Pɔl nende lə bənɨ bə kɨmbɨŋ'ə kɨ tsɨsə Nyɔ bə bɔ
3
Bə ŋkanə, bəŋgwɨŋ, bə kɨ tsɨsə bə bɨ fə diɛ yi Baba kɨ gəndə yi gɨntɨ fiə fɔfɔ, bənɨ bɨ̂ŋ ba kuntə yi diəŋ chi bə nə̀ bɨmiə. 2 Bə kɨ tsɨsə ma kə foto nə bənɨ bə shəŋ yi yii lə kaŋ, bə na fɨtɨ biɔŋ bibiə, ndzɨ na bənɨ bəchi kə bə na ji bə kɨmbɨŋ. 3 Bəmanɨ, Baba ba yu kɨ lɨmi diɛ yihi bɨŋ. Yu jiwa ɨ yu nya bəŋ buŋga ba kɨɨ bəŋ nə miɨ wubiə kaŋ. 4 Baba' fə kə ga shəŋ bəŋ wɨ, lə bə fɨtɨ ba fiɔŋ fi kə na tɨdi, lə bə jiba ɨ bə kətə bə fɨtɨ. 5 Kə na nende lə Baba ga shəŋ yɛnɨ yi kkə kɨnse kɨ Nyɔ lə bə kansɨ shəŋ nɨ Klistu nə̀ kansə.Miɨ naji lə yu nɨŋ fə yu tə diə
6 Bəŋgwɨŋ, kə na tɨdi bə bəŋ butədiə yɨ wu Baba waha Jisɔs Klistu lə lɨ lə bə kə kɨ tɛshɛ gwɨ bə bəŋgwɨŋ bə kɨmbɨŋ'ə bə na ji kɨlɔlɔ, bɔ jikə biələ bitɨfiə bi kə nə̀ tɨfiə bəŋ. 7 Mɨ nchanyɛ mɛ ndzɨ bəŋ bə bəŋ'ə bə na kkɨ nɨ bə naji lə bə fɨyɛ nə bɨ lɨ. Kə nə̀ kə baha kɨ ji kɨlɔlɔ tsa yi kə nə̀ ji bə bəŋ. 8 Kə nə̀ diəhə fiɔŋ fi miɨ lə nsɔmbu sɨŋ. Kə nə̀ nɨntɨ kə yəsə bbutsu bə bbushə kə tə kə tosɔ ntə miɨ wudɔ fi nə bəŋ ntɨŋ. 9 Fi nə̀ jimiɛhɛ lə kə nə̀ sɨŋ bə buŋga bu binɛ fiɔŋ nə bəŋ'ɨ, nə̀ lə ma bə kwete fiə waha ba kɨ fɨtɨ diəŋ. 10 Bə na kkɨ lə tsa yi kə nə̀ ji bə bəŋ, kə nə̀ nya bəŋ kɨlaŋ kɨŋ lə, “Ɨ miɨ nɨŋŋ lə yu nɨntəhə, yu kə dîəhə.” 11 Mɨ nchanyɛ mɛ ndzɨ kə wɔ lə bənɨ bədɔ nə bəŋ ntɨŋ na shɨ kɨlɔlɔ, bɔ nɨŋ sɨŋ, bɔ gəndə kwa bɔ chɛsɛ bifuŋ biɔŋ bi bənɨ bədɔ lə ntɨŋ. 12 Ŋgwe yi ba bənɨ, kə na tombi bɔ kə nya bɔ bitɨfiə yɨ wu Baba Jisɔs Klistu lə lɨ lə bɔ gbɔ kɨ nɨntɨ bɔ keŋkɛ fiɔŋ fi bɔ kɨ diɨ. 13 Bə bəŋ bəŋgwɨŋ, gwɨ kə̂ kaha bəŋ bə mfə yi fiə wu ndzeŋe.
14 Ɨ miɨ nɨŋŋ ŋ'wɔ fiɔŋ fi kə na chanyɛ kɨŋwatɨ kɨŋ ntɨŋ, bə tɨŋkɨ bə wa miɨ. Bə kə̂ keŋkɛ fiɔŋ fi fənə bə wa miɨ, fə yaa kwɛɛ yu. 15 Bəmanɨ, bə kə̂ dzɛɛ yu nɨ miɨ wu nchɛnɛ. Bə lɨ̂mə yu nɨ wəma wɛnɨ.
Kɨnntsɨsɨ kɨ fəŋgbɨŋ
16 Baba wu na ji bə budə kɨ nya la bəŋ budə tsá chi dzə́ ntɨŋ chi. Baba kɨ ji bə bəŋ bəchi.