Yesù Ŋaablà re màsàbee gɔ̀un min niì kɔnɲɔn goo ka
22
1 Àyìwà, Yesù yè gooma è ka kɔn gooma bɔɔ ì ɲàn, nìi doùn, à ci: «
2 Ŋaablà re Màsàbee boo màsà kpiri sɔn ne, nìi na nà furu fa e dzin kpir'la kɔ̀.
3 Tɔ̀un, kɔnɲɔn ɲwɛɛ̀n ta jiumaà, à na e vu boo nìì reè rà, è re faagoofadzin neè ka, ci yè bè twɛy kiri. Ŋà, è bèu kiri, è na e tsiì yè nà waa.
4 È sèè kɔn è faagoofadzin kpɛrɛkuru ì ka, è dzin twɛy rà ci: "Ye bè dzin mòdzin kiriuma rèè rà, ci mun ne kɔnɲɔn ɲwɛɛ̀n sɔn byɛ̀n dòu. Ci min n ne nìì tor'la reè vuunà, ko mun ne dzwɛkà ceynama reè. Ci goò sapɛ sɔn byɛ̀n dòu, ci yè nà kɔnɲɔn goo rà."
5 Ŋà, mòdzin kiriuma rèè na tɔ̀ goomaa bà e jaa waa, è sa yeè geren e jaara gane ì ɲàn. Sɔn yeè dɔ̀n be e re dzù'ùn, sɔn yeè bè e re durufama.
6 Dzyee rèè yè màsà kpir'là rè faagoofadzin neè kun, yè byɛnbe ɲɛn e tsɛ, yè vu.
7 Tɔ̀ goò yè màsà kpir'là vunun ta, fɔ è bè geren. Tɔ̀un, è re kaadzin kur'là bàji be twɛy mòdzìn vu reè kpɛyn, yè bè è vu, yè è re wɔ̀ɔ̀ dzu.
8 Tà shɔ̀ùn, màsà kpir'là yè dzin e re faagoofadzin neè rà ci: "Kɔnɲɔn ɲwɛɛ̀n kpɛ̀yn goojaa bo dòu. Ŋà gè o ge na kiriɔ, twɛy pɛn naà wù à ɲɔnbaa waa.
9 Tà doùn, ye bè wɔ̀ɔ̀ shi kungɔ reè rà, e ye mòò o moò jà, y'a kiri kɔnɲɔn ɲwɛɛ̀n nà."
10 Faagoofadzin neè yè bo bè wɔ̀ɔ̀ shi reè rè tɔ̀un, è mòò o moò jàu, mòdzin wuu sen ɲɛn mòdzìn ɲan tsɛ, yè è sapɛ ladzyèè na. Kɔnɲɔn gbaà yè tsyɛn kpan ɲwɛyn ɲɔn reè rà.
11 Àwà màsà kpir'là nàu bè dɔ̀n ci wo nà ɲwɛyn ɲɔn reè siin, è mòò sɔn jà è ɲan, kɔnɲɔn vya na ni tɔ̀ vu ra waa.
12 È dzin tɔ̀ ra ci: "N dzunwɛynsi, wo dɔ̀un mìin dzùrù, kɔnɲɔn vya mà bà ni wo vura waa ?" Gooma na ja kpir'la rè waa.
13 Màsà kpir'là yè dzin faagoofadzin neè rà tɔ̀un ci: "Y'a si rèè ko à sàn nèè shì, y'a maa da rɔ̀n tsitsiɛ̀ rà. Gɛɛy boo, ko ɲiun taa rìì nà bà ni mɔn."
14 Mòò giri kpɛ̀yn kiriɔ, ŋà nìì reè boo jaara taki, twɛy dzyɛ̀n.»
Faridziɲɛn rèè na myɛ̀ɛ̀n ɲɛnma gaa Yesù jɔɔn min niì kɔnsɔɔn goo ka
15 Àwà Faridziɲɛn rèè yè bè e si jà tɔ̀un, y'à siin, ye ye ba ni dzi myɛ̀ɛ̀n ɲɛn Yesù jɔɔn nìi tsuru gooma ka, y'a kun.
16 Tà doùn yè e re kàràndzin neè swey, ko Erodzì raa mòò rèè swey ka bè à kpɛyn, yè bè dzin à ra ci: «Kàrànfaà, m'a tɔ̀ ci wo sààben ni dèe, w'e bà Ŋaabla shià kàr'na mòdzian nà sààben ka, wo na mòò jaadzin siɛ̀n. Mòdzian to kɛ̀nsɛɛn ye ba ni dzii o dzii, wo na tɔ̀ siɛ̀n waa.
17 Àwà wo raa kɛ̀sɛmàà nìi nèe goo rèe tsɛ, tɔ̀ dè mùn na: «Kɔnsɔɔn yè sàrà Sezarì, Ɔ̀rɔmùn màsà kpiri blàa rè, tɔ dàaŋnà ràà, à na dàaŋnà ?»
18 Yesù yè è re ɲanbee tɔ̀ nìi fa, è dzin è ra ci: «Mòdzin duungoofiitsi ì, feera ye yè bà mun dzuun bo siɛ̀n ?
19 Ɲɛyn niì ka kɔnsɔɔn sàr'la, y'a sɔn kpadè n na siin.» Tɔ̀un, yè ɲɛɛn tanma soo kpadè à ra.
20 À yè è tey ci: «Tsì rii ɲɛyn, ko à tsoo ni tanma ree tsɛ ?»
21 È ci à ra ci: «À Sezar'lì.» È dzin è ra tɔ̀un ci: «Nìi Sezar'laa ye tɔ̀ sìn Sezar'là, nìi to Ŋaablà raà, ye tɔ̀ sìn tɔ̀ ra.»
22 È tɔ̀ goomaa myɛ̀un min niì, è ji è dzii tsɛ. Y'à bàto mɔn, yè geren.
Sadzusiɲɛn rèè Yesù teron fùn nèè sèè kpuna goo mà min niì
23 Ayìwà, tɔ̀ sii sèè ko e sa, Sadzusiɲɛn rèè swey yè bè Yesù rè. Sadzusiɲɛn rèè rìì ci fùn nèè sèè kpunan na ni waa. Tà doùn, yè Yesù tey.
24 È ci: «Kàrànfaà, kɛɛra Musà dziun ci kpir'la sɔn ye san è re tààn to dzin bɛy, tseyn kpirimaa wù è tàan ree sen, gè riì ni à to è dzin tàrà à ka, tɔ̀ yeè bà sanbaa rèe tsu.
25 Awà, keresima ɲɛɛ̀nun na ni ɲe re mìin. Jɔ̀naà furu fau, è san à na dzin tàrà waa. Taàn yè to à tseyn kpiri gbanaa rè.
26 Tɔ̀ sa yeè san à na dzin tàrà waa, taàn yè to tɔ̀ raa gbanaa rè kɔn. È fa tà tsuru, fɔ mòkun ɲɛɛ̀nun nèe sapɛ yeè bè dò.
27 È sapɛ saumaà shɔ̀ùn, taàn sa yeè nà san.
28 Àwà fùn nèè to ye na sèè kpunan ɔn, tàan rèe nà bà tsì rii soo raa mòkun ɲɛɛ̀nun nèe ɲan, à to bà dɔɔ̀n è sapɛ re tààn ?»
29 Yesù yè dzin è ra tɔ̀un ci: «Ye fìriɔ̀ taki, kàtsu ye na Ŋaablà re goomaa dzin seunà, ye to na à re dzibaabee tsu tɔ.
30 Fùn nèè ye na sèè kpunan, kpiri fa tàan furu, tàan tsu to fa sìn kpir'la waa, è nà bà ni a ci jìrànxɔ rɔ̀n mɛ̀rɛ̀kɛ rèè.
31 Nìi fùn nèè sèè kpunaàn raa goò, Ŋaabla nìi dèu ye ra tɔ̀ tsɛ, tà bwèy ye na tɔ̀ kàràn gbɛ ? À dziun ci:
32 Mun Ibraximà rè Ŋaablà, ko Ishakà rè Ŋaablà, ko Yàkubà rè Ŋaablà.
Tɔ̀ goomaa y'à kpàdèe ci twɛy mòdzin neè jaama ni Ŋaablà re mɔn. Ŋaablà na fun ì rè Ŋaablà waa, à jaama ì rè Ŋaablà rii.»
33 Jàmaà twɛy gooma reè myɛ̀un min niì, Yesù rè kàr'nà yè ji è dzii tsɛ fɔ è bè geren.
Faridziɲɛn rèè Yesù teron Ŋaablà dzugooma xɔù rèè sapɛ ɲan blàa mà min niì
34 Àwà, Faridziɲɛn rèè toro jiu à ɲan min niì ci Yesù Sadzusiɲɛn rèè dzu ciun, è sa yeè e ladzyèè tɔ̀ gàne sɔ̀n nɔ̀n.
35 Tɔ̀un, è ɲan mòò sɔn, sàrìyà kaamoo sɔn, tɔ̀ ni ba nìi tsuru è myɛ̀ɛ̀n ɲɛn à jɔɔn goomaa ka, à y'à tey ci: «
36 Kàrànfaà, sàrìyaa doùn, Ŋaablà dzugooma xɔù rèè ɲàn, kɛ̀n ni blà dzyee rèè sapɛ ma ?»
37 Yesù yè dzin à ra ci: « "A Tsifa Ŋaablà kɛn kɛ̀n'n kur'la sapɛ: à goo yè bà ni a vunun tsɛ, è bà ni a xɔɔn tsɛ, a kɛsɛmàà sapɛ yeè bà ni à tsɛ."
38 Tɔ̀ rii Ŋaablà dzugooma xɔù rèè sapɛ ɲan blàa, è bà jɔ̀naà.
39 Fiira riì y'à bosi, tɔ̀ rii yɛ ci: "A modzìnsia kɛ̀n, jàci a yɛr'la."
40 A ci à Tàworataà ò, kɛɛra reè dzugooma reè ò, twɛy sapɛ shiɔ̀ nèe dzugooma xɔù fii reè rìì là.»
Ŋaablà Jaa ra Modzìàn ko màsà kpiri Dawudà fia
41 Àwà, Faridziɲɛn rèè ladzyeeŋmaà tɔ̀un, Yesù yè è tey ci:
42 Ye raa kɛ̀sɛmàà kɛ̀n ni Ŋaablà Jaara Modzìàn raa goò tsɛ ? À tsì rii dzin kpiri ?» È ci à ra ci: «Màsà kpiri Dawudà.»
43 È dzin è ra ci: «À to yè bà dzùrù, Ŋaablà re Dzia baraka rɔ̀n, Dawudà y'à kiri ci Tsìfaà, à dziunmaà doùn ci:
44 Mùn Tsìfa Ŋaabla dziun mun Tsìfaà rà ci:
"Nà a tsuù n sirama si jaa rè, fɔ min bè a ɲan rèè sapɛ wɔ dò a san dzuun."