Kɨŋwatɨ kɨ tsá fiɛ bɨŋ kɨ Pɔl nə̀ bɔndɔ bə ntɛshɛ yi
Tɛsalɔnika
1
Na mɨ Pɔl, nna nji bɨ bə Silas bə Timɔti. Nna mbondo kɨŋwatɨ kɨŋ bə ntɛshɛ yi bənɨ bə kɨmbɨŋ'ə bə Tɛsalɔnika bə na ji Taa waha Nyɔ bə Baba Jisɔs Klistu ntɨŋ.2 Taa waha Nyɔ bə Baba Jisɔs Klistu dônchə bəŋ shəŋ yi ndzeŋe ba nya bəŋ budə.
Nsa yi ná kɨ ji tsa yi Klistu ná fichə ba lɨ
3 Bəŋgwɨŋ, kə naji lə kə kɨ nya kɨmbafə bə Nyɔ tsá chi tsukɔ bəŋ wɨ. Fi na ji diəŋ manɨ ndzɨ kɨmbɨŋ kɛnɨ ko ka kɨ gɨntɨ fiə, kɨnse kɨ miɨ chi na keŋkɛ bə wəmɛni gɨntɨ fiə. 4 Bəma, bɨ kɨbɛɛ kə na ba kə kɨ kuntsɔ gulu bə bəntɛshɛ bə bənɨ bə kɨmbɨŋ'ə bə Nyɔ lə bədɔ ndzɨ bəŋ. Kə na ba kə kɨ kuntsɔ gulu ndzɨ bə na lɨmi ŋkɨɨŋ, bə chiŋfi kwa kɨmbɨŋ kɛnɨ wɨ bəŋgə bə bə na woko ntɨŋ bə gbo wu bənɨ na sesɛ bəŋ nəjiŋ. 5 Fiŋ na fiɔŋ fi na donchɛ lə Nyɔ ná sakɨ bənɨ nə dzə yi diəŋ ntɨŋ, fə bə kwətsə bənɨ bə buŋkuŋ bu Nyɔ lə bu bə na woko bəŋgə bɛŋ ndzɨ bu. 6 Nɨ Nyɔ na ji wu diəŋ, yu ná chisə lɨ ŋgə wu bənɨ na nya bəŋ 7 ba fə bəŋ bə na woko ba ŋgə ɨ bə fufiə ntɛshɛ bə bɨ. Fiŋ ná tɨchə tsa yi Baba Jisɔs ná yinshɛ bɔ́ kɨ ba bə boso wu doko. Yu ná kɨ ba manɨ bə bənchinda buhu bəŋga. 8 Yu ná chisə fie bə bənɨ bə na nɨnntɨ Nyɔ, ma bənɨ bə kə bɨmiə shɔŋ yi ndzeŋe yi na ji kɨ Baba waha Jisɔs lə. 9 Bɔ ná keŋkɛ lɨ ŋgə. Bə́ ná jishi bɔ kamo lɨ ɨji njɛ yi bə́ jɛɛ bɔ nə dia wu Baba lə wɨ ma nə bubəŋ bu buŋga buhu lə wɨ, lə bɔ kə̂ baha yu nəfiə. 10 Fiŋfi ná kɨ ji butsu bu yu ná ba, fə bənɨ bə na ji buhu ná kuntə yu, ɨ bənɨ bəchi bə galə shəŋ yu wɨ keŋkɛ kɨgəsə kɨ wɨŋə bɔ ŋgəsə bə yu. Bəŋ bə bəŋə ná kɨ ji bə bɔ, ndzɨ bə nə̀ bɨŋ shɔŋ yihi yi kə nə̀ chanyɛ bə bəŋ. 11 Fia na fiɔŋ fi kə na tsɨsə bəŋ'ɨ tsá chi lə Nyɔ waha fə bə kwətsə ŋgwe yi bənɨ bə yu bəndə bəŋ lə bə kɨ ji bɔ lɨ. Kə tsɨsə tɨ lə yu chitə bəŋ bə buŋga buhu ba kanə fiɔŋ fi ndzeŋe fichi fi bə na se, ma nɨ́ŋ chi yi bə na fɨtɨ ndzɨ shəŋ yi bə galə Klistu wɨ. 12 Kə tsɨsə manɨ fə yɨ wu Baba waha Jisɔs lə kɨ keŋkɛ bubəŋ bəŋ ntɨŋ, bə keŋkɛ tɨ bubəŋ yu ntɨŋ. Fi na ji ma ndzɨ shəŋ yi ndzeŋe yi Nyɔ waha bə Baba Jisɔs Klistu na keŋkɛ bəŋ wɨ.