Kɨŋwatɨ kɨ fiəfiə kɨ Pɔl nə̀ bɔndɔ bə
Timɔti
Fiɔŋ fi na ji Kɨŋwatɨ kɨ Timɔti lə kɨ fiəfiə kɨŋ ntɨŋ
Kɨŋwatɨ kɨŋ na kɨ fiəfiə kɨ Pɔl nə̀ bɔndɔ bə wɛŋbutsɔ wudɔ, yɨ wuhu ji lə Timɔti. Timɔti nə̀ ji miɨ wu Klistu, yu nə̀ ji miɨ nə kɨtuŋ kɨ Ɛsha wuntse ntɨŋ.
Biɔŋ bi Pɔl bɔndɔ tsukɔ bi wɨ kɨŋwatɨ kɨhɨ kɨ fiəfiə kɨŋ ntɨŋ na bitɛ. Fi fiəfiə na ji yu chanyɛ sɔ yu tɨfiə lə bə́ kɨ dze tsa tsukɔ bitɨfiə bi sɔkə wɨ bənɨ bə kɨmbɨŋ'ə ntɨŋ. Biŋ bitɨfiɛ nə̀ ji lə, mbi wu kə na ŋɨntɨ no na mbi wu bubiə, naji ɨ miɨ fɔfo kwa tsa yi miɨ na kkɨ biɔŋ bidɔ bi na ji bunyələ bə tsa yi miɨ na jimi kɨjimiɛ kɨdɔ yu nɨnntɨ ndiə yi ŋgwe yi biɔŋ bidɔ ma bə njiŋ kpansɨ sɨŋ makə nyunso sɨŋ.
Kɨŋwatɨ kɨsu na chanyɛ tɨ nɨ naji ɨ Timɔti kɨ nɨntɨ nɨŋ yihi ntɛshɛ yi bənɨ bə kɨmbɨŋ'ə ntɨŋ, bə nɨ naji lə bənɨ kɨ tsɨsə Nyɔ. Yu chi tədiə ŋgwe yi fiə wu fo yi bəntɛshɛ bə bənɨ bə kɨmbɨŋ'ə bə bədikin naji lə bɔ kɨ keŋkɛ. Nəjiŋ wusu yu tɨfiə Timɔti nɨ naji ɨ yu kɨ nɨntɨ nɨ wɛŋ wu nɨŋ wu Jisɔs Klistu wu ndzeŋe.
Fó yi biɔŋ'ə Kɨŋwatɨ kɨŋ ntɨŋ
1:1-2 Mbɛyɛ
1:3–3:16 Bitɨfiə tsukɔ nɨ naji ɨ bə́ kɨ fɨtɨ biɔŋ ntɛshɛ ntɨŋ bə tsukɔ bənɨ bəbəŋ bə ntɛshɛ lə
4:1–6:21 Bitɨfiə nɨ naji lə Timɔti kɨ nɨntɨ nɨŋ yihi