Kɨŋwatɨ kɨ fiəfiə kɨ Pɔl nə̀ bɔndɔ bə
Timɔti
1
Na mɨ Pɔl, nji wɛŋ wu faŋə wu Jisɔs Klistu nɨ Nyɔ wu na ji Nchitə waha bə Jisɔs Klistu wu kə galə bufɨ yu wɨ nə̀ tədiə lə ŋkɨ nji.2 Nna mbondo kɨŋwatɨ kɨŋ bə wə Timɔti wɛnɛ wu kɨmbɨŋ wu yɛyi.
Taa waha Nyɔ bə Jisɔs Klistu Baba waha dônchə wə shəŋ yi ndzeŋe ba kwese yaa bə wə ba nya wə budə.
Pɔl tə lə Timɔti kɨ losɔ bitɨfiɛ bi biyɔndu lə
3 Nɨ nnə̀ nnendɛ cha wə tsa yi nnə̀ ŋgɨntɨ Mɛsɛdɔnia lə wə shə kɨ ji Ɛfɛsɔ, nna nchisə nendɛ lə wə kɨ ji kwa sɔ fə wə losɔ bənɨ bə na tɨfiə ba ŋgwe yi bitɨfiə bidɔ chichi. 4 Lôso tɨ lə bɔ kə kɨ dze tsa yibɔ bɔ bɨsə yi ji məndəŋfɨ mə bəko lə wɨ ma yɨ yi bəchɛ ku bə bənɨ lə bə bɔ ba bɔ kɨ tanchɛ yi yi ŋka sɨŋ. Biŋ na biɔŋ bi na ba kwa ji bə yímbiɛ, ɨjikə jimiɛ nɨŋ yi Nyɔ yi na ba nə kɨmbɨŋ wɨ. 5 Kɨnyi kɨ ntəfɨ nyi lə na bə mfə lə bənɨ kɨ keŋkɛ kɨnse kɨ fɔɔ nə shəŋ yi ntsaaŋ ntɨŋ bə kɨ fɔɔ nə shəŋ yi miɨ na fɨtɨ fiɔŋ kə jimiɛ fi shəŋ kɨ sakɨ yu, bə kɨnse ntɨŋ kɨ fɔɔ nə shəŋ yi yɛyi ntɨŋ yi miɨ galə Nyɔ wɨ. 6 Bənɨ bədɔ nə shə nyi dzə ba kɨ jikijiki bɔ biəlɨ ji bənchanyɛ bə kɨlɔlɔ lə. 7 Bɔ na se lə bɔ kɨ ji bənɨ bə na tɨfiə bənɨ bilaŋ bi Nyɔ lə, bəmanɨ bɔ jikə kkə tɨmo fiɔŋ fi bɔ na chanyɛ kɨ fi lə, makə kɨnyi kɨ fiɔŋ fi bɔ na nyikə fi wɨ masə sɨŋ.
8 Kə na kkɨ lə kɨlaŋ kɨ Nyɔ lə na fiɔŋ fi ndzeŋe jilə miɨ' dze kɨlaŋ kɨsu dzə yi diəŋ ntɨŋ nɨ yu naji lə yu dze. 9 Kə na kkɨ tɨ lə bə́ nə̀ kə galə kɨlaŋ ndzɨ bənɨ bə diəŋ. Bə́ nə̀ ga ɨji ndzɨ bənɨ bə na bunchi bilaŋ bə bə na tɛti fo, bə bə na kkəhə Nyɔ, bə bə na fɨtɨ bubiə, ma bə na tsaləhə, ma bə na nyənə fiɔŋ fi na tsukɔ Nyɔ wɨ, ma bə na kkpɨshə bətɨɨ bəbɔlə makə bəmɛni bəbɔlə, ma bə na kkpɨshə bənɨ bədɔ. 10 Bə́ nə̀ ga tɨ ndzɨ bəkansɨ bə bənɨnsə bə na dzenɛ binchi, ma bə bənɨnsə bə na me bə gwɨ́ yibɔlə, ma tɨ bə bənɨ bə na yɨ bənɨ bədɔ bɔ lətə bə bɔ, ma bənɨ bə biyɔndu lə, ma bə bənɨ bə na tɨdi dyɛ, ma bə na kkɨ yɛyi lɨ lə bɔ na lɨmi nsa yi dyɛ nəjiŋ, ma bə na fɨtɨ ŋgwe yi fiɔŋ yɨ la fi na biələhə bitɨfiə bi diəŋ. 11 Bitɨfiɛ biŋ na biəlɨ shɔŋ yi ndzeŋe yibəŋ yi na ji yi Nyɔ wu bə́ na kuntə, shɔŋ ya ji yi Nyɔ nə̀ nya ya mɨ kaŋ.
Pɔl nya kɨmbafə bə Baba ndzɨ yaa wu Baba nə̀ kwesɛ bə yu
12 Mɨ nya kɨmbafə bə Jisɔs Klistu Baba waha wu nya mɨ buŋga lə nnɨŋ nɨŋ yihi. Yu nə̀ jiŋgə ba ŋəŋ lə mɨ ŋkwətsə, yu tə sa mɨ lə ŋkɨ nnɨntɨ. 13 Mɛfə nnə̀ nsa nji fiəfiə nchanyɛ díɛ yibiə tsukɔ yu wɨ, nsesɛ gbo bənɨ buhu nəjiŋ, nsɛyi bɔ, bəmanɨ yu kwesɛ yaa bə mɨ ndzɨ nnə̀ mfɨtɨ kɨjuwɔ ntɨŋ njikə keŋkɛ kɨmbɨŋ. 14 Baba waha nə̀ donchɛ mɨ shəŋ yihi yi ndzeŋe kɨtso, yu fə ŋkɨ ŋkeŋkɛ kɨmbɨŋ bə kɨnse nɨ miɨ wu na ji Jisɔs Klistu ntɨŋ ba yu kɨ keŋkɛ. 15 Nchanyɛ nyi lə Jisɔs Klistu nə̀ ba mbi ntɨŋ lə yu fə bənɨ bəbiə fɔfo na yɛyi. Na nchanyɛ yi kwətsə yi naji ɨ miɨ bɨŋ bə yi chi masə sɨŋ. Mɨ kɨbɛɛ nna nji ntinsɛ wu bubiə. 16 Bəmanɨ, Baba kwese yaa bə mɨ, fə Jisɔs Klistu tseyɛ shəŋ yi yu na kansɨ bə bənɨ gəŋ tuŋ fəŋgbɨŋ mɨ ntɨŋ, mɨ wu nna nji ntinsɛ wu bubiə. Nna nji manɨ nɨ ndonchɛ bənɨ lɨ bə ná biələ yu ba keŋkɛ buwəŋ bu kəkaha. 17 Nyɔ na ji Ŋkuŋ wu na ji tsá chi, naji ɨ yu ná kkpə kə, naji ɨ bə́ ŋəŋ yu wɨ kə. Na kwa yu wu na ji Nyɔ. Kə kɨ nya yu kɨŋkuntə, kə nya yu bubəŋ tsá chi ŋka sɨŋ. Fi kɨ ji ma.
Nɨŋ yi Timɔti kɨ nɨntɨ
18 Timɔti wɛnɛ, mɨ nnya nɨŋ yi fiɔŋ fi nna nchanyɛ fiŋ wə kaŋ, ə ba nə bənɨ nə̀ chanyɛ tsukɔ wə wɨ nɨ bənɨ bə na tɨdi shɔŋ yi Nyɔ, fə bi chitə wə ɨ wə tunɔ dzoŋ yi ndzeŋe. 19 Kɨ lɨmi kɨmbɨŋ kɔhɔ wɨ, wə kɨ nɨkɨ fiɔŋ fi yɛyi wɨ fi shəŋ yɔhɔ na tɨdi bə wə. Bənɨ bədɔ nə tsukə kɨ nɨkɨ bə fiɔŋ fi shəŋ yibɔlə na tɨdi bə bɔ, bɔ gbɔ nə kɨmbɨŋ kɨbɔlə wɨ nɨ kɨkpɔŋkɔ kɨ biɔ, kɨ sə gbədiə. 20 Bədɔ nə bɔ ntɨŋ na Hamɛnayus bə Alɛdzanda. Mɨ' nya ba bənɨ Satan kaŋ fə bufɨ bubɔlə kwə, ɨ bɔ baŋ bifuŋ bə yɨ wu Nyɔ lə wu bɔ na bɨsə wa.