Bənɨ bə na tɨfiə bitɨfiə bi dyɛ lə
4
Kɨn'yɨntɨ kɨ Ntsaaŋ na chanyɛ ŋgbooŋ lə ná kɨ ji tsa yi nəjiŋ ntɨŋ, ɨ bənɨ bədɔ shə kɨmbɨŋ kɨbɔlə ba kɨ woko ji nə bin'yɨntɨ bi na fukiɛ bənɨ lɨ bə bitɨfiɛ bi bətsə lə. 2 Bitɨfiɛ biŋ na ba nə bənɨ lɨ bə na gəndə bɔ lənə bə bənɨ, bɔ yundi, ɨji shəŋ yibɔlə kkpə wələ bə́' tiŋ ji bə kɨŋfi kɨ bə́' shisə fətaŋ. 3 Bɔ na nɨnntɨ lə bənɨ kə kɨ tɛshɛnɨ nɨ miɨ bə kpansɨ, bɔ nnɨntɨ tɨ lə miɨ kə kɨ diɨ ŋgwe yi bidiəŋ bidɔ. Nyɔ nə̀ fə bidiəŋ biŋ fə bənɨ bə na keŋkɛ kɨmbɨŋ, bɔ kkɨ kɨyɛyi lə bɔ kɨ diɨ, bɔ nya kɨmbafə bə yu. 4 Fiɔŋ fichi fi Nyɔ nə̀ fəə na fi ndzeŋe, fidɔ na sɨŋ su fi naji lə miɨ nɨŋŋ, jilə yu' ləkə nə Nyɔ lɨ bə kɨmbafə, 5 ndzɨ diɛ yi Nyɔ bə kɨntsɨsɨ' tsaləsɨ fiɔŋ fia.Wɛŋ wu nɨŋ wu Jisɔs Klistu wu ndzeŋe
6 Ɨ wə tɨfiə bəŋgwɨŋ baha biɔŋ biŋ, ɨ wə kɨ ji miɨ wu nɨŋ wu Jisɔs Klistu wu ndzeŋe wu na kosɔ gwɨ yihi bə diɛ yi Nyɔ yi na ji tsukɔ kɨmbɨŋ wɨ bə bitɨfiə bi ndzeŋe bi wə na biəlɨ. 7 Wə kə̂ keŋkɛ fiɔŋ fi fənə bə məndəŋfɨ mə kɨlɔlɔ lə mə na jikə keŋkɛ fiɔŋ fi fənə kɨ Nyɔ lə. Tɨ̂fiə gwɨ yɔhɔ dzə́ yi jimiɛ kɨjimiɛ kɨ Nyɔ na se. 8 Nindiɛ ba yanshɛ gwɨ na keŋkɛ lɨ tɨ mbɨ miɨ gwɨ. Bəmanɨ njiŋ yi kɨjimiɛ kɨ Nyɔ na se na keŋkɛ mbɨ miɨ lɨ dzə́ ntɨŋ chi, ndzɨ fiŋ na keŋkɛ mbɨ kɨjimiɛ kɨ fɛŋ'ə ntɨŋ, fi chisə keŋkɛ mbɨ kɨjimiɛ kɨ na ba ntɨŋ. 9 Nchanyɛ nyi na yɛyi, na nchanyɛ yi naji lə miɨ bɨŋ yi masə sɨŋ. 10 Na fiɔŋ fi kə na nuyi gaŋ nɨŋ nyi wɨ, ndzɨ kə' ga bufɨ bwaha buchi Nyɔ wu buwəŋ wɨ. Nyɔ na ji Nchitə wu bənɨ bəchi, gwɨtɛɛ bə bənɨ bə na bɨmi yu.
11 Kɨ tɨfiə bənɨ biɔŋ biŋ, wə tɨdi bɔ fɨtɨ bi. 12 Wə kə̂ galə lə miɨ dze wə koso lə ndzɨ wə na bambi wɛŋbutsɔ. Kɨ ji miɨ wu na donchɛ fiə wu kɨmbɨŋ'ə nə dzə́ yi wə na chanyɛ ntɨŋ, nə fiə wɔhɔ ntɨŋ, ma nə kɨnse kɨ wə na keŋkɛ ntɨŋ, bə shəŋ yi wə galə Nyɔ wɨ, bə dzə́ yi ntsaaŋ yi wə na galɨ gwɨ yɔhɔ yi ntɨŋ. 13 Nyâ gwɨ yɔhɔ lə wə kɨ tanchɛ Kɨŋwatɨ kɨ Nyɔ lə bə bənɨ bə kɨmbɨŋ'ə toko, wə tɨdi diɛ yi Nyɔ, kɨ bu tɨfiə bɔ gəŋ fɔ tsa yi nná mba. 14 Wə kə̂ nyənə kɨnya kɔhɔ. Kɨnya kɨŋ na kɨ bə́ nə̀ nya wə tsa yi bənɨ bəbəŋ bə bənɨ bə kɨmbɨŋ'ə nə̀ galə kaŋ yibɔlə wə fi, shɔŋ yi Nyɔ ba wə bɨŋ. 15 Nyâ gwɨ yɔhɔ biɔŋ biŋ wɨ, kɨ fɨtɨ bi bichi, bənɨ bəchi ŋɨntɨ chi wə na gɨntɨ fiə. 16 Kɨ tɨntɨ ŋkɨ bə gwɨ yɔhɔ ma bə bitɨfiə biɔhɔ, kɨ chiŋfi bi wɨ buntaŋ, nɨ wə na fɨtɨ manɨ, ɨ wə kɨ chitə gwɨ yɔhɔ, wə chitə tɨ ma bə bənɨ bə na woko fiɔŋ fi wə na chanyɛ.