Fiə wu mfia wu bɨmiɛ lə
6
Bənɨ bəchi bə na ji kɨmboŋ kɨ buŋfia lə nəkoso naji lə bɔ kɨ nya kɨŋkuntə dzə́ ntɨŋ chi bə bənɨ bə na keŋkɛ bɔ. Bɔ kɨ fɨtɨ manɨ fə bənɨ jɛkə kɨ chanyɛ díɛ yibiə tsukɔ yɨ wu Nyɔ lə wɨ ma tsukɔ bitɨfiɛ biaha wɨ. 2 Bəŋfia bə bəchɛ bɔ na ji bənɨ bə kɨmbɨŋ'ə kə kɨ dze bəchɛ bɔ koso lə ndzɨ bɔ na ji miɨ bə wəmɛni Klistu ntɨŋ. Bɔ naji lə bɔ kɨ nɨntɨ bəchɛ bɔ lɨ ba ya lɨ, ndzɨ bənɨ bə na keŋkɛ mbɨ wu nɨŋ yibɔ na bənɨ bə kɨmbɨŋ'ə, bɔ se bɔ kɨtso.Bənɨ bə bitɨfiə lə bə biyɔndu lə, bə bubəŋ bu diəŋ
Tɨ̂fiə bənɨ biɔŋ biŋ, wə tə̂ lə bɔ kɨ fɨtɨ bi. 3 Ɨ miɨ na tɨfiə bitɨfiə bidɔ chichi bi na jikə gbɔnɔ bə bi Baba waha Jisɔs Klistu lə bə bifɨyə bi na jikə gəndə bə fiə wu Nyɔ na se, 4 tə miɨ wa na dze ji gwɨ yi kɨlɔlɔ, yu jikə kkə fiɔŋ. Jimə wa miɨ na gwente gwɨ yi yímbiɛ bə bəŋkpanə tsukɔ díɛ yi nədze wɨ yi na ba bə kɨndɔ kɨ chindiɛ ma bə bəŋkpanə ma muntɔŋ mumbiə ma bə bimbintsə bibiə, 5 ma bə ŋkə yi bifuŋ bənɨ ntɨŋ bə naji lə bufɨ bubɔlə' dəmə, bɔ lasɨ kɨyɛyi. Bɔ na fɨtɨ manɨ, bɔ gɔmbiɛ lə fiɔŋ fi Nyɔ lə na dzə yidɔ yi bɔ ná keŋkɛ bubəŋ yi ntɨŋ.
6 Bəmanɨ jilə miɨ na jimi kɨjimiɛ kɨ Nyɔ na se, yu woko buni bə fiɔŋ fi yu na keŋkɛ, tə na bubəŋ bu kɨtso lə, 7 ndzɨ kə nə̀ ba sɛŋ mbi ntɨŋ kaya, kə ná tsu jiŋ kaya. 8 Kɨjilə ɨ kə na keŋkɛ biɔŋ bi diənə bə bindzu, tə biŋ biɔŋ kwətsə bɨ. 9 Bəmanɨ bənɨ bə na se ji bubəŋ ba bɔ be mfɔ ntɨŋ, ntasɨ kwe bɔ, bɔ be kɨshəntə kɨ biɔŋ'ə ntɨŋ kɨyɛŋ bi buŋfidi lə bi na ba bə bəŋgə. Na biɔŋ biŋ bi na chɛsɛ bənɨ bəŋgə ntɨŋ ɨji bi bi na jishi bənɨ. 10 Ŋgwe yi biɔŋ bibiə bichi na ba nə kɨshəntə kɨ kpə lə wɨ. Na ndzɨ kɨshəntə kɨ kpə lə kɨŋ kɨ bənɨ bədɔ' fɨsə dzə yi kɨmbɨŋ kɨbɔlə ba bəmbiə shəŋ yibɔlə bə biɔŋ bilo kɨyɛŋ.
11 Nə wə lɨ Timɔti, wə wu na ji fiɔhɔ miɨ wu Nyɔ, lə̂tə fiɔhɔ nə ŋgwe yi biŋ biɔŋ wɨ bichi. Kɨ ŋɨntɨ ji lə wə keŋkɛ fiə wu diəŋ bə fiə wu Nyɔ na se. Chîŋfi kɨmbɨŋ kɔhɔ wɨ, wə kêŋkɛ kɨnse, wə kânsɨ shəŋ, wə kɨ ji tɨ bə fiə wu budə lə. 12 Dîɔ budiɔ bu kɨmbɨŋ'ə bu ndzeŋe. Kêŋkɛ buwəŋ bu kəkaha bu bə́ nə̀ bəndə wə lə wə be bu ntɨŋ, wə ləŋ bənɨ kɨyɛŋ nəfiə ba chanyɛ diəŋ tsukɔ kɨmbɨŋ kɔhɔ wɨ.
13 Mɨ ŋkɨ nchanyɛ bə wə Nyɔ nəfiə wu na nya biɔŋ bichi buwəŋ ma bə Jisɔs Klistu nəfiə wu nə̀ ləmiə Pɔntus Pailɛt nəfiə ba chanyɛ kɨyɛyi bə bifuŋ bihi tsukɔ gwɨ yihi wɨ. 14 Nna ntɨdi lə wə gâ bənchanyɛ bɛŋ ŋkeŋkɛ sɨŋ ŋkweŋ, fiɔŋ jikə jimiɛ fi miɨ na kwente wə tsukɔ fi wɨ, gəŋ fɔ tsa yi Baba waha Jisɔs Klistu ná lafɔ. 15 Yu ná lafu ji tsa yi diəŋ bɨŋ, tsa ya ji ndonchɛ yi Nyɔ wu bə́ na kuntə, wu na ka kwa yu, wu na sakɨ biɔŋ bichi, yu ji Ŋkuŋ wu bəŋkuŋ bə Baba wu bəbaba. 16 Na kwa yu wu jikə kkpəhə, yu na ji kɨŋgbooŋ ntɨŋ kɨ naji ɨ miɨ jikə kɨnə gwɨgwɨ fə kɨ ku. Miɨ kə saa ŋəŋ yu wɨ, naji ɨ miɨ ŋəŋ yu wɨ kə. Kɨŋkuntə bə buŋga kɨ ji bə yu tsá chi ŋka sɨŋ. Fi kɨ ji ma.
17 Dia wu bəchɛ kpə bə mbi no lə, tə̂ bə bɔ lə bɔ kə kɨ dzegwɨ. Bɔ kə̂ galə bufɨ bubɔlə bubəŋ wɨ bu naji ɨ bu jiji ba ka lɨ. Bɔ gâ bufɨ ji Nyɔ wɨ, yu wu na yente bɨ biɔŋ bichi lə kə kɨ woko buni bə bi. 18 Bɔ kɨ fɨtɨ ji biɔŋ bi ndzeŋe, bubəŋ bubɔlə ji biɔŋ bi ndzeŋe bi bɔ na fɨtɨ. Bɔ kɨ yanshə kaŋ yibɔlə, bɔ nya kɨnya ŋgɔmbiɛ sɨŋ. 19 Nyi na dzə yi naji lə bɔ kɨ galɨ kɨbə kɨ wɔki lə gwɨ yibɔ lɨ nɨ kɨchə kɨntaŋ, fə bɔ keŋkɛ kɨjimiɛ kɨ yɛyi.