Yesù dɔ̀ùn'n kur'la Yerusalɛmùn wɔ̀ rɔ̀n
21
1 Ayìwà Yesù ko e re kpɛyndzin neè bèu tsyɛnbe Yerusalɛmùn wɔ̀ɔ̀ rà watsi riì bwèy, à yè è to Oliviku rèè jèèn tɛyn, Bɛtsifaazhì wɔ̀ɔ̀ mà gba, è re kàràndzin neè fii ka bè e jɔɔn tɔ̀ wɔ̀ rɔ̀n.
2 À ci è ra ci: «Wɔ̀ rìi yɛ ye jɔɔn, ye bè mɔn. Ye ye be wɔ nìi tsuru, ye nà shùkwɛ̀yna sɔn shiuma jà, à dziàn ni à tɛyn. Ye è foro, ye nà è ka n kɔ.
3 Mòò ye e tey, ye dzin ci Tsìfaà rìì màgoo ni à ra. Tɔ̀ nɔ̀nkɔɔrɔn, à nà à to yè bè.»
4 Tà goò fau nì, sànko kɛɛraa rè gooma de dɔ̀unma bɔrɔɔ sɔn yeè bo e shi tsɛ, nìi yɛ ci:
5 «Y'a dè Yerusalɛmunka reè rà ci:
Ye re màsà kpir'là nàkɔɔn siin ye re. À vunun ma dzi, è bà tèreòn shùkwɛ̀yna bò'ùn.
Shùkwɛ̀yn kpèr'niin bo'ùn, faagoo faa dzwɛka dzin.»
6 Kàràndzin neè yè bè, y'à fa a ci Yesù y'à dèu è ra nìi tsuru.
7 Yè nà shùkwɛ̀ynaà ko e dziàn ka. Yè e re vya rèè bà è tsɛ, Yesù yè tèyn.
8 Jàma brìsià mòdzian yè e re vya rèè bà beè à jɔɔn shia tsɛ. Swey yè bè gɔ̀ɔ̀ tsira ì kɛɛ̀, yè nà tɔ̀ ji beè à jɔɔn.
9 Jàma nìi na ni à jɔɔn ko bònè sa, twɛy yè e vu boò fààn na ci:
«Tsoo dzi yeè ɲɛn màsà kpiri Dawudà tsua dziàn tsɛ.
Nìi nàkɔɔn yɛ Tsìfaà tsoo ra, dzwɛ yè bà ni tɔ̀ kpɛyn.
Tsoo dzi yeè ɲɛn Ŋaablà tsɛ, jìrànxɔɔ̀ doùn doùn mɔn.»
10 Awà Yesù dɔ̀un Yerusalɛmùn wɔ̀ɔ̀ doùn watsi riì bwèy, wɔ̀ɔ̀ sapɛ yeè fù tsìì e saan, mòdzian yè e si tey bèe ci: «Nèe yè bà tsì rii ?»
11 Jàmaà ci: «À kɛɛra Yesù rìì, è bo Nazarɛtsì wɔ̀ rɔ̀n, Galile mar'la ɲàn.»
Yesù gwɛy fa reè kaa bou min niì Ŋaablà re gbà blàa doùn
12 Àyìwà, Yesù yè bè dɔ̀n Ŋaablà re gbà blàa fɔɔn doùn tɔ̀un. À dɔ̀un mɔn, nìì reè sapɛ ni gwɛɛ̀ ko fìɛ rà, è twɛy sapɛ kaa bo da rɔ̀n. È ɲɛyn ɲancinan reè raa tàbàr'leè, ko màsàkèrè gɔɔ reè raa tsùùràge reè kùnà gblen.
13 È dzin è ra ci: «À sɛbɛɔ̀n ci:
Mun ne gbàà nà kiri Ŋaabla mafyɛn gba,
ŋà ye, ye y'à baɔ̀ goo koron fa reè mɛnɛnmà.»
14 À wà jaana reè ko sànsɔn nèè yè e kpɛrɛ̀ à ra Ŋaablà re gbà blàa fɔɔn doùn, à yè è cɛrɛmabe.
15 Tɔ̀un, saaka jɔɔndzin neè ko sàrìyà kaamoo reè Yesù rè kabagoo goo fakɔɔn reè jà nìi fau, tà ko dziin nèè yè bà dziàn fààna Ŋaablà re gbà blàa fɔɔn doùn ci: «Tsoo dzi yeè ɲɛn màsà kpiri Dawudà tsua dziàn tsɛ», tɔ̀ yeè è vunun ta fɔ è bè geren.
16 Yè dzin à ra ci: «Nèe rèè nìi dèe, w'a myɛ̀na ɔn ?» À ci è ra ci: «Ɔ̀ɔn kɛ̀ ! Tà bwèy nèe gooma niì yɛ, ye na tɔ̀ kàràn jà ŋe gbɛ ? À dèu ci:
Ye niì reè tsoo dzi ɲɛɛn wo tsɛ, wo twɛy wɔu dziiniin nèè, ko cɛmina reè dzu.»
17 Tà goomaa shɔ̀ùn, Yesù yè bo è tɛyn. È bo wɔ̀ɔ̀ doùn, è dɔ̀n be Betani wɔ̀ rɔ̀n, è bè feèn fa mɔn.
Yesù fiigiku sɔn gɔrɔu min niì
18 Tɔ̀ raa gbee gbishɛɛ̀mà nɔ̀n, à sèè nakɔɔn wɔ̀ɔ̀ doùn, dzu y'à kun.
19 Tɔ̀un, è fiigiku sɔn ja shi dziɛ rè. È kpɛrɛ̀ tɔ̀ fiigikuà rà, ŋà, à na dzin pɛn jà à ra waa, tsira ì boshɔ̀ùn. À to yè dzin à ra tɔ̀un ci: «Wo mà dzin wɔ dɛ fyeu !» Tɔ̀ nɔ̀nkɔɔrɔn ko e sa, fiigikuà yè gɔ̀rɔ̀.
20 Àwà, kàràndzin neè tɔ̀ jàu min niì, è ji è dzii tsɛ, yè dzin ci: «À bàu dzùrù, fiigikuà yè gɔ̀rɔ̀ bo sɔn ?»
21 Yesù yè dzin è ra ci: «Sààben na, mun nì ci e ra, ɲɛyna ye ba ni ye ɲan, ye mà bà e cir'la fyeu, mun yɛ nìi fau fiigikuà ka nèe, ye sa dzia tɔ̀ fa. À yɛ̀rɛ̀ fa dàn tɔ̀ bàsɔùn mà waa. Ye dzia dzin neè jèn nèe ra ci: "Fù, e b'a ji kòòyu rɔn !" À to nà fa n dzi.
22 Awà, gè o ge, ye y'a gaa màfyɛɛ̀n doùn ko ɲɛyna ka, ye nà à tàrà.»
È Yesù teron min niì, ci è re goo fakɔɔn reè dzi tarau min
23 Àyìwà, Yesù yè bè dɔ̀n Ŋaablà re gbà blàa fɔɔn doùn tɔ̀un, è maa è mòdzian kàr'na. À ni tɔ̀ kàr'nà nà, saaka jɔɔndzin neè ko dzyèèsìbee mòdzin neè bɔɔ rèè yè nà e kpɛrɛ à ra, y'à tey ci: «Dzi kɛn ni baraka ɲan wo nèe goo rèe rèè faa ? Tàà tsì yeè e faa fààn wɔu wo suun ?»
24 Yesù ci è ra ci: «Mun sa nà ye tey goo soo ma. Ye ye tɔ̀ jaa dè mun na, tà doùn dzi riì baraka ɲan mun nèe faa, mun sa nà tɔ̀ dè ye ra.
25 Tsì rii Yùxanà kau, è nà mòdzian jaara foò Ŋaablà re shia goo rèè rà ? À Ŋaablà rii làà, à mòdzian nì ? Tɔ̀ goomaa dèumaà, yè maa yè goomaa e duùn, yè dziàn e si ra ci: «Ɲe ye dzin ci à Ŋaablà rii, à nà ɲe tey, ci feera ɲe na ɲɛn à ra ?
26 Ɲe to ye dzin ci à mòdzian nì, ɲe shiɔ̀ jàmaà jɔɔn, kàtsu è sapɛ na ɲɛɔ̀n à ra, ci Yùxanà kɛɛra rii.»
27 Yè dzin Yesù rà tɔ̀un ci: «Ɲe na tɔ waa.» Yesù sa yeè dzin è ra ci: «Dzi riì baraka ɲan mun sa nèe faa, mun tsu fa tɔ̀ dè ye ra waa.»
Yesù gooma bɔɔ nìi ka tàlen baun kpiri sɔn ko e dzin kpiri fii tsɛ
28 Yesù yè dzin kɔn ci: «Ye fee kɛ̀sɛɛ̀ nèe goo rèe tsɛ, nìi yɛ kpiri sɔn, ko e dzin kpiri fii ? Àwà nìi jɔ̀naà, è dzin tɔ̀ ra ci: "Mun dziàn, bè gɔ̀ɔ̀dzu rɔ̀n she, e bè faagoo fa."
29 Tɔ̀ yeè dzin à ra ci: "Mun na naà bè waa." Ŋà dɛ̀ɛnin tà shɔ̀ùn, à akir'là yè nà à sɔ̀swɛy, è bè dzù rɔ̀n.
30 È nà e kpɛrɛ̀ soo sa ra, à dè tɔ̀ sa ra kɔn. Tɔ̀ yeè dzin à ra ci: "Bàa, mun nà bè." Ŋà, à na na bè waa.
31 Àwà è fiɛ̀ ɲàn, tsì rii fàmaa sàò fau ?» È ci à jɔ̀naà nì. Yesù yè dzin è ra tɔ̀un ci: «Sààben na, mun nì ci e ra, kɔnsɔɔn tsi reè ko ɲànmɔ̀ɔ̀taan rèè nà dɔ̀n ye jɔɔn Ŋaablà re Màsàbee doùn.
32 Tɔ nà fa, kàtsu Yùxanà nau ye re, è nà shi tereonmaà kpàdè ye ra, ye to na ɲɛn à ra waa. Ŋà kɔnsɔɔn tsi reè ko ɲànmɔ̀ɔ̀taan rèè, twɛy ɲɛun à ra. Tɔ̀ jàumaà ko e raà sa ye re, tɔ̀ pɛn na to ye akir'là yè ye sɔ̀swɛy, ye yè ɲɛn à ra.»
Yesù gooma bɔɔ nìi ka tàlen baun gbàtsi sɔn, ko e re dzùà faagoofadzin neè tsɛ
33 Àyìwà Yesù yè dzin è ra kɔn ci: «Ye nèe gooma bɔɔ rèe sa lamyɛ̀n. Gbàtsi sɔn ɛ̀rɛ̀nzhɛ̀n dzu wɔu, è kɛ̀yngɛ kun à y'à laguru. E kɔ̀ɔ̀ ɲɛɛn, ɛ̀rɛ̀nzhɛɛ̀n nà vùr'la min niì, à yuà yè bo. È sangaso ji, à kplatsuubaa rèè nà bà ni min niì, y'à kààwɔɔ̀. Tɔ̀ sapɛ shɔùn, è kòmànà dzùà kɛ̀ɛ̀yfa faagoofadzin neè swey mà, è dɔ̀n be jìì rà.
34 Àwà, ɛ̀rɛ̀nzhɛ̀n dzian bo watsi nàu wɔ, dzùtsià yè e re faagoofadzin neè swey ka dzùà faagoo fa reè rè, yè bà ni wò raa nìàn sìn.
35 Twɛy faagoofadzin neè nàu wɔ tɔ̀un, ɛ̀rɛ̀nzhɛ̀n dzuà faagoo fa reè yè sɔn kun è ɲan, yè tɔ̀ ban cɛyn. Yè sɔn vu, yè sɔn dzyɛn ko kpàa ì ka.
36 Tà shɔ̀ùn kɔn, è faagoofadzin kpɛrɛkuru ì bàji be, nìi reè giri jɔ̀na rèè mà. Yè twɛy sa kun tɔ̀ kuun'n kur'la rà.
37 Tà sapɛ shɔùn, è dzin kpir'la yɛr'la ka bè è re, è dzin ci: "È nà blà wɔ mun dzin kpir'la ɲàn."
38 Ɛrɛ̀nzhɛ̀n dzuà faagoo fa reè jaadzin ɲɛun dzin kpirimaa mà min niì, yè dzin e si ra ci: "À shɛnsenbaà rìì yɛ, y'a wa m'a vu m'a re shɛɛ̀n tàrà bà e raa.
39 Y'à kun tɔ̀un, y'à sɔ̀ɔ̀n bo dzùà bònè, y'à vu maa mɔn.
40 Àwà ɛ̀rɛ̀nzhɛ̀n dzùtsià ye na nà ɔn, à nà fee rìì fa twɛy faagoo fa reè rà ?»
41 Yè dzin Yesù rà ci: «A nà twɛy faagoofadzin ɲan reè vu vuu'n kur'la arì à fa màtsuru è ra waa. Tà shɔ̀ùn è re dzùà kɛ̀ɛ̀yfa faagoofadzin kpɛrɛ ì mà, twɛy y'à faagoò fa, y'à raa nìn ɛ̀rɛ̀nzhɛɛ̀n sìn à ra e watsi ɲan.»
42 Yesù yè dzin è ra ci: «Nìi sɛbɛɔ̀n Ŋaablà re Goomaa doùn, ye na tɔ̀ kàràn jà ŋe gbɛ ? À deò ci:
Gbà ji reè kpàà riì maaŋ, tɔ̀ rii nàu sèè è bà gbàà nɔ̀nkɔ̀n kpaa,
nìi ni kpàà dzyee reè sapɛ jɔɔn. Tɔ bou Tsìfaà rìì ɲàn, è bà kabagoo ɲe jaa ra !»
43 Yesù yè dzin kɔn ci: «Tɔ̀ kamà, mun nì ci e ra, Ŋaablà re Màsàbee nà bo ye suun è sìn kun na, nìi y'à ra goo faa.
44 (Tà doùn, mòò o moò nà mɛɛy kpàà ree tsɛ, tɔ̀ min niì sapɛ nà kɛɛy kɛɛy. À to nà mɛɛy mòò o moò tsɛ, à nà tɔ̀ tsìfa jɔjɔ.»)
45 Àwà, saaka jɔɔndzin neè ko Faridziɲɛn rèè dziu twɛy gooma bɔɔ rèè myɛ̀n min niì, y'à tɔ̀, ci Yesù dziàn ye rìì là.
46 Àwà à na ni è duùn tɔ̀un, y'a kun, ŋà è na shiɔ̀ jàmaà jɔɔn, kàtsu è sapɛ na ɲɛɔ̀n à ra ci Yesù kɛɛra rii.