Ntəfɨ tsukɔ ntsɨsɨ bə Nyɔ wɨ
2
Fiɔŋ fi fiəfiə fi nna nnende na lə bənɨ bə Nyɔ lə kɨ tsɨsə bənɨ bəchi lɨ. Bɔ kɨ tsɨsə, bɔ dɨ bə Nyɔ miɨ chi lɨ, bɔ nende Nyɔ bənɨ bədɔ lɨ, bɔ nya tɨ kɨmbafə bə yu. 2 Bɔ kɨ tsɨsə bəŋkuŋ lɨ bə bənɨ bəchi bə na ji bitɨ bibəŋ bɨŋ. Bɔ kɨ tsɨsə manɨ fə kə kɨ ji bə kɨjimiɛ kɨ budə lə, kɨ nyəkə, kɨ bənɨ bə Nyɔ lə, kɨ na ji bə kɨŋkuntə dzə́ ntɨŋ chi. 3 Bə ntsɨsɨ manɨ na fiɔŋ fi ndzeŋe, fi ji diəŋ Nyɔ yəsɨ, wu na ji Nchitə waha. 4 Yu na se lə miɨ chi fɔfo, yu se tɨ lə miɨ chi kkə kɨyɛyi. 5 Nyɔ na ji miu, miɨ wu na nende Nyɔ bənɨ lɨ na kwa miu. Miɨ no ji Jisɔs Klistu. 6 Na yu wu nə̀ nya gwɨ yihi lə yu tsu bənɨ bəchi nə ŋgə kaŋ. Fiŋ na fiɔŋ fi Nyɔ nə̀ donchɛ tsa yi tsa nə̀ kwətsə diəŋ. 7 Na fiɔŋ fi Nyɔ nə̀ sabiɛ mɨ lə ŋkɨ nji miɨ wu na tɨdi diɛ yihi, nji tɨ wɛŋ wu faŋə wu Jisɔs. Yu sa tɨ mɨ lə ŋkɨ nji miɨ wu na tɨfiə bənɨ bə na jimiɛhɛ Bəju, ntɨfiɛ bɔ lə bɔ ga shəŋ Klistu wɨ, ntɨfiə tɨ bɔ kɨyɛyi. Fiɔŋ fi mɨ nchanyɛ fiŋ, nna ntɨdiɛhɛ dyɛ. Nna nchanyɛ ji kɨyɛyi.8 Kɨŋgɔmbiɛ kɛmɨ na ji lə bənɨnsə kɨ tsɨsə bidɨ bichi, bɔ toto kaŋ yi ntsaaŋ bɔ́, bɔ jikə lɔɔ makə bɔ kpanə. 9 Nna nse tɨ lə bəkansɨ kɨ doŋko bindzu dzə yi diəŋ ntɨŋ, yi na donchɛ kɨŋkuntə ma dzə yi bənɨ na ŋɨntɨ lə na yi diəŋ. Bɔ kə kɨ lo yu makə bɔ doŋko biɔŋ bi bə́ fəə bə ŋgusa makə bə gəsɨ yi buŋkuŋ'ə, makə bindzu bi na tɛti kpə. 10 Bɔ kɨ dente gwɨ́ yibɔlə ji bə fiə wu ndzeŋe wu na kwətsə bə bəkansɨ bə na ŋɨntɨ lə bɔ kuntə ba Nyɔ. 11 Kpansɨ naji lə yu nya gwɨ yihi chi ba kɨ fɨyə nshiŋnshiŋ bə kɨŋkuntə. 12 Ŋkə nyaha dzə lə kpansɨ kɨ tɨfiə bənɨnsə makə lə yu kɨ keŋkɛ buŋga bənɨnsə bɨŋ. Yu naji lə yu kɨ ji mɔɔŋ. 13 Fi na ji manɨ ndzɨ Nyɔ nə̀ sa ma Adam nə Iff lɨ. 14 Nə̀ kə Adam wu bə́ nə̀ fukiɛ. Nə̀ kpansɨ wu bə́ nə̀ fukiɛ, yu buŋ kɨlaŋ kɨ Nyɔ lə. 15 Mɛfə fi na ji tɨmo manɨ, Nyɔ ná chitə lɨ kpansɨ nə kɨmbɛyɛ kɨhɨ ntɨŋ, jilə yu' kətə kɨ ji bə shəŋ yi yu galə Nyɔ wɨ, yu ji bə kɨnse, yu jimi kɨjimiɛ kɨ ntsaaŋ, ma bə kɨŋkuntə.