Matthieu 8

Yesù byèèma kpiri sɔn cɛrɛmabeu min niì

1 Ayìwà, Yesù jàà bou jèèn tsɛ watsi riì bwèy, jàma brìsi yè e gban à kpɛyn.

2 Tɔ̀un, byèèmà kpiri sɔn yeè bo na, tɔ̀ yeè e kunun gban à bììn, è dzin à ra ci: «Tsìfaà, è wo dzibe, wo dzia mun cɛrɛmabe, min bà mòdzìn fɛnɛ.

3 Tɔ̀un, Yesù yè sià foro è dzyɛn à ra, è dzin ci: «Min tsiiŋ, mun ci e cɛrɛmabe.» Tɔ̀ nɔ̀nkɔɔ rɔn ko e sa, kpir'la yè cɛrɛmabe, è bo e re byèèmà ɲin'nà ɲàn.

4 Yesù yè dzin à ra ci: «Maà à dè mòò pɛn na dɛ ! B'à yɛrɛ kpadè saaka goojaabobaà rìì là. Tà shɔ̀ùn, Musà rè sàrìyaa ci saaka kaatsi nìi yè bo, è kpàdè mòdzian nà ci wo cɛrɛmabeu, e bè tɔ̀ ka. Tɔ nà bà shɛɛrɛbe è re»

Yesù kaadzin jɛrɛ̀blàtsi sɔn ne faagoofadzin cɛrɛmabeu min niì

5 Ayìwà, Yesù dɔ̀nkɔɔn Kapɛrinaxumù wɔ̀ rɔ̀n, kaadzin jɛrɛ̀blàtsi sɔn yeè e kpɛrɛ̀ à ra, à y'à màfyɛ̀n.

6 A ci: «Tsìfaà, mun ne faagoofadzian ɲɛɔ̀n gbàà doùn. A mùrùkuɔ̀, à to byɛɔ̀n fɔ è bè geren.»

7 Yesù yè dzin à ra ci: «Mun nà bè, m'a cɛrɛmabe.»

8 Kaadzin jɛrɛ̀blàtsià ci: «Tsìfaà, wo yè bà ni dɔn mun tsur'le tsii, mun na wɔɔ tɔ̀ mà waa. Arì wo ye gooma dzin soo basɔùn nì dè, tɔ mun ne faagoofadzian cɛrɛmabeuma.

9 Awà, mun mòdzin, kuntsii ì ni mun kùùn, mun sa yeè bà ni kaadzin ì kùùn. Min sɔn ka, tɔ bèe, mun to ye sɔn kiri, tɔ nàa. Min dzin n ne jòòn rà, nèe fa, ta tɔ̀ faa rìì.»

10 Awà, Yesù twɛy gooma reè myɛ̀un, è ji à dzii tsɛ. Tɔ̀un, à ko nìì reè ni, è dzin è ra ci: «Sààben na, mun nì ci e ra, arì Isirayɛlidzin neè ɲàn, mun na mòò jà ŋe, nèe ɲɛyna brìsi rèe kaatsi ni nìi ɲàn waa.

11 Mun nì ci e ra, mòò giri nà dan kir'la rà, ko bwèydoo rè, yè nà e tsuù yè ɲwɛɛ̀n ɲɔn Ibraximà, ko Ishakà, ko Yàkubà ka Ŋaablà re Màsà gane rɔn.

12 Ŋà, Ŋaablà re Màsà ganee na wù è bà nìì reè raa, twɛy nà maa da rɔ̀n, yè bà ni tsitsiɛ̀ rà. Gɛɛy boo, ko ɲiun taa rìì nà bà ni mɔn.»

13 Tɔ̀un, Yesù yè dzin kaadzin jɛrɛ̀blàtsià rà ci: «Bè tsii. E fa a re, a ci wo ɲɛun à ra nìi tsuru.» Tɔ̀ watsia yɛ̀r'la ɲàn, kpir'la rè faagoofadzian yè cɛrɛmabe.

Yesù Piyɛrì blantaàn ko mòò giri cɛrɛmabeu min niì

14 Tà shɔ̀ùn, Yesù yè dɔ̀n be Piyɛr'lè tsii. A wɔu mɔn, è Piyɛrì blantaàn jà, màta brìsi tɔ̀ ɲɛɔ̀n.

15 Tɔ̀un, è dzyɛn taàn sià rà. Tɔ̀ fau min nii, màtaà yè dò. Taàn yè fù, è ɲwɛyn goo jaa bo à re.

16 Tɔ̀ ɲɛ̀rɛɛ̀ rɔ̀n, yè nà kweykɔɔn giri ka à re. Yesù rè gooma soo baraka rɔ̀n, è kwey rèè kaa bo twɛy kweykɔɔn reè kpɛyn, è ɲìnìnkɔɔn sapɛ cɛrɛmabe.

17 Tɔ fau, sànko Ŋaablà re kɛɛra Esayì na nìi dè dɔɔ̀n bɔrɔɔ, tɔ̀ yeè bo e shi tsɛ, nìi yɛ ci:

«E kungɔ wɔu mùn gbaa goo rèè dzuun, è mùn ne ɲìn'nèè seen sen.»

Nìi ni Yesù kpɛyn jìɛ̀ ɲàn

18 Awà, Yesù nàu à jà jàma brìsi wò laguruunà, è dzin e re kàràndzin neè rà, ci y'a wa yu blàa kɛ̀yn nɔn.

19 Tɔ̀un, sàrìyà kaamoo sɔn yeè e kpɛrɛ̀ Yesù rà, è dzin à ra ci: «Kàrànfaà, wo ye be min o min, mun nà n gban wo kpɛyn.»

20 Yesù ci à ra ci: «Kɔ̀ɔ rìì ni tsɛ̀ kùn kpar'nèè rè, è dɔ̀ɔn min niì. Tàn yè bà ni jiran nɔ̀n kɛ̀yn neè rè, yè e ɲɛɛn mɔn. Ŋà Adamà dziàn, gàne na ni tɔ̀ tsoo ra, à nà e kungɔ wɔ min niì waa.»

21 Yesù rè kàràndzin neè soo kpɛrɛ yè dzin à ra kɔɔn ci: «Tsìfaà, à to min bè n faà fùn wɔ ŋe.»

22 Yesù ci à ra ci: «A gban mun kpɛyn, a to fùn nèè yè e re fùn nèè wɔ.»

Yesù fyɛn blaa tsìiŋ yuà tsɛ min niì

23 Tà shɔ̀ùn, Yesù yè dɔ̀n konkoron sɔn doùn, à re kàràndzin neè sa yeè dɔ̀n ko à ka.

24 Tɔ̀un, à yè è to yuà tsɛ, fyɛn bla sɔn yeè bàràma fu. Tɔ̀ fyɛɛn blàbe ɲaanfaa suun, yuà yè fù jia konkor'na doùn. Tɔ̀ y'a tàrà, Yesù ni ciɛ̀ rà.

25 Kàràndzin neè yè e kpɛrɛ̀ à ra tɔ̀un, y'à kpuna ci: «Tsìfaà, mùn tsi, yuà nàkɔɔn yɛ mùn ɲɔn.

26 Yesù yè kpuna, è dzin è ra ci: «Fee y'à to ye yè bà shia nèe tsuru ? Ye ɲɛunmaà dzyɛ̀n Ŋaablà ra dɛ !» A fùu tɔ̀un, è cerè fyɛɛn ko yuà sa tsɛ, twɛy sa yeè e majàà tɛ màànkaan sapɛ yeè dò.

27 E ji mòdzian dzii tsɛ. E ci: «Nèe kɛ̀n tsuru mòdzin ? Arì fyɛɛn ko yuà sa y'a dzugoomaa latsuɔ.

Yesù kpiri kweykɔɔn fii cɛrɛmabeu min niì Gadara mar'la ɲàn

28 Ayìwà, Yesù ko e re kàràndzin neè yè bè wɔ yu blàa kɛ̀yn, jàmaàn sɔn ɲan, nìi kir'là Gadaraka reè rè jàmaàn. E bèu wɔ mɔn, kpiri kweykɔɔn fii yè bo kabur'lèè rà, yè tsià Yesù mà. Twɛy na ɲanbeò, fɔ mòò na e tsiɛ, è dɔ̀n tɔ̀ shia rè dɛ.

29 Tɔ̀un, yè sɛ̀ɛ̀y ci: «Ŋaablà Dzin Kpir'la, fee ni wo ko ɲe fi ? Wo naɔ̀ mìin, wo yè nà ɲe byɛn, sani à watsi yeè wɔ rìì gbɛ ?»

30 Tɔ̀ y'a tàrà, bɛ̀y kuru brìsi sɔn dan na gbàn è ra, twɛy yè bà ni ɲwɛɛ̀n nà.

31 Kwey rèè yè Yesù màfyɛ̀ɛn ci: «E ba nà mùn kaa, a yɛrɛ to e mùn bàji be bɛ̀y kur'là ɲàn.»

32 Yesù ci è ra ci: «Y'a wa !» Tɔ dèu min niì, yè bo, yè bè dɔ̀n bɛ̀y kur'là ɲàn. Tɔ̀un, bɛ̀y kur'là sapɛ yeè soso jaà bo jèèn tsɛ, yè nà e kpinìn yu rɔ̀n, yè san mɔn.

33 Bɛ̀y kplàtsuu reè yè vwɛ̀ɛ̀y, yè bè wɔ̀ɔ̀ doùn. Goo o goo fau kweykɔɔn fiɛ̀ rè goò ɲàn, yè tɔ̀ jaa dè mòdzian nà.

34 Tɔ fau, wɔ̀ɔ̀ mòdzian sapɛ yeè bo, yè Yesù kùùntsi. Y'à màfyɛ̀n, ci è bè, è bo ye re jàmàan nɔ̀n.