Yesù lakereu min niì jèèn tsɛ
17
1 Àyìwà bwèy tsùnmɛn tà shɔ̀ùn, Yesù yè Piyɛrì, ko Yàkubà, ko tɔ̀ raa keresi Yùxanà kiri gban e ra, è bè tèyn è ka jèn gbààn sɔn tsɛ, yè bà ni mɔn e si.
2 È ni mɔn, y'à jà Yesù lakereu. À jaakɔrɔɔ̀n den deèn a ci bwèy, à mà vya reè yè bà fyɛɔ tɛrɛ, tɛrɛ, tɛrɛ a ci vyevyeè.
3 Tɔ̀un, è jaa yè ɲɛn Ŋaablà re kɛɛra Musà ko Aliì mà, twɛy goomaa à ka.
4 Piyɛrì yè goomaa sen, è dzin Yesù rà ci: «Tsìfaà, mìn bà ni mìin, tɔ wù dɛ ! È ba wo sàò, mun na bùù gba vyama zhiigi kun mìin, soo wo raa, soo Musà raa, soo yè bà Aliì raa.»
5 Piyɛrì ni tɔ̀ goomaa nà, munun dendenkɔɔn sɔn yeè nà è kuu, cian yè bà ni è tsɛ. Vu sɔn yeè bo munun nɔn tɔ̀un, tɔ̀ yeè dzin ci: «Nèe mun Dzin Kpir'la rìì yɛ nèe, mun nìi kɛ̀niɔ̀n fɔ è bè geren, è bà dzibeu mun na. Ye e toro wɔ à re.»
6 Kàràndzin zhiigia tɔ̀ goomaa myɛ̀un min niì, è shiuma brìsi yè mɛɛy, yè kuu e jaa rèè tsɛ.
7 Yesù yè e kpɛrɛ̀ è ra tɔ̀un, è dzyɛn è ra, è dzin ci: «Ye fù, e maà shi waa !»
8 Yè e jaa rèè ɲanseun min niì, Yesù soo boshɔ̀ùn, è na mòò pɛn jà dɛ.
9 Àyìwà, è jàà bokɔɔn jèèn tsɛ, Yesù y'à dè màxɔbe è ra ci: «E nìi jàu, e maà à dè mòò pɛn jaa ra, fɔ Adamà dziàn yè bè sèè kpunan bo fùn nèè fi.»
10 Tɔ̀un, kàràndzin neè y'à tey ci: «Feera, sàrìyà kaamoo reè yè bà dziàn, ci fɔ kɛɛra Aliì yè nà ŋe ?»
11 Yesù ci: «À sààben, Aliì nà nà, è goò sapɛ dzii mà sɛ̀rɛ̀nbe e shɔùn.
12 Ŋà, mun nì ci e ra, Aliì nàu nòn, è to na à tɔ̀ waa. Goo o goo dzibeu è ra, è tɔ̀ fau à ra. Tà doùn, Adamà dziàn sa wù, è byɛn è suun.»
13 Àwà, kàràndzin neè y'à tɔ̀ tɔ̀ rii ɲan, ci à Mòdzìn Jààràfoobaa Yùxanà nì gooma dekɔɔn ye ra.
Yesù kìnìnkìnìnsànkɔɔn sɔn cɛrɛmabeu min niì
14 Àyìwà è kpɛyn sèeŋmaà yè nà wɔ jàmaà tsɛ tɔ̀un, kpiri sɔn yeè nà e kunun gban Yesù bììn,
15 è dzin ci: «Tsìfaà, màtsuru n dzin kpir'la rà, kàtsu kìnìnkìnìnsàn ɲin'nà ni à ra, nìi y'à byɛɔ̀n fɔ è bè geren. Watsia sɔn ɲan à y'à mɛɛ̀ sa rɔ̀n, watsia sɔn à y'à mɛɛy yu rɔ̀n.
16 Mun y'à kpàdèu wo re kàràndzin neè rà, è to na dzi à cɛrɛmabe waa.»
17 Yesù yè dzin ci: «Ye she mòdzìn ɲan ree reè, e na ɲɛɔ̀n Ŋaablà ra, mun nà to ye ka min ye re goo rèè ku n ɲan fɔ watsi kɛn ? Ye nà dziɛ̀n ka n kɔ mìin.
18 Yesù yè e cerè kweè tsɛ, è bo dziɛ̀n ɲàn. Tɔ̀ nɔ̀nkɔɔrɔn, dziɛ̀n yè cɛrɛmabe.
19 Tɔ̀un, kàràndzin neè yè e kpɛrɛ Yesù rà tɔnmà, y'à tey ci: «Fee y'à to ɲe na dzi kwey rèe kaa bo dziɛ̀n ɲàn do ?»
20 Yesù ci è ra ci: «Ye re ɲɛynaà dzyɛ̀nbee rìì kamà, ye na dzi waa. Sààben na mun nì ci e ra, ɲɛyna ye ba na ni ye ɲan, nìi blàbee kaanindzian boò, ye na dzia dzin nèe jèn nèe ra ci:" Bo a shɔùn e bè nuu," à to na nà bo e shɔùn n dzi. Goo sɔn pɛn fa ni ye jan waa.
21 (Awà nèe kwey kaatsi rèe na dzia kaa kaaŋ kuru pɛn na, suàn ko màfyɛɛ̀n shɔ̀un waa.)
Yesù yè e saàn ko e seè kpunaàn gooma deu min niì kɔn
22 Àyìwà, sii sɔn see, è Yesù rè kàràndzin neè ladzyeeŋma to Galile mar'lɔn, Yesù yè dzin è ra ci: «È nà Adamà dziàn wɔ mòdzian suun,
23 y'à vu. A saunmaà bwèy zhììgì raa sii sèè è sèè kpunan bo saàn ɲàn.» Tɔ̀ goò yè kàràndzin neè taama ŋununbe fɔ è bè geren.
È kɔnsɔɔn goo tey fau Yesù rè min niì
24 Tà shɔ̀ùn, Yesù ko e re kàràndzin neè yè dɔ̀n be Kapɛrinaxumùn wɔ̀ rɔ̀n. Tɔ̀un, nìì reè Ŋaablà re gbà blàa kɔnsɔɔn tsià, twɛy yè nà Piyɛrì kpɛyn y'à tey ci: «Ye kàrànfaà na Ŋaablà re gbà blàa kɔnsɔɔn sàr'la gbɛ ?»
25 Piyɛrì ci: «Ɔ̀ɔn, à y'à sàr'la.» Àwà Piyɛrì bèu dɔ̀n tsii rɔ̀n tɔ̀un, Yesù yè tabe à y'à tey ci: «Shimɔ̀n, wo nèe jàa dzùrù ? Dzɔ̀nxɔɔ̀ tsɛ màsa reè wù yè kɔnsɔɔn ko fàànmàn ɲɛɛ̀n tsi tsi ì rìì lè ? È dzin nèè ràà, tàà tɔn'leè ?»
26 Piyɛrì ci: «À tɔn'leè rìì.» Yesù yè dzin à ra tɔ̀un ci: «Tɔ̀ y'a kpàdèe ci è dzin nèè dzii na ni à sàr'là ɲàn kɛ̀ ?
27 Tà ko e sa ra, mìn dzin ci mùn mà mòdzin nee reè ɲìnìn goo fa, bè yu blàa rà, e duleen ji. A naà ji jɔna niì kun, à sɔ̀ɔ̀n bo a dzu san. Wo nà ɲɛyn ja mɔn. E tɔ̀ ɲɛɛn sen, a raà ko mun naà sa sarà à ka.»