Biɔŋ bi nyiŋ'ə bi ná kɨ tɨchə díɔ yi nəjiŋ
3
Kɨ kkɨ lə, ná kɨ ji díɔ yi nəjiŋ, ɨ biɔŋ bi sɔkə kɨ tɨchə. 2 Bənɨ ná kɨ se kwa ji gwɨ́ yibɔlə, bɔ se kpə, bɔ kuntsɔ gulu, bɔ dze gwɨ, bɔ chanyɛ díɛ yibiə tsukɔ bənɨ bədɔ wɨ. Bɔ tsukə kɨ woko bə bəmɛni ma bətɨɨ bəbɔlə, bɔ jikə nyaha kɨmbafə kɨ fiɔŋ'ə, bɔ jikə keŋkɛ tɨ fiə wu ntsaaŋ. 3 Bɔ tsukə kɨ kwesɛ yaa bə bənɨ, bɔ ŋgufiɛ sɨŋ məmbiə mə bənɨ lə. Bɔ ná kɨ bɨsə yɨ́ yi bənɨ lə, bɔ ná kɨ jikə tɨŋkəhə ŋkɨ bə gwɨ́ yibɔlə. Bɔ ná kɨ keŋkɛ fiə wu sɔkə, bɔ jikə sɛhɛ fiɔŋ fi ndzeŋe. 4 Bɔ ná kɨ taŋŋə bənɨ, bɔ ji kɨjimiɛ kɨ sɔkə ntɨŋ, bɔ dze gwɨ kɨtso. Bɔ ná kɨ laŋkɨ kɨn'yɛŋ ba ya nɨ naji lə bɔ kɨ se Nyɔ. 5 Bɔ donchɛ lə bɔ lɨmi ba fiɔŋ fi Nyɔ lə wɨ, bəmanɨ bɔ tsu bɔ nɨnntɨ buŋga bu fiɔŋ fi Nyɔ lə fia. Bâ gwɨ nə ba bənɨ wɨ. 6 Bədɔ nə bənɨ ba ntɨŋ na gəndə bɔ bekiɛ bənɨ tsɔ́ŋ, bɔ fukiɛ bəkansɨ bə na ji bə shəŋ yi wəəə bə bubiə' kusə bɔ, bɔ kɨ njiŋki bɔ biəlɨ ji kɨshəntə kɨ biɔŋ'ə chichi chichi. 7 Bɛŋ bəkansɨ na bə na ba bɔ kɨ shɨ kwa bɔ woko bitɨfiə tsá chi, bəmanɨ ɨji naji ɨ bɔ kkə fiɔŋ fi yɛyi nə bitɨfiə bia ntɨŋ kə. 8 Nɨ Janis bə Jamblɛs nə̀ yimbiɛ Mose, na tɨ diəŋ nɨ bənɨ bɛŋ na yimbiɛ kɨyɛyi kɨ Nyɔ lə. Na bənɨ bə bufɨ bubɔlə' jibiɛ, shəŋ yi bɔ na tɨdi lə bɔ' ga Klistu wɨ ji biyɔndu. 9 Bəmanɨ bɔ ná fɨtəhə manɨ ba gəŋ dzəbudə, ndzɨ buŋfidi bubɔlə ná yinshi ŋgbooŋ nɨ bu Janis bə Jamblɛs lə nə̀ yinshɛ.Pɔl tɨfiə Timɔti lə yu lə̂ŋ buntaŋ fiɔŋ fi bə́' tɨfiə yu wɨ
10 Timɔti, wə na ji yɔhɔ wə kkɨ bitɨfiə biɛmɨ bə fiə wɛmɨ ma fiɔŋ fi nna nse kɨjimiɛ kɛmɨ ntɨŋ. Wə na kkɨ tɨ tsukɔ shəŋ yi mɨ ŋgalə Nyɔ wɨ bə shəŋ yi nna mba ŋkɨ ŋkansɨ, ma kɨnse kɨ nna ŋkeŋkɛ bə bənɨ, bə nɨ mba ŋkɨ ndiɔnɔ bə fiɔŋ fichi ŋgɨntɨ fiə. 11 Wə na kkɨ tɨ gbo wu bənɨ nə̀ sesɛ mɨ nəjiŋ, wə kkɨ tɨ bəŋgə bɛŋŋ, wə kkɨ biɔŋ bi nə̀ tɨchə mɨ Antiɔk bə Ikɔnium ma Lista, wə kkɨ ŋgwe yi gbo wu bənɨ nə̀ sesɛ mɨ nəjiŋ. Bəmanɨ nə bəŋgə bɛŋ ntɨŋ bəchi, Baba nə̀ chitə mɨ. 12 Na yɛyi lə miɨ chi wu na se njiŋ kɨjimiɛ kɨ Nyɔ na se nɨ miɨ wu na ji Jisɔs Klistu ntɨŋ, bə́ ná kɨ sesɛ tɨ gbo yu nəjiŋ. 13 Bənɨ bə na fɨtɨ biɔŋ bi na dadiɛ gwɨ bə bənɨ bə dyɛ lə, fiə wubɔlə ná kɨ bɨfi wu gɨntɨ fiə nɨ bɔ na fukiɛ bənɨ bədɔ, bɔ fukiɛ tɨ gwɨ́ yibɔlə. 14 Bəmanɨ, nə wə lɨ, lə̂ŋ kwa ji fiɔŋ fi wə nə̀ fɨyə ba bɨŋ fi bə shəŋ yɔhɔ chi. Lə̂ŋ fi wɨ ndzɨ wə na kkɨ bənɨ bə tɨfiə wə fi. 15 Wə na kkɨ lə, wə nə̀ gbɔ kɨ kkɨ biɔŋ bi na ji bubɔndɔ Kɨŋwatɨ kɨ Nyɔ lə ntɨŋ wə bambi wɛŋ wubiɨ ɨji biɔŋ biŋ ji bi naji ɨ bi tɨfiə wə, ɨ wə keŋkɛ mfɔ yi fo yi na ba nə shəŋ yi wə galə Jisɔs Klistu wɨ. 16 Fiɔŋ fichi fi na ji bubɔndɔ Kɨŋwatɨ kɨ Nyɔ lə ntɨŋ, bufɨ busu nə̀ fɔ nə Nyɔ wɨ, fi chitə bə ntɨfiə yi bənɨ, fi donchɛ bəŋgbɔ, fi lɨmə bənɨ, fi tɨfiə bənɨ fiə wu diəŋ, 17 fə miɨ wu na ji miɨ wu Nyɔ kɨ ji wu naji lə yu' kwətsə, yu keŋkɛ fiɔŋ fichi fi fənə nɨŋ yi ndzeŋe chi su.