Matthieu 19

Yesù nìi dèu furu goo tsɛ

1 Àyìwà, Yesù nàu dò twɛy gooma reè rà watsi riì bwèy, è bo Galile mar'lɔn, è dɔ̀n be Yude mar'la wòòɲan reè ɲàn, Yuridɛn baa kɛ̀yn nɔn.

2 Àwà, jàma brìsi yè e gban à kpɛyn. È ɲan ɲìnìnkɔɔn reè, è twɛy cɛrɛmabe.

3 Tɔ̀un, Faridziɲɛn rèè swey yè e kpɛrɛ̀ à ra, è bà na ni twɛy duùn, ye y'à dzuun bo. Y'à tey ci: «À dàaŋnà kpir'la yè e re tààn furu san è ɲɛn kùàn sapɛ tsɛ ɔ ?»

4 Yesù yè è latsi ci: «Tà bwèy ye na à kàràn Ŋaablà re goomaa doùn, ci

dziɲaan jɔ̀n bwey gè sapɛ ɲɛnbaa Ŋaablà yeè è ɲɛun kpiri ko tàan gbɛ ?

5 A to yè dzin ci:

Tɔ̀ kamà, kpir'la nà e naà ko e faà bàto, è shi e re tààn nà, è fiɛ̀ sa yeè bà gɔn kungɔ soo.

6 Tà tsuru è na fii dɛ waa, ŋà è gɔn kungɔ soo rii sa. Tà doùn, Ŋaablà ye nìi dzyèè soo, mòo mà tɔ̀ bo e si ra waa.»

7 Y'à tey kɔɔn ci: «Feera kɛɛra Musà ci kpir'la ye ba taàn bàjia, è furu san sɛbɛ̀n sìn à ra ?»

8 Yesù ci: «A y'a jà Musà yè ye re tàan rèè bàjia shi wɔ ye suun, à tɔ̀ fau ye re tantaamaxɔbeè rìì kamà. Tà boshɔ̀ùn goo rèè jɔ̀n bwey, à naà tɔ̀ tsuru waa.

9 Tà doùn, mun nì ci e ra, mòò riì yè e re tààn bàjia, à mà bà ɲànmɔ̀ɔ̀be shi tsɛ fyeu, è tàan kpɛrɛ sen, tɔ ɲànmɔ̀ɔ̀be rii faa.»

10 Yesù rè kàràndzin neè yè dzin à ra tɔ̀un ci: «Nèe rìì ye ba kpir'la faa raà taàn kàjaa tsɛ, tà bwèy, fur'la fabɛybe rìì fyan.»

11 È dzin è ra ci: «Nèe gooma, mòdzian sapɛ na dzia nìi shi jiì waa, fɔ Ŋaablà y'a fààn siɔ̀n nìì reè rà.

12 Kpir'la mà furu fa, kàjaa giri dzia dan tɔ̀ ka. Swey kereu, tɔ̀ y'a tàrà è na ni kpiribe ɲan waa. Swey raa yè bà mòdzian fyɛ̀, nìi doùn y'à bou kpiribee ɲàn. À yɛ̀rɛ̀ to yè bà swey sàò yè to nèe tsuru, Ŋaablà re Màsàbee kamà. Mòò riì ye ba dzia e tsiì nèe gooma ree ra, è tsiì à ra.»

Yesù dziun min niì ci è mà dziin nèè jɔɔn shu wò tsɛ waa

13 Tà shɔ̀ùn mòdzian yè nà dziin nèè swey ka Yesù rè, gè riì ni à to è sià tsùù è tsɛ, è Ŋaablà mafyɛ̀n è re. Ŋà, kàràndzin neè yè fù fù twɛy mòdzin neè kpɛyn.

14 Yesù ci tɔ̀un ci: «Ye dziin nèè to mɔn. E maà è jɔɔn shu n tsɛ nàà nà waa. Mòdzin niì reè ni è tsuru, Ŋaablà re Màsàbee twɛy rìì la.»

15 Àwà Yesù yè e sià tsùù dziin nèè tsɛ tɔ̀un è dzwɛ ji è ra, tà shɔ̀ùn è bo mɔn, è dɔ̀n be.

Jaamabe dziù dò bɛɛ tàràù'n kur'la

16 Tà doùn, kpiri sɔn yeè e kpɛrɛ Yesù rà à y'a tey ci: «Kàrànfaà, mun nà fee wùù rii soo fa, min bà ni jaamabe dziù dò bɛɛ tàrà ?»

17 Yesù ci à ra ci: «Feera wo yè bà mun teè wùɔ goojaa mà ? Ŋaablà soo pe rii wù. Tà doùn, e ba ni à re e jaamabe dziù dò bɛɛ tàrà, à dzugooma xɔù rèè shi jiì.»

18 È Yesù tey ci: «Kɛ̀nma ì ?» Yesù ci: «Nìi yɛ,

maà a modzìnsi vu waa, maà ɲànmɔ̀ɔ̀be fa waa, maà shɔnbe fa,

maà doò wɔ a modzìnsi ra,

19 a naà ko a faà blàbe, a modzìnsia kɛ̀n jàci a yɛr'la.»

20 Kpir'la yè dzin Yesù rà ci: «Mun tɔ̀ sapɛ shi jiiŋ nòn. Fee rìì mun fɔɔn kɔn ?»

21 Yesù yè dzin à ra ci: «E ba ni à re a dzii yè tsyɛn taki, b'à suun ge reè sapɛ gɔɔ, a ɲɛɛn sìn gbakɔɔn reè rà. Tà tsuru, nàforo nà bà ni wo re jìrànxɔ rɔ̀n, tà shɔ̀ùn, e nà a gban mun kpɛyn.

22 Kpir'la dziu twɛy gooma reè myɛ̀n min niì, à taama yè ŋununbe fɔ è bè geren. Tɔ̀un è bo mɔn è geren, kàtsu à na gètsi blà.

23 Tà doùn, Yesù yè dzin e re kàràndzin neè rà ci: «Sààben na, mun nì ci e ra, gètsià dɔn ɲan Ŋaablà re Màsàbee doùn.

24 Min bà ci e ra kɔn, ci ɲɔ̀ɔ̀nmɛɛ̀n yè dɔ̀n mɔnsɛyn kɔɔ rè, tɔ̀ fa dzi gètsià dɔ̀ɔ̀n mà Ŋaablà re Màsàbee doùn.»

25 Àwà kàràndzin neè tɔ̀ goomaa myɛ̀un min niì, è ji è dzii tsɛ fɔ è bè geren. È ci: «Tsì rii soo to dzia tsi sa ?»

26 Yesù yè e jaa gban è ra tɔ̀un, è dzin è ra ci: «Adamà dzin nèè rè, à na dzia fa waa, ŋà Ŋaablà, tɔ̀ na gbaa goo sɔn pɛn na waa.»

27 Piyɛrì y'à latsi tɔ̀un ci: «Àwà ɲe do ? Ɲe kaariu gèè sapɛ shɔun, ɲe yè e gban wo kpɛyn. Ɲe raà to nà kun dzùrù ?»

28 Yesù yè dzin è ra ci: «Sààben na, mun nì ci e ra, goò sapɛ ye na bà yeu watsi riì bwèy, Adamà dziàn yè e tsuù e re màsà gbaaniɛn tsɛ, blàbee màsà gbaaniɛn, ye nìì reè yè e gbaun mun kpɛyn, ye sa nà e tsuù màsà gbaaniin teeŋ fii tsɛ, ye yè kitsia kùnùn Isirayɛlì mòdzian kun teeŋ fii rèè tsɛ.

29 Awà, mòò o moò to nà kaari e re gbà rèè shɔ̀ùn, è kaari e tseyn nèè tàmafa e tsinà rèè, tàmafa e naà tàmafa e faà, tàmafa e dzin nèè, tàmafa e re dzù rèè shɔ̀ùn mun tsoò kamà, tɔ nà twɛy tsuru càànmoò tàrà, è sèè kɔn è jaamabe dziù dò bɛɛ tàrà shɛn.

30 Àwà jɔɔndzin neè giri nà bà bònè dzin, bònè dzin neè giri yè ba jɔɔndzin.