Yesù gooma bɔɔ rìi ka tàlen baun dzùtsi sɔn ko e re faagoofadzin ì tsɛ
20
1 Àyìwà Yesù yè gooma bɔɔ sɔn ka tàlen ban kɔn, nìi yɛ nèe ci: «Àwà Ŋaablà re Màsàbee boo dzùtsi sɔn ne, nìi bou gbishɛɛ̀mà nɔ̀n, è bè faagoofadzin ì gaa, ci yè bè faagoo fa wò re gɔ̀ɔ̀dzu rɔ̀n.
2 À ko faagoofadzin neè byɛ̀unma shɔ̀ùn faagoo sar'la rà, nìi cɛ̀ɛ̀n fii bwèè doùn, à yè bàji be gɔ̀ɔ̀dzu rɔ̀n.
3 À sèè bou kɔn bwèy ɲin'na tèreonmaà shɔ̀ùn, è bè swey jà wɔ̀ɔ̀ jàmà làdzyeema nɔ̀n, faagoo na ni twɛy rè waa.
4 È dzin twɛy rà ci: "Ye sa y'a wa faagoò rà gɔ̀ɔ̀dzu rɔ̀n. Ye wù sàr'lìi ka mun nà tɔ̀ sìn ye ra."
5 Twɛy yè dɔ̀n be. Bwèè wɔumaà sènfi, è bo kɔn, è tà soo fa. Bwèè nàu e jɛngɛ kɔn, è bo kɔn, à y'à fa tà tsuru.
6 Ɲɛ̀rɛ̀ɛ̀ dziɛ rè kɔn, è bo. Arì she, è bè swey tsìiŋma jà wɔ̀ɔ̀ jàmà làdzyeema nɔ̀n. È tey ci: "Fee ye tsìiŋnà mìin bwèè ko e kur'la sapɛ, ye na ni faagoo ra ?"
7 È ci à ra ci: "Mòò pɛn na ɲe seòn faagoo ra nìi fa waa, tɔ̀ rii kamà, ɲe ni mìin." À ci: "E sa yeè bè faagoò rà mun ne gɔ̀ɔ̀dzu rɔ̀n."
8 Àwà bwèè nàu dò, dzùtsià yè dzin e re ɲɛyn goojaabobaà rà ci: "Faagoofadzin neè kiri e sàrà. A jɔ̀n bònè dzin neè tsɛ, è bè suu fɔ jɔɔn dzin neè rà."
9 Tɔ̀un, nìi reè bèu faagoò rà ɲɛ̀rɛ̀ɛ̀ dziɛ rè, twɛy jɔ̀na yeè e kpɛrɛ̀, è soo sookɔɔn sa sarà cɛ̀ɛ̀n fii fii.
10 Nìì reè jɔ̀na bèu faagoò rà, twɛy na à siɛ̀n ci ye nà giri tàrà è geren bònè be reè tsɛ. Ŋà, è sapɛ yeè tɔ̀ sàrà soo tàrà, nìi yɛ cɛ̀ɛ̀n fii fiɛ̀.
11 Tɔ̀ ɲɛɛn tàraumaà twɛy rè, yè maa, yè dzùtsià ŋùnùnŋun'na e dzii dzuun.
12 È ci: "Nèe rèè nàu bònè, yè nà watsi soo pe fa faagoò rà, è ko ɲe sa to yɛ sàraɔ̀ dzii soo. Ɲe to faagoò fau bwèè ko e kur'la sapɛ, ɲe yè byɛnbee ko bwèy ŋɔɔn sapɛ tsi e ma."
13 Dzùtsià yè mòò sɔn latsi è ɲan ci: "N dzunwɛynsi, wo ni dzin ci mun na tereòn wo ka ɔ ? Wo ko mun na byɛn cɛ̀ɛ̀n fii rìì mà bwèè doùn ɔ̀n ?
14 A sar'là tsi a wa. À dzibeu mun na ni, min sàrà soo sin wo ko nèe bònè dzin nee sa ra.
15 Tàà à na dàaŋnà min n sao fa n suun ge reè ka gbɛ ? Tàà mun wù nìi fa tɔ̀ rii jaaɲininbe wo kuɔn gbɛ ?"
16 Bònè dzin neè nà bà tɔ̀ rii tsuru jɔɔn dzin ì, jɔɔn dzin neè yè bà bònè dzin ì»
Yesù yè e saàn ko e seè kpunaàn gooma deu min niì kɔn
17 Àyìwà, Yesu rè shia kuunmaà è bà bèe Yerusalɛmùn, è re kàràndzin teeŋ fiɛ̀ kiri e si, è dzin è ra ci:
18 «Àwà mùn tèyn bekɔɔn yɛ Yerusalɛmùn nèe, Adamà dziàn nà bè wɔ saaka jɔɔndzin neè ko sàrìyà kaamoo reè suun mɔn, yè kitsia mɛɛy à tsɛ, ci è vu.
19 È nà à wɔ kun kpɛrɛ mòdzin neè suun, twɛy y'à ɲanŋmɛn, y'à dɔrɔ sɛɛn ka, y'à gban gɔɔ̀ rà. Bwèy zhììgi à saunmaà shɔ̀ùn, è sèè kpunan bo saàn ɲàn.»
Zhebedè rè tààn dziun Yesù yè nìi fa wò dzin nèè rè
20 Tà doùn, nìi Zhebedè raa tààn, tɔ̀ yeè nà e kpɛrɛ̀ e dzin kpiri fiɛ̀ ka Yesù rà, è kunun gban è kuu à bììn, à y'à gaa à re, ci è wùbe wò mà goo sɔn ka.
21 Yesù y'à tey ci: «Wo gaa fee rìì là ?» À ci: «Mun dzin kpiri fiɛ̀ yɛ nèe. À dè n na ci wo ye na a tsuù a re màsàbee tsɛ watsi riì bwèy, ci wo nà soo tsùù a sirama si jaa rè, soo yè bà ni wo ɲɔ̀nmà sì jaa rè.»
22 Yesù ci à dzin nèè rà ci: «Ye nìi gaa, ye na tɔ̀ tɔ̀ dɛ ! Byɛnbe niì nà mun tàrà, tɔ̀ ni dzi ku ye ɲan ɔn ?» È ci à ra ci: «Ɔ̀ɔn, tɔ nà dzi ku ɲe ɲan.»
23 Yesù ci è ra ci: «À kpɛ̀yn nà dzi ku ye ɲan. Ŋà, nìi mun sirama si jaa re tsùù goo, ko ɲɔ̀nmà sì jaa re tsùù goo, tɔ̀ na ni mun suun waa. Mun Fà Ŋaablà y'a màbyɛ̀n tsuuŋnà nìì reè rè, à nà sìn twɛy rìì là.»
24 Kàràndzin neè dzyee tsyeòn tɔ̀ goomaa myɛ̀un min niì, è vunun yè ta e koòsi fiɛ̀ kpɛyn.
25 Yesù yè è dzyèèmaa kiri kpɛ̀rɛ̀ e ra tɔ̀un, è dzin è ra ci: «Y'a tɔ̀ ci dziɲaan doùn, jàmàan rèè kùntsii rèè yè è màraɔ̀ kùntsììbe ka, mòdzin bla reè yè bà e faan ɲinaɔn è tsɛ.
26 Ŋà ye fi, à fa bà tà tsuru waa. Ye ɲan, mòò riì sào ni wò yeè blàbe dzyee rèè mà, fɔ tɔ̀ yeè bà è re faagoofadzin.
27 Mòò riì sàò to ni wò yeè bà ni dzyee rèè sapɛ jɔɔn, fɔ tɔ̀ yeè bà è re jòn.
28 Tà soo tsuru, Adamà dziàn na naɔ̀ ci mòò yè faagoo fa à re dɛ, ŋà à naɔ̀ nì ci è faagoo fa mòdzian rè. È xɔɔn sìn, à y'à ka mòò giri kùngɔ màbo.»
Yesù jaana fii jaa dzii saun min niì
29 Ayìwà, Yesù ko e re kàràndzin neè bokɔɔn Jerikò wɔ̀ɔ̀ doùn, jàma brìsi yè e gban è kpɛyn.
30 Tà doùn, jaana mokun fii na tsùuŋnà shi dziɛ rè. Twɛy y'à myɛ̀un min niì ci Yesù rìì dɔ̀ɔn, yè e vu bo fààn na ci: «Tsìfaà, màsà kpiri Dawudà tsua dziàn, màtsuru mùn na !»
31 Jàmaà yè fù è kpɛyn tɔ̀un, sànko yè e mɛnshɛ̀n. Ŋà, yè e vuà ɲansen kɔn kpɛrɛ ci: «Tsìfaà, màsà kpiri Dawudà tsua dziàn, màtsuru mùn na !»
32 Yesù yè e tsiì tɔ̀un, à yè è kiri, è tey ci: «Ye sào ni min fee rìì fa ye re ?»
33 È ci à ra ci: «Tsìfaà, mùn jaa rèè rìì yè jɛ̀y fa.»
34 È màtsuru yeè Yesù kun fɔ è bè geren. Tɔ̀un è dzyɛn è jaa rèè rà, tɔ̀ nɔ̀nkɔɔrɔn ko e sa, yè jɛ̀y fa. Yè e gban Yesù rà.