Matthieu 18

Tsì rii blà Ŋaablà re màsàbee doùn ?

1 Ayìwà, tɔ̀ watsia yɛ̀r'la ɲàn, Yesù rè kàràndzin neè yè kpɛrɛ̀ à ra y'à tey ci: «Tsì rii blà dzyee rèè sapɛ ma Ŋaablà re Màsàbee doùn ?

2 Yesù yè dziin sɔn kiri na tɔ̀un, è nà tɔ̀ tsìì è fi,

3 è dzin ci: «Sààben na, mun nì ci e ra, ye ma e lakere, ye yè bà a ci dziin nèè fyeu, ye fa dzi dɔn Ŋaablà re Màsàbee doùn waa.

4 Tɔ̀ gàneè doùn, mòò riì nà e majàà a ci nèe dziiniin nèe, tɔ̀ rii blà dzyee rèè sapɛ ma Ŋaablà re Màsàbee doùn.

5 Mòò riì to nèe dziin nèe tsuru kuun'n kuru wubee mun kamà, tɔ mun nì kuun'n kuru wubeu.

Nìi ni sàn fir'la ɲàn

6 Ŋà nèe dziin nèe reè tsuru nìì reè ɲɛɔ̀n mun na, mòò riì twɛy sɔn san fìr'la, è ye zhi kpaa bla shi tɔ̀ tsìfa vu ra, yè b'a maa kòòyu rɔn tɔ̀ ka, tɔ̀ dziì dzi à ra.

7 Dziɲan dzin naà barau, mòdzian sàn fir'la yè bà tsoo. Àwà sàn fìrì goo kpɛyn na do jàa waa, ŋà wo mòò riì bàa tsoo sàn fir'la yè mòò tàrà, wo raa barau.

8 A sià tàmafa a saàn ye ba tsoo e gooɲaantsii tara, à tsyɛ bo a ra, a maa jeenà. A ko a si sɔɔ̀n, tàmafa a san sɔɔ̀n yè gbee tarà, tɔ fyan, sani a ko a si fiɛ̀, tàmafa a san fiɛ̀ yè bè maa sà dzi bɛy rɔn.

9 A jaadzian to ye ba tsoo e gooɲaantsii tarà, à kwey bo a ra, a maa jeenà. E bà jaa sɔn, e gbey tarà, tɔ fyan, sani a ko a jaadzin fiɛ̀ yè bè maa sà dzi bɛy rɔn.

10 Tà doùn, ye e yɛrɛ kaàwɔ, e maà nà to nèe dziin nèe rèè sɔn kɔn waa. Mun nì ci e ra, è re mɛ̀rɛ̀kɛ rèè ni jìrànxɔɔ̀ doùn kudɛyn, mun Fà Ŋaablà ka.

11 (Àwà, nìì reè fìriɔ̀, Adamà dziàn naɔ̀ twɛy rìì gaa, è tsi.)

Yesù tàlen nìi baun sàà fìriumaà tsɛ

12 Ye nèe jàa dzùrù ? Sàà dzin caànmoò yè bà ni sɔn ne, soo yeè fìrì bo è ra, à dzyee yè to cɛ̀ɛ̀n ko dzin teeŋ kyeèron. Àwà à fa cɛ̀ɛ̀n ko dzin teeŋ kyeèron nèe to jèèn tsɛ è bè soo ree gaa ?

13 Sààben na, mun nì ci e ra, à ye sàà dzin soo ree gaaŋma jà, à taamadzibe rìi faa tɔ̀ ra, dzin cɛ̀ɛ̀n ko teeŋ kyeèron nìi na fìriɔ̀ waa, à na tɔ̀ tsuru taamadzibe faa twɛy kamà waa.

14 Tɔ̀ fau'n kuru soo rà, ye Fà Ŋaablà riì ni jìrànxɔ rɔ̀n, à na tɔ̀ sàò, nèe dziin nèe rèè mòò sɔn yè fìrì waa.

Yesù ci mìn goo rèè jaabo e si ka nìi tsuru

15 A ɲɛyna moosia ye fa bɛy fa, b'a re, a ko à fii, a dè à ra. À ye toro wɔ wo re, tà bwèy wo dziu a ɲɛyna moosia dzuun.

16 À to ma e tsiì è toro wɔ a re, mòò sɔn tàmafa mòkun fii bà a tɛy kɔn ye b'a re, gè riì ni à to goò sapɛ ma yè byɛ̀n shɛɛrɛ mòkun fii, tàmafa zhììgi dzugooma tsɛ.

17 À ye e nɔn ci wò fa twɛy tsu raà myɛ̀n, à dè ɲɛynamoo kur'là rà. À maa e tsiì è ɲɛynamoo kur'là tsu raa myɛ̀n, tà bwèy à jàtsi kun Ŋaabla tɔ bɛy, tàmafa kɔnsɔɔntsibaa.

18 Sààben na, mun nì ci e ra, ye ye e nɔn goo o goo mà dzɔ̀nxɔɔ̀ tsɛ, mòò fa e tsiì tɔ̀ ra jìrànxɔ rɔ̀n tsu waa. Ye to ye e tsiì goo o goo ra dzɔ̀nxɔɔ̀ tsɛ, mòò fa e nɔn tɔ̀ mà jìrànxɔ rɔ̀n tsu waa.

19 Sààben na, min bà ci e ra kɔn ci mòkun fii ye byɛn goo o goo mà ye ɲan dzɔ̀nxɔɔ̀ tsɛ, y'à gaa mun Fà Ŋaablà re, tɔ̀ riì ni jìrànxɔ rɔ̀n, à nà tɔ̀ fa è re.

20 Àwà, mòkun fii, tàmafa mòkun zhiigi ye e ladzyèè min o min mun tsoo ra, mun ni è fi.»

Yesù ci mìn yɛrɛ to e si re

21 Tà shɔ̀ùn, Piyɛrì yè e kpɛrɛ̀ Yesù rà, à y'à tey ci: «Tsìfaà, kudɛyn mun mòdzìnsia ye ba dɔ̀ɔn mun gàsin ɲan, à wù min n yɛrɛ to à re, è bè tàrà fɔ jaa fɛ̀rɛ̀n ? Fɔ jaa ɲɛ̀ɛ̀nun gbɛ ?»

22 Yesù yè dzin à ra ci: «N fa dzin a ra ci jaa ɲɛ̀ɛ̀nun dɛ, ŋà jaa mùey ko tsyeun tsùùma ɲɛ̀ɛ̀nun.

23 Tɔ̀ kamà, Ŋaablà re Màsàbee boo nìi bosi, tɔ̀ rii siin: à ni a ci màsà kpiri sɔn, nìi sàò na ni à re wò yeè e re nàfor'la jàtsi kun e re faagoofadzin neè ka, yè bà ni e vu ra tsìɛ̀ sàrà.

24 Jàtsikuan dzii kuunmaà, yè nà faagoofadzin soo ka à re, à re warifyɛ tsii ni tɔ̀ ra, nìi na gè gìrìbè san.

25 Tɔ̀ tsìɛ̀ sàr'la gè naà ni faagoofadzian suun waa. À kùntsiɛ yè dzin tɔ̀un, ci à ko e re tààn, ko à dzin nèè, ko à suun gee sapɛ yeè gɔɔ, tsìɛ̀ yè sàrà.

26 Faagoofadzian yè e kunun gban ji à bììn tɔ̀un, è kuu, à y'à màfyɛ̀n ci: «A yɛrɛ to, a mɔɲɔn n tɛyn, mun nà à sapɛ sarà wo re."

27 Tɔ̀ goomaa dèumaà, faagoofadzian màtsuru yeè e kuntsiɛ̀ kun fɔ è bè geren. Tɔ̀un, à y'à re tsìɛ̀ mɛɛy bo à mà, à y'à to è bèe.

28 Àwà, tɔ̀ faagoofadzian bou min niì, è tsi e faagoofadzinsia sɔn ka, à sa re tsìi ni tɔ̀ ra, nìi na ɲɛyn bɛrɛ waa. È tɔ̀ kun tɔ̀un, à còrò è dzin ci: "N ne tsìɛ̀ sàrà !"

29 Tɔ̀ sa yeè e kunun gban ji à bììn kɔn, à y'à màfyɛ̀n ci: "A yɛrɛ to, a mɔɲɔn n tɛyn, mun nà wo re tsìɛ̀ sàrà wo re."

30 Ŋà, à na e tsiì waa. È koòsià kun tɔ̀un è b'a ji kàsoò doùn, fɔ tsìɛ̀ ye be sàrà do watsi riì bwèy.

31 Àwà à kòòsi faagoofadzin neè tɔ̀ goò faumaa jàu min niì, è dɔ̀n è kpɛyn fɔ è bè geren. Tà doùn, goo gè o ge fau, yè bè tɔ̀ sapɛ lakɛ̀ɛ̀y kùntsiɛ̀ rà.

32 Kùntsiɛ̀ tɔ̀ goomaa myɛ̀un min niì, tɔ̀ y'a kiri, è nà dzin à ra ci: "Faagoofadzin ɲan, mun nèe tsìì brìsi rèe sapɛ mɛɛy bou wo mà, kàtsu wo mun màfyɛun.

33 Wo sa naà wù w'e màtsuru a faagoofadzinsia rà a ci mun màtsuruu wo ra nìi tsuru ɔ ?"

34 Àwà kùntsiɛ̀ vunun taumaà tɔ̀un fɔ è bè geren, à y'à kun sìn kàsògbaà faagoo fa reè rà, ci twɛy y'à ji kàsoò doùn, fɔ è bè e re tsìɛ̀ sapɛ sarà dò.

35 Tɔ̀ fau'n kuru soo rà, ye soo sookɔɔn sa ma e tsiì yeè e yɛrɛ to e koòsì dzyee reè rè ko e duɔ̀n sapɛ ka, mun Fà Ŋaablà riì ni jìrànxɔ rɔ̀n, tɔ̀ sa nà ye kun tɔ̀ kuun'n kur'la rìì là.»