un, è dziɛ̀n kun e si ra, è dzin à ra ci: «Tàlità kumùn !» Nìi dzuɔn ci: «Tàànmɛ̀yniin, mun ci e fù !»

42 Tɔ̀ nɔ̀nkɔɔrɔn, tàànmɛ̀yniɛn yè fù tsìì, è maa è jìɛ. Àwà, à sìà na jii teeŋ fii rìì. È ji è dzii tsɛ tɔ̀ nɔ̀nkɔɔrɔn fɔ è bè geren.

43 À y'à dè màxɔbe è ra tɔ̀un, ci è màà à to mòò pɛn y'à tɔ̀ waa. Tà shɔ̀ùn, è dzin è ra, ci yè ɲwɛyn sìn à ra, à y'à ɲɔn.