Yesù ci moo mà kitsi kunùn mòò tsɛ waa
7
1 Awà, e maà e yɛrɛ ba kitsikununbaa dzyee rèè tsɛ waa, tɔ̀ yee fa, mòò fa kitsi kunun e tsu tsɛ waa.
2 E maà tɔ̀ fa waa, kàtsu, ye mòdzian dèe dèù'n kur'liì rà, ye sa na dè tɔ̀ rii tsuru. Ye to dzyee rèè gɔ̀ɔn gè niì ka, tɔ̀ rii nà ka ye sa gɔn.
3 Fee bèe à to ɲɔ̀ùniin nìi ni wo mòdzìnsia jaa tsɛ, wo jaa ni tɔ̀ ra, tɔ̀ to y'à tàrà, gɔ̀ɔ blà riì ni wo yɛ̀r'la raà tsɛ, wo na tɔ̀ jàa waa ?
4 Wo dzia dzin a modzìnsia rà dzùrù, à to m'a jaa tsɛ ɲɔ̀ùniɛ̀n bo, tɔ̀ to y'à tàrà gɔ̀ɔ blàa ni wo raà tsɛ.
5 Mòdzin duungoofiitsi, a jaa tsɛ raa gɔ̀ɔ blàa bo ŋe. Tɔ̀ yee fa, wo nà dzi a modzìnsia jaa tsɛ raa ɲɔ̀ùniɛ̀n jà cɛyn, wo y'à bo.
6 Nìi Ŋaablà raà, e maà tɔ̀ sìn vì tsuru mòdzin neè rà waa, è mà nà to e jaa kere e kpɛyn, yè e vyɛ vyɛ̀ waa. E to mà e re sɛnu ma ge kpàxɔù rèè maa bɛy tsuru mòdzin neè bììn, yè nà à tɔ̀rɔ̀ e san dzuun waa.
Yesù ci Ŋaabla mòò kɔ̀ɔ nìi tsuru
7 E ye gè o ge fyɛ̀n, à nà sìn e ra. E ye ge o ge gaa, e naà à tàrà. E ye koòn màban, à nà dzii san e re.
8 Awà, a moo o moò ye Ŋaablà fyɛn, à nà a kɔ. A moo o moò ye gè gaa à re, a naà à tàrà. A moo o moò to ye koòn màban, à nà à dzii san a re.
9 Ye ɲan, tsì rii soo dzin dzia buru fyɛn à re, è kpàà sin à ra, ci tɔ buru ?
10 A to ye ji fyɛ̀n, à ni myɛn sin à ra ci tɔ ji ɔ ?
11 Ye ko e re ɲanbee sa, ye wù, ye yè gè niì sìn e dzin nèè rà è bà wù, ye tɔ̀ tɔ̀. Ye ye ba tɔ̀ tɔ̀, ye Fà Ŋaablà riì ni jìrànxɔ rɔ̀n, gooma na ni tɔ̀ mà waa. Nìì reè y'à fyɛ̀ɛn, à nà twɛy kɔ̀ gè rà, nìi wù.
12 Tà doùn, ye sào ni mòdzian yè nìi faa ye re, e sa yeè tɔ̀ faa mòdzian rè. Tàworataà gooma reè tɔ̀ rii kpàdeò, Kɛɛra reè sa yeè bà ci tɔ̀ tsuru.
Dɔ̀nmàdzii kiɲaaniàn ko dɔ̀nmàdzii blaa raa goò
13 Ye dɔ̀n dɔ̀nmàdzii kiɲaaniàn nà. Ye tɔ̀ fa, kàtsu shi niì bèe mòdzian barama nɔ̀n, tɔ̀ dziɛ̀ blà, à shia yè bà blà. Mòò giri to dɔ̀ɔn tɔ̀ rii lè, kàtsu à dɔn dzi.
14 Ŋà shi niì bèe jaamabee rà, tɔ̀ dɔ̀nmàdziɛ dzyɛ̀n à nɔ̀ɔ̀dzii yè bà ɲaan. Mòò bɛrɛ na tɔ̀ tàr'la waa.
Yesù ci mìn kaàwɔ kɛɛra doo de reè rà
15 Ye e yɛrɛ kaàwɔ kɛɛra doo de reè rà. E nàa ye mà, a ci saa ì, ŋà è duùn nɔ̀n, è tsuru kparan ɲan na ni.
16 Ye nà è tɔ̀ e dziàn nà. Mòo ɛ̀rɛ̀zhɛ̀ndzin ɲɔnàma boò daaku ra ɔ ? Mòò to fiigidzin ɲɔnàma boò daaku ra ɔ ?
17 Tà doùn, gɔ̀ɔ wùù rii dzin wùù wɔɔ̀, gɔ̀ɔ ɲaan yeè bà dzin ɲaan wɔɔ̀.
18 Gɔ̀ɔ wùù na dzia dzin ɲaan wɔ waa, gɔ̀ɔ ɲaan to na dzia dzin wùù wɔ waa.
19 Gɔ̀ɔ o gɔ̀ɔ na dzin wùù wɔɔ̀, tɔ nà jèè maa sa rɔ̀n.
20 Tà doùn, ye nà kɛɛra doo de reè tɔ̀ e dziàn nà.»
Yesù ci nìì reè nà dɔ̀n Ŋaablà re màsà gane rɔn
21 «Àwà, nìì reè sapɛ dziàn mun na ci: Tsìfaà, Tsìfaà, à na ni a ci twɛy sapɛ rii nà dɔ̀n Ŋaablà re Màsà gane rɔn dɛ ! Mun Fà Ŋaablà riì ni jìrànxɔ rɔ̀n, nìì reè tɔ̀ sàɔ faa, twɛy rìì nà dɔ̀n mɔn.
22 Tsìɛ̀ sii sèè, mòò giri nà dzin mun na ci: Tsìfaà, Tsìfaà ɲe na kɛɛrabee fa wo rìì tsoo ka ɔ ? Ɲe na kwey rèè kaa bo mòdzian kpɛyn wo rìì tsoo ka ɔ ? Ɲe na kabagoo goo giri fa wo rìì tsoo ka ɔ ?
23 Tɔ̀un, mun nà à dè fyɛ è ra ci: Mun na ye tɔ̀ jà ŋe fyeu ! Ye bo n tɛyn, gooɲaan fa ree reè.
Yesù nìi dèu gbà fiɛ̀ jiu'n kur'la tsɛ
24 Tɔ̀ kamà, mòò o moò mun ne goomaa myɛ̀ɛn à y'à shi jiì, tɔ ni a ci mòdzin akiritsi, nìi yè e re gbàà jiɔ̀ faà tsɛ.
25 Ŋaa brìsi yè nà tɔ̀un, ba rèè yè tsyɛn, fyɛn bla yeè fù, yè nà firi gbàà tsɛ. Gbàà na mɛɛy waa. A na mɛɛy waa, kàtsu à jiɔ̀ faà tsɛ.
26 Ŋà mòo o moò mun ne goomaa myɛ̀ɛn, à to na à shi jiɛ waa, tɔ ni a ci mòdzin akiri bɛy, nìi yè e re gbàà jiɔ̀ cɛncɛɛn tsɛ.
27 Ŋaa brìsi nàu tɔ̀un, ba rèè yè tsyɛn, fyɛn bla yeè fù, yè nà firi gbàà tsɛ. Awà gbàà yè mɛɛy, fɔ à mɛrɔn'n kur'la yè ɲaanbe.»