Matthieu 6

Yesù ci Ŋaabla shià yè jìì nìi tsuru

1 «Ye e yɛrɛ kaàwɔ, e re Ŋaabla shi jiɛ mà nà bà mòdzian jaa ra raa waa. Ye bà ni Ŋaabla shià jìì, ci mòdzian nì yè ye jà, bàràji pɛn na ni tɔ̀ ɲan ye Fà Ŋaablà re waa, tɔ̀ riì ni jìrànxɔ rɔ̀n.

2 E ba nà gbakɔɔn reè kɔ̀ gè rà, maà tɔ̀ bà vuru fyɛɛ goo, sànko mòdzian sapɛ y'a ja waa. Duungoofiitsi rèè rìì tɔ̀ faa Ŋaa blabe gba rèè doùn, ko shi reè rè. E tɔ̀ faa, sànko mòdzian yè blà wɔ ye ɲan. Sààben na mun nì ci e ra, twɛy yè e raa bàràjia tàrau nòn.

3 Ŋà, nìi wo e ba nà gbakɔɔn reè kɔ̀ gè rà, sirama sia nìi fau, maà à to ɲɔ̀nmà sia yè sɔn tɔ tɔ̀ ɲan waa.

4 Tɔ̀ fa, sànko a re kwɛ̀ɛ yè bà mɛnɛn doùn kwɛ̀y. Tɔ̀ tsuru, wo Fà Ŋaablà riì goo mɛnɛunma rèè jàa, tɔ nà à tsìì sàrà wo re.

5 Awà, ye ba nà Ŋaablà mafyɛ̀n, e maà bà a ci duungoofiitsi rèè waa. Nìi dzi twɛy rà, tɔ̀ rii yɛ, yè tsiì Ŋaa blabe gba rèè doùn, tà ko shidaa reè rà, yè Ŋaablà mafyɛ̀ɛn, sànko mòdzian yè ye jà. Sààben na, mun nì ci e ra, twɛy yè e raa bàràjia tàrau nòn.

6 Ŋà, nìi wo, e ba nà Ŋaablà mafyɛ̀n, dɔ̀n be fɔ a re gbàà jaane, e dziɛ̀ tsyee a ma, a Fa Ŋaablà mafyɛ̀n, tɔ̀ niì ni tɔ̀ gàne mɛnɛunma nɔ̀n. Tɔ̀ tsuru, wo Fà Ŋaablà riì goo mɛnɛunma rèè jàa, tɔ nà à tsìì sàrà wo re.

Yesù ci min Ŋaablà mafyɛ̀n nìi tsuru

7 Ye ba Ŋaablà mafyɛ̀ɛn, e maà sèè toò gooma soo tsɛ kudɛyn, a ci Ŋaabla tɔ bɛy reè y'à faa nìi tsuru waa. Twɛy y'à siɛ̀n, ci ye re goomaa giribee rìì kamà, Ŋaabla nà ye re màfyɛɛ̀n kun.

8 Awà, e maà bà è bosi waa. Ye màgoo ni nìi rà, sani ye yè tɔ̀ fyɛ̀n e Fa Ŋaablà re, à tɔ̀ tɔ̀ nòn.

9 Tà doùn, ye ba nà Ŋaablà mafyɛ̀n, ye dzin ci: «Mùn Fà Ŋaablà, wo rìi ni jìrànxɔ rɔ̀n, wo tsoò fɛnɛbee nìi boò, m'a gaa ci mòdzian sapɛ y'a blàbe.

10 M'a gaa wo re Màsàbee yè jàà mùn tsɛ. Wo sàɔ faa nìi tsuru jìrànxɔ rɔ̀n, è fa tà tsuru dzɔ̀nxɔɔ̀ sa tsɛ.

11 Mùn ne she dzira ɲwɛɛ̀n bɛ̀r'la sìn mùn na.

12 Mùn ne gooɲaan tsiɛ mɛɛy bo mùn vu ra, a ci nìì reè goo faa ɲe ra, ɲe sa tɔ̀ tsìɛ̀ mɛɛy boò twɛy mà nìi tsuru.

13 Maà à to Sùtana yè dzi mùn dzuun mìn fa bɛy goo fa. Mùn tsi à ra. (Tɔ̀ fa, kàtsu màsàbee, ko dzibaabee, ko blàbee sapɛ wo rìì laa kudɛyn. Arì she, Ŋaa y'à bà tà tsuru.»)

14 Tà shɔ̀ùn, Yesù ci: «Awà, ye ye ba dzyee rèè raa fìrìgoo rèè mɛɛy boò twɛy mà, ye Fà Ŋaablà riì ni jìrànxɔ rɔ̀n, tɔ̀ sa nà ye raà mɛɛy bo ye mà.

15 Ŋà, ye ma ba dzyee rèè raa fìrìgoo rèè mɛɛy boò twɛy mà, ye Fà Ŋaablà tsu fa ye raà mɛɛy bo ye mà waa.

Yesù ci suàn yè wɔ nìi tsuru

16 Awà, e ye sun wɔ, e maà e jaakɔrɔn kùùn, a ci mòdzin duungoofiitsi rèè y'à faa nìi tsuru waa. Twɛy yè e jaakɔrɔn ŋununbee, sànko, mòdzian y'à tɔ̀, ci ye sun wɔɔ. Sààben na, mun nì ci e ra, è raa bàràjia, è tɔ̀ tàrau nòn.

17 Ŋà, nìi wo, a ye sun wɔ, a jaara foò, e ɲinin kinin dziù ka a kuùn tsùsa.

18 Tɔ̀ fa, sànko mòdzian mà à tɔ̀ ci a sun wɔɔ waa, fɔ wo Fà Ŋaablà riì ni gàne mɛnɛunma nɔ̀n. Wo Fà Ŋaablà riì goo mɛnɛunma rèè jàa, tɔ nà à tsìì sàrà wo re.

Yesù ci min niì nàfòrò marama wùù

19 E maà nàforo ladzyèè tsùù e re dzɔ̀nxɔɔ̀ tsɛ waa. Dzɔ̀nxɔɔ̀ tsɛ, daa rèè ko kpɛ̀ɛkpɛɛ̀ baragoò faa, shɔn rèè sa yeè bà dzii rèè kɛɛ̀, yè gè rèè sen.

20 Ŋà, ye nàforo ladzyèè tsùù e re jìranxɔ rɔ̀n nì. Daa ko kpɛ̀ɛkpɛɛ̀ na ni mɔn, yè baragoò fa waa. Shɔn ì to na ni mɔn, yè bà ni dzii kɛɛy, yè ge ì sen waa.

21 Awà, a re nàfor'la ni min niì, tɔ̀ gàneè rìì fɔ̀rɔ̀ tsùuŋnà a vun'nà sa ra.

Yesù ci jaadzian nì màà vyevyeè

22 Mòdzian jaadzian nì y'à màà raa fìtsìnà vyevyeè. A jaadzin neè ye ba wù, wo màà sapɛ rii bàa ni vyevyeè ɲàn.

23 Wo jaadzin neè to ma ba wù, wo màà sapɛ rii bàa ni tsitsiɛ̀ ɲàn. Tà doùn wo ɲan vyevyeè ye ba tsitsiì, tɔ̀ tsitsiɛ̀ blà dɛ !

Yesù ci mòò na dzia faagoo fa kùntsii fii re waa

24 Mòò pɛn na dzia faagoo fa kùntsii fii re waa. Soo goo ma xɔbe à mà, soo goo dzibee à ra, tàmafa, è shi soo rà è soo kɔn. Ye fa dzi faagoò Fà Ŋaablà re, y'a fa nàfor'la sa re waa.

Yesù ci mun mà vyɛ̀ɛ̀y e re jaamabee ka waa

25 Tɔ̀ rii kamà, m'a dèe e ra ci: E maà vyɛ̀ɛ̀y, ci ye nà fee ɲɔn (tàmafa, ye nà fee mìn). E to mà vyɛ̀ɛ̀y, ci ye nà vya ji e ma dzùrù. Jaamabee na vùn ɲwɛyn goo mà ɔ̀n ? Màà yè bà vùn vya goo mà ɔ̀n ?

26 Ye jiran nɔ̀n kɛ̀yn neè siin cɛyn. E na shìman sià, è to na shìmàndzin gaa, è to na shìman ladzyèè tsùɔ bòndo ì doùn. Awà, ye Fà Ŋaablà riì ni jìrànxɔ rɔ̀n, tɔ̀ na è dzii ra gaara ɔ ? N ci ye vùn twɛy kɛ̀yn neè mà ?

27 Tsì rii soo ni ye ɲan, ci wo dzia nɔ̀nkɔn soo ba e sià tɛ̀y, à vyɛ̀ɛ̀y gereunmaà suun goo rèè rè ?

28 Fee to bèe à to, ye yè vya goo ka e vyɛɛ̀y ? Ye jòon nɔ̀n vun nèè swey siin, è fùa nìi tsuru, yè kan. E na faagoo faa, è to na jìsi faa y'à bà vya.

29 Awà, mun nì ci e ra, màsa Sɔ̀ɔ̀mɛyn ko e blabee sa, à na vya wɔ jà, nìi twɛy vunkan nèè soo wubee boò waa.

30 Jòon nɔ̀n vun nìi ni tɔ̀ tsuru she, tɔ̀ to y'à tàrà gbee ko e sa, à nà maa sa rɔn, Ŋaablà ye ba twɛy mà wɔɔ̀ tɔ̀ tsuru, gooma ni ye raà mà ɔ̀n ? Ye ɲan ɲɛynaà dzyɛ̀n dɛ !

31 Tà doùn, e maà vyɛ̀ɛ̀y ci ye nà fee ɲɔn, tàmafa, ye nà fee mìn waa. E to mà vyɛ̀ɛ̀y, ci ye nà vya ji e ma dzùrù waa.

32 Awà, Ŋaabla tɔ bɛy reè rìì twɛy gè rèè gaa. Ŋà ye, ye Fà Ŋaablà riì ni jìrànxɔ rɔ̀n, tɔ̀ y'a tɔ̀, ye màgoo ni twɛy sapɛ ra.

33 Ye Ŋaablà re Màsàbee ko à re terenbee rìì gaa ŋe. Tɔ̀ ye fa, twɛy gè rèè sapɛ nà bà à tɛ̀y ye re.

34 E maà vyɛ̀ɛ̀y gbee ka waa, gbee raa goò ni tɔ̀ yɛ̀r'la suun. A jisee sapɛ ko e raa byɛnbe.»