Dzə́ yi naji lə Timɔti kɨ ji bə bənɨ bə kɨmbɨŋ'ə
5
Tsa yi wə na lɨmə miɨntaŋ, wə kə kɨ wɛnti bə yu, bəmanɨ nyâ yu bitɨfiə nɨ chaa. Kɨ dze beŋ butsɔ bənɨnsə nɨ bəwəma. 2 Kɨ dze tɨ bəkansɨ bəntaŋ nɨ bəma. Kɨ dze beŋ butsɔ bəkansɨ nɨ dzə́mbɨtə yɔhɔ, wə jiŋgə yi dzə yi ntsaaŋ ntɨŋ dzə́ ntɨŋ chi.Ŋgwe yi bəkansɨ bə bəŋku lə bə naji lə ntɛshɛ yi bənɨ bə kɨmbɨŋ'ə kɨ chitə
3 Kɨ chitə bəkansɨ bə bəŋku lə bə na sɨŋ bə miɨ wu na chitə bɔ mɛ kpa. 4 Bəmanɨ, jilə kpansɨ ŋku na keŋkɛ beŋ makə beŋ bə beŋ'ə, bɔ sa ba fɨyə nɨŋ yibɔ yi kɨmbɨŋ bə nchitə yi bəmɛni bəbɔlə chi naji lə bɔ chitə bɔ. Fiŋ na fiɔŋ fi diəŋ Nyɔ yəsɨ. 5 Kpansɨ ŋku wu na sɨŋ bə miɨ wu chitə yu mɛ kpa, yu na jiŋgə kwa fiə Nyɔ wɨ, yu tsɨsə, yu dɨ bə Nyɔ tsá chi, bbutsu bə bbushə. 6 Bəmanɨ, kpansɨ ŋku wu na gəndə fihi yu diɨ ji mbi wuhu na wuŋkkpə, mɛfə yu na bambi yu gəndə. 7 Kɨ chanyɛ biɔŋ biŋ bə bɔ fə bənɨ jɛkə kɨ kwente bɔ. 8 Ɨ miɨ na jiŋgəhə kɨtsɔŋ kɨhɨ, gwɨtɛɛ tsɔŋ yihi, kɨjilə yu' nɨŋŋ fiə wu bənɨ bə kɨmbɨŋ'ə naji lə bɔ kɨ ji bə wu. Wa miɨ na wubiə tɨmo ba ya miɨ wu na jimiɛhɛ miɨ wu kɨmbɨŋ.
9 Kpansɨ ŋku wu naji lə bə́ ga yɨ wuhu kɨntsu kɨ bəkansɨ bə bəŋku lə ntɨŋ lə bə́ kɨ chitə yu, yu kə̂ jimiɛ wu na bambi kə fɔkɔ biya gbɨbuse, yu kɨ ji kpansɨ wu nə̀ dzɛ kwa nyunso miu, 10 ɨji wu bə́ nə̀ kkɨ buni lə yu na keŋkɛ fiə wu ndzeŋe, nɨ kpansɨ, yu nə̀ koso beŋ buhu dzə́ yi ndzeŋe ntɨŋ, yu ləkə bəbanə yu tsɔŋ, ɨji yu nə̀ wwɔ go yi bənɨ bə Nyɔ lə, yu nə̀ chitə bənɨ bə nə̀ ji ŋgə ntɨŋ ba nya gwɨ yihi bə mfə nɨŋ yi ndzeŋe dzə́ ntɨŋ chi.
11 Bəmanɨ, bə kə̂ bɨmiə lə bə́ ga bəkansɨ bə bəŋku lə bə na bambi beŋ butsɔ kɨntsu ntɨŋ lə bə́ kɨ chitə bɔ, ndzɨ ɨ gwɨ́ yibɔlə jiji ba kɨ shi, ɨ bɔ gufiɛ bikaŋə bi bɔ nə̀ kaa bə Klistu ba kɨ se lə bɔ tɛshɛnɨ bə bənɨnsə bədɔ. 12 Ɨ bɔ fə manɨ, kɨjilə bɔ' tɔ ŋgə bɔ fi, ndzɨ bɔ buŋ bikaŋə bibɔlə bi fiəfiə. 13 Bə n'yinə su na lə, ɨ wə ga bɔ kɨntsu ntɨŋ, ɨ bɔ kɨ ji bənɨ bə na shɨ kɨlɔlɔ, bɔ bekiɛ tsɔ́ŋ yi bənɨ lə ntɨŋ. Fibiə kɨtso na lə ɨ bɔ kɨ ji bə ntsúŋ, bɔ chɛsɛ bifuŋ biɔŋ bi bənɨ lə ntɨŋ, bɔ chanyɛ biɔŋ bi na jimiɛhɛ lə bɔ kɨ chanyɛ. 14 Bəma mɨ ŋkɨ ntɨfiə bəkansɨ bə bəŋku lə bə na bambi beŋ butsɔ lə, bɔ chi dzɛ bənɨnsə, bɔ bɛyɛ beŋ, bɔ kɨ jiŋgə tsɔ́ŋ yibɔlə, miɨ wu nchɛnɛ tə kə wədiə bɔ nəjiŋ ba bɨsɨ yɨ waha. 15 Nna ntɨdi mɛ ndzɨ bənɨ bədɔ nə bɔ ntɨŋ' fɨsə dzə ba tsu dia wu Satan lə. 16 Jilə kpansɨ wu kɨmbɨŋ na keŋkɛ bəkansɨ bə bəŋku lə kɨtsɔŋ kɨhɨ ntɨŋ, yu kɨ chitə bɔ fə ntɛshɛ yi bənɨ bə kɨmbɨŋ'ə jɛkə kɨ toto ntə yibəŋ, fə yi kɨ chitə ji bəkansɨ bə bəŋku lə bə na sɨŋ bə miɨ wu chitə bɔ mɛ kpa.
Fiɔŋ fi bənɨ bə kɨmbɨŋ'ə naji lə bɔ kɨ fɨtɨ bə bənsafiə bə ntɛshɛ yi bənɨ bə kɨmbɨŋ'ə
17 Bənsafiə bə ntɛshɛ yi bənɨ bə kɨmbɨŋ'ə bə na nɨntɨ buni, bə́ naji lə bə́ kɨ nya bɔ kɨŋkuntə bə yukɔ bɔ yasə lɨ, gwɨtɛ bə na tɨdi diɛ yi Nyɔ, bɔ tɨfiə tɨ bənɨ. 18 Bə́ naji lə bə́ kɨ nya manɨ ndzɨ Kɨŋwatɨ kɨ Nyɔ lə na tɨdi lə,
“Wə kə̂ kansə bifuŋ bi naŋ'ə tsa yi yu na fishi jiŋ.”
Fi ji tɨ lə, “Miɨ wu nɨŋ naji lə yu keŋkɛ bikwəntsə bihi.” 19 Miɨ kə̂ sɔmɔ nsafiə wu ntɛshɛ wudɔ bə wə lə wə bu bɨŋ bə miɨ wa, fiəŋkə lə bənɨ bəfɛ makə bətɛ' ləŋ nsa ya nəjiŋ. 20 Bənɨ bə kətə kɨ bu fəə bubiə bɔ gɨntɨ fiə, wə naji lə wə wɛ̂miɛ bə bɔ bənɨ bəchi nəfiə fə nyiŋ kwɛɛ bədɔ ba.
21 Nna nchanyɛ fiŋ bə wə Nyɔ bə Jisɔs Klistu ma bənchinda bə Nyɔ lə bə yu sabiɛ nəfiə, lə wə kɨ fɨtɨ fiɔŋ fi mɨ ntədiə fiŋ, wə jikə ləmiə miɨ wudɔ nəjiŋ, kɨ fɨtɨ ndonchɛ sɨŋ kɨchichi. 22 Wə kə̂ biakə bə ŋga kaŋ miɨ bɨŋ lə yu kɨ ji nsafiə wu ntɛshɛ yi bənɨ bə kɨmbɨŋ'ə. Wə kə̂ chɛsɛ kaŋ yɔhɔ bubiə bu miɨ wudɔ lə ntɨŋ. Kə̂tə wə ji ntsaaŋ.
23 Wə kə̂ tsɔhɔ mwɔ kwa ji ŋgɔŋ. Kɨ mu tɨ mbiŋ tsəsɨ ndzɨ tɔ wɔhɔ, ndzɨ wə na gwente tsá chi. 24 Bubiə bu bənɨ bədɔ lə na ba bu kɨ yinshi kɨtso, fi donchɛ lə bɔ' gbɔ nsa, bu bədɔ lə na ba bu dze tsa tə yinshi lɨ. 25 Na tɨ diəŋ nɨ fiə wu ndzeŋe na ba wu kɨ ji. Wu jikə yinshɛ tɨmo fɔfɔ, ɨ wu ná jɛkə kətə bunyələ.