Kɨ miɨ wu bubiə wa lə
2
Bəŋgwɨŋ, tsukɔ tsa yi mba yi Baba waha Jisɔs Klistu bə nɨ kə ná tɛshɛ lə kə gəŋ kɨ ji bə yu, nna nnende lə 2 bufɨ bwɛnɨ kə tsaŋkə kɨsu. Diŋkə bə sə wɔ lə Kɨn'yɨntɨ kɨ Ntsaaŋ sə faŋ shɔŋ yidɔ, makə lə kə sə tə fiɔŋ fidɔ, makə kɨŋwatɨ kɨdɔ kɨ kə bɔndɔ sə tə lə butsu bu Baba lə sə ba. 3 Bə kə̂ galə lə miɨ fukiɛ bəŋ ma ji dzə yi la ntɨŋ. Bə kɨ kkɨ lə butsu bu Baba na ba ná kwətsəhə, fiəŋkə lə tsa yi bəntɛfo bə Nyɔ sə sa ba ba lɨ, fiəŋkə tɨ lə miɨ wu na bunchi wa bilaŋ sə yinshi, ɨji yu wu bə́ ná jishɛ. 4 Na yu wu ná kɨ bəndɨsɨ gwɨ yihi, yu dio ma la fi bə́ na tsɨsə lə nyɔ, makə fi bə́ na tsɨsə bə fi. Bəma, ɨ yu ná gəŋə ba be jiŋ tsɔŋ yi bintɔfiɛ yi Nyɔ ntɨŋ ba kɨ tɨdi lə na yu Nyɔ. 5 Bə kə sɛhɛ lə tsa yi nnə̀ nji bə bəŋ, lə nnə̀ ntə biɔŋ biŋ bə bəŋ?6 Bə kkɨ ba fɛŋ fiɔŋ fi na chiŋfi fia yu, fə yu ná fɔɔ ji tsa yi bə́ galə yu lɨ. 7 Yu nɨntɨ wa fɛŋ bə buŋga buhu nəkoso nəkoso fə bənɨ kɨ bunchi bilaŋ bi Nyɔ lə, fi ji kwa lə miɨ wu na baŋkɨ wa yu ná kɨ baŋkɨ kwa manɨ sɨŋsɨŋ gəŋ fɔ tsa yi bə́ ná fosɔ yu nə dzə. 8 Bə́ ná fosɔ yu manɨ, miɨ wu bubiə wa yinshi, ɨ Baba Jisɔs tə gboso yu bə kɨn'yɨntɨ kɨ yu dze ba jishi yu bə nlakiɛ yi yu ná kɨ ba yu lakiɛ. 9 Miɨ wu na bunchi wa bilaŋ ná kɨ ba bə buŋga bu Satan lə, yu keŋkɛ buŋga bu fənə ŋgwé yi biɔŋ bichi lə bi na donchɛ buŋga buhu bə biɔŋ bi kɨgəsə kɨ wɨŋə lə bi dyɛ lə bichi. 10 Yu ná kɨ ba tɨ bə ŋgwe yi biɔŋ bibiə bichi fə yu kɨ fukiɛ bənɨ bə na la. Bɔ la ndzɨ bɔ nɨŋŋ nlaŋ yi kɨyɛyi fə bɔ fɔɔfo. 11 Nɨ bɔ na sɛhɛ kɨyɛyi manɨ, Nyɔ faŋ biŋfukiɛ bintaŋ lə bi jibiə bɔ, fə bɔ kɨ bɨmi ji fiɔŋ fi dyɛ lə. 12 Nyɔ nə̀ fə manɨ fə yu galə bənɨ ŋgə ntɨŋ bə nə̀ kə bimiə kɨyɛyi, bɔ woko buni ji bubiə ntɨŋ.
Nyɔ nə̀ sa bəŋ lə bə fɔfo
13 Bəmanɨ bəŋgwɨŋ bə Baba na laŋkɨ, kə naji lə kə kɨ nya kɨmbafə bə Nyɔ tsá chi ndzɨ bəŋ, ndzɨ yu nə̀ sa bəŋ nə mbɛyɛ bɨŋ lə bə fɔfo, ə ba nə nɨŋ yi Kɨn'yɨntɨ kɨ Ntsaaŋ na fɨtɨ lə bə kɨ tsalə, bə nə kɨmbɨŋ kɨ yɛyi wɨ kɨ bə na ji bə kɨ. 14 Yu nə̀ bəndɨ bəŋ lə bə fɔfo, ə ba nə shɔŋ yi ndzeŋe yi kə nə̀ tɨfiə wɨ, fə bə keŋkɛ nə bubəŋ bu Baba waha Jisɔs Klistu lə wɨ. 15 Bəma bəŋgwɨŋ, bə lə̂ŋ ŋkɨɨŋ, bə chîŋfi bitɨfiə bi kə nə̀ tɨfiə bəŋ, mɛ ji bi kə nə̀ tɨfiə bəŋ bə bifuŋ, makə bi kə nə̀ bɔndɔ bə bəŋ. 16 Kə na nende lə Baba waha Jisɔs Klistu kɨbɛɛ bə Nyɔ Taa waha wu nə̀ laŋə bɨ ba koso shəŋ yaha ba nya bɨ fiɔŋ fi ndzeŋe fi kə na jiŋgə fiə fi wɨ ndzɨ shəŋ yihi yi ndzeŋe lə 17 yu chi kôsɔ shəŋ yɛnɨ ba fə bə lə̂ŋ ŋkɨɨŋ nɨ́ŋ yi ndzeŋe wɨ chi yi bə na nɨntɨ bə nə fiɔŋ fichi wɨ fi bə na chanyɛ.