Matthieu 16

Swey dziun ci Yesù yè tàànmàshɛn kabagooma fa min niì

1 Àyìwà, Faridziɲɛn rèè swey, ko Sadzusiɲɛn rèè swey yè nà e kpɛrɛ̀ Yesù rà. È ni à re y'à dzuun bo nìi fa, yè dzin à ra ci è tàànmàshɛn kabagoomaa sɔn fa ye jaa ra, è bo jìrànxɔ rɔ̀n.

2 Yesù yè dzin è ra ci: (Ɲɛ̀rɛɛ̀ rɔ̀n, ye dziàn ci ŋaa fa nà waa, kàtsu, ŋaablaxɔɔ̀ bàa xeò.

3 À to ye ba gbishɛɛ̀mà nɔ̀n, ye dziàn ci ŋaà nà nà she, kàtsu jìrànxɔɔ̀ xeò è bà ŋaa tsi. Àwà ŋaablaxɔɔ̀ rà raa goo fakɔɔn reè, ye twɛy gɔ̀ngɔn tɔ bo e si ɲan, ye to na dzia nèe watsi ree ɲan raa tàànmàshɛn reè dzuun tɔ feera ?)

4 Nèe she mòdzìn ɲan ree reè siin, è na tereòn Ŋaablà ka ! È ci tàànmàshɛn kabagooma yeè fa kpadè ye ra. Ŋaablà re kɛɛra Yonasì raà boshɔ̀ùn, pɛn fa fa kpadè è ra waa.» Tɔ̀ dèumaà shɔ̀ùn, è bo è tɛyn, è geren.

Faridziɲɛn rèè ko Sadzusiɲɛn rèè raa buru fu geè goomaa

5 Àwà, tɔ̀ y'a tàrà, è bokɔɔn yu blàa kɛ̀yn nɔn, kàràndzin neè taa na to yè buru sen ji e kuùn waa.

6 Yesù yè dzin è ra ci: «Ye e yɛrɛ kaàwɔu'n kuru wube Faridziɲɛn rèè ko Sadzusiɲɛn rèè rè buru fu geè rà !»

7 Kàràndzin neè yè e akiri yaa bo, yè dzin tɔ̀un ci: «Ɲe na buru sen ji e kuùn nìi fa, à to mà bà tɔ̀ rii kɛ̀ ?»

8 Yesù yè è duùn naà tɔ̀u nìi fa, è dzin ci: «Ye fee rìì kɛ̀sɛɛ̀ e duùn ? Ŋà ye ɲan ɲɛynaà dzyɛ̀n dɛ ! Feera y'a kɛ̀sɛɛ̀, ci ye na buru seòn nìi fa, ci à tɔ̀ rii ?

9 Arì she ye akir'là na jɛ̀y fa ŋe o ? Mòkun gbaa nùàn dzii ra gaaŋ buru kunun nun nìi ka, ye taa myɛ̀un tɔ̀ re o ? À dzyeè ka sèè fɛ̀rɛ̀n ni tsyɛun ?

10 Buru kunun ɲɛɛ̀nun nìi ka mòkun gbaa nààlen dzii ra gaaŋ, ye taa myɛ̀un tɔ̀ sa re o ? Tɔ̀ sa dzyeè ka sèè fɛ̀rɛ̀n ni tsyɛun ?

11 Fee to bèe à to ye fa à tɔ̀, ci mun nìi dèe ye ra, à na buru goo goòmà ? N ci ye e yɛrɛ kaàwɔ Faridziɲɛn rèè, ko Sadzusiɲɛn rèè rè buru fu geè rìì là.

12 Tɔ̀un y'à tɔ̀, ci à na dziàn ye ra ci ye yè e yɛrɛ kaàwɔ buru fua gè rà waa, ŋà ye yè e yɛrɛ kaàwɔ Faridziɲɛn rèè ko Sadzusiɲɛn rèè rè kàr'nà nì nà.

Piyɛrì ci Yesù Ŋaablà Jaa ra Modzìàn

13 Àyìwà, tà shɔ̀ùn, Yesù yè dɔ̀n be Sezare wɔ̀ rɔ̀n, Fìlipù wòɲaan ɲàn. À ci e ye bè dzi mɔn, è re kàràndzin nèe tey ci: «Mòdzian dziàn ci Adamà dziàn tsì rii do ?»

14 Twɛy ci: «Swey ci à Mòdzìn Jààràfoobaa Yùxanà, swey ci à kɛɛra Aliì, swey ci à kɛɛra Yeremi, swey yɛ̀rɛ̀ to yè bà ci à kɛɛra kpɛrɛkuru ì.»

15 È tey ci: «Ye do, ye ci mun tsì rii ?»

16 Shimɔn Piyɛrì ci: «Wo rìì Ŋaablà Jaara Modziàn, Ŋaablà jaamaa Dzin Kpir'la.»

17 Yesù yè dzin à ra ci: «Yonasì dzin kpiri Shimɔ̀n, wo raà wùbeu, kàtsu, nìi nèe sààben nee dèu wo ra, à na Adamà dzin mòdzin waa, ŋà mun Fà Ŋaablà riì ni jìrànxɔ rɔ̀n, à wò rii.

18 Tɔ̀ gàneè doùn, mun ci wo rìì Piyɛrì, nìi dzuɔn kpàa, mun to nà n ne ɲɛynamoo kur'là tsùù kpàà ree tsɛ. Arì fùn nèè tàà fàan fa dzi gèsɔn fa à ra waa.

19 Mun nà Ŋaablà re Màsà ganee nèèdzin neè wɔ wo suun. Wo y'a nɔn goo o goo mà dzɔ̀nxɔɔ̀ tsɛ, mòò fa e tsiì tɔ̀ ra jìrànxɔ rɔ̀n tsu waa. Wo to y'a tsiì goo o goo ra dzɔ̀nxɔɔ̀ tsɛ, mòò fa e nɔn tɔ̀ mà jìrànxɔ rɔ̀n tsu waa.»

20 Tɔ̀ ɲan, à y'à dè màxɔbe kàràndzin neè rà, ci è mà dzin mòò pɛn jaa ra, ci wo Ŋaablà Jaara Modziàn waa.

Yesù yè e saàn ko e seè kpunaàn gooma deu min niì

21 Awà è sen tɔ̀ watsia rà, Yesù yè maa à y'à dè fyɛɛ̀ e re kàràndzin neè rà, ci fɔ wò yeè bè Yerusalɛmùn, wo yeè bè byɛn mɔn cɛyn bɔɔ rèe, ko saaka jɔɔndzin neè, ko sàrìyà kaamoo reè suun, fɔ yè bè wò vu. Tà shɔ̀ùn, wò saunmaà bwèy zhììgìraa sii sèè, wò yeè sèè kpunan bo saàn ɲàn.

22 Àwà Piyɛrì tɔ̀ goomaa myɛ̀un min niì, è Yesù kiri tɔnmà à dè màxɔbe à ra ci: «Tsìfaà, Ŋaa y'à taàn tɔ̀ mà. Tɔ̀ fa wo tàrà fyeu !»

23 Yesù yè e jaa kere, è dzin Piyɛr'là ci: «Bo n tɛyn, e bè jɔɔn, Sùtànà modzìn ! Wo mun sàn nà baan kpàà rii, kàtsu wo na a kɛsɛɛ̀ Ŋaablà raa goo rèè mà waa, ŋà wo y'à kɛsɛɛ̀ mòdzin neè raà rìì mà.»

Mòò yè e gbaàn Yesù kpɛyn nìi tsuru

24 Tɔ̀un, Yesù yè dzin e re kàràndzin neè rà ci: «Mòò riì ye ba ni à re è gban mun kpɛyn, fɔ è ɲɛyn bo e yɛrɛ tsɛ, è tsiì byɛnbee kaatsià sapɛ ra, arì è kɛ̀nsɛɛn ye ba à vua rìì, è kòmànà e gban mun kpɛyn.

25 Àwà mòò riì y'à gaa ci wò yeè e xɔɔn tsi, tɔ nà fɔn à ɲan. Ŋà mòò o moò nà fɔn e xɔn nɔn mun kamà, tɔ nà à sèè tàrà.

26 À fee wùbee mòò mà e dziɲan sapɛ tarà bà a raa, a xɔɔn to yè bara ? Mòò to dzia fee soo rii ka e xɔɔn màbo ?

27 Àwà Adamà dziàn nà nà e fa Ŋaablà blàbee doùn, e re mɛ̀rɛ̀kɛ rèè ka. Tɔ̀ sii sèè, à nà mòdzian soo soo sapɛ sarà, è kòrò è faadziɛ ka.

28 Sààben na, mun nì ci e ra, nìì reè tsìiŋnà mìin, swey fa san fyeu ni è na Adamà dziàn nàkɔɔn ja e re màsàbee doùn.»