Nɨ fiə wu bənsafiə bə ntɛshɛ yi bənɨ bə kɨmbɨŋ'ə naji lə wu kɨ ji
3
Nchanyɛ yidɔ na ji su yi yɛyi. Nchanyɛ nyi ji lə: Ɨ miɨ na shəntə lə yu kɨ ji fo wu ntɛshɛ yi bənɨ bə kɨmbɨŋ'ə, tə yu na se ji nɨŋ yi na keŋkɛ kɨŋkuntə. 2 Fo wu ntɛshɛ yi bənɨ bə kɨmbɨŋ'ə naji lə yu kə jimiɛ miɨ wu naji ɨ bə́ kɨ kwente yu. Yu naji lə yu kɨ ji nomə kpansɨ miu, yu jikə fəkə biɔŋ woo, yu gɔmbiɛ biɔŋ diəŋ, yu keŋkɛ kɨŋkuntə, yu ləkə bənɨ bə ŋkɔŋ'ə yu tsɔŋ, yu kkɨ ntɨfiə bənɨ. 3 Yu naji lə yu kɨ ji miɨ wu na jikə kɨ chinchi bimunɔ. Yu naji lə yu kɨ ji miɨ wu na ji bə budə bə bənɨ, yu jikə kɨ luŋki, yu jikə kpanə, yu kə kɨ ji bə yəsɨ yi kpə lə. 4 Yu naji lə yu kɨ ji miɨ wu na chiŋfi tsɔŋ yihi buni, yu fɨtɨ beŋ buhu woko bə yu biɔŋ bichi ntɨŋ, bɔ kuntə yu. 5 Ɨ miɨ jikə kkə chiŋfi yihi tsɔŋ buni, ɨ yu fə nəŋ tə kɨ jiŋgə ntɛshɛ yi bənɨ bə Nyɔ lə? 6 Yu kə̂ jimiɛ miɨ wu na bambi wufa kɨmbɨŋ kɨhɨ ntɨŋ, ndzɨ naji ɨ tsa yidɔ ɨ yu gbɔ kɨ dze gwɨ ba be ŋgə ntɨŋ nɨ Satan nə̀ fəə. 7 Yu naji lə yu kɨ ji miɨ wu bənɨ bə na keŋkɛhɛ kɨmbɨŋ na ŋɨntɨ tɨ lə yu na ji miɨ wu diəŋ. Ɨ jikə jimiɛ manɨ, ɨ yu keŋkɛ yaa ba be ntasɨ wu Satan ntɨŋ.Nɨ fiə wu bədikin lə naji lə wu kɨ ji
8 Bədikin naji lə bɔ kɨ ji bənɨ bə na ji bə fiə wu ndzeŋe. Bɔ kɨ ji bənɨ bə na tɨdi kɨyɛyi, bɔ jikə jimiɛ bənɨ bə na nya gwɨ yibɔ bə bimunɔ bi kɨtso lə, bɔ jikə jimiɛ bənɨ bə na ji bə yəsɨ yi kpə lə. 9 Bɔ naji lə bɔ chiŋfi ba ləŋ fiɔŋ fi nə̀ ji bunyələ wɨ fi Nyɔ donchɛ bɨ tsukɔ kɨmbɨŋ wɨ, shəŋ yibɔlə jikə sakəhə bɔ. 10 Ɨ bə́ na se lə bə́ ga bɔ nɨŋ ntɨŋ, bə́ sa fɔ bɔ tsɔnyɔ. Bɔ jikə fɔkɔ bə ŋgbɔ, bə́ tə ga bɔ, bɔ kɨ ji bədikin. 11 Bəkansɨ bəbɔlə naji tɨ lə bɔ kɨ ji bə fiə wu ndzeŋe, bɔ jikə jimiɛ bə ntsúŋ. Bɔ kə kɨ fɨtɨ biɔŋ woo. Bɔ naji tɨ lə bɔ ləŋ kɨyɛyi bɨŋ fiɔŋ fichi ntɨŋ. 12 Dikin naji lə yu kɨ ji nomə kpansɨ miu. Yu naji tɨ lə yu chiŋfi beŋ buhu bə tsɔŋ yihi buni. 13 Bədikin bə na nɨntɨ buni jiba ɨ bɔ keŋkɛ yɨ wu ndzeŋe, ɨ bɔ kɨ chanyɛ tsukɔ kɨmbɨŋ kɨ bɔ na keŋkɛ Jisɔs wɨ nle sɨŋ.
Fiɔŋ fi na ko kɨtso kɨmbɨŋ kaha ntɨŋ
14 Nna ŋŋɨntɨ lə shə tsəsɨ mba ŋəŋ wə. Bəmanɨ mɨ mbɔndu biɔŋ biŋ bə wə fə, 15 nchɛse tsa, ɨ wə kkə nɨ bənɨ naji lə bɔ kɨ fɨtɨ tsɔŋ yi Nyɔ ntɨŋ, yi na ji ntɛshɛ yi bənɨ bə Nyɔ wu buwəŋ'ə. Ntɛshɛ nyi na kɨntɔŋ bə kɨchə kɨ na chiŋfi kɨyɛyi lə. 16 Fiɔŋ fia su fi na ko kɨtso. Fiɔŋ fiŋ na fi nə̀ ji bunyələ tsukɔ kɨmbɨŋ kaha kɨ kə na chanyɛ kɨŋ wɨ, Nyɔ fə kə kkə. Fiɔŋ fiŋ ji lə:
Yu nə̀ ba yu ji chi miɨbəwəŋ.
Kɨn'yɨntɨ kɨ Ntsaaŋ donchə miɨ wu yu na ji yu lɨ,
Bənchinda bə Nyɔ lə ŋəŋ yu wɨ.
Bə́ nə̀ tɨfiə tsukɔ yu wɨ bituŋ ntɨŋ.
Bənɨ nə̀ ga shəŋ yu wɨ mbi ntɨŋ chi.
Nyɔ nə̀ dze yu, yu bəndɨ bɔ́ dɨ wu bubəŋ'ə.