Pɔl nya Timɔti bitɨfiə lə yu kɨ nɨntɨ nɨŋ buni
4
Nna nchanyɛ fiŋ bə wə Nyɔ nəfiə bə Jisɔs Klistu wu ná kɨ sakɨ bənɨ bəwəŋ bə bəŋkkpə. Nna nchanyɛ ndzɨ nlafu yi yu ná lafɔ bə ndzɨ buŋkuŋ buhu ntɨdi lə, 2 kɨ tɨdi diɛ yi Nyɔ. Kɨ tɨdi wə gɨntɨ bə yi fiə, mɛ kɨ ji tsa yi diəŋ makə jikə jimiɛ yi diəŋ. Kɨ donchɛ bəŋgbɔ bə bənɨ lə, wə lɨmə bɔ, wə kosɔ shəŋ yibɔlə bə budə nɨ wə kɨ tɨfiə bə shəŋ yi kansə. 3 Kkə̂ lə tsa ba ya yi bənɨ jiba ɨ bɔ tsukə kɨ lɨmi bitɨfiɛ bi diəŋ wɨ. Bitiu bibɔlə ná kɨ shəntə bə ŋ'wɔ ji fiɔŋ fidɔ chichi. Ɨ bɔ banchɛ ji ŋgwe yi bənɨ bə bitɨfiɛ lə kɨyɛŋ bə kɨ tɨfiə bɔ ji fiɔŋ fi bɔ na se ŋ'wɔ. 4 Bɔ ná shɨkɨ ŋ'wɔ yi fiɔŋ fi kɨyɛyi lə ba kɨ la bɔ gɨntɨ ji məndəŋfɨ ntɨŋ. 5 Bəmanɨ, nə wə lɨ, kɨ tɨntɨ ŋkɨ bə gwɨ yɔhɔ tsá chi, kânsɨ shəŋ bəŋgə ntɨŋ, wə kɨ nɨntɨ nɨŋ nɨ miɨ wu na gəndə yu tɨdi shɔŋ yi ndzeŋe. Kânə nɨŋə nɨŋ yɔhɔ chi yi bə́ galə wə kaŋ.6 Nə mɨ lɨ, nna nji fɛŋ nɨ mbiŋ, tsa kwətsə yi bə́ jiba bə́ dze mɨ ba fə bintɔfiɛ su nɨ bə́ shichi mbiŋ. Tsa yɛmɨ yi kwənə' kwətsə. 7 Mɨ ndiɔ budiɔ bu ndzeŋe ndzɨ nɨŋ yi Nyɔ, mɨ nlətə kɨlɨtɨ ba kanə lɨ, mɨ nchiŋfi kɨmbɨŋ kɛŋ buntaŋ ba kətə kɨ wɨ. 8 Dze nə fɛŋ bɨŋ, bə́' ga kɨfulɔ kɨ buŋkuŋ'ə mɨ lɨ ɨji kɨ fiə wu diəŋ'ə. Kɨfulɔ kɨŋ ji kɨ Baba wu na ji miɨ wu sakɨ bənsa diəŋ ná chisə mɨ fi butsu bu nəjiŋ. Yu ná chisəhə ji mɨ kwa. Yu ná chisə tɨ bənɨ bəchi bə na se lə yu fichə ba lɨ.
Pɔl tə nɨ biɔŋ na ji dia wuhu
9 Timɔti, dîɔnɔ buni wə ba mɨ wɨ fɔfɔ. 10 Kkə̂ lə Dɛmas bə kɨshəntə kɨ mbi wu fɛŋ no lə' tɔfu mɨ ba gəŋ Tɛsalɔnika. Klesɛns gəŋ Galɛsha, Taytus gəŋ Dalmatia. 11 Na kwa Luka yu wumbɔŋ wu na ji bə mɨ. Tsa yi wə kɨ ba, wə dze Maku, bə ba. Naji ɨ yu chitə mɨ kɨtso bə nɨŋ. 12 Nnə mfaŋ Tikikus Ɛfɛsɔ. 13 Tsa yi wə kɨ ba, wə dzê kɨndzu kɛŋ kɨbəŋ kɨ nnə ŋgalə ka Kapus tsɔŋ, kɨtuŋ kɨ Tɔwas ntɨŋ, wə kɨ ba tɨ bə biŋwatɨ biɛŋ, gwɨtɛ bi bə́' fəə bia bə dzɨ́.
14 Alɛdzanda wu biɨ dia nya mɨ ŋgə, ɨ jikə jimiɛ wuntse. Baba jiwa yu sɔmbu yu nə fiə wuhu wɨ. 15 Kɨ tɨntɨ ŋkɨ bə yu. Yu na yimbiɛ shɔŋ yi kə na tɨfiə kɨtso.
16 Butsu bu fiəfiə bu nnə̀ nləmiə nsa, miɨ nə̀ kə ləmiə mɨ nəjiŋ. Bənɨ bəchi nə̀ lətə mɨ. Nyɔ kə̂ kweŋkɛ bɔ ndzɨ fia fiɔŋ. 17 Bəmanɨ, Baba nə̀ ləŋ mɨ nəjiŋ, yu nya mɨ buŋga bu tədiə shɔŋ yi ndzeŋe buni fə bənɨ bəchi bə na jimiɛhɛ Bəju wɔɔ shɔŋ ya. Bəma yu foso mɨ nə mbɔŋku kaŋ. 18 Baba jiwa yu kɨ fosɔ mɨ nə biɔŋ bibiə bichi ntɨŋ, nəjiŋ wusu ɨ yu ga mɨ buŋkuŋ buhu bu bɔ́ ntɨŋ nyəkə. Bubəŋ kɨ ji bə yu tsá chi ŋka sɨŋ. Fi kɨ ji ma.
Binntsɨsɨ
19 Tsɨ̂sɨ Pliska bə Akwela mɨ lɨ. Tsɨ̂sɨ tɨ kɨtsɔŋ kɨ Ɔnesifɔlus lə. 20 Ɛlastus nə̀ shə Kɔlɛn, nshə Tɔfimus Miletus ndzɨ yu nə̀ gwente lɨ. 21 Dîɔnɔ kɨtso lə wə ba tsa yi kɨkumɔ kɨntaŋ bambi kə baha. Yubulus' faŋ wə kɨntsɨsɨ. Pudɛns bə Lainɔs ma Klawdia bə bəŋgwɨŋ bəchi bə Klistu ntɨŋ' faŋ tɨ kɨntsɨsɨ. 22 Nna nende lə Baba kɨɨ kɨn'yɨntɨ kɔhɔ. Kɨnse kɨhɨ kɨ ji bə bəŋ bəchi.